Luka 16 - Nau Brah Ndu Ngơi 2023

Nau hôr ma bunuyh mât uănh mâu răp jăp. – Lĕ nau đă êng

¹ Brah Yêsu lah tay ma phung oh mon: “Du huê bunuyh ndrŏng geh du huê bunuyh mât uănh ngih jêh ri bu phong nơm nây ƀư mpŭng jêh drăp ndơ kôranh păng.

² Yor ri, kôranh kuăl păng tât jêh ri lah: ‘Gâp tăng bu phong may moh nau nây! Mbơh nkoch rah vah hom nau may mât uănh, yorlah ntơm aƀaơ may mâu mra dơi mât ngih gâp ôh!’

³ Bunuyh mât ngih mĭn êng: ‘Kôranh n'glưh nsot nau gâp mât uănh, moh gâp mra ƀư? Pŏk neh gâp mâu geh n'hâm suan, bi hăn ƀư dan gâp bêk prêng.

⁴ Gâp gĭt jêh moh gâp mra ƀư gay nôk bu n'glưh nsot gâp geh bunuyh mra rom gâp tâm ngih khân păng.’

⁵ Pôri, păng kuăl ăp nơm iang rnon kôranh tât jêh ri lah ma nơm tal nguay: ‘Ndah âk may iang rnon kôranh gâp?’

⁶ Bunuyh nây plơ̆ lah: ‘Du rhiăng thŭng dak ngi ôlive.’ Bunuyh mât ngih lah: ‘Sŏk hom pŏk samƀŭt rnon, gŭ ta nây nchih gơnh: Prăm jât.’

⁷ Jêh nây păng lah ma bunuyh tal bar: ‘Ndah âk may iang rnon?’ Nơm nây plơ̆ lah: ‘Du rhiăng sah ba ƀlê.’ Bunuyh mât ngih lah: ‘Sŏk hom pŏk samƀŭt rnon nchih: Pham jât.’

⁸ Kôranh păng tâm rnê ma bunuyh mât uănh ngih kue nây ƀư blau gĭt mĭn ngăn kơt nây. Yorlah phung kon rnôk aơ blau rlau lơn phung kon nau ang tâm nau gŭ ngao ma phung băl khân păng.

⁹ Jêh ri Gâp lah ma khân may: Ăn dŏng prăk ndơ mâu sŏng gay ƀư mĭt jiăng, gay ma tât prăk ndơ nây lĕ jêh, khân păng mra rom khân may lăp tâm ngih n'ho ro.

¹⁰ Mbu nơm răp jăp tâm kan dŭt jê̆, răp jăp đŏng tâm kan toyh, mbu nơm kue tâm nau dŭt jê̆, kue đŏng tâm kan toyh.

¹¹ Pôri tơlah khân may mâu răp jăp ma drăp ndơ mâu sŏng, mbu mra djôt drăp ndơ ngăn jao ma khân may?

¹² Tơlah khân may mâu răp jăp ma drăp ndơ bunuyh êng, mbu mra jao ma khân may drăp ndơ prăp êng ma khân may nơm?

¹³ Mâu geh du huê oh mon dơi pah kan ma bar hê kôranh, yorlah mra tâm rmot ma kôranh aơ, jêh ri rŏng ma kôranh ri, mâu lah yơk ma kôranh aơ jêh ri mưch ma kôranh êng. Khân may mâu dơi ôh pah kan ma Brah Ndu, nđâp pah kan ma prăk ndô ndơ ôh.”

¹⁴ Phung Pharisi jêng phung rŏng ma prăk rêl tăng lĕ nau nây, ri mơ mưch rmot ma Brah Yêsu.

¹⁵ Păng lah ma khân păng: “Khân may ŭch jan sŏng srăng tanăp bunuyh, ƀiălah Brah Ndu gĭt năl nuih n'hâm khân may; yorlah nau bunuyh n'hao jêng nau mưch rmot tanăp Brah Ndu.

¹⁶ Nau vay jêh ri nau mbơh lor ăt hôm tât ta rnôk Y-Yôhan dơm. Ntơm nar nĕ, bu mbơh nkoch Nau Mhe Mhan Ueh ma ƀon bri hađăch Brah Ndu jêh ri lĕ rngôch bunuyh dŏng nau dơi ktang gay lăp ta nây.

¹⁷ Trôk neh rlau lôch dơh lơn ma nau jut lơi du rplay samƀŭt dŭt jê̆ tâm nau vay.

¹⁸ Mbu nơm chalơi ur păng jêh ri gŭ bu ur êng jêng ƀư tih văng tĭr, bi mbu nơm gŭ bu ur sai păng chalơi jêh, păng ƀư tih văng tĭr đŏng.”

Bunuyh ndrŏng jêh ri Y-Lasar

¹⁹ “Geh jêh du huê bunuyh ndrŏng nsoh ao chăng krăk jêh ri ao bok mhay rhên, ăp nar nhêt sa răm maak ngăn.

²⁰ Geh du huê o ach amoh păng Y-Lasar bê̆ch padih mpông ngih bunuyh ndrŏng nây, săk jăn păng bêng toh ok.

²¹ Păng ŭch dơi sa lĕ ndơ sông sa ndăk tŭp tă bơh sưng ndrŏng. Geh đŏng phung so tât ler ntŭk sôt ok păng.

²² Bunuyh o ach nây khĭt, tông mpăr Brah Ndu leo păng n'gân tâm ntang ntơh Y-Abraham. Bunuyh ndrŏng khĭt đŏng jêh ri bu leo tâp păng.

²³ Bunuyh ndrŏng gŭ tâm ƀon phung khĭt geh nau nđêh nji, n'gơr măt uănh saơ Y-Abraham bơh ngai jêh ri Y-Lasar gŭ ta ntang ntơh păng.

²⁴ Păng kuăl huy: ‘Hơi chô yau Y-Abraham, yô̆ nđach an gâp ƀă, njuăl Y-Lasar mbŭk nglau ti tâm dak gay nđik ta mpiăt gâp, yorlah gâp rêh ni dŭt hâu ngăn tâm mpiăt ŭnh aơ.’

²⁵ Ƀiălah Y-Abraham plơ̆ lah: ‘Hơi kon, kah gĭt tay hom dôl may gŭ rêh, may dơi dơn lĕ nau ueh jêh, bi Y-Lasar dơn âk nau djơh; aƀaơ aơ, păng geh nau bonh leng, bi may gŭ tâm nau rêh ni dŭt hâu ngăn.

²⁶ Rlau lơn ma nĕ, geh du brŏng jru dŭt huy vah vang may đah hên, kŏ tât mbu nơm ŭch ntơm bơh ntŭk aơ rgăn ta ntŭk nây mâu dơi, mbu nơm ŭch ntơm bơh ntŭk nây rgăn ta ntŭk aơ mâu dơi ôh.’

²⁷ Bunuyh ndrŏng lah: ‘Hơi chô yau! Pôri dăn ma may njuăl Y-Lasar hăn tât ta ngih mbơ̆ gâp,

²⁸ yorlah gâp geh prăm nuyh oh, gay ma păng mbơh lor khân păng, gay ăn khân păng mâu hăn jŭr ntŭk nau rêh ni dŭt hâu ngăn aơ.’

²⁹ Ƀiălah Y-Abraham plơ̆ lah: ‘Khân păng geh jêh Y-Môis jêh ri phung nơm mbơh lor. Ăn khân păng iăt nau phung nây!’

³⁰ Bunuyh ndrŏng lah tay: ‘Hơi chô yau Y-Abraham, mâu di pônây ôh! Ƀiălah tơlah geh bunuyh khĭt dâk rêh tay mâp ta păng, ri mơ khân păng mra rmal nau tih.’

³¹ Y-Abraham plơ̆ lah: ‘Tơlah khân păng mâu iăt nau Y-Môis ngơi jêh ri nau phung nơm mbơh lor ngơi, nđâp tơlah geh bunuyh khĭt dâk rêh tay, khăn păng mâu lĕ chroh.’ ”