Kôranh Oh Mon 1 - Nau Brah Ndu Ngơi 2023

I. Nau Mhe Mhan Ueh mbơh nkoch ma phung Yuđa ( 1:1 – 12:25 ) Nau Brah Yêsu hao klơ trôk

¹ Hơi Y-Thêôphil ơi, tâm ndrom samƀŭt tal nguay, gâp hŏ nchih jêh ma lĕ rngôch nau Brah Yêsu ƀư jêh ri nti ntơm bơh saơm

² kŏ tât ta nar Brah Ndu sŏk Păng hao klơ trôk, jêh Păng nsing ma Brah Huêng Ueh gay ntĭm nti ma phung kôranh oh mon Păng săch jêh.

³ Păng dŏng âk đŏng ntil nau mbên gay ma tâm mpơl ma phung kôranh oh mon pô aơ dôl Păng hôm rêh jêh nây hŏ dơn nau khĭt, jêh ri tâm mpơl ma khân păng tâm puăn jât nar, ntĭm nti ma ƀon bri hađăch Brah Ndu.

⁴ Tâm nôk Păng mâp ndrel ma phung kôranh oh mon, Păng ntĭnh ma khân păng: “Lơi luh du tă bơh ƀon Yêrusalem, ƀiălah gŭ kâp ta nây, gŭ kâp ma nau Mbơ̆ hŏ ton jêh, jêng nau khân may hŏ tăng jêh Gâp lah.

⁵ Yorlah Y-Yôhan ƀư jêh ƀaptem ma dak, ƀiălah hôm djê̆ nar đŏng, khân may mra dơn nau ƀaptem ma Brah Huêng Ueh.”

⁶ Pôri, phung bunuyh dôl tâm rgum ta nây ơh ma Păng pô aơ: “Ơ Kôranh Brah, di lĕ rnôk aơ May mra ndâk njêng tay ƀon bri hađăch Israel?”

⁷ Păng plơ̆ lah: “Ma rnôk jêh ri mông nar Mbơ̆ nơm geh nau dơi tâm nal, nây jêng nau khân may mâu gĭt ôh.

⁸ Ƀiălah tơlah Brah Huêng Ueh jŭr ta khân may, khân may mra sŏk dơn nau brah jêh ri mra jêng phung mbơh nkoch an Gâp ta ƀon Yêrusalem, lĕ n'gor Yuđa, n'gor Samari kŏ tât dŭt rplay neh.”

⁹ Jêh Păng ngơi nau nây, Brah Ndu chông Păng hao klơ trôk, dôl phung oh mon gŭ uănh Păng. Geh du ndâr tŭk nkŭm ndâp Păng tă bơh măt khân păng.

¹⁰ Lah khân păng dôl gŭ n'gơr uănh ta klơ trôk nôk Brah Yêsu hao leo klơ, ri, geh bar hê bu klâu nsoh ao nglang dâk dăch khân păng

¹¹ jêh ri lah: “Hơi phung Galilê, mâm ƀư khân may dâk n'gơr uănh ta klơ trôk ri? Brah Yêsu aơ Brah Ndu chông hao klơ trôk tă bơh phung khân may, Păng mra plơ̆ văch tâm ban ma khân may saơ Păng hao klơ trôk nây đŏng.”

Phung oh mon tâm jrô prêh klơ

¹² Jêh nây, phung oh mon plơ̆ sĭt ta ƀon Yêrusalem tă bơh yôk bu rnha yôk Ôlive. Yôk nây dăch ta ƀon Yêrusalem, ngai klăp lah du kilômet, hăn trong tâm du nar saƀat.

¹³ Lah khân păng tât ta ƀon, khân păng hao tâm jrô klơ, ta ntŭk khân păng gŭ. Phung bunuyh nây jêng Y-Pêtrôs, Y-Yôhan, Y-Yakơ, Y-Andrê, Y-Philip, Y-Thômas, Y-Ƀartôlômi, Y-Mathiơ, Y-Yakơ kon Y-Alphê, Y-Simôn Sêlôt, jêh ri Y-Yuđas kon Y-Yakơ.

¹⁴ Lĕ rngôch phung nây du ai du nau mĭn ndrel ma phung bu ur jêh ri ma H'Mari jêng mê̆ Brah Yêsu jêh ri ndrel ma phung oh bu klâu Păng jêh ri mbơh sơm.

Nau săch Y-Mathias dơi ƀư kôranh oh mon ntrok Y-Yuđas

¹⁵ Tâm lĕ nar nây, Y-Pêtrôs dâk ta nklang phung oh nâu (rnoh bunuyh gŭ rƀŭn ta nây geh klăp lah tâm du rhiăng bar jât nuyh) jêh ri păng lah pô aơ:

¹⁶ “Hơi phung oh nâu, geh nau ngơi tâm Nau Brah Ndu Ngơi, Brah Huêng Ueh mbơh lor jêh ma bâr mbung Y-Đavit ma nau Y-Yuđas, nơm hŏ njŭn trong ma bu nhŭp Brah Yêsu, tât di ngăn.

¹⁷ Yorlah păng jêng du huê tâm phung he jêh ri păng pah du ntil kan ndrel ma he.

¹⁸ Păng sŏk prăk nkhôm nau tih mhĭk păng nơm gay rvăt du lôk mir lŏ, jêh ri păng prah ta nây ro, prih ndŭl jêh ri prih proch klơm luh padih.

¹⁹ Nau nây lĕ rngôch bunuyh ƀon Yêrusalem gĭt rah vah, kŏ tât khân păng rnha mir lŏ nây tĭng nau ngơi khân păng nơm lah Hakêlđama, nâm bu ntĭt, mir mham.

²⁰ Tâm ndrom samƀŭt Nau mprơ ơm geh đŏng nchih pô aơ: Ăn ntŭk păng gŭ jêng rngol, ‘Lơi geh bunuyh gŭ ta nây ôh’ jêh ri: ‘Ăn geh du huê nơm êng sŏk dơn nau pah kan păng.’

²¹ Pôri yơh, tâm phung bunuyh hŏ gŭ ndrel ma he, tâm du bông Kôranh Brah jêng Brah Yêsu hăn gŭ ta nklang he,

²² ntơm bơh nar Y-Yôhan ƀư ƀaptem kŏ tât ta nar Brah Ndu chông Păng hao du luh tă bơh he, ăn geh du huê bunuyh ndrel ma he gay mbơh nkoch ma nau Brah Yêsu dâk rêh tay.”

²³ Phung oh mon săch bar hê: Y-Yôsep nâm bu ntĭt Y-Barsabas, rnha jêng Y-Yustus, jêh ri Y-Mathias.

²⁴ Jêh nây khân păng mbơh sơm pô aơ: “Ơ Kôranh Brah, May jêng Nơm gĭt rah vah nuih n'hâm lĕ rngôch bunuyh, dăn mpơl ma hên gĭt tâm bar hê aơ, mbu nơm May hŏ săch jêh

²⁵ gay ma ntrok nau kan jêh ri nau pah kan kôranh oh mon Y-Yuđas, nơm hŏ rlăng jêh gay hăn ta ntŭk prăp êng ma păng.”

²⁶ Khân păng nchroh di ma Y-Mathias, jêh ri bu ăn păng nglăp tâm phung jât ma nguay kôranh oh mon.