Luka 1 - Nau Brah Ndu Ngơi 2023

Nau ngơi gleh

¹ Hơi kôranh Y-Thêôphil bu yơk, geh âk bunuyh hŏ srôih pah kan nchih du nau rblang nkoch bri ma lĕ nau hŏ ƀư jêh ta nklang he,

² di tĭng nâm phung bunuyh hŏ tă saơ jêh ri pah kan nau Brah Ndu bơh ntơm saơm nkoch tay ma he.

³ Yor nây, jêh sek uănh nanê̆ bơh ntơm, gâp mĭn ŭch geh tĭng gưl gay nchih ăn ma kôranh

⁴ gay kôranh gĭt lĕ nau may nơm hŏ tă nti jêng nanê̆.

Nau jŭr deh jêh ri nôk ndăm rah Brah Yêsu ( 1:5 – 2:52 ) Nau mbơh lor ma nau deh Y-Yôhan-Ƀaptist

⁵ Tâm nôk Hêrôt, hađăch phung Yuđa, geh du huê kôranh ƀư brah tâm mpôl Abija, amoh Y-Sakari; ur păng jêng H'Êlisabet, jêng noi deh Y-Arôn.

⁶ Lĕ bar hê jêng bunuyh sŏng srăng tanăp Brah Ndu, tông djôt prăp lĕ nau vay jêh ri tĭng nau ntĭm Kôranh Brah ntăm nŭm rĭng ngăn.

⁷ Khân păng mâu geh kon, yor H'Êlisabet mâu bă kon jêh ri lĕ bar hê ranh jêh da dê.

⁸ Nkoch bri tât geh nôk Y-Sakari tĭng lor nglĕ tâm mpôl păng nơm ƀư nau kan ndơ ƀư brah tanăp Brah Ndu.

⁹ Nôk nchroh n'hôr tĭng nâm nau vay phung kôranh ƀư brah, păng hŏ tâm nchroh di dơi lăp tâm ngih brah Kôranh Brah gay nhhơr ndơ ƀâu kah.

¹⁰ Tâm mông nhhơr ndơ ƀâu kah, lĕ phung bunuyh âk gŭ padih mbơh sơm.

¹¹ Nôk nây geh du huê tông mpăr Kôranh Brah tâm mpơl ma Y-Sakari, dâk pa ma nơng ƀư brah nhhơr ndơ ƀâu kah.

¹² Saơ tông mpăr, Y-Sakari rŭng răng, klach krit.

¹³ Ƀiălah tông mpăr đă ma păng: “Aơ, hơi Y-Sakari, lơi klach ôh! Yorlah Brah Ndu hŏ tăng jêh nau may mbơh sơm. H'Êlisabet, ur may, mra deh du huê kon bu klâu; may mra tâm amoh păng Y-Yôhan.

¹⁴ Kon bu klâu nây mra ƀư ma may răm maak hâu ngăn, jêh ri âk bunuyh mra hâk răm ngăn nôk deh kon se jê̆ nây.

¹⁵ Yorlah kon se jê̆ nây mra dơi yơk tanăp Kôranh Brah, mâu nhêt ndrănh krăk ƀâu mâu lah dak ndơ nhêt geh ndrui, jêh ri mra dơi bêng ma Brah Huêng Ueh ntơm bơh hôm tâm ndŭl mê̆.

¹⁶ Kon se jê̆ nây mra njŭn leo âk bunuyh Israel plơ̆ tay ma Kôranh Brah jêng Brah Ndu khân păng;

¹⁷ Kon nây mra sŏk nuih n'hâm jêh ri nau brah Y-Êli gay hăn lor ăn ma Kôranh Brah, gay djôt leo nuih n'hâm mbơ̆ plơ̆ sĭt đah kon păng, djôt leo nơm mâu tông bâr tât nau blau mĭn bunuyh sŏng srăng, jêh ri gay ma ndrăp du phung mpôl băl rơm ndrăp jêh ma Kôranh Brah.”

¹⁸ Y-Sakari ngơi ma tông mpăr: “Mâm ƀư gâp gĭt nau nây mra tât geh? Yorlah gâp lĕ ranh, ur gâp lĕ ranh jêh.”

¹⁹ Tông mpăr plơ̆ lah: “Gâp jêng Gabriel, ƀaƀơ gŭ tanăp Brah Ndu. Gâp dơi njuăl văch gay lah đah may jêh ri mbơh Nau Mhe Mhan Ueh ma may.

²⁰ Nĕ aơ, may mra mlo, mâu dơi ngơi ôh, tât nar lĕ nau nây tât geh, yorlah may mâu chroh ma nau gâp ngơi, jêng nau mra dơi ƀư nanê̆ di mông.”

²¹ Dôl nôk nây, phung ƀon lan gŭ kâp Y-Sakari; khân păng hih rhâl yorlah păng gŭ jŏ tâm ngih brah.

²² Tơlah păng du luh, Y-Sakari mâu dơi ngơi đah phung ƀon lan ôh, ri mơ khân păng mhe gĭt păng hŏ geh nau tâm saơ tâm ngih brah. Păng nchŏng ma ti ma khân păng yor păng hôm mlo.

²³ Tơlah lĕ nar păng pah kan hŏ lôch jêh, păng plơ̆ sĭt ta ngih păng.

²⁴ Pakơi lĕ nar nây, ur păng jêng H'Êlisabet bă ntreo jêh ri pôn săk tâm prăm khay. Păng lah pô aơ:

²⁵ “Kôranh Brah hŏ ăn nau yô̆ ma gâp. Tâm lĕ nar nây, Păng yô̆ nđach gâp jêh ri sŏk lơi nau prêng gâp ta nklang lĕ rngôch bunuyh.”

Tông mpăr mbơh nau jŭr deh Brah Yêsu

²⁶ Lăp khay rơh prao, Brah Ndu njuăl tông mpăr Gabriel hăn ta ƀon Nasaret, tâm n'gor Galilê,

²⁷ tâm mâp du huê bu ur druh tâm ndrôi jêh đah du huê amoh Y-Yôsep, jêng noi deh Y-Đavit. Bu ur druh nây amoh H'Mari.

²⁸ Tông mpăr hăn tât gay tâm mâp păng jêh ri lah: “Hơi bunuyh geh nau yô̆, ueh lăng ay! Kôranh Brah gŭ ndrel ma ay!”

²⁹ Ƀiălah H'Mari rŭng răng ngăn ma lĕ nau ngơi nây jêh ri ôp êng nau mbah nây moh nau bu ntĭt.

³⁰ Tông mpăr lah tay: “Hơi H'Mari, lơi klach ôh yorlah ay geh jêh nau yô̆ tanăp Brah Ndu.

³¹ Nĕ aơ, ay mra bă ntreo, deh ma du huê kon bu klâu jêh ri mra ntơ amoh YÊSU.

³² Kon bu klâu nây mra dơi yơk, dơi kuăl jêng Kon Nơm Dŭt Prêh, Kôranh Brah jêng Brah Ndu mra ăn ma Păng sưng hađăch Y-Đavit, chô yau Păng.

³³ Păng mra jêng chiă uănh n'ho ro ngih Y-Yakôp; ƀon bri hađăch Păng mra hôm mro mrăng n'ho ro.”

³⁴ H'Mari ngơi đah tông mpăr: “Gâp ê hŏ geh sai, mâm ƀư nau nây dơi tât?”

³⁵ Tông mpăr plơ̆ lah: “Brah Huêng Ueh mra gŭ ta klơ ay, jêh ri nau brah tă bơh Nơm Dŭt Prêh mra nkŭm nkâm ay; yor nây nau jŭr deh kon kloh ueh bu mra kuăl jêng Kon Brah Ndu.

³⁶ Ri, H'Êlisabet, bunuyh ndŭl mpôl ay, đŏng bă ntreo du huê kon bu klâu tâm dôl păng lĕ ranh. Păng ơm dơi gĭt jêng mâu bă kon ƀiălah aƀaơ hŏ bă treo dơi prao khay jêh.

³⁷ Yorlah mâu geh moh nau kan Brah Ndu mâu dơi ƀư.”

³⁸ H'Mari plơ̆ lah: “Gâp jêng oh mon bu ur ma Kôranh Brah. Dăn nau nây tât ma gâp nâm nau may ntrŭnh!” Jêh nây tông mpăr du tă bơh H'Mari.

H'Mari hăn khâl H'Êlisabet. – Nau mprơ H'Mari

³⁹ Tâm lĕ nar nây, H'Mari dâk, ndal hăn sĭt nkual yôk, tât ta ƀon n'gor Yuđa,

⁴⁰ lăp tâm ngih Y-Sakari jêh ri mbah ma H'Êlisabet.

⁴¹ H'Êlisabet mhe tăng nau H'Mari mbah, kon tâm ndŭl mpât ro. H'Êlisabet dơi bêng ma Brah Huêng Ueh;

⁴² păng ngơi huy pô aơ: “Ay yơh geh nau ueh lăng ngăn tâm phung bu ur, kon jê̆ tâm trôm ndŭl ay đŏng dơi geh nau ueh lăng ngăn.

⁴³ Mâm ƀư gâp dơi nau khlay nây, kŏ mê̆ Kôranh Brah văch khâl gâp?

⁴⁴ Yorlah ri, tơlah gâp mhe tăng nau ay mbah, kon tâm trôm ndŭl gâp mpât rhơn.

⁴⁵ Ueh maak yơh ma ay hŏ chroh, yorlah nau Kôranh Brah mbơh jêh ma ay mra dơi tât di ngăn!”

⁴⁶ H'Mari lah: “Huêng gâp tâm rnê ma Kôranh Brah,

⁴⁷ Huêng nuih n'hâm gâp răm rhơn tâm Brah Ndu jêng Nơm Tâm Rklaih gâp,

⁴⁸ Yorlah Păng hŏ uănh yô̆ jêh kon bunuyh jê̆ lê̆ oh mon bu ur Păng. Aơ, ntơm aƀaơ tât kăndơ̆, lĕ rngôch rnôk mra rnê ma gâp jêng bunuyh geh ueh lăng ngăn;

⁴⁹ Yorlah Nơm Geh Lĕ Nau Brah ƀư jêh lĕ nau kan toyh ma gâp. Amoh Păng jêng kloh ueh,

⁵⁰ Jêh ri Păng yô̆ nđach ma phung bunuyh klach yơk mbah ma Păng, Ntơm bơh rnôk aơ tât rnôk ri.

⁵¹ Păng hŏ dŏng ti Păng ƀư lĕ nau kan nau brah; Ƀư nchah rai pru pra phung geh nau mĭn sưr rlau tâm nuih n'hâm.

⁵² Păng n'glưh nsot sưng hađăch lĕ phung chiă uănh, Jêh ri hŏ n'hao phung bunuyh dêh rhêt hao.

⁵³ Păng hŏ ƀư jêh bunuyh ji ngot geh bêng ndơ sa kah, Jêh ri mprơh phung ndrŏng plơ̆ sĭt ti dơm.

⁵⁴ Păng hŏ kơl jêh Israel, oh mon Păng, Jêh ri kah gĭt tay nau Păng yô̆ nđach.

⁵⁵ Tâm ban ma Păng hŏ ntăm jêh ma chô yau he, Ma Y-Abraham jêh ri ma noi deh păng tât lĕ rngôch rnôk n'ho ro.”

⁵⁶ H'Mari gŭ ndrel ma H'Êlisabet tâm pe khay, jêh nây plơ̆ sĭt ta ngih păng nơm.

Nau deh Y-Yôhan-Ƀaptist

⁵⁷ Nôk nây, tât nar H'Êlisabet deh kon, păng deh ma du huê kon bu klâu.

⁵⁸ Tăng lư Kôranh Brah tâm mpơl jêh nuih n'hâm yô̆ nđach toyh ma păng, phung chiau meng jêh ri phung ndŭl mpôl păng hăn tât răm maak ndrel ma păng.

⁵⁹ Tâm nar rơh pham, khân păng văch koh ntâu ma kon se jê̆ jêh ri tâm amoh Y-Sakari tĭng amoh mbơ̆ păng.

⁶⁰ Ƀiălah mê̆ păng lah: “Mâu! Tâm amoh păng Y-Yôhan.”

⁶¹ Khân păng lah: “Tâm ndŭl mpôl dăch păng, mâu geh bu amoh tâm ban pônây.”

⁶² Khân păng ôp ma mbơ̆ păng mâm ŭch tâm amoh kon se jê̆ nây.

⁶³ Y-Sakari đă hăn sŏk kađar jê̆ jêh ri nchih: “Amoh păng Y-Yôhan.” Lĕ rngôch khân păng hih rhâl.

⁶⁴ Ƀât lât, păng hă mbung, mpiăt mpât mbrơi, jêh ri păng ngơi tâm rnê ma Brah Ndu.

⁶⁵ Lĕ Bunuyh chiau meng klach da dê, jêh ri bu tâm ôp ndrăng khăn păng ma lĕ rngôch nau nây lam jŭm n'gor yôk Yuđa.

⁶⁶ Lĕ rngôch bunuyh tăng nau aơ kah gĭt tâm nuih n'hâm, jêh ri lah: “Mâm kon se jê̆ nây pakơi taơ mra jêng?” Yor nanê̆ ngăn ti Kôranh Brah gŭ ndrel ma kon se jê̆ nây.

Nau mprơ Y-Sakari

⁶⁷ Y-Sakari, mbơ̆ kon se jê̆ nây, dơi bêng ma Brah Huêng Ueh, mbơh lor pô aơ:

⁶⁸ “Tâm rnê ma Kôranh Brah, jêng Brah Ndu Israel, Yorlah Păng hŏ khâl jêh ri tâm chuai jêh phung ƀon lan Păng,

⁶⁹ Păng hŏ n'hao ma phung he, tâm ngih Y-Đavit, oh mon Păng, Du huê Nơm Tâm Rklaih bêng nau brah!

⁷⁰ Tâm ban ma Păng hŏ dŏng bâr mbung phung nơm mbơh lor kloh ueh Hŏ ton ntơm bơh rnôk kăl e,

⁷¹ Nau rklaih he bơh phung rlăng, Jêh ri bơh ti lĕ rngôch bunuyh tâm rmot đah he.

⁷² Păng tâm mpơl nuih n'hâm yô̆ nđach ma chô yau he, Jêh ri kah gĭt tay nau tâm rnglăp kloh ueh Păng,

⁷³ Nâm nau Păng hŏ sơm ton đah Y-Abraham, Jêng chô yau he,

⁷⁴ Pô aơ nôk he dơi kơl rklaih tă bơh ti phung rlăng, Păng mra ăn ma he dơi pah kan ma Păng mâu geh nau klach ôh,

⁷⁵ Tâm nau kloh ueh jêh ri nau sŏng srăng Tanăp Păng lôch du njăr rêh he.

⁷⁶ Hơi kon se jê̆, bu mra kuăl ma may jêng nơm mbơh lor ma Nơm Dŭt Prêh; May mra hăn tanăp Kôranh Brah, nkra trong ma Păng,

⁷⁷ Gay ma phung ƀon lan Păng bơh nau yô̆ an nau tih Gĭt ma nau tâm rklaih.

⁷⁸ Yor nuih n'hâm yô̆ nđach bơh Brah Ndu he, Ang ơm ôi bơh klơ prêh chop khâl he,

⁷⁹ Gay ma sol ang phung bunuyh gŭ tâm ntŭk ngo klĕng jêh ri tâm dâng gui nau khĭt, Jêh ri njŭn leo he chuat lăp trong đăp mpăn.”

⁸⁰ Kon se jê̆ nây văch ma toyh, huêng nuih n'hâm jêng ktang, gŭ rêh tâm bri rdah tât nar păng tâm mpơl tanăp phung Israel.