Luka 9 - Nau Brah Ndu Ngơi 2023

Nau njuăl jât ma bar kôranh oh mon

¹ Brah Yêsu kuăl jât ma bar kôranh oh mon rgum tay, ăn nau brah jêh ri nau dơi gay mprơh brah mhĭk jêh ri ƀư bah nau ji kuet.

² Păng njuăl khân păng mbơh nkoch ma nau ƀon bri hađăch Brah Ndu jêh ri ƀư bah bunuyh ji.

³ Păng lah ma khân păng: “Dôl khân may hăn trong, lơi djôt leo ndơ, lơi djôt mâng jra, dŭng cheng, piăng let, prăk rêl; mâu đŏng djôt bar ao mbâl.

⁴ Moh ngih khân may lăp, gŭ ta nây ma tât khân may hăn luh du.

⁵ Moh ntŭk bu mâu vơt rom khân may, tơlah luh tă bơh ƀon nây, rtuh hom neh muy bơh jâng khân may tâm ban du nau mbơh tâm rdâng đah khân păng.”

⁶ Pôri, phung kôranh oh mon luh hăn, rgăn âk ƀon jê̆, mbơh nkoch Nau Mhe Mhan Ueh lam ntŭk jêh ri ƀư bah bunuyh ji.

Nau Hêrôt klach

⁷ Nôk nây, Hêrôt jêng hađăch bri dak jê̆ tăng lĕ nau geh tât, păng ndrât klach ngăn, yorlah bunuyh aơ lah: “Y-Yôhan dâk rêh tay tă bơh nau khĭt;”

⁸ nơm ri lah: “Y-Êli hŏ tâm mpơl jêh;” bi bunuyh êng lah tay: “Du huê tâm phung nơm mbơh lor rnôk rô̆ kăl e hŏ dâk rêh tay jêh.”

⁹ Hêrôt lah: “Gâp hŏ koh jêh trô ko Y-Yôhan jêh, pôri mbu nơm bunuyh aơ, tâm păng gâp geh tăng lư âk nau kơt nĕ?” Hađăch joi nau ŭch tâm mâp Brah Yêsu.

Brah Yêsu njêng piăng let

¹⁰ Phung kôranh oh mon plơ̆ sĭt mbơh ma Brah Yêsu lĕ kan khân păng hŏ ƀư jêh. Păng leo phung kôranh oh mon hăn ntŭk êng, tât ƀon rnha jêng Ƀêtsaiđa.

¹¹ Lah phung ƀon lan dơi gĭt, ri mơ hăn tĭng Păng. Brah Yêsu vơt rom khân păng, mbơh nkoch ăn khân păng ma ƀon bri hađăch Brah Ndu, jêh ri ƀư bah ăn phung ŭch bah nau ji.

¹² Trôk dăch măng jêh, jât ma bar kôranh oh mon ngơi ma Păng: “Dăn ăn phung ƀon lan hăn sĭt gay khân păng hăn tât lĕ ƀon jê̆ jêh ri ƀon jê̆ lơn văr jŭm jêh ri joi ndơ sông sa, yorlah he dôl gŭ ta ntŭk jêng rngot njăp.”

¹³ Ƀiălah Brah Yêsu lah: “Khân may nơm yơh ăn khân păng sông sa.” Phung kôranh oh mon ơh: “Hên geh knŏng prăm mlâm piăng let jêh ri bar mlâm ka dơm, klăp lah hăn rvăt ndơ sông sa mơ ăp lĕ ƀon lan.”

¹⁴ Yorlah geh klăp lah prăm rbăn nuyh bu klâu, Brah Yêsu lah ma phung oh mon: “Ăn khân păng gŭ tĭng mpôl, du mpôl prăm jât nuyh.”

¹⁵ Phung oh mon ƀư tĭng nâm nau jêh ri đă lĕ rngôch bunuyh gŭ.

¹⁶ Brah Yêsu sŏk prăm mlâm piăng let jêh ri bar mlâm ka, n'gơr măt klơ trôk, nau lah ueh jêh ri nkê̆ch piăng let, jao ăn ma phung oh mon tâm pă ma phung ƀon lan.

¹⁷ Lĕ rngôch bunuyh sa hơm da dê. Khân păng dônh sĭt jât ma bar bĭ bêng lĕ piăng let hôm rmeh.

Nau Y-Pêtrôs mbơh nkoch

¹⁸ Tơlah Brah Yêsu gŭ mbơh sơm êng, phung oh mon rgum ndrel jŭm Păng. Păng ôp ma khăn păng: “Mbu moh phung ƀon lan lah Gâp jêng?”

¹⁹ Khân păng ơh: “Bunuyh aơ lah jêng Y-Yôhan-Ƀaptist, nơm êng lah jêng Y-Êli, bunuyh êng đŏng lah jêng du huê tâm phung nơm mbơh lor rnôk rô̆ kăl e dâk rêh tay.”

²⁰ Brah Yêsu ôp tay khân păng: “Bi khân may, mbu khân may lah Gâp jêng?” Y-Pêtrôs ơh: “Nơm Nti jêng Brah Krist tă bơh Brah Ndu.”

²¹ Brah Yêsu buay jêh ri ntrŭnh ma phung oh mon mâu ngơi nau nây ma bu ôh.

Brah Yêsu mbơh lor ma nau Păng khĭt jêh ri dâk rêh tay

²² Brah Yêsu lah: “Kon Bunuyh dơn âk nau rêh ni, phung bu ranh, phung kôranh ƀư brah toyh jêh ri phung kôranh nchih samƀŭt dun lơi, bu nkhĭt Păng, ta nar tal pe Păng dâk rêh tay.”

²³ Păng lah ma lĕ rngôch: “Tơlah mbu nơm ŭch tĭng Gâp, ăn păng dun khân păng nơm, ăp nar tuy si tâm rkăng khân păng nơm gay tĭng Gâp.

²⁴ Yorlah mbu ŭch rklaih nau rêh păng nơm mra roh, ƀiălah mbu yor Gâp roh nau rêh mra rklaih nau rêh păng nơm.

²⁵ Moh nau khlay tơlah du huê bunuyh geh lĕ neh ntu ƀiălah păng nơm roh rai mâu lah ngroh lơi săk păng nơm?

²⁶ Yorlah tơlah mbu nơm mra bêk prêng ma Gâp jêh ri ma nau Gâp ngơi, Kon Bunuyh mra bêk prêng ma bunuyh nây tơlah Păng plơ̆ văch tâm nau chrêk rmah Păng, Mbơ̆ Păng jêh ri phung tông mpăr kloh ueh.

²⁷ Nanê̆ ngăn, Gâp lah ma khân may, geh ƀaƀă bunuyh gŭ ta aơ mâu mra khĭt ôh lor saơ ƀon bri hađăch Brah Ndu.”

Brah Yêsu rgâl săk jăn

²⁸ Klăp pham nar ta kơi lah lĕ nau aơ, Brah Yêsu leo Y-Pêtrôs, Y-Yôhan jêh ri Y-Yakơ hăn ndrel ma Păng hao klơ yôk gay mbơh sơm.

²⁹ Dôl mbơh sơm, muh măt Păng rgâl êng ngăn, ao Păng dơi jêng nglang jêh ri nchrat ang.

³⁰ Ri, geh bar hê bunuyh ngơi ndrel đah Păng, nây jêng Y-Môis jêh ri Y-Êli.

³¹ Păng tâm mpơl tâm nau chrêk rmah jêh ri ngơi khĭt Păng, jêng nau Kôranh ntơm ƀư mbên khlay ta ƀon Yêrusalem.

³² Y-Pêtrôs jêh ri phung mĭt jiăng păng hâu ngăn ŭch bê̆ch, ƀiălah dôl kah rngăl, khân păng saơ nau chrêk rmah Brah Yêsu jêh ri bar hê bunuyh gŭ ndrel ma Păng.

³³ Dôl bar hê nây du tă bơh Brah Yêsu, Y-Pêtrôs ngơi ma Păng pô aơ: “Hơi Nơm Nti, he gŭ ta aơ ueh ngăn, Dăn ăn hên ndâk pe mlâm vâl bok: du mlâm ma Nơm Nti, du mlâm ma Y-Môis jêh ri du mlâm ma Y-Êli.” Păng ngơi ƀiălah mâu gĭt moh nau păng lah.

³⁴ Dôl Y-Pêtrôs ngơi, geh ndâr tŭk tât nkŭm khân păng; phung oh mon klach nôk lăp tâm ndâr tŭk.

³⁵ Jêh nây geh bâr ngơi tâm ndâr tŭk ngơi lah pô aơ: “Aơ jêng Kon Gâp, Bunuyh Gâp hŏ săch jêh, iăt hom nau Bunuyh.”

³⁶ Nôk tăng bâr ngơi lôch, knŏng hôm du huê Brah Yêsu dơm. Tâm lĕ nar nây, phung oh mon gŭ rklăk, mâu nkoch ma bu ôh ma lĕ nau khân păng saơ jêh.

Brah Yêsu ƀư bah kon se ndăm brah mhĭk lơh

³⁷ Ôi taơ, tơlah Brah Yêsu ndrel ma phung oh mon jŭr jêh tă bơh yôk, geh phung bunuyh âk hăn tâm mâp Păng.

³⁸ Ri, geh du huê bunuyh tâm phung âk kuăl pô aơ: “Hơi Nơm Nti, dăn Nơm Nti yô̆ nđach kon bu klâu gâp, yorlah păng jêng kon dul gâp.

³⁹ Nôk geh brah mhĭk lơh, păng nter ndal. Brah mhĭk rgu ktang păng kŏ tât luh mpŭnh dak diu ta trôm mbung, ƀư săk jăn bŭr lam jêh ri djê̆ dơm brah mhĭk du tă bơh păng.

⁴⁰ Gâp dăn jêh ma phung oh mon Nơm Nti mprơh brah mhĭk nây, ƀiălah khân păng mâu dơi mprơh ôh.”

⁴¹ Brah Yêsu lah: “Hơi ndŭl mpôl mâu chroh jêh ri dăng bôk! Ndah jŏ Gâp mra gŭ ndrel đah khân may? Njŭn leo hom kon bu klâu may tât ta aơ!”

⁴² Nôk kon se hăn dăch, brah mhĭk nklơ̆ ktang păng ta neh, jêh ri rgu păng. Ƀiălah Brah Yêsu buay mprơh brah mhĭk ƀơ̆ jêh ri ƀư bah kon se nây, jêh ri jao ma mbơ̆ păng nơm.

Brah Yêsu mbơh lor tay ma nau Păng khĭt jêh ri dâk rêh tay

⁴³ Lĕ rngôch hih rhâl ma nau brah dŭt prêh tă bơh Brah Ndu. Tâm nôk lĕ rngôch bunuyh hih rhâl ma lĕ nau Brah Yêsu ƀư jêh, Păng lah ma phung oh mon:

⁴⁴ “Phung kon iăt nanê̆ hom lĕ nau aơ: Kon Bunuyh mra jao tâm ti bu.”

⁴⁵ Ƀiălah phung oh mon mâu gĭt rbăng ôh nau ngơi nây. Đah ma khân păng, nau nây hôm nkŭm ndâp ƀư ăn khân păng mâu dơi gĭt rbăng ôh, ƀiălah khân păng klach, mâu nănh ôp Brah Yêsu.

Nau toyh lơn nanê̆ ngăn

⁴⁶ Phung oh mon rlăch nchră ndrăng khân păng, ŭch gĭt mbu nơm tâm phung khân păng jêng toyh lơn.

⁴⁷ Brah Yêsu gĭt nau khân păng mĭn tâm nuih n'hâm, Păng leo du huê kon se jê̆ gay gŭ ta meng Păng nơm

⁴⁸ jêh ri lah ma khân păng: “Mbu nơm rom kon se jê̆ aơ tâm amoh Gâp nâm bu ntĭt rom Gâp, bi mbu rom Gâp nâm bu ntĭt rom Nơm hŏ njuăl Gâp. Yorlah mbu nơm dŭt jê̆ tâm phung khân may jêng bunuyh dŭt toyh.”

⁴⁹ Y-Yôhan ơh pô aơ: “Hơi Nơm Nti, hên saơ jêh du huê bunuyh mprơh brah mhĭk tâm amoh May, hên buay jêh bunuyh nây yorlah păng mâu tĭng he ôh.”

⁵⁰ Ƀiălah Brah Yêsu lah ma păng: “Lơi buay păng ôh, yorlah mbu nơm mâu tâm rdâng đah khân may jêng gŭ đăp ma khân may.”

Brah Yêsu hăn hao Yêrusalem ( 9:51 – 19:28 ) Brah Yêsu ta Samari

⁵¹ Tơlah dăch tât nar Brah Yêsu hao sĭt ta klơ trôk, Păng tâm nal hăn ta ƀon Yêrusalem.

⁵² Păng njuăl phung mbơh hăn lor Păng nơm. Khân păng hăn lăp tâm du ƀon jê̆ phung Samari gay nkra ngih njưh ma Păng.

⁵³ Ƀiălah bunuyh Samari mâu vơt rom Păng ôh, yorlah Păng hăn tât mpeh ta ƀon Yêrusalem.

⁵⁴ Y-Yakơ jêh ri Y-Yôhan jêng phung oh mon Păng lah saơ kơt nây, ơh: “Ơ Kôranh Brah, May ŭch hên ƀư ăn ŭnh tă klơ trôk jŭr su lơi khân păng ƀơh?”

⁵⁵ Ƀiălah Brah Yêsu n'gĭl uănh nduyh bar hê khân păng; [jêh ri lah: “Khân may mâu gĭt moh brah nsŭk nsônh khân may;”]

⁵⁶ jêh nây Păng ndrel ma phung oh mon hăn rgăn ƀon êng.

Nau di tĭng Brah Yêsu

⁵⁷ Dôl hăn rŏ trong, du huê bunuyh ngơi đah Brah Yêsu: “Ta ntŭk Nơm Nti hăn, gâp mra hăn tĭng ta nây.”

⁵⁸ Brah Yêsu plơ̆ lah: “Phung mpik geh trôm, phung sĭm klơ trôk geh rsuăn, ƀiălah Kon Bunuyh mâu geh ntŭk dâm bôk.”

⁵⁹ Păng lah ma du huê bunuyh êng: “Tĭng hom Gâp.” Ƀiălah bunuyh nây ơh: “Ơ Kôranh Brah, dăn ăn gâp hăn plơ̆ sĭt gay tâp mbơ̆ gâp lor.”

⁶⁰ Ƀiălah Brah Yêsu lah: “Ăn bunuyh khĭt tâp bunuyh khĭt khân păng; bi may, hăn hom jêh ri mbơh nkoch ƀon bri hađăch Brah Ndu.”

⁶¹ Du huê êng ơh đŏng: “Hơi Kôranh Brah, gâp mra tĭng Kôranh Brah, ƀiălah ăn kon sĭt ntĭnh đah bunuyh rnăk vâl ƀât.”

⁶² Brah Yêsu plơ̆ lah: “Mbu nơm kuăn chuar ƀiălah uănh tay pakơi, mâu gop ma ƀon bri hađăch Brah Ndu ôh.”