Kôranh Oh Mon 16 - Nau Brah Ndu Ngơi 2023

Y-Timôthê hăn tĭng Y-Pôl

¹ Y-Pôl hăn ta ƀon Đerbơ jêh ri ta ƀon Listrơ. Ta nây, geh du huê oh mon, amoh păng Y-Timôthê, kon bu klâu du huê bu ur chroh bunuyh Yuđa, jêh ri mbơ̆ păng jêng bunuyh Grek.

² Phung oh nâu ta ƀon Listrơ jêh ri ta ƀon Ikôni mbơh nkoch nau ueh da dê ma Y-Timôthê.

³ Y-Pôl ŭch djôt leo Y-Timôthê hăn ndrel; pôri păng koh ntâu nơm nây, yorlah phung Yuđa gŭ tâm lĕ ntŭk nây gĭt mbơ̆ păng jêng bunuyh Grek.

⁴ Nôk hăn rgăn lĕ ƀon, khân păng ntĭnh ma phung chroh djôt prăp lĕ nau ntĭnh phung kôranh oh mon jêh ri phung kôranh bu ranh tâm ƀon Yêrusalem hŏ ƀư jêh.

⁵ Yor nây, lĕ Phung Ngih Brah Ndu dơi nâp tâm nau chroh, jêh ri rnoh phung chroh ăp nar lơ âk lơn.

Y-Pôl geh nau tâm saơ

⁶ Khân păng hăn rgăn lam n'gor Phriji jêh ri n'gor Galati, yorlah Brah Huêng Ueh buay jêh khân păng mbơh Nau Brah Ndu Ngơi tâm n'gor Asi.

⁷ Nôk dăch tât ma n'gor Misi, khân păng srôih lăp tâm n'gor Bithini, ƀiălah Brah Huêng Ueh Brah Yêsu mâu ăn nau dơi

⁸ pôri khân păng hăn rgăn n'gor Misi jêh ri jŭr ta ƀon Trôas.

⁹ Dôl măng, Y-Pôl geh nau saơ pô aơ: Geh du huê bunuyh Masêđôn dâk tanăp păng jêh ri dăn lah pô aơ: “Dăn may rgăn ta n'gor Masêđôn kơl hên!”

¹⁰ Nôk Y-Pôl saơ nau tâm saơ nây, ƀât lât hên joi nau rgăn ta n'gor Masêđôn, yorlah hên gĭt Kôranh Brah kuăl jêh hên mbơh nkoch Nau Mhe Mhan Ueh ta nây.

Ta ƀon Philip. – H'Lidi sĭt chroh

¹¹ Pôri, luh tă bơh ƀon Trôas, hên ncho kumpăn hăn tât ta kôdak Samôtras; nar ôi taơ, ta ƀon Nêapôlis;

¹² tă bơh nây, hên hăn ta ƀon Philip, du ƀon lor lơn tâm n'gor Masêđôn, jêng n'gor phung Rôm chiă uănh. Hên gŭ ta nây bar pe nar.

¹³ Tâm nar saƀat, hên luh padih mpông ƀon, dăch kơh dak krong, jêng ntŭk hên mĭn ta nây geh ntŭk bu tâm rƀŭn mbơh sơm. Hên gŭ jêh ri mbơh nkoch ma phung bu ur tâm rƀŭn ta nây.

¹⁴ Geh du huê bu ur iăt hên, amoh păng H'Lidi, bơh ƀon Thiatir, vay tăch bok chăng krăk, jêng bunuyh yơk mbah ma Brah Ndu. Kôranh Brah pơk nuih n'hâm H'Lidi ƀư ăn păng rkêng tôr iăt nau Y-Pôl ngơi.

¹⁵ Tơlah păng dơn nau ƀaptem jêh ndrel ma phung tâm ngih păng, H'Lidi jă hên: “Tơlah khân may mĭn ma gâp răp jăp đah Kôranh Brah, dăn lăp gŭ hom tâm ngih gâp.” Jêh ri păng nchâp hên lăp.

Bu krŭng Y-Pôl jêh ri Y-Silas – Kôranh bu nă sĭt chroh

¹⁶ Du nar, hên hăn tât ntŭk mbơh sơm, hên tâm mâp đah du huê oh mon bu ur geh brah mhĭk Pithôn lăp jêh ri păng n'hao ndrŏng ma kôranh păng tâm nau n'hŭm pol.

¹⁷ Păng hăn tĭng pakơi Y-Pôl jêh ri hên, nter huy: “Phung bunuyh aơ jêng phung oh mon Brah Ndu Dŭt Prêh, nkoch mbơh ma khân may nau tâm rklaih.”

¹⁸ Păng ƀư pônây mro tâm âk nar ƀư ăn Y-Pôl mâu maak ôh, n'gĭl uănh jêh ri lah ma brah mhĭk pô aơ: “Tâm amoh Brah Yêsu Krist, du luh hom may tă bơh bu ur aơ.” Ta mông nây ro, brah mhĭk du luh.

¹⁹ Ƀiălah dôl phung kôranh bu ur nây saơ mâu hôm geh nau joi âk prăk đŏng ôh, nhŭp Y-Pôl ndrel ma Y-Silas, têk khân păng tât ta nkual toyh jao ma phung kôranh chiă uănh.

²⁰ Nôk njŭn leo phung nây tanăp phung kôranh phat dôih, khân păng phong: “Phung bunuyh aơ jêng phung Yuđa ƀư nau rŭng răng toyh tâm ƀon he,

²¹ ntĭm nti lĕ nau vay he mâu dơi vay dơn mâu lah tĭng ƀư, yorlah he jêng phung Rôm.”

²² Phung âk plơ̆ dâk tâm rdâng ma bar hê khân păng; phung kôranh phat dôih đă bu nkhêk ao khân păng jêh ri dong ma mâng.

²³ Jêh dong ma mâng, khân păng krŭng bar hê khân păng tâm ndrung jêh ri ntăm ma kôranh ndrung gak njrăng ăn ueh.

²⁴ Jêh tăng nau đă nây, kôranh ndrung krŭng bar hê khân păng tâm ndrung ngo jêh ri nkông jâng.

²⁵ Klăp lah n'gul măng, Y-Pôl jêh ri Y-Silas mbơh sơm jêh ri mprơ tâm rnê ma Brah Ndu; phung bu nă gŭ iăt.

²⁶ Ƀât lât, geh nau n'găr neh ntu dăng ngăn, kŏ tât lĕ mbon ngih ndrung n'gơ lĕ. Ƀât lât, lĕ rngôch mpông pơk da dê, rse rvăk phung bu nă tŭp lĕ rngôch.

²⁷ Kôranh ndrung kah rngăl saơ lĕ mpông ngih ndrung pơk da dê, păng ntôn phung bu nă nchuăt du lĕ, yor ri păng tăk đao ŭch nkhĭt êng săk nơm.

²⁸ Ƀiălah Y-Pôl nter huy hâu ngăn: “Lơi ƀư djơh ma may nơm ôh! Hên ăt hôm tâm aơ da dê!”

²⁹ Kôranh ndrung đă bu sŏk ŭnh kađen jêh ri nchuăt ngăch lăp tâm ndrung, râm nsâr chon mon ta jâng Y-Pôl jêh ri Y-Silas.

³⁰ Jêh nây păng ăn phung nây du luh jêh ri ôp: “Hơi phung kôranh, mâm gâp mra ƀư gay dơi tâm rklaih?”

³¹ Bar hê khân păng plơ̆ lah “Chroh hom ma Kôranh Brah jêng Brah Yêsu, may jêh ri lĕ rnăk vâl may mra dơi rklaih.”

³² Bar hê kôranh oh mon mbơh nau Kôranh Brah ngơi ma nơm nây jêh ri ma lĕ rngôch phung bunuyh gŭ tâm ngih păng.

³³ Tâm măng nây, ta mông nây, kôranh ndrung djôt leo bar hê khân păng luh gay ma sâm rao lĕ sôt rmanh; jêh ri păng ndrel ma lĕ rnăk vâl dơn nau ƀaptem ro.

³⁴ Kôranh ndrung jă bar hê khân păng lăp tâm ngih păng jêh ri nkra nau sông sa ma khân păng. Păng ndrel ma rnăk vâl răm maak ngăn, yorlah hŏ chroh jêh ma Brah Ndu.

³⁵ Tât ang trôk, phung kôranh phat dôih njuăl tahan gak lah đah kôranh ndrung: “Mplơ̆ hom ăn kon me ma phung nây.”

³⁶ Pôri, kôranh ndrung đă Y-Pôl: “Phung kôranh ndrung hŏ đă ma gâp mplơ̆ ăn kon me ma khân may; pôri, du luh hom, jêh ri hăn đăp mpăn.”

³⁷ Ƀiălah Y-Pôl lah ma khân păng: “Hên jêng phung ƀon lan Rôm, aƀaơ ri ê hŏ gĭt dôih, khân păng hŏ dong jêh hên ma mâng tanăp phung âk, jêh ri krŭng tâm ndrung; mâm ƀư aƀaơ khân păng mƀơk hên tâm nau ndâp? Mâu dơi ôh! Ăn phung kôranh nơm văch ta aơ mƀơk hên.”

³⁸ Phung kôranh phat dôih tăng tahan gak mbơh tay lĕ nau nây, khân păng klach yorlah gĭt bar hê khân păng jêng phung ƀon lan Rôm.

³⁹ Pôri, khân păng hăn dăn dôih, jêh nây leo bar hê khân păng luh jêh ri đă du tă ƀon nây.

⁴⁰ Jêh du luh tă bơh ndrung, bar hê kôranh oh mon lăp khâl tâm ngih H'Lidi, n'hao nuih ma phung oh nâu, jêh ri hăn.