Luka 12 - Nau Brah Ndu Ngơi 2023

Nau mbơh lor ma bunuyh nuih n'hâm nklă

¹ Dôl nây, phung ƀon lan rgum ndrel âk rbăn bunuyh, kŏ tât tâm jot ndrăng băl nơm. Lor lơn Brah Yêsu ntơm ngơi ma phung oh mon Păng pô aơ: “Uănh njrăng hom ma ndrui phung Pharisi, jêng nau vay nuih n'hâm nklă.

² Mâu geh moh ndơ pôn mo bu mâu mpơl jêh ri mâu geh moh ndơ ndâp bu mâu ăn bu gĭt.

³ Yor nây, lĕ nau khân may lah tâm ntŭk ngo mra dơi tăng tâm ntŭk ang; lĕ nau khân may lah jêh tâm jrô ndâp bu mra mbơh ta klơ chor ngih.”

⁴ Gâp lah ma khân may jêng phung mĭt jiăng Gâp: Lơi klach ôh ma phung nkhĭt săk jăn jêh pakơi nây mâu hôm dơi ƀư đŏng ôh.

⁵ Ƀiălah Gâp ntĭm ma khân may gĭt klach mbu nơm: Klach hom ma Nơm, nôk nkhĭt jêh, hôm geh nau dơi mƀăr jŭr ndrung ŭnh. Di kơt nây, Gâp đă ma khân may, klach hom ma Nơm nây!

⁶ Mâu di hĕ prăm mlâm sĭm srai tăch rnoh bar rêl? Nđâp lah pônây, Brah Ndu mâu chuêl du mlâm sĭm srai ôh.

⁷ Nđâp ma sŏk ta klơ bôk khân may dơi kơp lĕ jêh. Lơi klach ôh, yorlah khân may geh rnoh khlay lơn ma phung sĭm srai.

⁸ Gâp đă ma khân may, mbu nơm mbơh Gâp tanăp lĕ rngôch bunuyh, Kon Bunuyh ăt mra mbơh bunuyh nây tanăp phung tông mpăr Brah Ndu.

⁹ Ƀiălah mbu nơm dun Gâp tanăp lĕ rngôch bunuyh, Gâp ăt mra dun păng tanăp phung tông mpăr Brah Ndu.

¹⁰ Mbu nơm ngơi tâm rdâng đah Kon Bunuyh mra geh nau yô̆ an; ƀiălah mbu nơm sưr rlau đah Brah Huêng Ueh mâu mra geh nau yô̆ an ôh.

¹¹ “Tơlah bu njŭn leo khân may tanăp ngih rƀŭn, tanăp phung kôranh mât uănh jêh ri phung kôranh chiă uănh, lơi ta rvê moh nau khân may mra lah mâu lah lĕ nau khân may lah gay n'gang ma khân may nơm,

¹² yorlah ta mông nây, Brah Huêng Ueh mra nti ma lĕ nau khân may mra lah.”

Bunuyh ndrŏng rluk

¹³ Nôk nây, du huê tâm phung bunuyh lah ma Brah Yêsu: “Hơi Nơm Nti, lah an ma nâu gâp tâm pă drăp ndơ ma gâp.”

¹⁴ Brah Yêsu plơ̆ lah: “Ơ bunuyh ri, mbu ăn Gâp jêng kôranh phat dôih mâu lah nơm pă drăp ndơ ma khân may?”

¹⁵ Păng lah ma khân păng: “Rjăp hom, uănh njrăng lĕ rngôch ndơ kơnh rlau ir, yorlah nau rêh kon bunuyh mâu jêng yor ma drăp ndơ păng nơm geh âk rmeh ôh.”

¹⁶ Păng nkoch ma khân păng du nau hôr: “Ta mir du huê bunuyh ndrŏng geh âk ba.

¹⁷ Păng mĭn êng: ‘Mâm gâp mra ƀư, yorlah gâp mâu hôm tŏng ntŭk prăp âk play ôh.’

¹⁸ Păng lah: ‘Gâp mra ƀư kơt aơ: Gâp mra ƀư rai lĕ jay aơ jêh ri ƀư lĕ jay êng toyh lơn, jêh nây gâp mra bun nkrem ba jêh ri drăp ndơ gâp tâm nĕ.

¹⁹ Gâp mra lah ma huêng gâp pô aơ: Hơi huêng gâp, may geh âk drăp ndơ prăp jêh âk năm jêh. Gŭ rlu hom, sông sa nhêt, jêh ri răm maak hom.’

²⁰ Ƀiălah Brah Ndu lah ma păng: ‘Hơi bunuyh rluk! Tâm măng aơ mra sŏk huêng may; kơt nây, drăp ndơ may prăp nkrem jêh mra jêng ndơ ma mbu moh?’

²¹ Mbu nơm prăp bun drăp ndơ ma păng nơm ƀiălah mâu jêng ndrŏng tâm Brah Ndu tâm ban pônây đŏng.”

Lơi ta rvê

²² Brah Yêsu lah ma phung oh mon: “Yor ri, Gâp lah ma khân may, lơi yor nau rêh rvê ma ndơ sông sa, mâu đŏng yor săk jăn rvê ma ndơ nsoh.

²³ Yorlah nau rêh khlay lơn ma ndơ sông sa jêh ri săk jăn khlay lơn ma ndơ nsoh.

²⁴ Uănh hom ma phung nđak: Khân păng mâu mâp nsrih, mâu rek, mâu đŏng geh jay mâu lah jay prăp drăp ndơ khlay, ƀiălah Brah Ndu hôm siăm khân păng. Khân may jêng khlay rlau lơn ma phung sĭm nây!

²⁵ Rlau lơn ma nĕ, mbu nơm tâm phung khân may yor rvê ƀư ma nau rêh păng nơm dơi jong ntop du ƀât lât mâu lah mâu?

²⁶ Pônây, tơlah khân may mâu dơi ƀư du ndơ jê̆ kơt nĕ, mâm ƀư khân may rvê ma lĕ nau kan êng?

²⁷ Uănh hom mâm ƀư kao si ueh văch ma prêh: Khân păng mâu ƀư kan jâk jêr, mâu lĕ rui brai; ƀiălah Gâp lah ma khân may, nđâp tơlah hađăch Salômôn lĕ nau chrêk rmah, mâu dơi đŏng nsoh ueh tâm ban ma phung kao si ueh aơ.

²⁸ Hơi phung bunuyh geh djê̆ nau chroh, tơlah kao gơ̆ nar aơ hôm rêh tâm mir, ôi taơ bu mra mƀăr păng tâm ŭnh năk, pôri Brah Ndu hôm ăn nsoh ueh kơt nĕ, rlau lơn ma khân may.

²⁹ Kơt nây, khân may lơi joi ndơ sông sa, ndơ nhêt, lơi đŏng rvê rlau ir.

³⁰ Yorlah lĕ rngôch ndơ nây, lĕ ntil mpôl bunuyh ta neh ntu vay joi, jêh ri Mbơ̆ khân may hŏ gĭt lĕ nau ŭch khân may jêh.

³¹ Ƀiălah joi hom ƀon bri hađăch Brah Ndu, ri mơ Păng mra ăn lĕ nau nây ma khân may đŏng.

³² Hơi phung jê̆, lơi klach ôh, yorlah Mbơ̆ khân may di nuih n'hâm ăn ƀon bri hađăch Păng ma khân may jêh.

³³ Tăch hom drăp ndơ khân may geh gay ƀư nau yô̆. Joi hom dŭng prăk mâu djơh mâu mŭnh jêh ri jay ndơ khlay mâu hŭch ta klơ trôk, ntŭk bunuyh ntŭng mâu dơi tât, nchiăr mbon mâu ƀư rai păng ôh.

³⁴ Yorlah ta ntŭk drăp ndơ khân may gŭ, nuih n'hâm khân may gŭ ta nây lĕ.”

Nau blau njrăng

³⁵ “Ăn khân may rêt rse bŭt, mpoh ŭnh kađen khân may.

³⁶ Ăn khân may ƀư tâm ban ma phung bunuyh gŭ kâp kôranh khân may plơ̆ văch bơh nau nhêt sông tâm nkol ur sai, gay nôk kôranh sĭt tât, goh mpông ri mơ pơk mpông ro.

³⁷ Ueh maak yơh ma phung oh mon nây, tơlah kôranh sĭt tât jêh ri saơ khân păng gŭ rngeh! Nanê̆ ngăn, Gâp lah ma khân may, kôranh mra rêt rse bŭt păng nơm, jă phung oh mon gŭ ta sưng sông sa jêh ri văch pah kan ma khân păng.

³⁸ Tơlah n'gul măng mâu lah dăch kêng ôi, kôranh plơ̆ sĭt saơ phung oh mon tâm ban pônây ri mơ ueh maak ngăn ma khân păng!

³⁹ Gĭt hom nau nây, tơlah du huê kôranh ngih gĭt moh mông bunuyh ntŭng văch, păng mâu mra ăn ôh bunuyh ntŭng lăp tâm ngih păng.

⁴⁰ Ăn khân may rơm ndrăp jêh, yorlah Kon Bunuyh văch tâm mông khân may mâu geh mĭn.”

⁴¹ Y-Pêtrôs ơh: “Ơ Kôranh Brah, May lah nau hôr aơ ma hên lĕ mâu lah ma lĕ rngôch bunuyh?”

⁴² Brah Yêsu lah: “Mbu nơm jêng bunuyh chiă uănh blau mĭn jêh ri răp jăp, kôranh jao ăn păng mât uănh ngih kôranh gay păng ăn ndơ sông sa di mông?

⁴³ Ueh maak yơh ma oh mon nây, tơlah kôranh tât jêh ri saơ păng ƀư pônây!

⁴⁴ Nanê̆, Gâp lah ma khân may, kôranh mra jao ăn oh mon nây chiă uănh lĕ drăp ndơ păng.

⁴⁵ Ƀiălah tơlah oh mon nây lah tâm nuih n'hâm păng: ‘Kôranh gâp ê hŏ plơ̆ sĭt ro ôh,’ pônây păng ntơm dong mbang oh mon bu klâu, oh mon bu ur, jêh nây sông sa nhêt nhŭl ndrănh.

⁴⁶ Kôranh păng mra văch tâm nar păng mâu gĭt, tâm mông păng mâu gĭt ôh, mra tâm rmal păng âk ngăn jêh ri ăn ma păng dơn nsum mrô nal ndrel ma phung mâu răp jăp.

⁴⁷ Oh mon gĭt mĭn kôranh păng ŭch ƀiălah mâu ndrăp nkra nŭm jêh ri mâu ƀư ôh tĭng nâm kôranh păng ŭch, mra dơn nau rpăt âk ngăn.

⁴⁸ Ƀiălah mbu nơm mâu mâp gĭt mĭn kôranh, ƀiălah ƀư nau khư tâm rmal, mra geh nau dong n'gơch. Yorlah mbu moh dơi ăn âk bu mra sŏk tay âk; mbu nơm dơi jao âk lơn mra sŏk tay âk lơn.”

Lĕ nau nti lah êng

⁴⁹ “Gâp văch jêh gay klŭp mƀăr ŭnh ta neh ntu. Tơlah ŭnh nây hit jêh, moh ndơ Gâp ŭch!

⁵⁰ Geh nau ƀaptem gâp mra dơn, jêh ri Gâp geh nau nđêh nji âk ngăn kŏ tât nau nây dơi lôch jêh!

⁵¹ Khân may mĭn Gâp tât gay djôt leo nau đăp mpăn ma neh ntu lĕ ƀơh? Gâp đă ma khân may, mâu di ôh, ƀiălah nau tâm nkhah di lơn.

⁵² Yorlah bơh nar aơ, tâm du mlâm ngih geh prăm nuyh mra geh nau tâm nkhah: pe nuyh tâm rdâng đah bar, bar tâm rdâng đah pe.

⁵³ Khân păng mra tâm nkhah băl: Mbơ̆ tâm rdâng đah kon bu klâu, kon bu klâu tâm rdâng đah mbơ̆; mê̆ tâm rdâng đah kon bu ur, kon bu ur tâm rdâng đah mê̆; Po bu ur tâm rdâng đah ƀăn păng, ƀăn tâm rdâng đah po bu ur.”

⁵⁴ Păng lah đŏng ma phung bunuyh: “Tơlah saơ ndâr tŭk n'hao âk mpeh nhâp nar, khân may lah ro: ‘Trôk mra mih;’ ri mơ geh kơt nây.

⁵⁵ Jêh ri tơlah sial pa dâng khôm, khân may: ‘Mra duh hâu ngăn;’ ri mơ geh kơt nây.

⁵⁶ Hơi phung nuih n'hâm nklă! Khân may gĭt tâm rnglah nau mbên trôk neh, mâm ƀư khân may mâu gĭt tâm rnglah nôk aƀaơ aơ?

⁵⁷ Mâm ƀư khân may mâu sek uănh êng khân may nơm moh nau jêng di?

⁵⁸ Tơlah may hăn ndrel ma nơm phong may văch tanăp bunuyh chiă uănh, rŏ trong srôih ƀư hom nau đăp mpăn đah khân păng; lơi ăn khân păng leo may tanăp kôranh phat dôih, jêh ri kôranh phat dôih, jao ăn ma kôranh bu nă gay krŭng may.

⁵⁹ Gâp lah ma may, may mâu mra luh ôh tă bơh ndrung kŏ tât nôk may mplơ̆ sĭt rĭng lĕ prăk nglĕ dŭt.”