Kan Lêvi 7 - Nau Brah Ndu Ngơi 2023

Nau vay ndơ ƀư brah chuai nau ƀư tih

¹ “Aơ jêng nau vay ma ndơ ƀư brah chuai nau ƀư tih, du ndơ ƀư brah dŭt kloh ueh.

² Nkhĭt hom mpa ƀư brah nau chuai nau ƀư tih ta ntŭk nkhĭt mpa ƀư ndơ ƀư brah gŭch, jêh ri nsrih mham păng jŭm nơng ƀư brah.

³ Nhhơr hom lĕ rngôch ngi, ngi chiăng, ngi nkŭm proch khŭng,

⁴ bar mlâm leh, ngi iang ta bar mlâm leh dăch bŭt jêh ri kô̆ dŭt kah tâm klơm ndrel ma bar mlâm leh.

⁵ Kôranh ƀư brah mra gŭch lĕ ndơ nĕ ta klơ nơng ƀư brah nâm bu du ndơ ƀư brah ăn ŭnh sa nhhơr ma Brah Yêhôva. Nĕ jêng ndơ ƀư brah chuai nau ƀư tih.

⁶ Lĕ rngôch bu klâu tâm rnăk vâl kôranh ƀư brah dơi sa ndơ nây da dê tâm du ntŭk kloh ueh; nây jêng ndơ dŭt kloh ueh.

⁷ Ndơ ƀư brah chuai nau ƀư tih tâm ban ma mpa ƀư brah chuai nau tih, lĕ bar geh du nau vay da dê. Mbu nơm kôranh ƀư brah nhhơr mpa ƀư brah chuai nau tih, mpa ƀư brah nây jêng ndơ păng.

⁸ Kôranh ƀư brah nhhơr ndơ ƀư brah gŭch ma du huê nơm, ntâu bơh mpa nhhơr ƀư ndơ ƀư brah gŭch nây mra jêng ndơ ma kôranh ƀư brah nĕ.

⁹ Lĕ rngôch ndơ ƀư brah rnih môi mâu lah gŭch jêh tâm năk mâu lah vâr tâm glah mâu lah gŭch ta klơ mpĭt mra jêng ndơ ma nơm kôranh ƀư brah dâk nhhơr.

¹⁰ Ƀiălah ăp ndơ nhhơr rnih môi êng êng ê gâm, hŏ pot jêh dak ngi mâu lah ăn kro, mra dơi pă tâm ban da dê ma phung kon sau Y-Arôn.”

Ndơ ƀư brah đăp mpăn

¹¹ “Aơ jêng nau vay ma ndơ ƀư brah đăp mpăn, klăp lah ăp nơm dơi nhhơr ma Brah Yêhôva.

¹² Tơlah păng nhhơr ndơ ƀư brah gay nau tâm rnê, nđâp ma ndơ nhhơr nau tâm rnê, ăn nhhơr hom ƀănh jê̆ mâu geh ndrui pot dak ngi, ƀănh n'hơ mâu geh ndrui mhĭng dak ngi, jêh ri ƀănh ƀư ma rnih ba ƀlê hŏ tâm pot li ăn lam ma dak ngi.

¹³ Ndrel ma mpa ƀư brah bơh ndơ ƀư brah đăp mpăn gay ƀư nau tâm rnê, ăn păng nhhơr ntop đŏng ƀănh geh ndrui.

¹⁴ Ăn păng sŏk đŏng du mlâm ƀănh tâm ăp ntil nâm bu du ndơ kô̆ khlay nhhơr ma Brah Yêhôva. Ndơ nây mra prăp ma kôranh ƀư brah hŏ mbrih jêh mham mpa ƀư brah tâm nau ƀư brah đăp mpăn.

¹⁵ Puăch bơh mpa ƀư brah tâm ndơ ƀư brah đăp mpăn gay tâm rnê ăn sa tâm nar bu nhhơr, mâu dơi om du ntil ndơ tât ang nar ôi taơ.

¹⁶ Tơlah ndơ ƀư brah tă bơh nau ton mâu lah tă bơh nuih n'hâm rŏng, sa ro mpa ƀư brah tâm nar bu nhhơr, moh mpa hôm e bu dơi sa nar ôi taơ.

¹⁷ Ƀiălah chuat tât nar tal pe, lĕ mpa hôm e ăn bu su lơi ma ŭnh.

¹⁸ Tơlah mbu nơm sa puăch ndơ ƀư brah đăp mpăn tâm nar tal pe, ndơ ƀư brah bơh nơm nây nhhơr mra mâu dơn jêh ri ndơ hŏ nhhơr ƀư brah nây bu mâu kơp ôh. Nĕ jêng du ntil nau ƀơ̆ ƀơch, mbu nơm sa puăch nây mra tuy nau tâm rmal.

¹⁹ Puăch hŏ geh nđĭl jêh ta moh ndơ ƀơ̆ ƀơch, bu mâu dơi sa ôh, ƀiălah ăn bu su păng tâm ŭnh. Bi ma puăch êng, lĕ rngôch mbu geh nau kloh dơi sa da dê.

²⁰ Mbu nơm gŭ tâm nau ƀơ̆ ƀơch ƀiălah sa puăch ndơ ƀư brah đăp mpăn nhhơr ma Brah Yêhôva, bu mra nsot lơi păng luh bơh phung ƀon lan păng.

²¹ Tơlah mbu pah ta ndơ ƀơ̆ ƀơch, mâu lah bơh bunuyh mâu lah bơh moh mpô mpa mâu lah moh ndơ geh nau ƀơ̆ ƀơch, ƀiălah sa tay puăch ƀư brah đăp mpăn nhhơr ma Brah Yêhôva, bu mra nsot lơi păng luh bơh phung ƀon lan păng.”

Buay sa ngi jêh ri mham

²² Brah Yêhôva ntĭnh ntăm tay ma Y-Môis:

²³ “Ăn kon đă hom ma phung ƀon lan Israel: Mâu dơi sa ôh ngi, ngi ndrôk, ngi biăp mâu lah ngi be.

²⁴ Ngi mpa khĭt êng mâu lah tă mpa bri janh sa hêk, bu dơi dŏng ma kan êng, ƀiălah khân may mâu dơi sa ôh.

²⁵ Mbu nơm sa ngi mpa ăn ŭnh sa nhhơr ma Brah Yêhôva, bu mra nsot lơi păng luh bơh phung ƀon lan păng.

²⁶ Phung kon mâu dơi sa mham ôh ta ăp ntŭk phung kon gŭ, nđâp lah nĕ jêng mham sĭm mâu lah mham mpô mpa rong.

²⁷ Mbu nơm sa mham, bu mra nsot lơi păng luh bơh phung ƀon lan păng.”

Kô̆ ma lĕ kôranh ƀư brah

²⁸ Brah Yêhôva hôm ntĭnh đŏng ma Y-Môis:

²⁹ “Ăn may đă hom ma phung ƀon lan Israel pô aơ: Mbu nơm nhhơr ndơ ƀư brah đăp mpăn ma Brah Yêhôva, ăn nơm nĕ djôt leo hom mpa ƀư brah đăp mpăn tât ma Brah Yêhôva.

³⁰ Ti păng mra djôt lĕ ndơ nhhơr ăn ŭnh sa ma Brah Yêhôva, jêng ngi ndrel ma nting rpaih nse, nting rpaih nse nhhơr ma Brah Yêhôva jêng nâm bu du ndơ nhhơr kô̆ khlay.

³¹ Kôranh ƀư brah mra su ngi ta klơ nơng ƀư brah, bi nting rpaih nse prăp ma Y-Arôn jêh ri noi deh Y-Arôn.

³² Ăn khân nơm ăn kô̆ klơ bơh nglik pa ma, pakơi, ma kôranh ƀư brah jêng noi deh Y-Arôn nhhơr mham jêh ri ngi bơh mpa ƀư brah.

³³ Mbu nơm tâm phung kon bu klâu Y-Arôn nhhơr mham jêh ri ngi mpa ƀư brah tâm ndơ ƀư brah đăp mpăn, mra geh nglik pa ma nây.

³⁴ Tă bơh mpa ƀư brah đăp mpăn, Gâp sŏk jêh ri ăn ma kôranh ƀư brah Y-Arôn jêh ri phung kon bu klâu păng nting rpaih nse hŏ ƀư jêh nau vay ƀư ndơ̆ đah aơ ndơ̆ đah ri jêh ri nglik jêng ndơ phung ƀon lan hŏ nhhơr ma Gâp, tĭng nâm nau vay n'ho ro tâm phung ƀon lan Israel djôt prăp.

³⁵ Nây jêng kô̆ prăp ma Y-Arôn jêh ri phung kon bu klâu păng, sŏk bơh lĕ ndơ ƀư brah ăn ŭnh sa nhhơr ma Brah Yêhôva, prăp êng ma khân păng ntơm bơh nar bu dăp khân păng jêng kôranh ƀư brah tanăp Brah Yêhôva.

³⁶ Nĕ jêng nau Brah Yêhôva ntăm jêh ma phung ƀon lan Israel ăn jao ma khân păng tâm nar bu tŏ dak ngi ta khân păng. Aơ jêng du nau vay n'ho ro tâm lĕ rngôch rnôk khân păng.”

³⁷ Nây jêng nau vay ma ndơ ƀư brah gŭch, ndơ ƀư brah rnih môi, ndơ ƀư brah chuai nau tih, ndơ ƀư brah chuai nau ƀư tih, ndơ ƀư brah n'hao kan jêh ri ndơ ƀư brah đăp mpăn

³⁸ jêng nau Brah Yêhôva hŏ ntăm jêh ma Y-Môis ta klơ yôk Sinai, ta nar Brah Yêhôva ntĭnh ntăm ma phung ƀon lan Israel nhhơr ndơ ƀư brah ma Brah Yêhôva, tâm bri rdah Sinai.