Kôranh Oh Mon 8 - Nau Brah Ndu Ngơi 2023

Y-Sôl ƀư mhĭk Phung Ngih Brah Ndu

¹ Y-Sôl tâm di ma nau nkhĭt Y-Êtiên. Tâm nar nây, Phung Ngih Brah Ndu tâm ƀon Yêrusalem lĕ geh nau ƀư mhĭk dŭt ngăn; lĕ rngôch phung chroh du êng êng tâm n'gor Yuđa jêh ri n'gor Samari. Hôm knŏng phung kôranh oh mon dơm.

² Phung klach yơk tâp Y-Êtiên jêh ri nhĭm nhhiăng rngot klâng ma păng âk ngăn.

³ Ƀiălah Y-Sôl ƀư rai ma Phung Ngih Brah Ndu, rduh lăp ăp ngih vâl nhŭp phung bu ur bu klâu têk leo krŭng khân păng.

Nau Mhe Mhan Ueh mbơh nkoch ta ƀon Samari. – Phung ƀŭk rƀên Y-Simôn

⁴ Pôri, phung bunuyh chah rai pru pra hăn ntơm bơh ntŭk nây tât ta ntŭk êng mbơh nkoch Nau Mhe Mhan Ueh.

⁵ Y-Philip hăn jŭr ta ƀon Samari mbơh nkoch Brah Krist ma phung ƀon lan ta nây.

⁶ Phung ƀon lan tăng nau Y-Philip mbơh jêh ri saơ nau mbên khlay păng ƀư, khân păng geh du ai nuih n'hâm ŭch iăt păng;

⁷ yorlah geh âk brah ƀơ̆ ƀơch nter ktang ngăn du luh bơh âk bunuyh geh brah mhĭk lơh; âk bunuyh ji jâng ti jêh ri bunuyh rvĕn bah da dê.

⁸ Yor nây, tâm ƀon bêng ler nau răm maak.

⁹ Rnôk nây, tâm ƀon nây geh du huê bunuyh, amoh păng Y-Simôn, kăl e ri păng ƀư nau blau rƀên, kơp êng săk jêng bunuyh dŭt toyh, ƀư ma phung ƀon lan Samari hih rhâl ngăn.

¹⁰ Lĕ rngôch bunuyh ntơm bơh kon se tât bu ranh iăt tĭng păng, lah pô aơ: “Bunuyh aơ jêng nau brah Brah Ndu, kuăl jêng Nau Dŭt Brah Ngăn.”

¹¹ Khân păng gŭ iăt nau păng, yorlah hŏ jŏ nar jêh păng sŏk nau blau rƀên ƀư ma khân păng hih rhâl.

¹² Ƀiălah dôl khân păng hŏ chroh Y-Philip, jêng bunuyh mbơh nkoch Nau Mhe Mhan Ueh ma ƀon bri hađăch Brah Ndu jêh ri amoh Brah Yêsu Krist ma khân păng, pô ri nđâp bu ur bu klâu dơn nau ƀaptem da dê.

¹³ Y-Simôn yơh chroh đŏng; jêh dơn nau ƀaptem, păng gŭ ndrel ma Y-Philip mro. Păng saơ nau khlay jêh ri nau tâm mbên khlay toyh, păng hih rhâl ngăn.

¹⁴ Phung kôranh oh mon gŭ ta ƀon Yêrusalem tăng lư phung Samari sŏk dơn jêh nau rnơm tâm Brah Ndu, khân păng njuăl Y-Pêtrôs jêh ri Y-Yôhan hăn tât ta khân păng.

¹⁵ Bar hê khân păng tât ta nây, khân păng mbơh sơm ma phung bunuyh aơ gay ma khân păng sŏk dơn Brah Huêng Ueh.

¹⁶ Yorlah Brah Huêng Ueh ê hŏ nkhŭt jŭr klơ bu ôh, knŏng khân păng sŏk dơn jêh nau ƀaptem ma amoh Brah Yêsu.

¹⁷ Y-Pêtrôs jêh ri Y-Yôhan pah ti ta khân păng, khân păng sŏk dơn Brah Huêng Ueh ro.

¹⁸ Dôl saơ phung kôranh oh mon pah ti, pôri Brah Huêng Ueh jŭr, Y-Simôn sŏk prăk ro nhhơr ma bar hê kôranh oh mon, jêh ri lah:

¹⁹ “Ăn ma gâp geh nau dơi nây, gay ma mbu nơm gâp pah ti, bunuyh nây sŏk dơn Brah Huêng Ueh.”

²⁰ Ƀiălah Y-Pêtrôs plơ̆ lah pô aơ: “Prăk may rai yot ndrel ma may, yorlah may mĭn bu dơi rvăt ma prăk nau Brah Ndu ăn!

²¹ May mâu geh du kô̆ mâu lah mâu dơi tâm pă tâm kan aơ, yorlah nuih n'hâm may mâu sŏng ôh tanăp Brah Ndu.

²² Pôri, rmal hom ma nau mhĭk may jêh ri mbơh sơm ma Kôranh Brah, gay Păng mra yô̆ an nau mĭn nây tâm nuih n'hâm may.

²³ Yorlah gâp saơ may dôl gŭ tâm play măt tăng jêh ri tâm rse rvăk tih mhĭk.”

²⁴ Y-Simôn plơ̆ lah: “Mbơh sơm hom ma Kôranh Brah an gâp, gay gâp mâu khan nau khân may lah nây.”

²⁵ Jêh nau hŏ mbơh nkoch jêh ri nti lah nau Kôranh Brah ngơi, Y-Pêtrôs ndrel ma Y-Yôhan plơ̆ sĭt ta ƀon Yêrusalem, ƀă hăn ƀă nti lah Nau Mhe Mhan Ueh tâm âk ƀon jê̆ jê̆ phung Samari.

Kôranh char Êthiôpi plơ̆ sĭt ma nau chroh

²⁶ Nôk nây, geh du huê tông mpăr Kôranh Brah ngơi ma Y-Philip: “Dâk hom may jêh ri hăn tât mpeh pa dâng, tĭng trong tă bơh ƀon Yêrusalem hăn trŭnh ta ƀon Gaxa. Trong nây mâu hôm ôh vay hăn.”

²⁷ Y-Philip dâk jêh ri hăn. Ri, geh du huê kôranh char Êthiôpi, ƀư kôranh toyh ma H'Kandas, hađăch bu ur n'gor Êthiôpi, păng mât uănh lĕ jay prăp drăp ndơ khlay ma ay. Păng văch jêh ta ƀon Yêrusalem gay ma yơk mbah;

²⁸ jêh ri dôl plơ̆ sĭt, gŭ tâm ndeh seh, rŏ ndrom samƀŭt nơm mbơh lor Y-Êsai.

²⁹ Brah Huêng Ueh lah ma Y-Philip: “Hăn dăch hom jêh ri tĭng ban ndeh seh nây.”

³⁰ Y-Philip nchuăt tĭng, păng tăng kôranh Êthiôpi rŏ ndrom samƀŭt nơm mbơh lor Y-Êsai, păng lah pô aơ: “May gĭt rbăng lĕ nau may rŏ nây mâu lah mâu?”

³¹ Kôranh char plơ̆ lah: “Mâm gâp dơi gĭt rbăng tơlah mâu geh nơm rblang an ma gâp?” Jêh nây păng jă Y-Philip ncho ndrel gŭ dăch păng.

³² Kô̆ Nau Brah Ndu Ngơi păng rŏ nây pô aơ: “Bu têk Păng tâm ban ma du mlâm biăp ta ntŭk ƀư puăch, Tâm ban ma kon biăp mlo tanăp nơm nkăp rsau, Păng mâu mâp hă mbung ôh.

³³ Tâm nôk Păng geh nau đit prêng, bu pit sŏk nau di tă bơh Păng. Mbu mra mbơh ma noi deh Păng? Yorlah nau rêh Păng bu sŏk lơi tă bơh neh ntu.”

³⁴ Kôranh nây lah ma Y-Philip: “Gâp ôp may, ma mbu nơm mbơh lor ŭch lah nau nây? Ma păng nơm mâu lah ma du huê nơm êng?”

³⁵ Y-Philip ngơi, ntơm bơh ntŭk Nau Brah Ndu Ngơi nây jêh ri nti lah Nau Mhe Mhan Ueh ma nau Brah Yêsu ma păng.

³⁶ Dôl bar hê khân păng hăn, tâm mâp ntŭk geh dak, kôranh char lah: “Aơ, dak aơ, geh lĕ nau buay gâp dơn nau ƀaptem ƀơh?”

³⁸ Păng đă nkân ndeh seh, jêh nây bar hê khân păng jŭr tâm dak da dê, jêh ri Y-Philip ƀư ƀaptem ma kôranh char.

³⁹ Dôk khân păng hao du luh tă bơh dak, Brah Huêng Ueh Kôranh Brah sŏk Y-Philip hăn; kôranh char mâu gĭt saơ păng ôh, jêh ri păng hăn tay ma nau maak.

⁴⁰ Bu saơ Y-Philip tâm ƀon Asôtus; ta trong hăn ta ƀon Sêsarê, păng mbơh nkoch Nau Mhe Mhan Ueh ma lĕ rngôch ƀon păng hŏ hăn.