Luka 3 - Nau Brah Ndu Ngơi 2023

Brah Yêsu ndrăp lor ƀư nau pah kan ( 3:1 – 4:13 ) Nau Y-Yôhan-Ƀaptist pah kan

¹ Năm rơh jât mprăm, tâm rnôk rô̆ Sêsar Tiberius — tơlah Pôns Pilat jêng kôranh toyh ma n'gor Yuđa; Hêrôt jêng hađăch bri dak jê̆ n'gor Galilê; Y-Philip, oh hađăch nây, jêng hađăch bri dak jê̆ n'gor Iturê jêh ri n'gor Trakônit; Y-Lisanias jêng hađăch bri dak jê̆ n'gor Abilen;

² Y-Anas jêh ri Y-Kaipe jêng kôranh ƀư brah toyh lơn — geh nau Brah Ndu ntăm ma Y-Yôhan, kon Y-Sakari, tâm bri rdah.

³ Y-Yôhan hăn lam ăp n'gor jŭm văr dak krong Yurdan, nti lah nau ƀaptem ma nau rmal nau tih gay geh nau yô̆ an nau tih,

⁴ nâm nau nchih jêh tâm ndrom samƀŭt nơm mbơh lor Y-Êsai: “Geh bâr bunuyh kuăl nter tâm bri rdah: Nkra hom trong ma Kôranh Brah, ƀư sŏng lĕ trong Păng.

⁵ Lĕ rngôch rlŭng mra brôi ăn bêng, Lĕ rngôch dor yôk ƀư ăn dêh; Trong kue nkra ăn sŏng, trong nduh ndăp mra ƀư ăn lâng;

⁶ Jêh ri lĕ kon bunuyh mra saơ nau tâm rklaih tă bơh Brah Ndu.”

⁷ Pôri, Yôhan lah ma phung bunuyh văch gay păng ƀư ƀaptem pô aơ: “Hơi mpôl ntil bêh rmâng, mbu mbơh jêh ma khân may gĭt gay nchuăt du nau ji nuih dăch tât?

⁸ Pôri, play kao hom tâm di jêh ma nau tâm rmal nau tih; lơi mĭn êng: ‘Y-Abraham jêng chô yau hên’; yorlah gâp lah đah khân may, Brah Ndu klăp lah ƀư ăn lĕ grăp lŭ aơ plơ̆ jêng kon sau ma Y-Abraham.

⁹ Sung hŏ dơm jêh ta reh tơm si, tơm si mâu geh play ueh, bu mra kăl lơi jêh ri klŭp mƀăr tâm ŭnh.”

¹⁰ Phung ƀon lan ôp Y-Yôhan: “Mâm hên mra ƀư mih?”

¹¹ Păng plơ̆ lah: “Mbu nơm geh bar ao, pă hom ma nơm mâu hŏ geh; mbu nơm geh ndơ sông sa ƀư tâm ban lĕ.”

¹² Geh đŏng phung bunuyh riu pi văch gay dơn nau ƀaptem, ôp pô aơ: “Hơi Nơm Nti, mâm hên mra ƀư?”

¹³ Păng plơ̆ lah ma khân păng: “Lơi sŏk âk ir nau vay dăp.”

¹⁴ Phung tahan ôp đŏng: “Bi hên, mâm hên mra ƀư?” Păng plơ̆ lah: “Lơi nkrit nhhu mâu lah ngơi nchơt bu gay sŏk prăk, ƀiălah maak nuih n'hâm di nau nkhôm khân may nơm.”

¹⁵ Lĕ rngôch phung ƀon lan dôl kâp gân jêh ri ôp êng tâm nuih n'hâm: “Di lĕ Y-Yôhan jêng Brah Krist?”

¹⁶ Yor ri, Y-Yôhan plơ̆ lah ma lĕ rngôch bunuyh: “Gâp ƀư ƀaptem ma khân may ma dak; ƀiălah geh Nơm geh nau dơi lơn ma gâp mra văch, gâp mâu khư ôh doh rse ntâu jot Păng. Păng mra ƀư ƀaptem ma khân may ma Brah Huêng Ueh jêh ri ma ŭnh.

¹⁷ Ti Păng djôt dông nsiăng kloh plên ba Păng nơm jêh ri rgum ba tâm jay; ƀiălah njŏk rhe su lơi tâm ŭnh mâu blau nhhât.”

¹⁸ Y-Yôhan sŏk đŏng lĕ nau ntĭm nti êng gay mbơh nkoch Nau Mhe Mhan Ueh ma phung ƀon lan.

¹⁹ Ƀiălah dôl Hêrôt, hađăch bri dak jê̆, geh nau nduyh nkra bơh Y-Yôhan ma nau hađăch sŏk H'Hêrôdias, ur oh păng nơm, jêh ri lĕ rngôch nau tih mhĭk păng ƀư

²⁰ jêh ri hađăch lŏ ƀư du ntil nau tih ntop nau mhĭk đŏng, jêng krŭng Y-Yôhan.

Kôranh Brah Yêsu dơn nau ƀaptem

²¹ Nôk lĕ rngôch phung ƀon lan dơn nau ƀaptem da dê, Brah Yêsu dơn đŏng nau ƀaptem. Dôl Păng mbơh sơm trôk pơk mpơl,

²² jêh ri Brah Huêng Ueh jŭr tâm rup tâm ban ma sĭm plŭk drâm klơ Păng; jêh ri geh bâr ngơi tă bơh trôk lah: “Kon jêng Kon Gâp rŏng ngăn ngên, Gâp geh nau maak ngăn.”

Phung che Brah Yêsu

²³ Brah Yêsu ntơm nau pah kan nôk Păng klăp lah tâm pe jât năm. Tĭng nâm bu mĭn Păng jêng kon Y-Yôsep, Y-Yôsep jêng kon Y-Hêli,

²⁴ Y-Hêli jêng kon Y-Mathat, Y-Mathat jêng kon Y-Lêvi, Y-Lêvi jêng kon Y-Mêlki, Y-Mêlki jêng kon Y-Yanai, Y-Yanai jêng kon Y-Yôsep,

²⁵ Y-Yôsep jêng kon Y-Matathias, Y-Matathias jêng kon Y-Amôt, Y-Amôt jêng kon Y-Nahum, Y-Nahum jêng kon Y-Êsli, Y-Êsli jêng kon Y-Nagai,

²⁶ Y-Nagai jêng kon Y-Math, Y-Math jêng kon Y-Matathias, Y-Matathias jêng kon Y-Sêmi, Y-Sêmi jêng kon Y-Yôsek, Y-Yôsek jêng kon Y-Yôda,

²⁷ Y-Yôda jêng kon Y-Yôanan, Y-Yôanan jêng kon Y-Rêsa, Y-Rêsa jêng kon Y-Sôrôƀaƀel, Y-Sôrôƀaƀel jêng kon Y-Salathiel, Y-Salathiel jêng kon Y-Nêri,

²⁸ Y-Nêri jêng kon Y-Mêlki, Y-Mêlki jêng kon Y-Adi, Y-Adi jêng kon Y-Kôsan, Y-Kôsan jêng kon Y-Êlmadam, Y-Êlmadam jêng kon Y-Er,

²⁹ Y-Er jêng kon Y-Yôsuê, Y-Yôsuê kon Y-Êliêser, Y-Êliêser jêng kon Y-Yôrim, Y-Yôrim jêng kon Y-Mathat, Y-Mathat jêng kon Y-Lêvi,

³⁰ Y-Lêvi jêng kon Y-Simêôn, Y-Simêôn jêng kon Y-Yuđa, Y-Yuđa jêng kon Y-Yôsep, Y-Yôsep jêng kon Y-Yônam, Y-Yônam jêng kon Y-Êliakim, Y-Êliakim jêng kon Y-Mêlêa,

³¹ Mêlêa jêng kon Y-Mêna, Y-Mêna jêng kon Matatha, Y-Matatha jêng kon Y-Nathan, Y-Nathan jêng kon Y-Đavit,

³² Y-Đavit jêng kon Y-Yêsê, Y-Yêsê jêng kon Y-Ôbet, Y-Ôbet jêng kon Y-Bôas, Y-Bôas jêng kon Y-Sala, Y-Sala jêng kon Y-Nahsôn, Y-Nahsôn jêng kon Y-Aminadap,

³³ Y-Aminadap jêng kon Y-Admin, Y-Admin jêng kon Y-Arni, Y-Arni jêng kon Y-Hesrôn, Y-Hesrôn jêng kon Y-Pêres, Y-Pêres jêng kon Y-Yuđa,

³⁴ Y-Yuđa jêng kon Y-Yakôp, Y-Yakôp jêng kon Y-Isăk, Y-Isăk jêng kon Y-Abraham, Y-Abraham jêng kon Y-Têra, Y-Têra jêng kon Y-Nakôr,

³⁵ Y-Nakôr jêng kon Y-Sêruk, Y-Sêruk jêng kon Y-Rêu, Y-Rêu jêng kon Y-Pêlek, Y-Pêlek jêng kon Y-Êber, Y-Êber jêng kon Y-Sala,

³⁶ Y-Sala jêng kon Y-Kainan, Y-Kainan jêng kon Y-Arpaksat, Y-Arpaksat jêng kon Y-Sem, Y-Sem jêng kon Y-Nôê, Y-Nôê jêng kon Y-Lamek,

³⁷ Y-Lamek jêng kon Y-Mêtusêla, Y-Mêtusêla jêng kon Y-Ênŏk, Y-Ênŏk jêng kon Y-Jaret, Jaret jêng kon Y-Mahalalel, Y-Mahalalel jêng kon Y-Kainan,

³⁸ Y-Kênan jêng kon Y-Ênôs, Y-Ênôs jêng kon Y-Set, Y-Set jêng kon Y-Ađam, Y-Ađam jêng kon Brah Ndu.