Kôranh Oh Mon 23 - Nau Brah Ndu Ngơi 2023

¹ Y-Pôl uănh thâng ma Mpôl Kôranh Phat Dôih jêh ri lah: “Hơi phung oh nâu, tanăp Brah Ndu, gâp gŭ rêh jêh ma nuih n'hâm sŏng tât ta nar aơ.”

² Nôk nây, kôranh ƀư brah toyh lơn Y-Ananias đă nơm gŭ dăch, tap ta mbung Y-Pôl.

³ Y-Pôl lah: “Hơi mpêr mhĭng klo nglang ri, Brah Ndu mra dong may. May gŭ gay ma phat dôih gâp tĭng nâm nau vay, ƀiălah may rlau nau vay, đă bu dong gâp.”

⁴ Phung gŭ dăch ta nây lah: “May suai rak kôranh ƀư brah toyh lơn bơh Brah Ndu hĕ?”

⁵ Y-Pôl plơ̆ lah: “Hơi phung oh nâu, gâp mâu gĭt ôh păng jêng kôranh ƀư brah toyh lơn; yorlah geh nau nchih jêh pô aơ: ‘Lơi bêk prêng ma kôranh chiă uănh phung ƀon lan khân may.’ ”

⁶ Y-Pôl gĭt geh ƀaƀă tâm phung khân păng jêng phung Sađusê, ƀaƀă êng jêng phung Pharisi, păng nter tanăp Mpôl Kôranh Phat Dôih: “Hơi phung oh nâu, gâp jêng bunuyh Pharisi, kon bunuyh Pharisi. Yor nau kâp gân ma nau dâk rêh tay tă bơh nau khĭt bu phat dôih gâp.”

⁷ Jêh păng ngơi pônây, phung Pharisi tâm rlăch đah phung Sađusê, jêh ri Mpôl Kôranh Phat Dôih ta nây geh nau tâm pă.

⁸ Yorlah phung Sađusê, lah mâu geh nau dâk rêh tay ôh, mâu lĕ geh tông mpăr mâu lah brah huêng; ƀiălah phung Pharisi chroh lĕ ma bar ntil nau nây.

⁹ Pôri geh nau tâm rlăch ngơi nteh ngăn. Ƀaƀă kôranh nchih samƀŭt mpeh Pharisi dâk jêh ri tâm dun hâu ngăn pô aơ: “Hên joi mâu saơ ôh du ntil nau tih tâm bunuyh aơ. Gĭt lah brah huêng mâu lah tông mpăr ngơi đah păng?”

¹⁰ Yor nau rlăch nây lơ hô jêng ngơi tâm ndăng, kôranh chiă uănh klach phung ƀon lan ƀư rai săk jăn Y-Pôl, ntrŭnh ma tahan păng jŭr, pit sŏk leo Y-Pôl luh tă bơh khân păng jêh ri djôt lăp ta pôih.

¹¹ Măng ôi taơ, Kôranh Brah tâm mpơl ma Y-Pôl jêh ri lah: “Gŭ nâp hom! Tâm ban ma may hŏ mbơh nkoch nau Gâp ta ƀon Yêrusalem, may mra mbơh nkoch ta ƀon Rôm tâm ban lĕ.”

Phung Yuđa tâm nchră nkhĭt Y-Pôl

¹² Nar ôi taơ, phung Yuđa rƀŭn tâm nchră jêh ri sơm ton ndrăng khân păng pô aơ khân păng mâu sông sa mâu nhêt tât khân păng dơi nkhĭt Y-Pôl.

¹³ Geh rmeh puăn jât nuyh tâm nchră nây.

¹⁴ Khân păng văch ma phung kôranh ƀư brah toyh jêh ri phung kôranh bu ranh, lah pô aơ: “Hên hŏ sơm ton ndrăng hên nơm, mâu mra sông sa ôh, tât hên dơi nkhĭt Y-Pôl.

¹⁵ Pôri aƀaơ, khân may đah Mpôl Kôranh Phat Dôih dăn hom ma kôranh chiă uănh ăn njŭn leo Y-Pôl tanăp khân may, n'hi săk tâm ban khân may ŭch sek uănh ma nau păng ƀư ăn di; bi hên hŏ ndrăp nkra nŭm jêh gay nkhĭt păng êlor păng tât ta aơ.”

¹⁶ Ƀiălah, kon bu klâu ruh Y-Pôl gĭt nau tâm nchră nây, păng hăn lăp tâm pôih mbơh lor ma Y-Pôl.

¹⁷ Y-Pôl kuăl du huê kôranh tahan jêh ri lah: “Njŭn leo bu klâu ndăm aơ văch ma kôranh chiă uănh, yorlah păng geh nau ŭch mbơh.”

¹⁸ Pôri, kôranh tahan njŭn bu klâu ndăm hăn, njŭn leo tât kôranh chiă uănh jêh ri lah: “Du huê bu nă amoh păng Y-Pôl, kuăl gâp njŭn bu klâu ndăm aơ ma may, yorlah păng geh nau ŭch mbơh ma may.”

¹⁹ Kôranh chiă uănh kuăn ta ti bu klâu ndăm, leo păng ta ntŭk êng jêh ri ôp: “Moh nau may ŭch mbơh ma gâp?”

²⁰ Bu klâu ndăm ơh: “Phung Yuđa du ai tâm chră jêh dăn ma may, ôi taơ njŭn Y-Pôl tanăp Mpôl Kôranh Phat Dôih, n'hi săk tâm ban ma khân păng ŭch sek uănh nanê̆ ma nau nây.

²¹ Ƀiălah lơi may iăt nau phung nây, yorlah geh rmeh puăn jât nuyh tâm phung khân păng, hŏ tâm nchră jêh gay ƀư ƀai ma Y-Pôl. Khân păng hŏ sơm ton mâu sông sa mâu nhêt tât khân păng dơi nkhĭt Y-Pôl; aƀaơ khân păng rơm ndrăp, knŏng kâp may dơn nau dơm.”

²² Kôranh chiă uănh ăn bu klâu ndăm nây sĭt jêh ri ntĭnh: “Lơi ăn bu gĭt lĕ nau may hŏ mbơh jêh ma gâp!”

Bu njŭn Y-Pôl tât kôranh n'gor Phêlik

²³ Kôranh chiă uănh toyh kuăl bar hê kôranh tahan jêh ri ntĭnh: “Ta sĭn mông măng ta oi, hŏ ndrăp nkra nŭm jêh bar rhiăng tahan hăn jâng, pơh jât nuyh tahan ncho seh jêh ri bar rhiăng nuyh tahan djôt tak, mra hăn ta ƀon Sêsarê.

²⁴ Nkra đŏng seh gay njŭn Y-Pôl, hăn ta kôranh n'gor Phêlik ma nau đăp mpăn.”

²⁵ Păng nchih ma kôranh n'gor du samƀŭt pô aơ:

²⁶ “Klôt Lysias njuăl ma kôranh n'gor Phêlik. Mbah kôranh n'gor!

²⁷ Phung Yuđa nhŭp jêh bunuyh aơ, gay ŭch nkhĭt lơi, gâp tât di mông ndrel ma phung tahan sâm rklaih păng, yorlah gâp gĭt păng jêng du huê phung Rôm.

²⁸ Gâp gĭt rah vah moh nau khân păng phong păng, gâp đă bu njŭn păng tanăp phung Mpôl Kôranh Phat Dôih.

²⁹ Gâp saơ nau bu phong păng ma lĕ nau tât ma nau vay khân păng, ƀiălah păng mâu mâp ƀư tih khư ma nau khĭt mâu lah krŭng ôh.

³⁰ Ƀiălah gâp gĭt phung Israel tâm nchră ƀư djơh ma păng, pôri gâp njuăl păng ma may văch tanăp may ro, jêh ri gâp ntrŭnh ma phung phong păng hăn ngơi tanăp may gay nkoch mbơh nau nchih samƀŭt phong.”

³¹ Pônây, phung tahan tông nau ntăm, djôt leo Y-Pôl hăn dôl măng jêh ri njŭn păng tât ta ƀon Antipatris.

³² Nar ôi taơ, phung tahan ncho seh hăn ndrel ma Y-Pôl, bi lĕ mpôl tahan êng plơ̆ sĭt ta pôih.

³³ Tât ta ƀon Sêsarê, khân păng ăn samƀŭt jêh ri jao Y-Pôl ma kôranh n'gor.

³⁴ Jêh rŏ samƀŭt, kôranh n'gor ôp ntŭk Y-Pôl gŭ; nôk gĭt Y-Pôl jêng bunuyh tă bơh n'gor Silisi

³⁵ păng lah: “Ndah jŏ phung phong may văch ta aơ, gâp mra sek uănh nau may.” Jêh ri kôranh n'gor đă bu krŭng Y-Pôl tâm ngih hađăch Hêrôt.