Luka 23 - Nau Brah Ndu Ngơi 2023

Brah Yêsu tanăp Pilat jêh ri Hêrôt

¹ Lĕ Mpôl kôranh dâk têk leo Brah Yêsu tanăp Pilat.

² Khân păng ntơm phong Brah Yêsu pô aơ: “Hên gĭt năl jêh bunuyh aơ nsŭk nsôr phung ƀon lan tâm rdâng, buay hên chê̆ pi ma Sêsar, jêh ri lah păng nơm jêng Brah Krist, jêng Hađăch.”

³ Pilat ôp Păng: “Di lĕ May jêng hađăch phung Yuđa ƀơh?” Brah Yêsu plơ̆ lah: “May lah jêh nau nây.”

⁴ Pilat lah ma phung kôranh ƀư brah toyh jêh ri ma phung ƀon lan: “Gâp mâu saơ bunuyh aơ geh nau tih.”

⁵ Ƀiălah khân păng ăt lah: “Bunuyh aơ nsŭk nsôr phung ƀon lan, nti lah lam n'gor Yuđa, ntơm bơh n'gor Galilê tât ta ntŭk aơ.”

⁶ Tơlah Pilat tăng nau nây, păng ôp bunuyh nây geh ngăn đŏng jêng bunuyh Galilê ƀơh.

⁷ Jêh păng gĭt Brah Yêsu jêng nau dơi Hêrôt, Pilat đă bu njŭn Păng tât ma Hêrôt, nôk nây Hêrôt lĕ gŭ ta ƀon Yêrusalem.

⁸ Hêrôt saơ Brah Yêsu, păng răm ngăn, yor bơh jŏ jêh păng tăng jêh nau bu nkoch bri ma Păng jêh ri ŭch tâm mâp Păng, păng kâp gân mra uănh Păng ƀư nau mbên khlay.

⁹ Yor nây, hađăch ôp Brah Yêsu âk ntil ngăn, ƀiălah Brah Yêsu mâu plơ̆ lah ôh.

¹⁰ Phung kôranh ƀư brah toyh jêh ri phung kôranh nchih samƀŭt dâk dăch ta nây phong Păng dŭt ktang ngăn.

¹¹ Hêrôt ndrel ma phung tahan mưch rmot jêh ri ƀư bêk prêng ma Brah Yêsu, nsoh ma Brah Yêsu ao âk ntil bok jêh nây têk leo jao Păng ma Pilat.

¹² Bơh saơm, Pilat jêh ri Hêrôt tâm rlăng băl, ƀiălah tâm nar nây khân păng jêng mĭt jiăng.

¹³ Pilat kuăl rgum phung kôranh ƀư brah toyh, phung kôranh chiă uănh jêh ri phung ƀon lan jêh ri lah pô aơ:

¹⁴ “Khân may hŏ njŭn leo jao bunuyh aơ ma gâp jêh ri phong păng nsŭk nsôr phung ƀon lan tâm rdâng, ƀiălah gâp sek ôp jêh păng tanăp khân may, gâp mâu saơ du ntil nau tih tâm ban ma khân may phong ôh.

¹⁵ Hêrôt saơ lĕ, yorlah păng hŏ mplơ̆ jêh Păng ma gâp. Kơt nĕ, bunuyh aơ mâu geh nau tih khư ma nau nkhĭt ôh

¹⁶ pôri gâp mra dong jêh nây mƀơk păng sĭt.”

¹⁸ Khân păng du ai nau nter dŭt hâu: “Nkhĭt lơi hom bunuyh aơ jêh ri mƀơk Y-Barabas ma hên!”

¹⁹ Y-Barabas gŭ ndrung yor nau păng ƀư uh ah tâm ƀon jêh ri nkhĭt bunuyh.

²⁰ Pilat ŭch mƀơk Brah Yêsu rĭ dĭng nsônh nchâp ma phung ƀon lan.

²¹ Ƀiălah khân păng nter dŭt hâu: “Pâng păng ma kđĭn ta si tâm rkăng! Pâng păng ma kđĭn ta si tâm rkăng!”

²² Pilat lah tay ma khân păng tơ̆ tal pe: “Moh nau mhĭk Păng ƀư jêh? Gâp mâu joi saơ tâm păng geh nau tih khư nkhĭt ôh. Yor nây, gâp mra dong jêh ri mƀơk păng sĭt.”

²³ Ƀiălah phung nây lơ hô nter ktang rlau lơn, dăn pâng kđĭn Brah Yêsu ta si tâm rkăng; jêh ri nau khân păng nter ngrông hŏ dơi.

²⁴ Pôri Pilat phat dôih tĭng ma nau khân păng dăn.

²⁵ Păng mƀơk nơm bu krŭng jêh khân păng dăn jêh, jêng nơm tâm rdâng jêh ri nkhĭt bunuyh, jêh ri păng jao Brah Yêsu ma khân păng tĭng nâm nau mĭn khân păng ŭch.

Bu pâng Brah Yêsu ma kđĭn klơ si tâm rkăng

²⁶ Dôl têk leo Brah Yêsu hăn, khân păng nhŭp du huê tă bơh ƀon Siren, rnha păng Y-Simôn, păng hăn hao tă bơh ƀon tơm, jêh ri khân păng nchâp păng tuy si tâm rkăng tĭng pakơi Brah Yêsu.

²⁷ Geh âk ngăn bunuyh hăn tĭng Brah Yêsu jêh ri geh âk bu ur tŭr ntang ntơh nhĭm nhhiăng ma Brah Yêsu.

²⁸ Ƀiălah Brah Yêsu ndôn kơi lah ma khân păng: “Hơi kon bu ur Yêrusalem, lơi nhĭm ma Gâp, ƀiălah nhĭm hom ma khân ay nơm jêh ri ma phung kon khân ay.

²⁹ Yorlah aơ, lĕ nar dăch tât, bu mra lah: ‘Ueh maak yơh ma bu ur mâu bă kon, ma ndŭl proch mâu bă ntreo jêh ri toh mâu ăn ma kon pu toh!’

³⁰ Jêh nây khân păng lah ma yôk: ‘Tŭp hom ta klơ hên!’ jêh ri lah ma dor: ‘Nkŭm hom hên!’

³¹ Yorlah tơlah bu ƀư kơt nĕ ma tơm si ndrêh, moh nau mra tât ma tơm si kro?”

³² Khân păng đŏng têk leo bar hê bunuyh tih êng gay ma nkhĭt ndrel ma Brah Yêsu.

³³ Tơlah khân păng tât du ntŭk rnha jêng Ntŭk Nting Bôk, khân păng pâng Brah Yêsu ma kđĭn ta si tâm rkăng ndrel ma bar hê bunuyh tih: du huê pa ma, du huê pa chiau Păng.

³⁴ Brah Yêsu mbơh sơm pô aơ: “Hơi Mbơ̆, dăn yô̆ an ma khân păng, yorlah khân păng mâu gĭt moh nau khân păng ƀư.” Jêh nây khân păng nchroh n'hôr gay tâm pă kho ao Brah Yêsu.

³⁵ Phung ƀon lan gŭ uănh ta nây, bi phung kôranh chiă uănh gơm mưch ma Brah Yêsu pô aơ: “Păng tâm rklaih bunuyh êng. Tơlah nanê̆ ngăn păng jêng Brah Krist, Nơm Brah Ndu săch jêh, ăn hom păng tâm rklaih păng nơm.”

³⁶ Phung tahan gơm mưch ma Păng đŏng, hăn dăch jêh ri yơr dak srat ma Brah Yêsu nhêt

³⁷ jêh ri lah: “Tơlah may jêng Hađăch phung Yuđa, rklaih hom may nơm!”

³⁸ Ta klơ bôk Păng geh du mbor rplay samƀŭt: “NƠM AƠ JÊNG HAĐĂCH PHUNG YUĐA.”

³⁹ Du huê tâm bar bunuyh ƀư tih bu yông đŏng suai rak ma Brah Yêsu pô aơ: “May mâu di jêng Brah Krist lĕ ƀơh? Tâm rklaih hom may nơm jêh ri hên ƀă!”

⁴⁰ Ƀiălah du huê ri buay păng: “May dơn nau tâm rmal tâm ban, hôm mâu klach ma Brah Ndu lĕ ƀơh?

⁴¹ He geh nau rmal jêng di jêh, yorlah he sŏk dơn nau rmal khư ma nau he ƀư; ƀiălah nơm aơ mâu mâp ƀư tih ôh.”

⁴² Jêh nây păng lah: “Hơi Brah Yêsu, tơlah May lăp ta ƀon bri hađăch May nơm jêh, dăn kah gĭt ma gâp!”

⁴³ Brah Yêsu plơ̆ lah: “Nanê̆, Gâp lah ma may, nar aơ may mra gŭ ndrel ma Gâp tâm Parađi.”

Nau Brah Yêsu khĭt

⁴⁴ Nôk nây, lam bri neh geh nau ngo ntơm bơh nklang bôk nar jêh kŏ tât pe mông mhaơ.

⁴⁵ Nar jêng ngo; bok nching tâm ngih brah nkhêk jêng bar.

⁴⁶ Brah Yêsu nter dŭt dăng ngăn pô aơ: “Hơi Mbơ̆, Gâp jao huêng Gâp tâm ti Mbơ̆!” Păng ngơi lôch, Păng tăch n'hâm.

⁴⁷ Saơ nau tât jêh, kôranh tahan tâm rnê Brah Ndu pô aơ: “Nanê̆ bunuyh aơ jêng bunuyh sŏng srăng!”

⁴⁸ Lĕ rngôch phung bunuyh rgum tay gay uănh nau nây; dôl saơ lĕ nau tât geh jêh khân păng tŭr ntang ntơh jêh nây plơ̆ sĭt.

⁴⁹ Lĕ rngôch phung bunuyh gĭt năl Brah Yêsu jêh ri phung bu ur tĭng Păng tă bơh n'gor Galilê, gŭ uănh lĕ nau nây bơh ngai.

Nau tâp Brah Yêsu

⁵⁰ Geh du huê bunuyh amoh păng Y-Yôsep, kôranh pah kan ma Mpôl Kôranh Phat Dôih, jêng bunuyh ueh jêh ri sŏng srăng,

⁵¹ mâu geh tâm di nau ma nau tâm nal jêh ri nau ƀư tă bơh phung ri. Y-Yôsep ƀon tơm ta ƀon Arimathê tâm n'gor Yuđa jêng bunuyh gŭ kâp gân ƀon bri hađăch Brah Ndu.

⁵² Păng hăn tât ta Pilat, dăn săk jăn Brah Yêsu.

⁵³ Nôk bu njŭr săk jăn păng jŭr, Y-Yôsep put njor ma bok mhay, jêh ri dơm tâm môch, hŏ lôk trôm lŭ toyh, ntŭk ê hŏ tâp brôi bunuyh khĭt ôh.

⁵⁴ Nôk nây jêng nar Ndrăp Nkra jêh ri nar saƀat dăch jêh.

⁵⁵ Phung bu ur hăn ndrel ma Brah Yêsu tă bơh n'gor Galilê, đŏng hăn tĭng gay uănh môch jêh ri gĭt mâm bu tâp săk jăn Brah Yêsu. Jêh nây khân păng plơ̆ sĭt, ndrăp lor dak si ƀâu kah jêh ri dak ƀâu kah.

⁵⁶ Nar saƀat khân păng gŭ rlu tĭng nau vay.