Kôranh Oh Mon 6 - Nau Brah Ndu Ngơi 2023

Nau njêng bunuyh kơl kan

¹ Tâm nôk nây, rnoh phung oh mon lơ âk; phung Yuđa ngơi nau ngơi Grek ngơi ƀrôk, nduyh ma phung Yuđa ngơi nau Aram, yorlah bu chalơi mâu pă ndơ sông sa ăp nar ma phung bu ur ndrô khân păng.

² Jât ma bar kôranh oh mon kuăl rgum lĕ rngôch oh mon jêh ri lah: “Chalơi nau nti lah ma nau Brah Ndu ngơi gay ma pah kan ta sưng sông jêng nau mâu di.

³ Pôri, dăn phung oh nâu săch hom tâm phung khân may pơh nuyh geh nau lư ueh, bêng ma Brah Huêng Ueh jêh ri ma nau blau mĭn, hên mra jao nau kan aơ ma khân păng.

⁴ Bi hên, hên mra hôm djôt mro kan mbơh sơm jêh ri pah kan ma nau Brah Ndu ngơi.”

⁵ Lĕ rngôch bunuyh maak nuih n'hâm ma lĕ nau nây; khân păng hŏ săch Y-Êtiên jêng nơm bêng ma nau chroh jêh ri Brah Huêng Ueh, Y-Philip, Y-Prôkôr, Y-Nikanor, Y-Timôn, Y-Parmênas jêh ri Y-Nikôlas jêng bunuyh ƀon Antiôs tĭng nau phung Yuđa chroh.

⁶ Khân păng tâm mpơl măt pơh nuyh nây ma phung kôranh oh mon; phung kôranh oh mon mbơh sơm pah ti ma phung bunuyh nây.

⁷ Nau chroh Brah Ndu bu mbơh lơ nar lơ hao jêng; phung oh mon ta ƀon Yêrusalem bĭk rơ̆ âk râk. Âk phung kôranh ƀư brah tông ma nau chroh đŏng.

Bu phong Y-Êtiên

⁸ Y-Êtiên bêng ma nau yô̆ jêh ri nau brah, ƀư lĕ nau khlay jêh ri nau mbên khlay toyh ngăn tâm phung ƀon lan.

⁹ Nôk nây, geh ƀaƀă bunuyh tâm ngih rƀŭn rnha jêng ngih rƀŭn phung bunuyh kon me jêh ri phung bunuyh tă bơh ƀon tơm ta Siren, ta Aleksandrơ, ndrel ma phung Yuđa tă bơh n'gor Silisi jêh ri n'gor Asi, dâk jêh ri tâm rlăch đah Y-Êtiên.

¹⁰ Ƀiălah khân păng mâu dơi tâm rdâng ma nau blau mĭn jêh ri ma Brah Huêng Ueh jêng Nơm hŏ ăn ma păng lĕ nau ngơi nây,

¹¹ rĭ dĭng khân păng nsŭk nsôr ƀaƀă phung phong pô aơ: “Hên tăng jêh păng ngơi lĕ nau ngơi djơh tât ma Y-Môis jêh ri ma Brah Ndu.”

¹² Khân păng nsŭk phung ƀon lan, phung kôranh bu ranh jêh ri phung kôranh nchih samƀŭt rduh lăp nhŭp Y-Êtiên jêh ri têk leo păng tât tanăp phung Kôranh Phat Dôih.

¹³ Khân păng ăn phung mbơh nchơt mƀruh, lah pô aơ: “Bunuyh aơ vay ngơi lĕ nau ngơi djơh tât ma ntŭk kloh ueh jêh ri ma nau vay.

¹⁴ Yorlah hên hŏ tăng jêh păng lah ma Brah Yêsu, bunuyh ƀon Nasaret nây mra ƀư rai ntŭk aơ jêh ri tâm rgâl nau vay ơm Y-Môis hŏ nkoch tay ma he.”

¹⁵ Lĕ rngôch bunuyh gŭ ta phung Kôranh Phat Dôih gŭ uănh ma Y-Êtiên jêh ri saơ muh măt păng nâm bu măt tông mpăr.