Kôlôh 1 - Nau Brah Ndu Ngơi 2023

Nau lor lơn

¹ Y-Pôl, jêng du huê kôranh oh mon Yêsu Krist tĭng nâm nau mĭn ŭch Brah Ndu, ndrel ma Y-Timôthê jêng oh nâu,

² njuăl ma phung kloh ueh jêh ri ma phung oh nâu răp jăp tâm Brah Krist tâm ƀon Kôlôs: Dăn Brah Ndu, Mbơ̆ he, ăn nau yô̆ jêh ri nau đăp mpăn ma khân may.

Brah Yêsu Krist jêng kôranh tâm lĕ rngôch ndơ jêh ri jêng tơm chuai nau tih ( 1:3 – 2:23 ) Nau mbơh sơm lah ueh

³ Nôk hên mbơh sơm ma khân may, hên tâm rnê ƀa ƀơ ma Brah Ndu, Mbơ̆ Kôranh Brah he jêng Yêsu Krist.

⁴ Yorlah hên tăng jêh nau khân may chroh tâm Yêsu Krist jêh ri nau khân may rŏng đah lĕ rngôch phung kloh ueh,

⁵ yorlah nau kâp gân prăp jêh ma khân may ta klơ trôk, nau tâm rnôk ntơm saơm khâm may hŏ tăng jêh tâm nau ngơi ngăn, jêng Nau Mhe Mhan Ueh hŏ văch ta khân may.

⁶ Nau Mhe Mhan Ueh nây dôl play kao jêh ri văch ma toyh tâm lam neh ntu nâm bu ta nklang khân may, bơh nar khân may tăng jêh ri gĭt rbăng ngăn nau yô̆ Brah Ndu.

⁷ Khân may nti jêh bơh Y-Êpapras, mĭt jiăng kan ndrel hên rŏng ngăn. Păng jêng bunuyh ntang an ma khân may ƀư bunuyh pah kan răp jăp ma Brah Krist,

⁸ jêh ri jêng bunuyh hŏ mpơl ma hên gĭt nuih n'hâm khân may rŏng tâm Brah Huêng Ueh.

⁹ Yor nây, bơh nar tăng nau nây, hên mâu rlu mbơh sơm ma khân may, dăn Brah Ndu ăn ma khân may geh nau gĭt năl rah vah nau mĭn ŭch Păng tâm lĕ nau blau mĭn jêh ri gĭt rbăng tâm nau rêh huêng

¹⁰ gay gŭ rêh tâm di ma Kôranh Brah, ƀư ueh nuih n'hâm Păng tâm lĕ kan, geh play tâm lĕ rngôch nau ƀư ueh, jêh ri văch ma toyh tâm nau gĭt rbăng Brah Ndu.

¹¹ Bơh nau brah chrêk rmah Păng, khân may geh bêng nau ktang gay srôih sŏk dơn lĕ rngôch nau tâm nau răm maak,

¹² jêh ri nhhơr nau ngơi lah ueh ma Brah Ndu Mbơ̆, jêng Nơm hŏ ƀư jêh ma khân may găl dơi geh kô̆ drăp ndơn phung kloh ueh tâm nau ang.

¹³ Păng rklaih jêh he bơh nau dơi tâm nau ngo, jêh ri djôt leo he lăp tâm ƀon bri hađăch Kon Păng rŏng ngăn ngên;

¹⁴ tâm Kon nây, he geh nau tâm chuai jêng nau yô̆ an nau tih.

Brah Krist Jêng Tâm Ban Ma Brah Ndu

¹⁵ Păng yơh jêng rup ma Brah Ndu mâu dơi saơ, jêng Nơm deh lor lơn ma lĕ rngôch mpa rhăk njêng.

¹⁶ Yorlah tâm Păng lĕ rngôch ndơ klơ trôk, tâm neh ntu, ndơ saơ mâu lah ndơ mâu saơ dơi rhăk njêng da dê. Mâu lah sưng hađăch, mâu lah nau chiă uănh, mâu lah phung kôranh chiă uănh, mâu lah kôranh toyh, lĕ rngôch yor Păng njêng da dê jêh, jêh ri prăp ma Păng lĕ.

¹⁷ Păng geh lor lơn ma lĕ rngôch ndơ, jêh ri lĕ rngôch ndơ dơi nâp tâm Păng.

¹⁸ Păng jêng bôk ma săk jăn, nâm bu ntĭt Phung Ngih Brah Ndu. Păng jêng nau ntơm, jêng Nơm deh lor lơn bơh phung khĭt, gay tâm lĕ rngôch ndơ Păng jêng kôranh toyh da dê.

¹⁹ Yorlah Brah Ndu hŏ maak nuih n'hâm dơm lĕ rngôch ndơ Brah Ndu njêng gŭ tâm Păng,

²⁰ Jêh ri ma mham Păng hoch jêh ta si tâm rkăng, Brah Ndu ăn nau đăp mpăn jêh ri tâm njĭr lĕ rngôch mpa ta neh ntu jêh ri tâm trôk ăn tâm rnglăp đah Păng Nơm.

²¹ Bi phung khân may, saơm khân may ơm ngai ƀah đah Brah Ndu, plơ̆ jêng nau tâm rlăng đah Păng tâm nau mĭn jêh ri tâm kan djơh mhĭk khân may,

²² Ƀiălah aƀaơ Brah Ndu hŏ tâm rnglăp jêh tâm nau khĭt Kon Păng tâm nglay săk, gay ma mpơl khân may tâm nau kloh ueh, mâu geh têl khap, mâu geh nau nduyh tanăp Păng;

²³ knŏng ma khân may nau gŭ nâp tay tâm nau chroh, mâu rdja nuih ôh, mâu trơn chalơi bơh nau kâp gân Nau Mhe Mhan Ueh khân may tăng jêh, jêng Nau Mhe Mhan Ueh hŏ mbơh nkoch jêh ma lĕ rngôch bunuyh tâm dâng trôk; jêh ri gâp, Y-Pôl, hŏ jêng bunuyh pah kan ma Nau Mhe Mhan Ueh nây.

Nau pah kan jêh ri nau rêh ni Y-Pôl

²⁴ Aƀaơ gâp răm maak tâm nau rêh ni yor khân may, jêh ri yor săk jăn Păng jêng Phung Ngih Brah Ndu, djôt leo săk jăn gâp nơm ƀư lôch jêh kô̆ hôm e tâm nau rêh ni Brah Krist.

²⁵ Gâp hŏ jêng bunuyh pah kan Phung Ngih Brah Ndu, tĭng nâm nau kan Kôranh Brah Ndu hŏ jao ma gâp gay mbơh nkoch lôch nau Păng ma khân may;

²⁶ nâm bu ntĭt nau khlay ndâp nây, pôn jêh tâm lĕ rngôch rnôk rô̆ ƀiălah aƀaơ tâm mpơl jêh ma phung kloh ueh Păng.

²⁷ Yor Brah Ndu ŭch khân may mpơl nau rmeh ler jêh ri nau chrêk rmah nau khlay ndâp nây ta nklang phung bu năch, nây jêng Brah Krist gŭ tâm khân may, jêng nau kâp gân ma nau chrêk rmah.

²⁸ Păng yơh jêng Nơm hên mbơh nkoch. Hên sŏk lĕ nau blau mĭn gay mbơh lor lĕ rngôch bunuyh, ntĭm nti lĕ rngôch bunuyh, gay mpơl lĕ rngôch bunuyh jêng rah vah ngăn tâm Brah Krist.

²⁹ Yor ma nau aơ gâp kan lĕ n'hâm suan jêh ri tâm lơh ma lĕ nau ktang bơh Păng ƀư ăn ktang tâm gâp.