Kôranh Oh Mon 12 - Nau Brah Ndu Ngơi 2023

Bu nhŭp Phung Ngih Brah Ndu. – Bu krŭng Y-Pêtrôs jêh ri dơi rklaih

¹ Rnôk nây lĕ, hađăch Hêrôt ntơm ƀư djơh ma bar pe nuyh tâm Phung Ngih Brah Ndu.

² Păng sŏk đao nkhĭt Y-Yakơ, jêng nâu Y-Yôhan;

³ Dôl saơ nau nây maak ma phung Yuđa, hađăch đă bu nhŭp Y-Pêtrôs tâm ban lĕ.

⁴ Nôk nây jêng lĕ nar rƀŭn Piăng Let Mâu Geh Ndrui. Hađăch nhŭp krŭng Y-Pêtrôs tâm ndrung, păng jao ma puăn mpôl tahan tâm tơh kâp gak, jêh ri tâm nal lôch rƀŭn Nau Găn mra sŏk leo phat dôih păng tanăp phung ƀon lan.

⁵ Pôri, Y-Pêtrôs gŭ tâm ndrung, ƀiălah Phung Ngih Brah Ndu mbơh sơm ma Brah Ndu dŭt n'hâm ngăn ăn ma păng.

⁶ Ƀiălah, tâm măng êlor ma hađăch Hêrôt njŭn Y-Pêtrôs ma nau phat dôih, Y-Pêtrôs bê̆ch ta nklang bar hê tahan, ti păng kât ma bar rse rvăk jêh ri geh phung tahan gak chiă panăp bôk mpông ndrung.

⁷ Ƀât lât, du huê tông mpăr Kôranh Brah mpơl, jêh ri nau ang nchrat tâm ndrung ngo. Tông mpăr dong Y-Pêtrôs ta pŭng vĕ, rlay păng jêh ri lah: “Dâk hom gơnh.” Rse rvăk tŭp tă bơh ti păng ro.

⁸ Tông mpăr đă: “Vân hom rse bŭt may jêh ri nsoh ntâu jot.” Y-Pêtrôs ƀư ƀoi nau păng đă. Tông mpăr lah tay: “Nsoh hom ao padih jêh ri hăn tĭng gâp.”

⁹ Y-Pêtrôs du luh hăn tĭng ƀiălah păng mâu gĭt nau tông mpăr ƀư ma păng jêng ngăn, păng ntôn lah păng nơm saơ nau tâm saơ.

¹⁰ Tơlah khân păng rgăn lăn jêh pôih gak tal nguay, jêh nây tât pôih gak ma tal bar, khân păng tât ta mpông pêr loih leo lăp tâm bon toyh. Mpông pêr nây pơk êng păng, tanăp khân păng. Khân păng luh hăn ta trong sâng. Ƀât lât, tông mpăr du bơh Y-Pêtrôs.

¹¹ Y-Pêtrôs kah gĭt jêh ri lah: “Aƀaơ aơ gâp gĭt n'hêl nanê̆ Kôranh Brah njuăl tông mpăr Păng hăn rklaih gâp bơh ti hađăch Hêrôt jêh ri bơh lĕ nau phung Yuđa kâp gân.”

¹² Nôk păng mĭn nau nây, păng hăn ta ngih H'Mari, mê̆ Y-Yôhan, ntơ amoh Y-Markôs; ta nây geh âk bunuyh gŭ rƀŭn mbơh sơm.

¹³ Păng goh mpông padih, geh du huê bu ur, amoh H'Rôđa hăn iăt.

¹⁴ Gĭt năl bâr Y-Pêtrôs, păng răm maak kŏ tât chuêl pơk mpông ôh, ƀiălah nchuăt plơ̆ mbơh nau ma bu, Y-Pêtrôs gŭ panăp mpông.

¹⁵ Bu lah ma păng: “Ay rluk!” Ƀiălah păng râng nau nây jêng ngăn. Khân păng lah: “Klăp lah tông mpăr păng yơh.”

¹⁶ Ƀiălah Y-Pêtrôs ăt goh ngăn; tơlah khân păng pơk mpông, saơ Y-Pêtrôs khân păng hih rhâl ngăn.

¹⁷ Ƀiălah Y-Pêtrôs yơr ti gay vơch tâm nal đă khân păng gŭ rklăk, jêh ri nkoch bri ma khân păng mâm nau Kôranh Brah hŏ rklaih jêh păng tă bơh ndrung nây; păng đă: “Mbơh hom nau aơ ma Y-Yakơ jêh ri ăn phung oh nâu gĭt.” Jêh nau nây, păng luh du jêh ri hăn ta ntŭk êng.

¹⁸ Tât ang ôi, geh nau uh ah toyh tâm phung tahan, yorlah khân păng mâu gĭt ôh moh nau tât jêh ma Y-Pêtrôs.

¹⁹ Hêrôt đă bu joi ƀiălah mâu hôm dơi saơ ôh; hađăch sek ôp phung tahan gak, jêh ri đă bu nkhĭt lơi khân păng. Pakơi nây, hađăch du tă bơh n'gor Yuđa hăn trŭnh ta ƀon Sêsarê jêh ri gŭ ta nây.

Hađăch Hêrôt khĭt

²⁰ Rnôk nây, hađăch Hêrôt ji nuih hâu ngăn ma phung Tyre jêh ri phung Sidôn; yor ri, khân păng geh du ai nuih n'hâm hăn gŭ tanăp hađăch. Jêh nsŭk nsôr nơm kâp kơl ma hađăch jêng Y-Blastus, khân păng hăn tât ƀư nau đăp mpăn, yorlah n'gor khân păng geh ndơ sông sa bơh n'gor hađăch.

²¹ Tât ta nar tâm nal, Hêrôt nsoh ao hađăch gŭ ta klơ sưng hađăch ntĭnh ntăm ma khân păng.

²² Phung ƀon lan nter lah: “Aơ jêng bâr du huê brah, mâu di bâr ngơi bunuyh ôh!”

²³ Ƀât lât, geh du huê tông mpăr Kôranh Brah dong hađăch Hêrôt yorlah hađăch mâu ăn nau chrêk rmah ma Brah Ndu. Hađăch khĭt yor ma rhai sa.

²⁴ Nôk nây, nau chroh ma Brah Ndu lơ âk lơn đŏng jêh ri ƀrư̆ nar lơ hâu văch ma toyh.

²⁵ Lôch jêh kan bu jao, Y-Ƀarnaƀas jêh ri Y-Sôl du tă ƀon Yêrusalem plơ̆ sĭt tay ta ƀon Antiôs, njŭn leo Y-Yôhan, rnha đŏng jêng Y-Markôs.