Kôranh Oh Mon 3 - Nau Brah Ndu Ngơi 2023

Nau ƀư bah bunuyh rvĕn. – Nau Y-Pêtrôs nti lah

¹ Rnôk nây, Y-Pêtrôs jêh ri Y-Yôhan hăn ta ngih brah ta mông mbơh sơm pe mông mhaơ.

² Geh du huê bunuyh rvĕn ntơm bơh luh bơh ndŭl mê̆, ăp nar bu djôt leo păng ăn gŭ ta mpông ngih brah, kuăl jêng Mpông Ueh, gay dăn prăk phung bunuyh lăp tâm ngih brah.

³ Saơ Y-Pêtrôs jêh ri Y-Yôhan bơi hăn lăp tâm ngih brah, păng dăn bar hê khân păng ăn ndơ yô̆.

⁴ Y-Pêtrôs jêh ri Y-Yôhan uănh ta păng jêh ri lah: “Uănh hom ta hên.”

⁵ Păng uănh ma bar hê, nđôn lah dơn ndơ bu ăn.

⁶ Ƀiălah Y-Pêtrôs lah ma păng: “Gâp mâu geh prăk mah ôh, ƀiălah ndơ gâp geh gâp ăn ma may: Tâm amoh Brah Yêsu Krist bunuyh Nasaret, dâk hăn hom jêh ri chuat hăn.”

⁷ Y-Pêtrôs kuăn ta ti ma păng jêh ri chông ăn păng dâk. Ƀât lât bar mpang jâng jêh ri rmăng iăr jâng păng jêng nâp.

⁸ Păng ntalơ̆ klơ ro, dâk sŏng jêh ri chuat hăn ndrel bar hê khân păng lăp ndrel tâm ngih brah, hăn ƀă kdŏ ƀă, tâm rnê ma Brah Ndu.

⁹ Lĕ rngôch bunuyh saơ păng chuat hăn jêh ri tâm rnê ma Brah Ndu,

¹⁰ khân păng gĭt năl păng jêng nơm vay gŭ ta Mpông Ueh ngih brah gay dăn ndơ bu ăn yô̆. Pôri khân păng hih rhâl jêh ri mâu hôm blau mĭn ma nau tât jêh ma păng.

¹¹ Tâm nôk bunuyh nây mâu hôm kuăn ta ti Y-Pêtrôs jêh ri Y-Yôhan, lĕ rngôch bunuyh hih rhâl jêh ri nchuăt ran ta khân păng ta ntŭk bu rnha ndring Salômôn.

¹² Saơ kơt nây, Y-Pêtrôs lah ro ma phung ƀon lan: “Hơi phung kon Israel, mâm ƀư khân may hih rhâl ma nau tât ma bunuyh aơ? Mâm ƀư khân ay may ntrâng uănh ta hên tâm ban hên hŏ rnơm nau brah mâu lah nau ueh êng hên nơm gay ƀư ma bunuyh aơ dơi hăn?

¹³ Brah Ndu Y-Abraham, Brah Ndu Y-Isăk, jêh ri Brah Ndu Y-Yakôp, Brah Ndu phung chô yau he hŏ tâm rnê oh mon Păng jêng Brah Yêsu, Nơm khân may hŏ nhŭp jao jêh ri dun tanăp Pilat, tâm nôk păng ŭch yô̆ an ma Păng.

¹⁴ Khân may dun jêh Nơm Kloh Ueh jêh ri Nơm Sŏng Srăng, ƀiălah khân may dăn yô̆ an ma khân may du huê nơm vay nkhĭt bunuyh.

¹⁵ Khân may nkhĭt jêh Kôranh nau rêh, ƀiălah Brah Ndu hŏ ƀư ăn Păng dâk rêh tay tă bơh nau khĭt; hên jêng phung mbơh ma nau nây.

¹⁶ Ma nau chroh tâm amoh Păng hŏ ƀư jêh ma nơm khân may hŏ saơ jêh ri gĭt năl nây geh nau nâp ktang. Tâm amoh Păng jêh ri nau chroh tâm Păng hŏ ƀư ăn bunuyh aơ ngăch dăng ueh săk jăn nâm ơm tâm ban ma lĕ rngôch khân may hŏ saơ jêh.

¹⁷ Hơi phung oh nâu, aƀaơ gâp gĭt ma khân may jêh ri phung kôranh chiă uănh khân may hŏ ƀư nau nây yorlah pưt nau gĭt mĭn.

¹⁸ Ƀiălah Brah Ndu hŏ dŏng nau nây gay ƀư tâm di ngăn nau Păng mbơh lor tă bâr mbung phung nơm mbơh lor ma Brah Krist Păng dơn nau nđêh nji.

¹⁹ Pôri, khân may rmal hom nau tih jêh ri plơ̆ sĭt ma Brah Ndu gay ma nau tih khân ay may mra dơi lâm lơi,

²⁰ gay ma lĕ rnôk mhe Kôranh Brah ăn mra văch, jêh ri gay ma Păng njuăl Brah Krist, jêng Brah Yêsu, Nơm hŏ nal lor jêh, văch tât ma khân may.

²¹ Nơm nây mra dơi prăp klơ trôk kŏ tât rnôk lĕ rngôch ndơ njêng tay, tâm ban Brah Ndu hŏ lah ma bâr mbung phung nơm mbơh lor kloh ueh ntơm bơh rbăn năm kăl e.

²² N'hêl nanê̆ ngăn, Y-Môis lah jêh: ‘Kôranh Brah jêng Brah Ndu khân may mra n'hao tâm phung oh nâu khân may du huê Nơm mbơh lor tâm ban ma gâp jêh ri khân may mra iăt tĭng lĕ nau păng ngơi ma khân may.

²³ Tơlah mbu nơm mâu iăt Nơm mbơh lor nây mra geh nau nsot lơi tă bơh phung ƀon lan.’

²⁴ Lĕ rngôch phung nơm mbơh lor, ntơm bơh Y-Samuel tât ma phung ntrok păng, nôk hŏ ngơi nau mbơh lor jêh mra nkoch mbơh đŏng lĕ nar aơ.

²⁵ Khân may jêng kon sau phung nơm mbơh lor jêh ri nau tâm rnglăp Brah Ndu hŏ ƀư jêh đah phung chô yau he dôl Păng lah ma Y-Abraham: ‘Lĕ rngôch mpôl băl bunuyh ta klơ neh ntu mra geh nau ueh uĭn tă bơh noi deh may.’

²⁶ Brah Ndu hŏ ndâk Oh Mon Păng jêh ri njuăl Păng văch ta khân may lor, gay ăn nau ueh uĭn ma khân may, gay ma ăp nơm tâm phung khân may chalơi trong djơh mhĭk khân may nơm.”