Kôlôh 4 - Nau Brah Ndu Ngơi 2023

¹ Hơi phung kôranh, ƀư hom nau sŏng jêh ri nau di ma phung dĭk khân may, yorlah khân may gĭt jêh khân may geh du huê Kôranh ta klơ trôk.

Nau nkah ma nau mbơh sơm jêh ri blau mĭn

² Nsrôih mbơh sơm hom ma lĕ nuih n'hâm, njrăng hom tâm nôk mbơh sơm jêh ri lah ueh.

³ Mbơh sơm hom ma hên ƀă, dăn Brah Ndu pơk mpông ma hên mbơh nkoch nau ngơi Păng, mbơh nau khlay ndâp Brah Krist yor nau khlay ndâp nây bu nkông gâp ma rse rvăk.

⁴ Dăn mbơh sơm đŏng gay gâp tâm mpơl rah vah nau gâp mra ngơi.

⁵ Ăn khân may gŭ ngao blau mĭn tanăp phung bu năch, jêh ri blau dŏng mông nar.

⁶ Ăn nau khân may ngơi geh nau rdơ̆ rbăn ƀaƀơ jêh ri ƀư kah nâm bu boh gay ma khân păng gĭt mâm nau plơ̆ lah ma ăp nơm.

Nau ngơi nhhơ Y-Tikikus jêh ri Y-Ônêsim

⁷ Y-Tikikus mra ngơi ma khân may ma lĕ nau gâp ƀư. Păng jêng oh nâu hên rŏng ngăn ngên, bunuyh pah kan răp jăp, jêh ri jêng băl pah kan tâm Kôranh Brah.

⁸ Yor nau aơ gâp njuăl păng hăn ma khân may, gay ma khân may dơi gĭt tâm hên, jêh ri n'hao nuih n'hâm khân may.

⁹ Hăn ndrel ma păng geh Y-Ônêsim, nơm răp jăp jêh ri rŏng ngăn, jêng bunuyh ƀon ndrel khân may nơm. Khân păng mra mbơh ăn ma khân may gĭt lĕ rngôch ntil nau ta aơ.

Nau mbah jô̆ khâl jêh ri nau ntĭnh ntăm

¹⁰ Y-Aristarkus, băl tâm ndrung ndrel ma gâp, njuăl nau mbah jô̆ khâl ma khân may; Y-Markôs, oh nâu ndrel ma Y-Ƀarnaƀas tâm ban lĕ. Bơh Y-Markôs, khân may hŏ dơi dơn nau ntĭm jêh, tơlah Y-Markôs hăn tât ntŭk khân may, vơt rom hom păng.

¹¹ Y-Yêsu, rnha jêng Y-Yustus, njuăl đŏng nau mbah jô̆ khâl khân may. Tâm phung bunuyh dơn koh ntâu, knŏng geh phung bunuyh nây pah kan ndrel ma gâp yor ƀon bri hađăch Brah Ndu, jêh ri khân păng jêng nau bonh leng ma gâp.

¹² Y-Êpapras, bunuyh ƀon ndrel khân may, du huê oh mon ma Yêsu Krist jô̆ khâl ma khân may; păng tâm lơh tâm nau mbơh sơm yor khân may; gay khân may plơ̆ jêng nŭm rĭng jêh ri ƀư lôch lĕ nau mĭn ŭch Brah Ndu.

¹³ Yorlah gâp mbơh nkoch ma khân may pô aơ, păng hŏ pah kan dŭt hŏt ra ah yor ma khân may jêh ri yor phung bunuyh gŭ ta Laođisê jêh ri ta Hiêrapôlis.

¹⁴ Y-Luk kôranh dak si, nơm gâp rŏng ngăn nđâp ma Y-Đêmas, mbah jô̆ khâl khân may.

¹⁵ Mbah nau jô̆ khâl hom ma phung oh nâu gŭ ta Laođisê jêh ri ta Nimpas ndrel ma Phung Ngih Brah Ndu tâm rƀŭn tâm ngih păng.

¹⁶ Jêh rŏ samƀŭt aơ ta nklang khân may, ndơ̆ hom ăn ma Phung Ngih Brah Ndu Laođisê rŏ đŏng; jêh ri rŏ đŏng samƀŭt Phung Ngih Brah Ndu Laođisê njuăl.

¹⁷ Nglĕ dŭt, lah hom đah Y-Archipus: “Ăn may njrăng jêh ri ƀư rĭng nau pah kan may hŏ sŏk dơn bơh Kôranh Brah.”

¹⁸ Ti gâp yơh, Y-Pôl, nchih nau mbah jô̆ khâl aơ. Kah gĭt hom ma rse rvăk gâp. Dăn nau yô̆ gŭ ndrel ma khân may.