Kan Lêvi 9 - Nau Brah Ndu Ngơi 2023

Phung kôranh ƀư brah ntơm pah kan

¹ Tât ta nar tal pham, Y-Môis jă Y-Arôn jêh ri phung kon bu klâu păng n'hanh phung bu ranh Israel văch tât

² jêh ri lah ma Y-Arôn: “Nhŭp hom du mlâm ndrôk nkuăng ƀư ndơ ƀư brah chuai nau tih, du mlâm biăp nkuăng ƀư ndơ ƀư brah gŭch; lĕ bar mlâm mâu geh têl khap ôh jêh ri nhhơr tanăp Brah Yêhôva.

³ Ăn may lah hom ma phung ƀon lan Israel pô aơ: ‘Ăn khân may nhŭp hom du mlâm be nkuăng ƀư ndơ ƀư brah chuai nau tih, du mlâm ndrôk kon jêh ri du mlâm biăp kon, lĕ bar mlâm nây mâu geh têl khap ôh jêh ri geh du năm, gay ƀư ndơ ƀư brah gŭch,

⁴ du mlâm ndrôk jêh ri du mlâm biăp nkuăng gay ƀư ndơ ƀư brah đăp mpăn nhhơr tanăp Brah Yêhôva jêh ri du ndơ ƀư brah rnih môi geh pot dak ngi, yorlah nar aơ Brah Yêhôva mra tâm mpơl ma khân may.’”

⁵ Khân păng njŭn tanăp Ngih Bok Nau Tâm Rƀŭn lĕ rngôch ndơ Y-Môis hŏ ntăm jêh, jêh ri lĕ rngôch phung tâm rƀŭn văch dăch jêh ri dâk tanăp Brah Yêhôva.

⁶ Y-Môis lah: “Aơ jêng nau Brah Yêhôva ntĭnh ntăm jêh ăn ma khân may ƀư gay nau chrêk rmah Brah Yêhôva mra tâm mpơl ma khân may.”

⁷ Jêh nây Y-Môis lah ma Y-Arôn: “Nâu văch hom dăch ta nơng ƀư brah nhhơr ndơ ƀư brah chuai nau tih jêh ri ndơ ƀư brah gŭch gay ƀư ndơ ƀư brah chuai nau tih ma may nơm jêh ri ma phung ƀon lan, jêh nây nhhơr ndơ ƀư brah bơh phung ƀon lan jêh ri ƀư ndơ ƀư brah chuai nau tih ma khân păng, tĭng nâm Brah Yêhôva ntăm nti jêh.”

⁸ Y-Arôn văch dăch nơng ƀư brah jêh ri nkhĭt ndrôk nkuăng kon gay ƀư ndơ ƀư brah chuai nau tih ma păng nơm.

⁹ Phung kon bu klâu Y-Arôn djôt mham mpa ƀư brah tât ta păng; păng mbŭk nglau ti păng tâm mham, mhĭng ta lĕ nke nơng ƀư brah, jêh nây nkhŭt mham tâm dâng jâng nơng ƀư brah.

¹⁰ Păng sŏk ngi, bar mlâm leh jêh ri kô̆ klơm dŭt kah bơh mpa ƀư brah chuai nau tih su ta klơ nơng ƀư brah, tĭng nâm Brah Yêhôva hŏ ntăm jêh ma Y-Môis.

¹¹ Bi puăch jêh ri ntâu, păng djôt su padih ngih bok.

¹² Y-Arôn nkhĭt mpô mpa dŏng ƀư ndơ ƀư brah gŭch. Phung kon bu klâu Y-Arôn djôt mham mpa ƀư brah ăn ma păng jêh ri păng nsrih mham jŭm nơng ƀư brah.

¹³ Khân păng djôt đŏng puăch ndơ ƀư brah gŭch hŏ koh jêh âk rngơl nđâp ma bôk gay păng su lĕ rngôch ndơ nây ta klơ nơng ƀư brah.

¹⁴ Păng rao proch khŭng jêh ri lĕ jâng jêh nây djôt su ta klơ ndơ ƀư brah gŭch ta ntŭk nơng ƀư brah.

¹⁵ Jêh nây, păng djôt ndơ ƀư brah bơh phung ƀon lan nhhơr. Păng nhŭp be nkuăng gay ƀư ndơ ƀư brah chuai nau tih phung ƀon lan, nkhĭt păng jêh ri nhhơr ndơ ƀư brah chuai nau tih nâm bu ndơ ƀư brah chuai nau tih hŏ ƀư êlor.

¹⁶ Păng nhhơr đŏng ndơ ƀư brah gŭch jêh ri kan tĭng nâm nau vay hŏ dăp jêh.

¹⁷ Jêh nây păng nhhơr ndơ ƀư brah rnih môi. Păng kuak bêng du mbăt ndơ ƀư brah rnih môi jêh ri su păng ta klơ nơng ƀư brah, ndrel ndơ ƀư brah gŭch kêng ôi.

¹⁸ Păng nkhĭt đŏng ndrôk jêh ri biăp nkuăng jêng mpa ƀư brah đăp mpăn ma phung ƀon lan. Phung kon bu klâu Y-Arôn djôt mham mpa ƀư brah ăn ma păng jêh ri păng nsrih jŭm nơng ƀư brah.

¹⁹ Bi ngi ndrôk jêh ri ngi biăp nkuăng, ngi chiăng, ngi nkŭm proch khŭng, bar mlâm leh jêh ri kô̆ dŭt kah ta klơm,

²⁰ khân păng dơm ta klơ kŭr kuyh, jêh ri păng gŭch ngi ta klơ nơng ƀư brah.

²¹ Ƀiălah Y-Arôn sŏk lĕ nting rpaih nse jêh ri nglik pa ma jêh ri ƀư nau vay ƀư ndơ̆ đah aơ ndơ̆ đah ri tanăp Brah Yêhôva, tĭng nâm Y-Môis hŏ ntăm jêh.

²² Y-Arôn yơr ti păng ma phung ƀon lan jêh ri ăn nau ueh uĭn ma khân păng. Lah jêh nhhơr ndơ ƀư brah chuai nau tih, ndơ ƀư brah gŭch jêh ri ndơ ƀư brah đăp mpăn ri mơ păng hăn trŭnh tă bơh nơng ƀư brah.

²³ Y-Môis jêh ri Y-Arôn lăp tâm Ngih Bok Nau Tâm Rƀŭn jêh ri khân păng du luh ăn nau ueh uĭn ma phung ƀon lan. Nau chrêk rmah Brah Yêhôva tâm mpơl ma lĕ rngôch phung ƀon lan.

²⁴ Du chiông ŭnh luh tă bơh tanăp Brah Yêhôva jêh ri su lĕ ndơ ƀư brah gŭch jêh ri ngi ta klơ nơng ƀư brah. Tơlah lĕ rngôch phung ƀon lan saơ nau nây, lĕ rngôch bunuyh ƀon lan nter răm maak jêh ri chon mon ta neh.