Luka 19 - Nau Brah Ndu Ngơi 2023

Brah Yêsu jêh ri Y-Sachê

¹ Brah Yêsu lăp jêh tâm ƀon Yêrikô, Păng hăn rgăn ƀon nây.

² Ta nây, geh du huê bunuyh amoh păng Y-Sachê, jêng kôranh tâm phung riu pi jêh ri ndrŏng ngăn.

³ Păng joi ŭch uănh Brah Yêsu jêng mbu moh, ƀiălah mâu dơi saơ, yorlah phung bunuyh âk ir ƀiălah păng jêng bunuyh gleh.

⁴ Kơt nây, Y-Sachê nchuăt panăp jêh ri hao ta klơ tơm si sikamôr gay uănh Păng, yorlah Păng bơi hăn rgăn ta nây.

⁵ Tơlah Brah Yêsu tât ta ntŭk nây, Păng n'gơr măt uănh jêh ri lah Y-Sachê: “Hơi Y-Sachê, trŭnh hom gơnh, yorlah nar aơ Gâp gŭ tâm ngih may.”

⁶ Y-Sachê trŭnh ro jêh ri rom Brah Yêsu răm rhơn.

⁷ Saơ pônây lĕ rngôch bunuyh ngơi ƀŭk dŭk suyh: “Păng hăn gŭ tâm ngih du huê bunuyh tih!”

⁸ Ƀiălah Y-Sachê gŭ nsrâng tanăp Kôranh Brah jêh ri ơh: “Hơi Kôranh Brah, aơ, gâp sŏk du n'gul drăp ndơ gâp gay ăn ma phung o ach; tơlah gâp ƀư mhĭk ma mbu moh nau, gâp mra ntrok âk lơn puăn tơ̆.”

⁹ Brah Yêsu lah ma păng: “Nar aơ nau tâm rklaih lăp jêh tâm ngih aơ, yorlah nơm aơ ăt jêng kon sau Y-Abraham.

¹⁰ Yorlah Kon Bunuyh văch jêh gay joi jêh ri tâm rklaih mbu nơm roh jêh.”

Nau hôr ma rnglay prăk

¹¹ Dôl khân păng tăng lĕ nau nây, Brah Yêsu nkoch bri ntop du nau hôr, yorlah Păng dăch tât ƀon Yêrusalem, rĭ dĭng bu nđôn lah pô aơ ƀon bri hađăch Brah Ndu mra mpơl ro.

¹² Yor nây, Păng lah: “Du huê bunuyh ndrŏng hăn tât ta bri ngai gay dơn nau dơi jêng hađăch, jêh nây mra plơ̆ sĭt.

¹³ Păng kuăl jât nuyh tâm phung oh mon păng hăn tât, jao ma khân păng jât glo prăk jêh ri lah: ‘Geh n'hao hom ma tât nôk gâp plơ̆ sĭt.’

¹⁴ Ƀiălah phung ƀon lan păng ta bri nây tâm rmot ma păng, rĭ dĭng khân păng njuăl bunuyh mbơh tĭng pakơi păng jêh ri lah: ‘Hên mâu ŭch ôh ma bunuyh aơ chiă uănh hên!’

¹⁵ Jêh păng geh nau dơi jêng hađăch jêh ri plơ̆ sĭt, păng kuăl ăn phung oh mon tât jêng phung hŏ dơn prăk, gay gĭt ăp nơm hŏ geh n'hao dơi ndah âk.

¹⁶ Oh mon tal nguay văch mbơh: ‘Hơi kôranh, glo prăk may hŏ dơi geh n'hao kao tât jât glo prăk.’

¹⁷ Kôranh lah: ‘Hơi oh mon sŏng, ueh ngăn, yorlah may hŏ răp jăp tâm kan jê̆, may mra dơi chiă uănh jât ƀon.’

¹⁸ Bunuyh rơh bar mbơh: ‘Hơi kôranh, glo prăk may hŏ dơi geh n'hao kao jêng prăm glo prăk.’

¹⁹ Kôranh đă đŏng: ‘May mra chiă uănh prăm ƀon.’

²⁰ Oh mon êng văch mbơh: ‘Hơi kôranh, aơ, glo prăk may, gâp nklâm tâm bok,

²¹ yor gâp klach ma may, yorlah may jêng bunuyh dăng jâk, sŏk tâm ntŭk mâu dơm, rek tâm ntŭk mâu nsrih.’

²² Kôranh lah: ‘Aơ oh mon djơh mhĭk! Tĭng nâm bu nau may ngơi gâp phat dôih may. Di lĕ may gĭt jêh gâp jêng du huê bunuyh dăng jâk, sŏk tâm ntŭk mâu dơm, rek tâm ntŭk mâu nsrih.

²³ Pôri mâm ƀư may mâu jao prăk gâp ma bunuyh tăch rgâl prăk, gay nôk gâp plơ̆ sĭt, mra sŏk lĕ prăk ơm nđâp ma kao păng?’

²⁴ Jêh nây kôranh lah ma phung gŭ ta nây: ‘Sŏk hom glo prăk tă bơh păng jêh ri ăn ma bunuyh geh jêh jât glo.’

²⁵ Khân păng lah: ‘Hơi kôranh, bunuyh nây hŏ geh jêh jât glo prăk jêh!’

²⁶ Gâp đă ma khân may: ‘Nơm geh jêh, mra ăn ntop; bi mbu mâu geh bu mra sŏk lơi lĕ ndơ khân păng hŏ geh jêh.

²⁷ Bi ma phung rlăng đah gâp, mâu ŭch gâp chiă uănh khân păng, njŭn leo hom khân păng văch ta aơ jêh ri nkhĭt lơi khân păng tanăp gâp.’ ”

²⁸ Jêh lah lĕ nau ngơi nây, Brah Yêsu hăn lor, hao ta ƀon Yêrusalem.

Nau Brah Yêsu pah kan ta ƀon Yêrusalem ( 19:29 – 21:38 ) Brah Yêsu lăp tâm ƀon Yêrusalem

²⁹ Tơlah dăch tât ta ƀon Bêtphajê jêh ri ƀon Bêthani, êp ta meng yôk rnha jêng Ôlive, Brah Yêsu njuăl bar hê oh mon hăn lor

³⁰ jêh ri ntĭnh: “Hăn lăp hom ta ƀon jê̆ tanăp. Tơlah lăp ƀon jê̆, khân may mra saơ du mlâm kon seh bri bu kât jêh ta nây ê hŏ bu ncho. Doh hom păng jêh ri têk păng plơ̆ sĭt ta aơ.

³¹ Tơlah geh mbu ôp: ‘Mâm ƀư khân may doh seh nây?’ khân may mra plơ̆ lah: ‘Kôranh Brah ŭch ncho păng.’ ”

³² Bar hê bunuyh nây hăn yơh jêh ri tâm mâp lĕ nau di tâm ban ma Brah Yêsu hŏ lah jêh.

³³ Tơlah khân păng doh kon seh bri, phung kôranh seh bri lah ma khân păng: “Mâm ƀư khân may doh kon seh bri nây?”

³⁴ Khân păng lah: “Kôranh Brah ŭch păng.”

³⁵ Jêh nây khân păng têk kon seh bri ma Brah Yêsu, sŏk ao khân păng lăk ta klơ ndŭr kơi seh jêh ri ăn Brah Yêsu ncho.

³⁶ Tơlah Brah Yêsu ncho seh bri hăn, geh âk bunuyh lăk ao khân păng nơm ta trong.

³⁷ Tơlah dăch tât sop ta yôk Ôlive, lĕ mpôl oh mon ntơm răm rhơn jêh ri tâm rnê ma Brah Ndu ma lĕ nau brah khân păng saơ jêh.

³⁸ Khân păng nter lah: “Tâm rnê ma Hađăch văch tâm amoh Kôranh Brah! Nau đăp mpăn gŭ ta klơ trôk, jêh ri nau chrêk rmah klơ ntŭk dŭt prêh!”

³⁹ Geh ƀaƀă phung Pharisi ta nklang phung âk lah ma Brah Yêsu: “Hơi Nơm Nti, dăn buay phung oh mon May!”

⁴⁰ Păng plơ̆ lah: “Gâp đă ma khân may, tơlah khân păng gŭ rklăk lŭ mra kuăl huy.”

⁴¹ Tơlah văch dăch, uănh saơ ƀon nây, Brah Yêsu nhĭm ma păng jêh ri lah:

⁴² “Ŭch ngăn, ta nar aơ, may dơi gĭt lĕ nau ƀư nau đăp mpăn ma may! Ƀiălah aƀaơ lĕ nau nây pôn ndâp bơh măt may.

⁴³ Yorlah mra geh nar, phung rlăng mra bât pôih, nchueng jŭm jêh ri rêt nâp puăn mpeh ma may.

⁴⁴ Khân păng mra ƀư rai may jêh ri phung kon sau ta nklang may đŏng. Khân păng mâu mra ăn glo lŭ aơ gŭ ta klơ glo lŭ ri, yorlah may mâu gĭt ôh mông may geh nau khâl.”

Brah Yêsu ƀư kloh ngih brah

⁴⁵ Brah Yêsu lăp tâm ngih brah, ntơm mprơh phung tăch drăp ta nây,

⁴⁶ jêh ri lah ma khân păng: “Geh nau nchih jêh pô aơ: ‘Ngih Gâp mra jêng ngih mbơh sơm,’ ƀiălah khân may plăch ntŭk nây jêng trôm nau tâm ntŭng.”

⁴⁷ Păng nti lah ăp nar tâm ngih brah. Phung kôranh ƀư brah toyh, phung kôranh nchih samƀŭt jêh ri phung kôranh chiă uănh tâm phung ƀon lan joi nau nkhĭt Păng,

⁴⁸ ƀiălah khân păng mâu gĭt mâm mra ƀư, yorlah lĕ rngôch phung ƀon lan ŭch iăt nau Păng ngơi da dê.