Malachi 2 - Nau Brah Ndu Ngơi 2023

Nau nduyh ma phung kôranh ƀư brah

¹ “Aƀaơ ri, hơi phung kôranh ƀư brah, aơ jêng nau ntăm ma khân may.

² Tơlah khân may mâu iăt ôh, jêh ri mâu mĭn ôh nhhơr nau chrêk ma lơp ma amoh Gâp pôri Gâp mra rak rtăp khân may, jêh ri mra rgâl nau ueh uĭn khân may jêng nau rak rtăp. Ngăn ro, Gâp hŏ rak rtăp jêh, yorlah khân may mâu mĭn ôh nau yơk ma Gâp.” Brah Yêhôva ma phung tahan lah kơt nây.

³ “Aơ, yor khân may, Gâp mra nduyh ma noi deh khân may, jêh ri mra srih ek ta muh măt khân may, nâm bu ntĭt ek mpa ƀư brah khân may nhhơr tâm ăp nau rƀŭn; bu mra mprơh khân may du ndrel ma ek nây.

⁴ Pôri mơ khân may mra gĭt Gâp hŏ mbơh nau ntăm aơ ma khân may, gay djôt prăp nau tâm rnglăp Gâp đah phung Lêvi.” Brah Yêhôva ma phung tahan lah kơt nây.

⁵ “Nau tâm rnglăp Gâp đah phung Lêvi jêng nau tâm rnglăp ma nau rêh jêh ri ma nau đăp mpăn, Gâp hŏ ăn, gay ăn păng klach yơk ma Gâp; pôri păng hŏ klach yơk jêh Gâp jêh ri râm nsâr panăp amoh Gâp.

⁶ Nau ntrŭnh nanê̆ ngăn hŏ gŭ tâm trôm mbung păng, jêh ri bu mâu saơ nau kue ôh ta trôm mbung păng. Păng hŏ chuat hăn ndrel ma Gâp tâm nau đăp mpăn jêh ri nau sŏng, păng ƀư âk bunuyh plơ̆ sĭt tă bơh nau kue.

⁷ Yorlah bâr mbung phung kôranh ƀư brah djôt prăp nau gĭt rbăng, bu mra joi nau ntrŭnh tă bơh trôm mbung păng, yorlah păng jêng nơm ntuh bâr Brah Yêhôva ma phung tahan.

⁸ Ƀiălah khân may nkhơng ma teng tă bơh trong ngăn, dŏng nau ntrŭnh ƀư ma âk bunuyh chêh prah, jêh ri ƀư rai nau tâm rnglăp phung Lêvi.” Brah Yêhôva ma phung tahan lah kơt nây.

⁹ “Yor nây, Gâp ƀư ăn ma khân may plơ̆ jêng tâm rmot jêh ri bêk prêng tanăp măt lĕ rngôch bunuyh, yorlah khân may mâu djôt prăp ôh trong Gâp, ƀiălah khân may mpơl nau khân may gŭ du ding mpeh tâm nau vay.”

Nau mâu răp jăp tâm phung ƀon lan Brah Ndu

¹⁰ Mâu di bơh lĕ rngôch he geh knŏng du huê mbơ̆? Mâu di bơh geh knŏng du huê Brah Ndu rhăk njêng jêh he? Mâm ƀư ăp nơm phung he mâu gŭ răp jăp ôh ndrăng oh nâu he, ƀư ƀơ̆ nau tâm rnglăp bơh chô yau he?

¹¹ Phung Yuđa gŭ tâm nau mbruh, jêh ri hŏ ƀư jêh nau ƀơ̆ ƀơch tâm phung Israel jêh ri tâm ƀon Yêrusalem. Yuđa hŏ ƀư ƀơ̆ jêh jrô kloh ueh Brah Yêhôva rŏng, yorlah khân păng nkhơng ma gŭ ur sai đah kon bu ur brah bu năch.

¹² Mbu moh ƀư nau nây, mâu lah ma nơm gĭt vât dơi plơ̆ lah, mâu lah nơm djôt leo ndơ nhhơr ƀư brah ma Brah Yêhôva ma phung tahan, pôri Brah Yêhôva mra ƀư rai da dê khân păng tă bơh ngih bok phung Yakôb.

¹³ Aơ jêng nau tal bar khân may mra ƀư: Khân may sŏk dak măt, nau nhĭm nhhiăng, nau nter vơl gay nkŭm lơi nơng ƀư Brah Yêhôva, yor Păng mâu hôm rle uănh ôh jêh ri mâu dơn ôh lĕ ndơ ƀư brah nhhơr tă bơh ti khân may.

¹⁴ Khân may ôp đŏng: “Mâm ƀư Păng mâu dơn?” Nây jêng yorlah nau nây Brah Yêhôva mbơh nanê̆ ngăn jêh ma nau tâm rnglăp may đah ur may ntơm bơh may mom ndăm, đah păng jêng nơm may mâu ôh gŭ răp jăp, nđâp lah păng jêng nơm gŭ ndrel may jêh ri jêng ur may ma nau tâm rnglăp.

¹⁵ Mâu di bơh Brah Ndu njêng knŏng du huê bunuyh nây, nđâp lah n'hâm păng nsôr rêh dơi rmeh ler ƀơh. Ƀiălah mâm dĭng njêng knŏng du huê bunuyh? Nây jêng gay joi du noi deh kloh ueh. Pôri, njrăng hom ma huêng khân may nơm, lơi ta mâu gŭ răp jăp ôh đah ur păng sŏk jêh dôl mom ndăm.

¹⁶ Yorlah Yêhôva Brah Ndu Israel lah: “Gâp ji nuih ngăn ma nau chalơi ur sai, jêh ri ji nuih đah mbu nơm sŏk nau djơh mhĭk ƀư ao nsoh ma păng nơm.” Brah Yêhôva ma phung tahan lah kơt nĕ. Pôri, njrăng hom tâm nuih n'hâm khân may, lơi jêng ôh bunuyh mâu gŭ răp jăp.

¹⁷ Khân may hŏ rsuak jêh Brah Yêhôva ma nau khân may ngơi, khân may lah đŏng pô aơ: “Ntŭk geh hên ƀư rsuak Păng?” Nây jêng lah khân may ngơi: “Ăp nơm ƀư nau mhĭk jêng ueh tanăp măt Brah Yêhôva, jêh ri Păng ŭch ngăn phung bunuyh pônây.” Mâu lah ôp: “Ta ntŭk gŭ Brah Ndu nau sŏng?”