Kôranh Oh Mon 2 - Nau Brah Ndu Ngơi 2023

Brah Huêng Ueh jŭr

¹ Tât nar Pantơkôt lĕ rngôch khân păng tâm rƀŭn du ntŭk.

² Ƀât lât, geh nteh tă bơh trôk tâm ban ma nteh sial khôm hut hut, bêng ngih khân păng gŭ tâm rƀŭn.

³ Dôl nây khân păng saơ mpiăt nâm bu mpiăt ŭnh mpơl, tâm nkhah jêh ri gŭ ta klơ ăp nơm tâm khân păng.

⁴ Lĕ rngôch khân păng bêng ma Brah Huêng Ueh, jêh ri ngơi nau bu năch êng êng tĭng nâm Brah Huêng Ueh ăn ma khân păng ngơi.

⁵ Nôk nây geh phung Yuđa, phung sŏng srăng, bơh phung ƀon lan chiau meng văch njưh gŭ tâm ƀon Yêrusalem.

⁶ Tơlah tăng nteh nây, phung ƀon lan văch ran jêh ri hih rhâl ngăn, yorlah ăp nơm tăng phung oh mon ngơi nau ngơi tâm n'gor khân păng nơm.

⁷ Khân păng hih rhâl ngăn jêh ri ôp ndrăng khân păng: “Lĕ rngôch phung bunuyh dôl ngơi nây, mâu di khân păng jêng phung Galilê hĕ?

⁸ Mâm ƀư ăp nơm phung he tăng khân păng ngơi nau ngơi tâm n'gor he nơm?

⁹ Ƀaƀă phung Parthê, Mêđơ, Êlamit, phung gŭ ta Mêsôpôtami, n'gor Yuđa, n'gor Kapadôs, Pôntus, Asi,

¹⁰ Phriji, Pamphili, Êjipt, Libi dăch Siren; ƀaƀă bu năch nsong văch tă bơh ƀon Rôm,

¹¹ nđâp ma phung Yuđa mâu lah phung mhe tĭng nau phung Yuđa chroh, phung Kret, phung Arap, he tăng khân păng ngơi lĕ nau brah tă bơh Brah Ndu ma nau ngơi n'gor he nơm.”

¹² Lĕ rngôch bunuyh hih rhâl ngăn jêh ri rŭng răng da dê, lah ndrăng khân păng nơm: “Moh nau geh ntĭt aơ?”

¹³ Ƀiălah geh nơm mưch pô aơ: “Khân păng lĕ nhŭl jêh ndrănh mhe.”

Nau Y-Pêtrôs nti lah

¹⁴ Ƀiălah Y-Pêtrôs dâk ndrel ma jât ma nguay kôranh oh mon, Păng ngơi huy ma phung ƀon lan: “Hơi phung oh nâu jêng phung Yuđa jêh ri lĕ rngôch bunuyh gŭ ta ƀon Yêrusalem! Ăn khân may gĭt rah vah nau aơ jêh ri rkêng tôr iăt nau gâp ngơi:

¹⁵ Phung bunuyh aơ mâu geh nhŭl ndrănh ôh, nâm bu khân may mĭn, yorlah aƀaơ aơ geh knŏng sĭn mông ôi nôk nar!

¹⁶ Ƀiălah aơ jêng nau Kôranh Brah hŏ lah ma nơm mbơh lor Y-Yôel:

¹⁷ ‘Brah Ndu lah: tâm lĕ nar nglĕ dŭt, Gâp mra nkhŭt Brah Huêng Ueh Gâp ta klơ lĕ rngôch nglay săk; Phung kon bu ur jêh ri phung bu klâu khân may mra mbơh lor, Phung bu klâu ndăm mra saơ nau tâm saơ, Jêh ri phung bu ranh mra saơ nau mbơi.

¹⁸ Di ngăn, tâm lĕ nar nây, Gâp mra nkhŭt Brah Huêng Ueh Gâp ta phung oh mon bu ur jêh ri bu klâu Gâp, Jêh ri khân păng mra ngơi nau mbơh lor.

¹⁹ Gâp mra ƀư lĕ nau khlay ta klơ trôk, Jêh ri nau mbên khlay ta neh ntu tâm dâng, nâm bu ntĭt mham, ŭnh, jêh ri nhhŭk ŭnh;

²⁰ Nar mra plơ̆ jêng ngo klĕng, Khay mra jêng mham Lor tât nar dŭt toyh jêh ri chrêk rmah Kôranh Brah.

²¹ Jêh ri mbu nơm kuăl dăn amoh Kôranh Brah mra dơi rklaih.’

²² Hơi phung Israel, iăt hom nau gâp ngơi aơ: Brah Yêsu bunuyh Nasaret, Nơm Brah Ndu mbơh ăn nanê̆ tanăp khân may ma lĕ kan nau brah, ma nau khlay jêh ri nau mbên khlay. Bơh Păng, Brah Ndu hŏ ƀư lĕ nau nây ta nklang khân may nâm bu khân may hŏ gĭt rah vah jêh.

²³ Bu nhŭp jao Păng tĭng nau dăp ƀư hŏ dăp nal jêh ri tĭng nau Brah Ndu gĭt lor, khân may hŏ manh ti phung djơh mhĭk pâng Păng klơ si tâm rkăng jêh ri nkhĭt Păng.

²⁴ Ƀiălah Brah Ndu ƀư ăn Păng dâk rêh tay, tâm rklaih Păng tă bơh nau nđêh nji ma nau khĭt, yorlah nau khĭt mâu dơi nhŭp kân Păng ôh.

²⁵ Yorlah Y-Đavit lah jêh ma Păng: ‘Gâp saơ Kôranh Brah gŭ tanăp gâp, Yorlah Păng gŭ mpeh pa ma gâp, yor ri gâp mâu mra mpât n'gơ ôh.

²⁶ Yor nây, nuih n'hâm gâp maak, mpiăt gâp răm rhơn, Jêh ri săk jăn gâp mra rlu tâm nau kâp gân.

²⁷ Yorlah Kôranh Brah mâu mra chalơi huêng gâp tâm ƀon phung khĭt, Mâu đŏng ăn ma Nơm Kloh Ueh May saơ nau roh rai.

²⁸ May hŏ ăn gâp gĭt trong nau rêh, Mra ƀư ăn gâp bêng ler ma nau răm maak tanăp May.’

²⁹ Hơi phung oh nâu, gâp dơi ngơi rah vah ma khân may pô aơ chô yau Y-Đavit jêng bunuyh khĭt jêh, bu tâp păng ta môch jêh ri môch păng hôm tât aƀaơ ta nklang phung he.

³⁰ Ƀiălah păng jêng nơm mbơh lor, gĭt jêh ma Brah Ndu lĕ ton jêh pô aơ Păng mra ăn du huê bunuyh jêng noi deh păng gŭ ta sưng hađăch păng nơm.

³¹ Yor nây, păng hŏ saơ lor jêh ri lah ma nau Brah Krist dâk rêh tay pô aơ: Bu mâu chalơi Păng tâm ƀon phung khĭt ôh, Săk jăn Păng mâu dơi saơ nau ôm rai ôh.

³² Brah Ndu hŏ ƀư ăn Brah Yêsu aơ dâk rêh tay; lĕ rngôch phung hên jêng nơm mbơh ma nau nây.

³³ Pôri, jêh geh nau yơk mpeh pa ma Brah Ndu jêh ri sŏk dơn nau ton ma Brah Huêng Ueh tă bơh Mbơ̆, Păng nkhŭt Brah Huêng Ueh tâm ban ma khân may saơ jêh ri tăng.

³⁴ Yorlah hađăch Đavit ê mâp hao ta klơ trôk ôh, ƀiălah păng nơm hŏ lah jêh: ‘Kôranh Brah lah jêh ma Kôranh Brah gâp pô aơ: Gŭ hom pa ma Gâp,

³⁵ Kŏ tât nôk Gâp dơm phung rlăng may ƀư rnơl chrong jâng ma may.’

³⁶ Yor nây, lĕ ngih Israel gĭt hom nanê̆ ma Brah Ndu aơ, Nơm khân may pâng kđĭn jêh klơ si tâm rkăng, Brah Ndu hŏ n'hao jêng Kôranh Brah jêh ri Brah Krist.”

³⁷ Jêh tăng nau ngơi nây, nuih n'hâm khân păng rngot, khân păng ôp Y-Pêtrôs ro jêh ri phung kôranh oh mon êng pô aơ: “Hơi phung oh nâu, moh nau hên mra ƀư?”

³⁸ Y-Pêtrôs plơ̆ lah: “Rmal hom nau tih, ăn ăp nơm khân may dơn nau ƀaptem tâm amoh Brah Yêsu Krist gay geh nau yô̆ an nau tih khân may nơm, jêh nây mra sŏk dơn ndơ jêng Brah Huêng Ueh ăn.

³⁹ Yorlah nau ton nây prăp ma khân may, ma phung kon sau khân may, jêh ri ma lĕ rngôch bunuyh gŭ ngai, jêng lĕ rngôch bunuyh Kôranh Brah jêng Brah Ndu he mra kuăl.”

⁴⁰ Y-Pêtrôs dŏng âk nau mbơh nkoch gay ma nsŭk nsôr khân păng pô aơ: “Khân may rklaih hom khân may nơm klaih tă bơh phung ndŭl mpôl tih mhĭk aơ!”

⁴¹ Pôri, phung bunuyh dơn nau ngơi nây, dơn nau ƀaptem da dê, jêh ri tâm nar nây, geh klăp lah pe rbăn nuyh ntop tâm Phung Ngih Brah Ndu.

Nau tâm rnglăp ndrel jêh ri nau rŏng phung chroh lor lơn

⁴² Phung chroh nsrôih djôt prăp nau phung kôranh oh mon nti, nau tâm rnglăp ndrăng oh nâu, rƀŭn nkê̆ch piăng let, jêh ri nau mbơh sơm.

⁴³ Lĕ rngôch bunuyh klach yơk da dê jêh ri geh âk nau khlay jêh ri nau mbên khlay phung kôranh oh mon hŏ ƀư.

⁴⁴ Lĕ rngôch phung chroh rgum tâm mâp ndrel jêh ri sŏk lĕ rngôch ndô ndơ ƀư jêng ndrel.

⁴⁵ Khân păng tăch mir, ngih jêh ri drăp ndơ khân păng, tâm pă ndrăng khân păng ăp nơm tĭng nâm nau ăp nơm ŭch.

⁴⁶ Ăp nar, khân păng gơih văch tât ngih brah; jêh ri ntơm bơh ngih aơ tât ta ngih êng, khân păng nkê̆ch piăng let jêh ri sông sa ndrel ma nau răm maak jêh ri ma nuih n'hâm nanê̆,

⁴⁷ tâm rnê ma Brah Ndu jêh ri geh nau yô̆ tanăp lĕ rngôch bunuyh. Ăp nar, Kôranh Brah ntop rnoh bunuyh dơi rklaih lăp tâm Phung Ngih Brah Ndu.