Kôlôh 2 - Nau Brah Ndu Ngơi 2023

¹ N'hêl nanê̆ ngăn, gâp ŭch khân may gĭt gâp hŏ yor ma khân may, yor phung ta ƀon Laođisê jêh ri yor lĕ phung ê hŏ saơ muh măt gâp tâm săk jăn hŏ tâm lơh jêr jŏk,

² gay ma nuih n'hâm khân păng geh nau n'hao nuih n'hâm, tâm rnglăp tâm nau rŏng, tâm ban đŏng geh âk nau gĭt rbăng rmeh ler jêh ri n'hêl nanê̆ gay gĭt năl nau khlay ndâp Brah Ndu, nâm bu ntĭt Brah Krist;

³ tâm Păng pôn prăp lĕ rngôch drăp ndơ khlay ma nau blau mĭn jêh ri nau gĭt rbăng.

⁴ Gâp lah pô aơ gay lơi ăn geh bunuyh ƀư vĭ khân may ma nau ngơi ndơm.

⁵ Nđâp lah săk jăn gâp ngai bơh khân may, ƀiălah huêng gâp ăt hôm gŭ ndrel ma khân may, gâp maak ngăn saơ oh nâu geh nau gŭ rêh tâm rnglăp jêh ri nau chroh khân may nâp tâm Brah Krist.

⁶ Pôri, mâm nau khân may sŏk dơn Yêsu Krist jêng Kôranh Brah hăn hom tâm Păng kơt nây lĕ;

⁷ sŏr hom reh, rdâk mbon tâm Păng; ktang hom tâm nau chroh tâm ban bu ntĭm nti ma khân may, jêh ri lơ hô ntop âk nau tâm rnê lah ueh.

Njrăng hom đah nau nti tih

⁸ Njrăng hom, lơi ăn mbu ƀư dăk sân khân may ma nau ntĭm nti dŭt blau jêh ri ma nau ngơi nklă dơm dam tĭng nâm nau vay ơm bơh kon bunuyh, tĭng nâm huêng brah tâm neh ntu, ƀiălah mâu di tĭng nâm Brah Krist.

⁹ Yorlah lĕ bêng nŭm nau brah tâm mpơl tâm săk jăn Păng dôl geh

¹⁰ pô ri khân may geh bêng nŭm tâm Păng, Nơm jêng kôranh lĕ rngôch nau chiă uănh jêh ri nau dơi toyh.

¹¹ Tâm Păng, khân may đŏng dơn nau koh ntâu, mâu di ti kon bunuyh ƀư, ƀiălah jêng nau koh ntâu bơh Brah Krist, nâm bu ntĭt doh lơi nau ŭch tâm nglay săk he.

¹² Khân may hŏ tâp brôi jêh khân may ndrel ma Păng tâm nau ƀaptem, ri mơ dơi dâk rêh tay ndrel Păng bơh nau chroh tâm nau brah Brah Ndu, Nơm ƀư ăn Păng dâk rêh tay tă bơh nau khĭt.

¹³ Nôk khân may khĭt jêh tâm nau tih jêh ri tâm nglay săk mâu koh ntâu, Brah Ndu ƀư ăn ma khân may rêh ndrel ma Brah Krist, yor Păng yô̆ an jêh lĕ nau tih he.

¹⁴ Păng chalơi jêh pŏk samƀŭt rnon tâm rdâng he đah lĕ nau vay tâm nchâp đah he. Păng mƀăr lơi ma nau pâng kđĭn păng ta si tâm rkăng.

¹⁵ Păng sŏk lơi lĕ nau chiă uănh, jêh ri nau ktang, sŏk si tâm rkăng Păng dơi đah phung nây, jêh ri ƀư bêk khân păng ta nklang lĕ rngôch bunuyh.

Nau di jêh ri nau vay ƀư bơh kon bunuyh

¹⁶ Pôri, lơi ăn bu phat dôih khân may ma ndơ sông sa, ma ndơ nhêt, ma nar rƀŭn, ma nar khay mhe, mâu lah nar saƀat,

¹⁷ lĕ nau nây knŏng jêng gui n'hâm ma lĕ nau dăch tât, bi rup nanê̆ ngăn jêng Brah Krist.

¹⁸ Lơi ăn bu ndơm jêh ri ƀư roh nau nkhôm yor phung srôih jan lah ƀư dêh rhêt jêh ri yơk mbah lĕ tông mpăr. Khân păng rnơm ma lĕ nau tâm saơ êng ngăn, bơh nau mĭn nglay săk geh nau sưr rlau dơm dam.

¹⁹ Khân păng mâu tâm rnglăp răp jăp đah bôk gay bơh Păng lĕ săk jăn geh nau siăm rong, geh nau tâm rnglăp ndrel bơh lĕ tâm trŭp nting, rse tâm rnglăp, jêh ri văch ma toyh tĭng nau Brah Ndu ŭch.

²⁰ Tơlah khân may khĭt jêh ndrel Brah Krist, klaih bơh lĕ huêng brah ta neh ntu, mâm ƀư khân may ăt hôm rêh tâm ban khân may hôm jêng ndơ neh ntu? Mâm ƀư hôm tông lĕ nau vay:

²¹ “Lơi sŏk, lơi lep, lơi pah bi”

²² nôk lĕ rngôch ndơ nây rai lôch da dê tơlah khân may hŏ dŏng. Khân păng knŏng jêng lĕ nau vay jêh ri ntĭm nti bơh kon bunuyh.

²³ Nanê̆ lĕ nau nây, uănh padih nâm bu blau mĭn yor yơk mbah tĭng nâm nau mĭn khân păng nơm, ndrel ma nau ntrŭnh he nơm jêh ri nau ƀư rêh ni ma săk jăn, ƀiălah mâu geh rnoh khlay ôh tâm nau nking ma nau kơnh nglay săk.