Kan Lêvi 8 - Nau Brah Ndu Ngơi 2023

Rƀŭn n'hao kan kôranh ƀư brah ma Y-Arôn jêh ri phung kon bu klâu păng

¹ Brah Yêhôva lah ma Y-Môis pô aơ:

² “Ăn may djôt leo hom Y-Arôn jêh ri phung kon bu klâu păng ndrel ma bok ao, dak ngi mhĭng, ndrôk ƀư ndơ ƀư brah chuai nau tih, bar mlâm biăp nkuăng jêh ri bĭ piăng let mâu geh ndrui,

³ jêh ri rgum lĕ rngôch phung ƀon lan ta mpông Ngih Bok Nau Tâm Rƀŭn.”

⁴ Y-Môis ƀư di tĭng nâm nau Brah Yêhôva ntĭnh ntăm jêh ma păng, jêh ri phung ƀon lan tâm rgum ta mpông Ngih Bok Nau Tâm Rƀŭn.

⁵ Y-Môis lah ma phung tâm rƀŭn: “Aơ jêng nau Brah Yêhôva ntăm đă ƀư.”

⁶ Y-Môis jă Y-Arôn jêh ri phung kon bu klâu păng tât, jêh ri sŏk dak jut rao khân păng.

⁷ Y-Môis sâm nsoh ma ao jâr ma Y-Arôn, rêt an rse vân bŭt, sâm nsoh ao jong, djôt êphôt jêh ri rêt ma rse vân bŭt êphôt.

⁸ Păng djôt đŏng ndơ văn ntang ntơh jêh ri nkuăk Urim jêh ri Thumim ăn ma Y-Arôn,

⁹ sâm ndô môk ta bôk, nkuăk pŏk jê̆ mah tanăp môk, jêng đon hađăch kloh ueh, tĭng nâm nau Brah Yêhôva hŏ ntăm jêh ma Y-Môis.

¹⁰ Jêh nây, Y-Môis sŏk dak ngi mhĭng ta ngih bok jêh ri lĕ rngôch ndơ tâm păng gay prăp êng ăn kloh ueh.

¹¹ Păng sâm mbrih đŏng dak ngi nây pơh tơ̆ ta klơ nơng ƀư brah jêh ri mhĭng dak ngi ta nơng ƀư brah jêh ri lĕ ndơ dŏng tâm nơng ƀư brah, thŭng dak nđâp jâng păng, gay prăp êng ăn kloh ueh.

¹² Păng nkhŭt đŏng dak ngi mhĭng ta bôk Y-Arôn jêh ri mhĭng dak ngi gay prăp êng păng ăn kloh ueh.

¹³ Y-Môis kuăl phung kon bu klâu Y-Arôn tât, sâm nsoh ao jâr ma khân păng, rêt an rse vân bŭt, sâm ndô môk ta bôk ma khân păng, tĭng nâm Brah Yêhôva hŏ ntăm jêh ma Y-Môis.

¹⁴ Păng đă têk đŏng ndrôk gay ƀư ndơ ƀư brah chuai nau tih. Y-Arôn jêh ri phung kon bu klâu păng pah ti ta klơ bôk ndrôk.

¹⁵ Y-Môis nkhĭt păng, jêh nây dŏng nglau ti sŏk mham mhĭng ta lĕ nke jŭm nơng ƀư brah, ƀư kloh nơng ƀư brah, jêh ri nkhŭt mham hôm e tâm dâng jâng nơng ƀư brah. Kơt nĕ, Y-Môis hŏ prăp êng nơng ƀư brah ăn kloh ueh gay ƀư nau rƀŭn chuai nau tih ta nây.

¹⁶ Păng sŏk lĕ ndâr ngi nkŭm proch khŭng jêh ri kô̆ dŭt kah ta klơm, bar mlâm leh ndrel ma ndâr ngi nkŭm bar ơ̆ leh, jêh nây Y-Môis djôt gŭch ta klơ nơng ƀư brah.

¹⁷ Bi ma ndrôk, ntâu, puăch jêh ri ek, ăn Y-Môis djôt gŭch padih rmlak tahan, tĭng nâm Brah Yêhôva hŏ ntăm jêh ma păng.

¹⁸ Y-Môis đă djôt đŏng biăp nkuăng tât gay dŏng ƀư ndơ ƀư brah gŭch. Y-Arôn jêh ri phung kon bu klâu păng pah ti khân păng ta bôk biăp,

¹⁹ jêh nây Y-Môis nkhĭt păng jêh ri nsrih mham jŭm nơng ƀư brah.

²⁰ Y-Môis koh kon biăp âk rngơl, jêh nây djôt gŭch bôk, lĕ mlay puăch jêh ri ngi.

²¹ Jêh bu rao kloh proch khŭng jêh ri nglik ma dak, Y-Môis djôt gŭch lĕ biăp nkuăng ta klơ nơng ƀư brah. Nĕ jêng ndơ ƀư brah gŭch ăn ŭnh sa, geh n'hôl ƀâu kah ma Brah Yêhôva, tĭng nâm Brah Yêhôva hŏ ntăm jêh ma Y-Môis.

²² Păng ăn djôt đŏng biăp nkuăng tal bar tât, jêng biăp nkuăng dŏng tâm nau rƀŭn n'hao kan. Y-Arôn jêh ri phung kon bu klâu păng pah ti khân păng ta klơ bôk biăp nây.

²³ Y-Môis nkhĭt păng, sŏk mham mhĭng ta chiau êp tôr pa ma Y-Arôn, ta nglau me ti pa ma păng jêh ri ta nglau me jâng ma păng.

²⁴ Y-Môis đă đŏng phung kon bu klâu Y-Arôn văch dăch jêh ri mhĭng mham ta chiau êp tôr pa ma khân păng, ta nglau me ti pa ma jêh ri ta nglau me jâng ma khân păng. Y-Môis nsrih mham hôm e jŭm nơng ƀư brah.

²⁵ Păng sŏk ngi, glom geh ngi tơm chiăng, lĕ rngôch ngi nkŭm proch khŭng, kô̆ dŭt kah ta klơm, bar mlâm leh ndrel ngi bơh bar mlâm leh jêh ri nglik pa ma.

²⁶ Păng sŏk đŏng bơh bĭ piăng let mâu geh ndrui panăp măt Brah Yêhôva du mlâm ƀănh mâu geh ndrui, ƀănh geh dak ngi, du mlâm ƀănh n'hơ, jêh nây dăp lĕ ntil ƀănh nây ta klơ ngi jêh ri ta klơ nglik ma.

²⁷ Jêh nây, păng dơm lĕ ndơ nây tâm ti Y-Arôn jêh ri tâm ti phung kon bu klâu păng, gay ma khân păng nhhơr ma Brah Yêhôva nâm du ndơ nhhơr êng ma Păng.

²⁸ Jêh nây, Y-Môis sŏk lĕ ndơ nây bơh ti khân păng jêh ri djôt gŭch ta klơ nơng ƀư brah, ta klơ ndơ ƀư brah gŭch. Nĕ jêng ndơ ƀư brah n'hao kan, jêng ndơ ƀư brah ăn ŭnh sa, geh n'hôl ƀâu kah ma Brah Yêhôva.

²⁹ Y-Môis sŏk nting rpaih nse bơh biăp nkuăng nhhơr tâm rƀŭn n'hao kan, jêh ri nhhơr ma Brah Yêhôva nâm bu jêng du ndơ nhhơr khlay êng; nĕ jêng kô̆ prăp ma Y-Môis tĭng nâm Brah Yêhôva hŏ ntăm jêh.

³⁰ Jêh nĕ tât, Y-Môis sŏk dak ngi mhĭng jêh ri mham ta klơ nơng ƀư brah nsrih ta klơ Y-Arôn jêh ri ta klơ bok ao păng, ta klơ phung kon bu klâu jêh ri ta klơ bok ao khân păng. Kơt nĕ, Y-Môis hŏ prăp êng Y-Arôn jêh ri bok ao păng ăn kloh tâm ban phung kon bu klâu păng jêh ri ta bok ao khân păng.

³¹ Y-Môis lah ma Y-Arôn jêh ri ma phung kon bu klâu păng: “Gâm hom puăch ta mpông Ngih Bok Nau Tâm Rƀŭn jêh ri sa păng ta nây ndrel ma piăng let tâm bĭ dŏng tâm rƀŭn n'hao kan, tĭng nâm Kôranh Brah hŏ ntăm jêh: ‘Y-Arôn jêh ri phung kon bu klâu păng mra sa lĕ ndơ nây.’

³² Ƀiălah puăch jêh ri piăng let hôm rmeh su hom ma ŭnh.

³³ Tâm pơh nar, nâu jêh ri phung kon bu klâu nâu mâu dơi du luh ôh bơh mpông Ngih Bok Nau Tâm Rƀŭn, kŏ tât nar n'hao kan khân may lôch jêh, yorlah rƀŭn n'hao kan nâu jêh ri phung oh mon mra thoi jong tâm pơh nar.

³⁴ Brah Yêhôva hŏ ntăm nti jêh ma khân may ăn ƀư tâm ban ma he hŏ ƀư jêh nar aơ gay chuai nau tih ma nâu jêh ri phung kon bu klâu nâu.

³⁵ Kơt nây, tâm pơh nar, ăn nâu jêh ri phung kon bu klâu nâu gŭ ta mpông Ngih Bok Nau Tâm Rƀŭn lĕ nar nđâp măng, mât mray lĕ nau Brah Yêhôva ntĭnh ntăm jêh gay ma nâu jêh ri phung kon bu klâu nâu mâu khĭt ôh; yorlah nĕ jêng nau Brah Ndu hŏ ntăm jêh ma gâp.”

³⁶ Y-Arôn jêh ri phung kon bu klâu păng ƀư di tĭng lĕ rngôch nau Brah Yêhôva hŏ ntăm bơh Y-Môis.