Kan Lêvi 6 - Nau Brah Ndu Ngơi 2023

Ndơ ƀư brah chuai nau ƀư tih

¹ Brah Yêhôva ntĭnh ntăm ma Y-Môis:

² “Tơlah du huê ƀư tih jêh ri mâu gŭ răp jăp ôh đah Brah Yêhôva yorlah păng hŏ ndơm mƀruh phung chiau meng păng nơm ma ndơ khân păng đă păng sâm mât mray mâu lah chiă uănh an, mâu lah ma nau ntŭng, mâu lah hŏ sŏk lĕ ndơ nơm chiau meng păng,

³ mâu lah geh dônh jêh moh ndơ bu hŏ tŭp ƀiălah dun, mâu lah ton mƀruh tâm lĕ ntil nau bunuyh vay geh ƀư tih.

⁴ Mbu nơm hŏ ƀư tih jêh ri geh nau tih kơt nây ăn păng mplơ̆ hom ndơ păng hŏ ntŭng jêh, mâu lah ndơ păng hŏ sŏk jêh, mâu lah ndơ bu njuăl ma păng, mâu lah lĕ ndơ roh jêh ri păng dônh,

⁵ mâu lah moh ntil ndơ păng geh yor ton mƀruh. Ăn păng ntrok rĭng n'ho ma ntop du kô̆ tâm prăm rnoh khlay, jêh nây ndơ̆ ma nơm kôranh ndơ nây tâm nar păng nhhơr ndơ ƀư brah chuai nau ƀư tih.

⁶ Ăn păng njŭn leo ma kôranh ƀư brah du mlâm biăp nkuăng mâu têl khap ôh, nhŭp tă bơh ndŭl mpôl biăp, di ma rnoh hŏ veh jêh, gay nhhơr ma Brah Yêhôva ƀư mpa ƀư brah chuai nau ƀư tih.

⁷ Kôranh ƀư brah mra ƀư nau rƀŭn chuai nau ƀư tih ma păng tanăp Brah Yêhôva, jêh ri păng mra dơi yô̆ an ma lĕ nau mâu di păng hŏ ƀư jêh.”

Nau vay ma ndơ ƀư brah gŭch

⁸ Brah Yêhôva lah tay ma Y-Môis:

⁹ “Ăn may ntăm hom nau aơ ma Y-Arôn jêh ri phung kon sau păng: Aơ jêng lĕ nau vay ma ndơ ƀư brah gŭch. Ăn ndơ ƀư brah gŭch dơm ta klơ ŭnh ta klơ nơng ƀư brah ntơm bơh măng kŏ tât ôi, jêh ri mât mray ŭnh ta klơ nơng ăn hit ƀaƀơ.

¹⁰ Kôranh ƀư brah mra nsoh kho gleh đah bok mhay gay ma nkŭm săk, jêh nây nsoh ao kôranh ƀư brah. Jêh nây, kôranh ƀư brah mra kuak buh ta klơ nơng ƀư brah ndơ ƀư brah gŭch jêh ri nkhŭt buh nây êp ta meng nơng ƀư brah.

¹¹ Jêh nây kôranh ƀư brah mra doh lơi kho ao păng jêh ri nsoh kho ao êng, djôt buh nĕ tât du ntŭk kloh ta padih ngih bok.

¹² Ŭnh ta klơ nơng ƀư brah ăn hit ƀaƀơ, mâu ăn rngơt ôh. Ăp ôi, kôranh ƀư brah mra ntop long, dơm ndơ ƀư brah gŭch ta klơ jêh ri gŭch ngi ndơ ƀư brah đăp mpăn ta klơ nơng ƀư brah.

¹³ Ŭnh ăn hit ƀaƀơ ta klơ nơng ƀư brah, mâu ăn nhhât.”

Ndơ ƀư brah rnih môi

¹⁴ Aơ jêng nau vay ma ndơ ƀư brah rnih môi: Du huê kôranh ƀư brah jêng noi deh Y-Arôn mra nhhơr ndơ ƀư brah nây tanăp Brah Yêhôva, ta nơng ƀư brah.

¹⁵ Kôranh ƀư brah mra sŏk du mbăt rnih ƀlê, dak ngi jêh ri lĕ rngôch ndơ ƀâu kah bu dơm ta klơ ndơ ƀư brah rnih môi, jêh nây djôt su ta klơ nơng ƀư brah, nhhơr n'hôl ƀâu kah ma Brah Yêhôva, gay nkah ăn gĭt lĕ rngôch ndơ ƀư brah rnih môi jêng ndơ prăp ma Brah Yêhôva.

¹⁶ Y-Arôn jêh ri phung kôranh ƀư brah tâm noi deh Y-Arôn mra sa moh ndơ hôm e, ƀiălah khân păng mra sa piăng let mâu geh ndrui jêh ri sa tâm du ntŭk kloh ueh, jêng ntŭk tâm ndring Ngih Bok Nau Tâm Rƀŭn.

¹⁷ Mâu dơi pot ndrui ôh tâm rnih nây gay gŭch. Gâp hŏ ăn ndơ nây ma khân păng bơh tâm lĕ ndơ ƀư brah ăn ŭnh sa nhhơr ma Gâp. Nĕ jêng ndơ dŭt kloh ueh, nâm bu ndơ ƀư brah chuai nau tih jêh ri ndơ ƀư brah chuai nau tih.

¹⁸ Lĕ rngôch bu klâu tâm noi deh Y-Arôn dơi sa ndơ nây. Nĕ jêng nau vay n'ho ro ma lĕ rngôch rnôk phung kon, bơh lĕ ndơ ƀư brah ăn ŭnh sa nhhơr ma Brah Yêhôva. Mbu nơm pah ta lĕ ndơ ƀư brah nây mra jêng nau mhĭk yorlah ndơ ƀư brah nây jêng ndơ kloh ueh.

¹⁹ Brah Yêhôva ntĭnh tay ma Y-Môis:

²⁰ “Aơ jêng ndơ Y-Arôn jêh ri phung kôranh ƀư brah jêng noi deh Y-Arôn mra nhhơr ma Brah Yêhôva tâm nar khân păng dơn bu tŏ dak ngi: Du kilô rnih ƀlê tâm ban ma du ndơ ƀư brah rnih môi bu vay nhhơr, ôi n'gul jêh ri măng n'gul.

²¹ Ndơ nhhơr nây ăn pot li lam đah dak ngi jêh ri gŭch păng ta klơ mpĭt. Lah sĭn jêh, ăn koh piăng let nây jêng âk rngơl gay nhhơr, geh n'hôl ƀâu kah ma Brah Yêhôva.

²² Tâm phung kon bu klâu Y-Arôn, mbu nơm kôranh ƀư brah dơn nau bu tŏ dak ngi gay ma tâm thoi kan kôranh ƀư brah toyh, nhhơr da dê ndơ ƀư brah nây ma Brah Yêhôva. Nĕ jêng du nau vay n'ho ro. Ndơ ƀư brah rnih môi ăn ŭnh sa lĕ rngôch.

²³ Ăp ndơ ƀư brah rnih môi bơh kôranh ƀư brah bu mra gŭch lĕ rngôch, mâu dơi ôh sa.”

Ndơ ƀư brah chuai nau tih

²⁴ Brah Yêhôva ntĭnh ma Y-Môis:

²⁵ “Ăn may ntăm hom nau vay ndơ ƀư brah chuai nau tih ma Y-Arôn jêh ri phung kon sau păng ta nâm pô aơ: Mpa ƀư brah ma nau rƀŭn chuai nau tih mra nkhĭt tanăp Brah Yêhôva, mpeh pa lơ ta nơng ƀư brah, ta ntŭk vay nkhĭt lĕ mpa ƀư ndơ ƀư brah gŭch. Nĕ jêng mpa ƀư brah dŭt kloh ueh.

²⁶ Kôranh ƀư brah nhhơr mpa ƀư brah chuai nau tih mra sa ndơ nhhơr nây tâm du ntŭk kloh ueh, jêng tâm ndring Ngih Bok Nau Tâm Rƀŭn.

²⁷ Mbu nơm bunuyh mâu lah moh ndơ pah tât ta puăch mpa ƀư brah mra dơn nau mhĭk, yorlah puăch nây prăp ăn ma nau kloh ueh. Tơlah mham mpa ƀư brah mprănh geh ta ao, ăn khân may pih ao nây tâm du ntŭk kloh ueh.

²⁸ Glah uk dŏng gâm puăch mpa ƀư brah mra mbang chah lơi; ƀiălah tơlah gâm ma glah kông, ăn bu kôr glah jêh ri rao ma dak ăn kloh.

²⁹ Lĕ rngôch bu klâu tâm rnăk vâl kôranh ƀư brah dơi sa ndơ nây da dê, nĕ jêng du kô̆ dŭt kloh ueh.

³⁰ Mâu dơi ôh sa puăch mpa ƀư brah chuai nau tih ƀiălah ăn su lơi, yorlah mham păng nây bu hŏ djôt jêh ma Ngih Bok Nau Tâm Rƀŭn gay ƀư nau rƀŭn chuai nau tih ta Ntŭk Kloh Ueh.”