Kôranh Oh Mon 27 - Nau Brah Ndu Ngơi 2023

Y-Pôl hăn ta ƀon Rôm

¹ Nôk hŏ ăn hên hăn trong dak mƀŭt rgăn ta n'gor Italy, bu jao Y-Pôl jêh ri ƀaƀă bunuyh bu nă êng ma du huê kôranh tahan, amoh păng Y-Julius, tâm mpôl tahan ngih hađăch Ôgust.

² Hên ncho du mlâm kumpăn tă bơh Adramit bơi hăn tât lĕ ntŭk njưh kumpăn njŏ tĭng kơh dak mƀŭt n'gor Asi, jêh ri hên hăn luh. Y-Aristarkus, du huê Masêđôn, ta ƀon Têsalônik, hăn ndrel ma hên.

³ Nar pakơi, hên tât ta ƀon Sidôn, Y-Julius ngơi nau ueh ma Y-Pôl, ăn nau dơi păng hăn khâl phung mĭt jiăng păng jêh ri gay ma ăn khân păng mât mray ma păng.

⁴ Jêh nây tă bơh nây, hên jŭr ncho kumpăn hăn tĭng kơh kôdak Syprơ, yorlah nôk nây geh sial rlơ̆.

⁵ Tơlah jêh hăn rgăn dak mƀŭt n'gor Silisi jêh ri n'gor Pamphili, hên tât ta ƀon Mira, tâm n'gor Lisi.

⁶ Ta nây, kôranh tahan saơ du mlâm kumpăn tă bơh ƀon Aleksandrơ hăn rgăn n'gor Italy, jêh ri păng ăn hên ncho kumpăn nây.

⁷ Hên ncho kumpăn hăn mbrơi tâm jŏ nar jêh ri ma nau jêr ngăn ri mơ tât ƀon Knidus. Yorlah rlơ̆ sial mâu ăn kumpăn hăn ngai rlau lơn, pôri hên hăn văch dăch kơh kôdak Kret, hăn rgăn ƀon Salmôn.

⁸ Hên hăn rgăn njŏ tĭng kơh dak mƀŭt ma nau jêr jêh ri tât ta du ntŭk bu rnha jêng Ntŭk Njưh Kumpăn Ueh, dăch ta ƀon Lasê.

⁹ Hên hŏ roh âk nar jêh ri nau hăn trong plơ̆ jêng ma nau jêr, yorlah yan Ât sông sa hŏ rlau jêh, yor nây Y-Pôl mbơh lor ma khân păng

¹⁰ pô aơ: “Hơi khân may, gâp saơ nau hăn trong nanê̆ mra geh nau jêr ngăn jêh ri nau roh, mâu di knŏng ma drăp ndơ jêh ri kumpăn, ƀiălah nđâp ma săk jăn he nơm đŏng.”

¹¹ Ƀiălah kôranh tahan tông ngăn nau nơm ƀĭt gai kumpăn jêh ri kôranh kumpăn rlau lơn ma nau Y-Pôl.

¹² Yorlah ntŭk njưh kumpăn mâu ueh ăn kumpăn gŭ rlu dôl tâm yan puh. Pôri âk bunuyh du nau mĭn ăn kumpăn du tă bơh nây; nsrôih hăn tât ta ƀon Phênik, ntŭk njưh kumpăn ta kôdak Kret, ma mpeh nhâp nar pa dâng jêh ri mpeh nhâp nar pa lơ, gay ăn kumpăn veh gŭ ta nây dôl yan sĭt puh ta nây.

¹³ Nôk geh sial pa dâng ntơm khôm đê̆ đê̆, khân păng mĭn lah dơi ƀư nau dăp, pôri khân păng yơk loih nkân kumpăn jêh ri ncho hăn njŏ tĭng kôdak Kret.

Phŭt chuănh jêh ri kumpăn ngâm

¹⁴ Ƀiălah ƀât lât ta nây, geh phŭt chuănh bu rnha Ơrakilôn khôm leo bơh kôdak nây.

¹⁵ Sial khôm kumpăn hăn jêh ri mâu hôm dơi tâm rdâng đah sial ktang ôh, pôri hên ăn kumpăn hăn tĭng nâm sial rdu yơh.

¹⁶ Nôk kumpăn rdu tât mpeh pa dâng du kôdak jê̆ amoh Klôda, dŭt jêr ngăn ri mơ hên dơi mât n'gang du mlâm plŭng rklaih rêh.

¹⁷ Jêh têk plŭng leo klơ, khân păng sŏk rse kât nâp jŭm kumpăn; yorlah klach khan ta choih klơ kơh Sirtơ, yor ri khân păng njŭr bok ta klơ kumpăn, kđôi ăn sial khôm rdu.

¹⁸ Nar ôi taơ, phŭt chuănh ăt hôm khôm ktang, khân păng ntơm klŭp mƀăr drăp ndơ trŭnh tâm dak mƀŭt.

¹⁹ Nar tal pe, khân păng klŭp mƀăr lĕ ndơ dŏng klơ kumpăn tâm dak mƀŭt.

²⁰ Dôl tâm lĕ nar, mâu geh nar, mâu geh mănh mbing mpơl, jêh ri phŭt chuănh ăt khôm ktang ngăn. Nglĕ dŭt, hên mâu hôm kâp gân ma nau dơi klaih ôh.

²¹ Yorlah khân păng ât ji ngot jŏ nar jêh, pôri Y-Pôl dâk ta nklang khân păng jêh ri lah: “Hơi khân may, tơlah nar panăp aơ dơh khân may iăt nau gâp, lơi ta du luh tă bơh kôdak Kret, he dơi der nau mhĭk jêh ri nau roh aơ.

²² Ƀiălah aƀaơ, gâp ntăm ma khân may nâp hom nuih n'hâm; tâm phung khân may mâu geh nơm khĭt ôh, knŏng roh kumpăn dơm!

²³ Yorlah măng ndơh, geh du huê tông mpăr Brah Ndu, Nơm gâp jêng bunuyh ma Păng jêh ri pah kan, tâm mpơl ma gâp jêh ri lah:

²⁴ ‘Hơi Y-Pôl lơi klach ôh! May mra hăn tât tanăp Sêsar; jêh ri aơ, Brah Ndu hŏ ăn ma may lĕ rngôch phung ncho kumpăn ndrel ma may.’

²⁵ Pôri dăn khân may nâp hom nuih n'hâm, yorlah gâp chroh nanê̆ ma Brah Ndu nau nây mra tât di nâm bu nau Păng lah jêh.

²⁶ Ƀiălah nanê̆ he mra khôm du tât ta du ntŭk kôdak.”

²⁷ Tât măng rơh jât ma puăn jêh hên ăt hôm nthông ta dak mƀŭt Adritik. Dôl klong măng, phung bunuyh ƀĭt kumpăn ntôn lah khân păng dăch tât ta kơh.

²⁸ Khân păng nklăch rse veh trŭnh jêh ri saơ jru bar jât laih, hăn ngai djê̆ đŏng, khân păng nklăch rse veh trŭnh tay jêh ri saơ jru jât ma prăm laih.

²⁹ Nôk nây, klach kumpăn tom ta ntŭk geh lŭ, pôri khân păng tă bơh bôl kumpăn nklăch puăn mlâm loih, jêh ri mbơh sơm dăn gay ma trôk gơnh ang.

³⁰ Ƀiălah yorlah phung bunuyh ƀĭt kumpăn joi nau nchuăt du bơh kumpăn, pôri nklăch plŭng ntrŭnh tâm dak mƀŭt, jan lah hăn nklăch mlâm loih nkân ta bôk kumpăn.

³¹ Yor nây, Y-Pôl lah ma kôranh tahan jêh ri phung tahan: “Khân may mâu dơi klaih ôh, knŏng tơlah phung bunuyh aơ ăt hôm gŭ tâm kumpăn.”

³² Nôk nây, phung tahan koh lơi rse kât plŭng nây, ăn păng tŭp.

³³ Dôl trôk bơi ang, Y-Pôl đă lĕ rngôch bunuyh sông sa. Păng lah: “Khân may hŏ kâp gân jêh ƀaƀơ jât ma puăn nar, ji ngot mâu geh sông sa.

³⁴ Pôri, gâp nkah khân may sông sa hom gay klaih nau rêh khân may, yorlah mâu geh du rse sŏk ta klơ bôk khân may mra roh rai.”

³⁵ Jêh ngơi pônây, Y-Pôl sŏk piăng let, dâk tanăp lĕ rngôch bunuyh, lah ueh ma Brah Ndu, jêh nây nkê̆ch jêh ri ntơm sa.

³⁶ Rnôk nây lĕ rngôch n'hao nuih n'hâm jêh ri sông sa yơh.

³⁷ Hên geh lĕ rngôch bar rhiăng pơh jât ma prao nuyh tâm kumpăn.

³⁸ Lôch sa hơm jêh, khân păng klŭp mƀăr ba ƀlê tâm dak mƀŭt, gay ma n'gơch oi kumpăn.

³⁹ Tât ang ôi, khân păng mâu gĭt năl neh nây ôh, ƀiălah saơ ntŭk dak rnhuĭl geh kơh choih, rĭ dĭng ŭch mĭn nkân kumpăn ta nây.

⁴⁰ Pôri, khân păng doh lơi rse kât mlâm loih nkân, chalơi trŭnh tâm dak mƀŭt, ndrel rnôk nây mƀơk lĕ rse kât ndơ gai kumpăn; jêh nây khân păng n'hao bok ta klơ kumpăn di tĭng sial rdu, gay hăn ta kơh.

⁴¹ Ƀiălah kumpăn nchuăt tom choih mŭr, khan ta choih. Yor ri bôk kumpăn chŏl khan tâm choih, mâu blau mpât ôh, bi bôl kumpăn dak rbuh njach ktang ƀư nchah hăch lĕ ƀhiau.

⁴² Nôk nây phung tahan mĭn ŭch nkhĭt lơi phung bu nă gay mâu geh du huê bunuyh dơi re tât ta kơh jêh ri nchuăt du.

⁴³ Ƀiălah kôranh tahan ŭch rklaih Y-Pôl rĭ dĭng buay lơi nau ŭch mĭn nây. Păng ntăm ma phung blau re nsăt lor tâm dak jêh ri re tât ta kơh;

⁴⁴ phung hôm tĭng groi pakơi, bunuyh hao ta klơ kađar, nơm hao ta mpir kumpăn. Pôri lĕ rngôch khân păng tât ta kơh tâm nau đăp mpăn.