Malachi 1 - Nau Brah Ndu Ngơi 2023

Nau tâm rlăng jêh ri nau Israel mâu chroh

¹ Nau mbơh lor bơh Brah Yêhôva lah ma phung Israel tă bơh Y-Malachi.

² Brah Yêhôva lah: “Gâp rŏng jêh ma khân may,” ƀiălah khân may lah pô aơ: “Hŏ geh Kôranh Brah rŏng ma hên?” Brah Yêhôva lah: “Mâu di Y-Êsau jêng nâu Y-Yakôb?

³ Ƀiălah Gâp lĕ rŏng Y-Yakôb jêh ri tâm rmot ma Y-Êsau. Gâp mra ƀư rai gôl yôk păng mra jêng rngol, jêh ri jao lơi drăp ndơn păng ăn ma phung so bri tâm bri rdah.”

⁴ Tơlah phung Êđôm lah: “Hên lĕ rai jêh, ƀiălah hên mra plơ̆ sĭt đŏng ndâk tay ta ntŭk lĕ rlâm rai jêh,” pôri Brah Yêhôva ma phung tahan lah pô aơ: “Khân păng mra ndâk đŏng ƀiălah Gâp mra ƀư rlâm lơi, bu mra ntơ khân păng jêng N'gor Bri Djơh Mhĭk, jêng phung ƀon lan Brah Yêhôva ji nuih n'ho ro.”

⁵ Măt khân may mra saơ, jêh ri khân may mra lah: “Brah Yêhôva dŭt toyh ngăn, lĕ rlau padih n'har bri Israel!”

Nau djơh mhĭk phung kôranh ƀư brah

⁶ Brah Yêhôva ma phung tahan lah đah khân may: “Hơi phung kôranh ƀư brah tâm rmot amoh Gâp! Kon bu klâu yơk ma mbơ̆ păng nơm, nơm dĭk nă yơk ma kôranh păng nơm. Pôri, tơlah Gâp jêng Mbơ̆ mbah ntŭk nau yơk ăn ma Gâp? Jêh ri tơlah Gâp jêng Kôranh hŏ geh nau klach yơk ăn ma Gâp?” Khân may lah đŏng pô aơ: “Ta ntŭk hên rmot hŏ amoh May?”

⁷ “Khân may nhhơr piăng let ƀơ̆ ƀơch ta nơng ƀư Brah Gâp, jêh ri lah: ‘Phung hên ntŭk hŏ geh ƀư ƀơ̆ ƀơch ma May?’ Khân may mĭn rvê pô aơ: ‘Nơng bơh Brah Yêhôva jêng ndơ mưch rmot.’

⁸ Lah khân may nhhơr du mlâm mpô mpa chieh măt ƀư brah nau nĕ mâm mâu di jêng nau tih? Lah khân may nhhơr du mlâm mpô mpa kuet rôi mâu lah geh nau ji nau nĕ mâm mâu di jêng nau tih? Rlong nâl nhhơr păng ma kôranh chiă uănh may, uănh păng geh nau maak nuih n'hâm lĕ jêh ri dơn ma may đŏng?” Brah Yêhôva ma phung tahan lah pô aơ.

⁹ Aƀaơ, dăn hom nau yô̆ bơh Brah Yêhôva, gay ma Păng ăn nau yô̆ ma phung he. Ƀiălah yor ti khân may hŏ ƀư pô nĕ, gĭt lah tâm khân may mbu nơm Păng mra dơn?

¹⁰ Brah Yêhôva ma phung tahan lah: “Ŭch ma du huê bunuyh tâm khân may nchăng lơi lĕ rngôch mpông ngih brah gay khân may mâu mpoh ôh ŭnh dơm dam ta nơng ƀư brah Gâp.” Brah Yêhôva ma phung tahan lah: “Nuih n'hâm Gâp mâu maak ôh ma khân may, jêh ri kŏ mâu dơn đŏng bơh ti khân may du ntil ndơ ƀư brah.

¹¹ Yor ntơm bơh nar luh tât nar nhâp, tâm amoh Gâp jêng dŭt toyh ta nklang tâm lĕ rngôch bri dak. Gŭ lam ntŭk, bu mra nhhơr ndơ ƀâu kah jêh ri nhhơr ndơ ƀư brah kloh ma amoh Gâp, yor amoh Gâp jêng dŭt toyh ta nklang lĕ rngôch bri dak.” Brah Yêhôva ma phung tahan lah pônây.

¹² Ƀiălah khân may ƀư rngot amoh Gâp nôk khân may ngơi pô aơ: “Nơng ƀư brah Brah Yêhôva jêng ƀơ̆ ƀơch, ndơ sa ta klơ păng jêng di ma nau mưch rmot.”

¹³ Khân may lah tay: “Ơ, nau ƀư aơ jâk jêr ngăn!” Jêh nây khân may mưch rmot păng. Brah Yêhôva ma phung tahan lah: “Khân may djôt leo mpô mpa ndơ ntŭng, kuet rvĕn jêh ri ndơ ji rôi ƀư ndơ ƀư brah nhhơr ăn ma Gâp. Gĭt lah Gâp dơn lĕ mâu ndơ nhhơr nây tă ti khân may?” Brah Yêhôva lah pônây.

¹⁴ “Di ma nau rtăp rak ma nơm mƀruh nchơt! Tâm phung mpô mpa păng geh mpa nkuăng ueh nau păng ton jêh, ƀiălah păng nkhơng djôt leo mpô mpa kuet rvĕn jêng mpa ƀư brah nhhơr ăn ma Kôranh Brah!” Brah Yêhôva ma phung tahan lah: “Yorlah Gâp jêng nơm Hađăch Dŭt Toyh, amoh Gâp jêng khư ma nau klach ta nklang lĕ bri dak.”