Kôranh Oh Mon 11 - Nau Brah Ndu Ngơi 2023

Y-Pêtrôs plơ̆ sĭt ta ƀon Yêrusalem

¹ Rnôk nây, phung kôranh oh mon jêh ri phung oh nâu tâm n'gor Yuđa tăng lư ma phung bu năch hŏ dơn nau chroh tâm Brah Ndu.

² Nôk Y-Pêtrôs hao jêh ta ƀon Yêrusalem, phung chroh koh ntâu, nduyh ma păng pô aơ:

³ “May lăp jêh tâm ngih phung mâu koh ntâu jêh ri sông sa jêh ndrel ma khân păng!”

⁴ Ƀiălah Y-Pêtrôs ntơm rblang ma khân păng, lĕ nau

⁵ kơt aơ: “Dôl gâp gŭ mbơh sơm tâm ƀon Jôpa pô ri gâp lêt ma nau tâm saơ jêh ri saơ du nau tâm saơ: Geh ndơ tâm ban ma du blah bok toyh kât puăn njônh, tă bơh trôk jŭr tât ta gâp.

⁶ Gâp nge nger treng uănh, saơ tâm nây geh phung mpô mpa puăn jâng ăp ntil, phung mpô mpa bri, phung mpô mpa vơr jêh ri sĭm klơ trôk.

⁷ Gâp tăng bâr ngơi lah: ‘Hơi Y-Pêtrôs, dâk hom may, sreh sa hom.’

⁸ Gâp ơh: ‘Ơ Kôranh Brah, mâu dơi, yorlah lĕ nau ƀơ̆ mâu lah ndơ mâu kloh mâu dơi lăp tâm trôm mbung gâp ôh.’

⁹ Ƀiălah bâr ngơi tă bơh trôk lah ma gâp tal bar: ‘Moh ndơ Brah Ndu ƀư kloh jêh, lơi may uănh păng ƀơ̆ ôh.’

¹⁰ Nau ngơi nây rkê̆ch tay pe tơ̆, jêh ri lĕ rngôch ndơ nây rhuăt tay leo klơ trôk.

¹¹ Dôl nây ro, pe nuyh bu njuăl ma gâp tă bơh ƀon Sêsarê, tât ta ngih gâp gŭ nây.

¹² Brah Huêng Ueh đă gâp hăn ndrel ma khân păng, lơi đing ôh. Prao nuyh oh nâu aơ hăn ndrel ma gâp lĕ, jêh ri hên lăp tâm ngih Y-Kôrnei.

¹³ Păng nây nkoch bri ma hên nau păng saơ jêh tâm ngih păng, du huê tông mpăr Brah Ndu tâm mpơl jêh ri ngơi ma păng pô aơ: ‘Njuăl hom bunuyh hăn ta ƀon Jôpa, jă Y-Simôn, tâm amoh Y-Pêtrôs.

¹⁴ Păng mra mbơh ma may lĕ nau ngơi gay tă bơh nĕ may jêh ri lĕ ngih may mra dơi tâm rklaih.’

¹⁵ Tơlah gâp ntơm ngơi, Brah Huêng Ueh jŭr ta khân păng, nâm bu ntơm saơm Păng jŭr ta phung he.

¹⁶ Jêh ri gâp kah gĭt tay nau Kôranh Brah lah jêh: ‘Y-Yôhan-Ƀaptist hŏ ƀư jêh ƀaptem ma dak, ƀiălah khân may mra dơn nau ƀaptem ma Brah Huêng Ueh.’

¹⁷ Pôri, tơlah Brah Ndu ăn ma khân păng du nau yô̆ tâm ban Păng ăn ma he nôk he chroh jêh ma Brah Yêsu Krist, pô ri mbu gâp jêng dĭng janh buay Brah Ndu?”

¹⁸ Nôk khân păng tăng lĕ nau ngơi nây, mâu nduyh đŏng. Khân păng tâm rnê Brah Ndu pô aơ: “Pôri, Brah Ndu hŏ ăn tâm ban đŏng nau rmal nau tih ma phung bu năch gay ma khân păng dơi geh nau rêh!”

Phung Ngih Brah Ndu ta ƀon Antiôs

¹⁹ Nôk nây, phung bunuyh hŏ chah rai jêh yor nau ƀư mhĭk ntơm bơh nau Y-Êtiên hăn tât ta n'gor Phênisi, ta kôdak Syprơ jêh ri ta ƀon Antiôs, ƀiălah khân păng knŏng mbơh nkoch nau ngơi Nau Brah Ndu Ngơi ma phung Yuđa dơm.

²⁰ Ƀiălah, bar pe nuyh tâm phung khân păng tă bơh kôdak Syprơ jêh ri bơh ƀon Siren tât ta ƀon Antiôs, nti lah đŏng Nau Mhe Mhan Ueh ma phung Grek, nkoch mbơh Kôranh Brah jêng Brah Yêsu ma khân păng.

²¹ Ti Kôranh Brah gŭ ndrel ma khân păng, rĭ dĭng geh âk bunuyh chroh jêh ri plơ̆ tay ma Kôranh Brah.

²² Tăng lư nau nây, Phung Ngih Brah Ndu tâm ƀon Yêrusalem njuăl hăn Y-Ƀarnaƀas tât ta ƀon Antiôs.

²³ Tơlah păng tât jêh ta nây jêh ri saơ nau yô̆ Brah Ndu ăn. Păng răm maak jêh ri nsŭk nsôr lĕ rngôch bunuyh nâp nuih n'hâm tĭng Kôranh Brah;

²⁴ yorlah Y-Ƀarnaƀas jêng bunuyh ueh, bêng ma Brah Huêng Ueh jêh ri nau chroh. Geh âk bunuyh chroh ma Kôranh Brah.

²⁵ Pakơi nây, Y-Ƀarnaƀas hăn ta ƀon Tars gay ma joi Y-Sôl;

²⁶ nôk dơi joi jêh, păng njŭn leo Y-Sôl ta ƀon Antiôs. Bar hê bunuyh tâm rƀŭn ndrel ma Phung Ngih Brah Ndu jêh ri ntĭm nti âk bunuyh tâm du năm. Ta ƀon Antiôs ro, bu ntơm kuăl phung oh mon jêng Phung Brah Krist.

²⁷ Tâm lĕ nar nây, geh ƀaƀă nơm mbơh lor tă bơh ƀon Yêrusalem jŭr ta ƀon Antiôs.

²⁸ Du huê tâm phung khân păng, amoh păng Y-Agabus dâk, yor Brah Huêng Ueh mbơh lor mra geh nau sa sât ji ngot toyh lam neh ntu; nau sa sât ji ngot nây tât ngăn tâm rnôk hađăch Klôt chiă uănh.

²⁹ Phung oh mon mĭn ăp nơm tĭng nâm ndơ khân păng geh, njuăl ndơ kơl ma phung oh nâu chroh gŭ tâm n'gor Yuđa.

³⁰ Khân păng ƀư nau nây jêh ri njuăl ndơ ăn ma phung bu ranh tă ma ti Y-Ƀarnaƀas jêh ri Y-Sôl.