Luka 11 - Nau Brah Ndu Ngơi 2023

Nau mbơh sơm

¹ Brah Yêsu mbơh sơm ta du ntŭk. Tơlah mbơh sơm lôch jêh, du huê oh mon lah ma Păng: “Hơi Kôranh, dăn nti ăn hên mbơh sơm, nâm bu Y-Yôhan nti jêh phung oh mon păng kơt nây.”

² Păng lah ma khân păng: “Tơlah khân may mbơh sơm, lah hom: ‘Ơ Mbơ̆! Dăn Amoh Mbơ̆ dơi yơk nau kloh ueh. Ƀon bri hađăch Mbơ̆ dơi tât.

³ Dăn ăn ma hên ndơ sông sa moh nar tŏng ma nar nây.

⁴ Dăn yô̆ an nau tih hên, yorlah hên yô̆ an jêh ma bunuyh ƀư tih đah hê. Dăn lơi ăn hên tŭp tâm nau ndơm ôh!’ ”

⁵ Jêh nây, Păng lah ma khân păng: “Mbu nơm tâm phung khân may geh du huê mĭt jiăng n'gul măng hăn tât jêh ri lah pô aơ: ‘Hơi jiăng, ăn gâp manh pe mlâm piăng let,

⁶ yorlah mĭt jiăng gâp hăn trong mhe tât, ƀiălah gâp mâu geh ndơ ăn păng sa ôh.’

⁷ Tơlah bunuyh gŭ tâm trôm ngih plơ̆ lah: ‘Lơi rsuak gâp ôh, mpông ndâl jêh, phung kon jêh ri gâp nơm lĕ bê̆ch jêh, mâu dơi dâk sŏk piăng let ma may!’

⁸ Gâp đă khân may, nđâp tơlah bunuyh nây mâu yor rŏng mĭt jiăng păng dâk sŏk piăng let ăn ma mĭt jiăng, ƀiălah yor mĭt jiăng ăt sŏl dăn mro, yor ri bunuyh nây dâk hăn jêh ri ăn mĭt jiăng tŏng ndơ ŭch dŏng.

⁹ Kơt nây, Gâp lah ma khân may: Dăn hom, mra dơi geh; joi hom, mra saơ; goh hom, mpông mra pơk ăn ma khân may.

¹⁰ Yorlah mbu nơm dăn mra dơi geh, mbu joi mra saơ, jêh ri mbu goh ri mơ mpông mra pơk.

¹¹ Mbu nơm tâm phung khân may jêng mbơ̆ bu, tơlah kon păng dăn piăng let ƀiălah ăn nkhơng lŭ? Mâu lah kon dăn ka, ƀiălah ăn nkhơng bêh?

¹² Mâu lah dăn du mlâm tăp ƀiălah ăn ndŭr vơng hĕ?

¹³ Kơt nây, tơlah khân may jêng bunuyh mhĭk hôm gĭt ăn lĕ ndơ ueh ma phung kon khân may nơm, rlau lơn ma Mbơ̆ gŭ klơ trôk mâu mra ăn Brah Huêng Ueh ma mbu nơm dăn ma Păng!”

Brah Yêsu jêh ri Bêlsêbul

¹⁴ Brah Yêsu mprơh du huê brah mhĭk mlo; tơlah brah mhĭk du luh jêh, bunuyh mlo blau ngơi ro. Phung ƀon lan gŭ hih rhâl da dê.

¹⁵ Ƀiălah geh ƀaƀă bunuyh lah: “Bunuyh nây bơh Bêlsêbul jêng kôranh brah mhĭk gay mprơh brah mhĭk.”

¹⁶ Ƀaƀă phung êng ŭch rlong Păng, dăn Păng ăn du ntil nau mbên khlay tă bơh trôk.

¹⁷ Brah Yêsu gĭt nau mĭn khân păng rĭ dĭng lah: “Ƀon bri hađăch ƀư tâm pă tâm păng nơm mra rlâm rai, moh ngih ƀư tâm pă tâm păng nơm mra rai roh.

¹⁸ Pônây, tơlah Satan tâm nkhah ndrăng păng nơm mâm ƀư ƀon bri hađăch păng hôm geh? Yorlah khân may lah pô aơ Gâp mprơh brah mhĭk tă bơh Bêlsêbul.

¹⁹ Tơlah Gâp mprơh brah mhĭk tâm amoh Bêlsêbul, bi phung kon khân may tă mbu nâm mprơh brah mhĭk? Yor nây, khân păng nơm yơh mra phat dôih khân may.

²⁰ Ƀiălah tơlah Gâp mprơh phung brah mhĭk tă bơh nglau ti Brah Ndu, ri mơ ƀon bri hađăch Brah Ndu hŏ tât ma khân may jêh.

²¹ Tơlah du huê bunuyh geh suan ktang, geh ndơ tâm lơh ăp ntil, gak njrăng ngih păng nơm ri mơ drăp ndơ păng geh nau ueh mpăn.

²² Ƀiălah tơlah du huê ktang lơn hăn lơh, jêh ri dơi tâm lơh ri mơ sŏk ndơ tâm lơh bunuyh ri rnơm, jêh ri tâm pă lĕ drăp ndơ lĕ pit sŏk jêh.

²³ Mbu nơm mâu gŭ ndrel ma Gâp jêng tâm rdâng đah Gâp, mbu nơm mâu tâm rnglăp đah Gâp jêng nchah rai pru pra.

²⁴ Tơlah brah ƀơ̆ ƀơch luh bơh du huê bunuyh, păng hăn rgăn lĕ ntŭk kro đang gay joi ntŭk rlu, ƀiălah mâu dơi joi ôh, păng lah: ‘Gâp mra plơ̆ sĭt ta ngih gâp, ta ntŭk gâp mhe du luh jêh!’

²⁵ Tơlah păng plơ̆ sĭt tât, saơ ngih nây bu pih rep kloh jêh ri dăp ăn ueh reh

²⁶ pôri păng hăn sŏk tay pơh brah mhĭk êng janh ƀai lơn ndrel lăp gŭ ta nây. Pôri, tâm nau pakơi bunuyh nây jêng djơh lơn ntơm saơm.”

²⁷ Tâm nôk Brah Yêsu ngơi lĕ nau nây, geh du huê bu ur tă bơh tâm phung bunuyh lah: “Ueh maak yơh ma ndŭl hŏ ntreo Păng jêh ri toh hŏ ăn Kôranh Brah pu!”

²⁸ Ƀiălah Păng lah: “Phung iăt jêh ri djôt prăp nau Brah Ndu ngơi geh ueh lăng rlau lơn!”

²⁹ Tơlah phung ƀon lan rgum ndrel âk lơn, Brah Yêsu ntơm lah: “Bunuyh rnôk aƀaơ aơ jêng phung djơh mhĭk. Khân păng joi du ntil nau mbên khlay, ƀiălah mâu mra geh nau mbên khlay êng ăn ma khân păng ôh, padih nau mbên khlay Y-Yôna.

³⁰ Yorlah Y-Yôna jêng nau mbên khlay ma phung Ninive mâm nau, Kon Bunuyh mra jêng nau mbên khlay ma bunuyh rnôk aƀaơ đŏng.

³¹ Tâm nar phat dôih, hađăch bu ur mpeh pa dâng mra dâk hăn tâm rdâng đah bunuyh rnôk aƀaơ aơ jêh ri phong khân păng; yorlah păng văch tă bơh bôk neh ntu tât lôch ŭch iăt nau blau mĭn hađăch Salômôn, jêh ri nây, ta aơ geh Nơm dŭt toyh lơn ma Y-Salômôn!

³² Tâm nar phat dôih, phung Ninive mra dâk ndrel ma bunuyh rnôk aƀaơ aơ jêh ri tâm rmal khân păng, yorlah phung ƀon lan nây hŏ tăng nau Y-Yôna mbơh nkoch jêh ri rmal nau tih, jêh ri nây, ta aơ geh Nơm dŭt toyh rlau lơn ma Y-Yôna!

³³ Mâu geh ôh bu mpoh ŭnh kađen ƀiălah n'gân ntŭk ndâp mâu lah tâm dâng thŭng, ƀiălah n'gân klơ jâng kađen gay ma mbu nơm hăn lăp, dơi saơ nau ang.

³⁴ Măt may jêng kađen ma săk jăn. Tơlah măt may ueh, lĕ săk jăn may ang đŏng, ƀiălah tơlah măt lĕ djơh jêh, lĕ săk jăn may gŭ tâm nau ngo đŏng.

³⁵ Pôri, njrăng hom, klach lah nau ang tâm may plăch jêng nau ngo.

³⁶ Tơlah lĕ săk jăn may bêng nau ang, mâu geh du kô̆ gŭ tâm nau ngo ôh, păng mra geh nau ang lam lĕ rngôch, tâm ban đŏng ŭnh kađen sol ang ma may kơt aơ.”

Brah Yêsu nti lah ma bunuyh Pharisi jêh ri nơm nti nau vay

³⁷ Dôl Brah Yêsu lah lôch jêh, geh du huê Pharisi jă Păng sông sa tâm ngih păng. Păng hăn lăp jêh ri gŭ ta sưng sông.

³⁸ Bunuyh Pharisi nây hih rhâl saơ Păng mâu rao ti êlor sông sa.

³⁹ Yor ri, Kôranh Brah lah: “Phung Pharisi khân may rao kloh padih ngan grưng jêh ri ngan khăl, ƀiălah tâm trôm bêng ma nau kơnh rlau ir jêh ri djơh mhĭk.

⁴⁰ Hơi bunuyh rluk! Mâm ƀư Nơm hŏ njêng padih ƀiălah mâu lah njêng tâm trôm đŏng?

⁴¹ Ƀiălah mpơl hom nuih n'hâm tâm kơl moh ndơ may geh, pôri lĕ rngôch ndơ mra jêng kloh rsang ma khân may.

⁴² Rêh ni yơh ma khân may, phung Pharisi! Yorlah khân may chê̆ du kô̆ tâm jât klôih, ndơ ƀâu kah, nđâp lĕ rngôch ntil trau, ƀiălah chuêl ma nau di jêh ri ma nuih n'hâm yơk rŏng Brah Ndu! Ăn khân may ƀư lă nau aơ ƀiălah mâu dơi đŏng chuêl lĕ nau ri.

⁴³ Rêh ni yơh ma phung khân may, Pharisi! Yorlah khân may ŭch ntŭk khlay tâm ngih rƀŭn, jêh ri ŭch bu mbah ta nklang ntŭk tăch drăp!

⁴⁴ Rêh ni yơh ma khân may! Yorlah khân may nâm bu môch rngol jêh ri bu hăn jot ta klơ môch ƀiălah mâu gĭt năl ôh!”

⁴⁵ du huê nơm nti nau vay ngơi ro: “Hơi Nơm Nti, May ngơi nau nây jêng bêk prêng ma lĕ hên đŏng.”

⁴⁶ Brah Yêsu plơ̆ lah: “Rêh ni yơh ma khân may đŏng, jêng phung nơm nti nau vay! Yorlah khân may ăn bu anh ndơ jâk, ƀiălah khân may nơm mâu pah bi du nglau ti ôh!

⁴⁷ Rêh ni yơh ma khân may! Yorlah khân may ndâk môch phung nơm mbơh lor, phung chô yau khân may nkhĭt lơi jêh.

⁴⁸ Kơt nây, khân may ƀư nơm mbơh jêh ri dơn jêh nau phung chô yau khân păng ƀư; yorlah khân may nkhĭt jêh phung nơm mbơh lor, bi khân may tay ndâk môch ma phung nây.

⁴⁹ Yor nây, nau blau mĭn Brah Ndu lah jêh: ‘Gâp mra njuăl ma khân păng phung mbơh lor jêh ri phung kôranh oh mon văch ta khân păng. Khân păng mra nkhĭt lơi ma bunuyh aơ, ƀư mhĭk ma bunuyh ri.’

⁵⁰ Kơt nây, rnôk aƀaơ aơ mplơ̆ tay rnon mham lĕ rngôch phung nơm mbơh lor nkhŭt jêh tâm rnôk ntơm rhăk njêng neh ntu,

⁵¹ nâm bu ntĭt ntơm bơh mham Y-Abel tât ta mham Y-Sakari, bu nkhĭt ta vah vang nơng ƀư brah jêh ri ntŭk kloh ueh. Di ngăn, Gâp lah ma khân may, bu mra dăn mham nây ma bunuyh rnôk aƀaơ aơ.

⁵² Rêh ni yơh ma khân may, jêng nơm nti nau vay! Yorlah khân may djôt prăp khuă nau gĭt rbăng, khân may nơm mâu lăp ƀiălah khân may buay đŏng lĕ phung êng ŭch lăp!”

⁵³ Tơlah Brah Yêsu luh tă bơh ntŭk nây, phung kôranh nchih samƀŭt jêh ri phung Pharisi ntơm tâm rdâng đah Păng dŭt hâu jêh ri ôp mpet Păng ma ăp ntil nau,

⁵⁴ ƀư dăk sân gay ngơi ƀrôk ăp nau Păng ngơi.