Kan Lêvi 5 - Nau Brah Ndu Ngơi 2023

Lĕ nau nkra êng êng ŭch nhhơr ndơ ƀư brah chuai nau tih

¹ “Lah du huê ƀư tih yor păng mâu ŭch mbơh du nau kan păng hŏ saơ jêh mâu lah lĕ gĭt, nđâp lah bu đă păng ngơi nau ton ma nau păng saơ nây, pôri păng mra tuy nau tih păng nơm.

² Lah du huê pah ta ndơ ƀơ̆ ƀơch, nâm bu săk mpô mpa bri mâu kloh, mâu lah săk du mlâm mpô mpa rong mâu kloh, mâu lah ta săk ndrŭng mâu kloh, nđâp lah mâu gĭt kđôi, nơm nây ăt geh nau ƀơ̆ ƀơch jêh ri khan nau tih.

³ Mâu lah păng pah ta moh ndơ mâu kloh bơh bunuyh, gĭt lah ta moh ndơ mâu kloh jêh ri nđâp lah mâu gĭt, păng mra khan nau tih yơh.

⁴ Tơlah du huê bunuyh lăn ngơi nau ton mra ƀư nau mhĭk mâu lah nau ueh, ngăch ton ăp ntil kan ƀiălah mâu mĭn, pakơi nĕ mơ păng gĭt năl, păng mra khan nau tih tâm lĕ nau nây.

⁵ Pôri mbu nơm ƀư tih ma du ntil nau tâm lĕ nau ta klơ aơ, ăn păng mbơh nau tih păng hŏ ƀư jêh,

⁶ jêh ri ăn păng djôt ndơ nhhơr ntrok nau tih gay nhhơr ma Brah Yêhôva jêng du mlâm biăp me mâu lah be me tă bơh mpô mpa rong gay ƀư ndơ ƀư brah chuai nau tih. Kôranh ƀư brah mra ƀư nau tâm rƀŭn chuai nau tih ăn ma păng.

⁷ Ƀiălah tơlah păng mâu dơi tŏng nau nhhơr du mlâm kon biăp me mâu lah du mlâm kon be me gay ntrok nau tih păng hŏ ƀư jêh, ăn păng nhhơr ma Brah Yêhôva du kôp sĭm ntơp mâu lah du kôp plŭk kon: du mlâm dŏng ƀư ndơ ƀư brah chuai nau tih, du mlâm êng dŏng ƀư ndơ ƀư brah gŭch.

⁸ Păng mra djôt du kôp sĭm nây ma kôranh ƀư brah. Lor lơn, ăn kôranh ƀư brah nhhơr sĭm ƀư ndơ ƀư brah chuai nau tih. Păng mra juet trô ko sĭm, ƀiălah mâu ăn bôk sĭm tăch ôh,

⁹ jêh nây păng mra mbrih du kô̆ mham mpa ƀư brah chuai nau tih ta pĭt nơng ƀư brah, mham hôm e păng mra păt ăn hoch tâm dâng jâng nơng ƀư brah. Nĕ jêng ndơ ƀư brah chuai nau tih.

¹⁰ Bi ma sĭm tal bar, kôranh ƀư brah mra nhhơr jêng ndơ ƀư brah gŭch tĭng nâm nau vay. Kơt nây, kôranh ƀư brah mra ƀư nau rƀŭn chuai nau tih, yor nau tih nơm nây hŏ ƀư jêh jêh ri păng mra dơi yô̆ an.

¹¹ Tơlah păng mâu geh du kôp sĭm ntơp mâu lah du kôp plŭk kon, ăn păng njŭn leo du kilô rnih môi ba ƀlê gay ƀư ndơ ƀư brah chuai nau tih yor kan tih păng hŏ ƀư jêh; mâu dơi chê̆ dak ngi jêh ri mâu dơi dơm ndơ ƀâu kah ta klơ rnih nây, yorlah nĕ jêng du ndơ ƀư brah chuai nau tih.

¹² Păng mra njŭn rnih nây tât ma kôranh ƀư brah; jêh ri kôranh ƀư brah mra sŏk du mbăt rnih nây djôt gŭch ta nơng ƀư brah, nđâp ma lĕ ndơ nhhơr ăn ŭnh sa nhhơr ma Brah Yêhôva. Mbăt rnih nây nkah ăn gĭt lĕ rngôch rnih jêng ndơ prăp ma Brah Yêhôva. Nĕ jêng ndơ ƀư brah chuai nau tih.

¹³ Tâm ban pônây, kôranh ƀư brah mra ƀư nau rƀŭn chuai nau tih ăn ma nơm hŏ ƀư tih jêh du ntil nau, tâm lĕ ntil nau klơ aơ, jêh ri nau tih păng mra dơi yô̆ an. Rnih hôm e mra jêng ndơ ma kôranh ƀư brah de tâm ban ma ndơ ƀư brah rnih môi.”

¹⁴ Brah Yêhôva ntĭnh ma Y-Môis pô aơ:

¹⁵ “Tơlah geh du huê mâu răp jăp ôh, lăn ƀư tih yorlah mâu nhhơr drăp ndơ prăp ma Brah Yêhôva, yorlah nau tih păng ƀư tih jêh, ăn păng nhhơr ma Brah Yêhôva du mlâm biăp nkuăng mâu têl khap ôh nhŭp tă bơh mpô mpa rong, kơp rnoh ma sêkel prăk tĭng nâm sêkel di ngăn ta Ntŭk Kloh Ueh. Nĕ jêng ndơ ƀư brah chuai nau ƀư tih.

¹⁶ Ăn păng ntrok tay ndơ kloh ueh jêh ri mra ntop du kô̆ tâm prăm rnoh prăk ma ndơ mpa kloh ueh yor nau tih păng hŏ ƀư jêh, jêh nây jao ndơ nây ma kôranh ƀư brah. Kôranh ƀư brah mra dŏng biăp nkuăng jêng ndơ ƀư brah chuai nau ƀư tih gay chuai nau tih ma păng, jêh ri păng mra dơi yô̆ an.

¹⁷ Tơlah du huê lăn ƀư tih ta du nau tâm lĕ nau vay Brah Yêhôva ntăm, ƀư nau mâu dơi vay ƀư ôh, yor ri lĕ tih jêh, jêh ri păng mra tuy nau rmal.

¹⁸ Ăn păng têk njŭn ma kôranh ƀư brah du mlâm biăp nkuăng mâu geh têl khap ôh, nhŭp tâm mpôl biăp, kơp tĭng nâm rnoh hŏ dăp jêh ma ndơ ƀư brah chuai nau ƀư tih. Kôranh ƀư brah mra ƀư nau rƀŭn chuai nau ƀư tih ma nơm nây, yor nau tih păng lăn ƀư tih, jêh ri păng mra dơi yô̆ an.

¹⁹ Nĕ jêng ndơ ƀư brah chuai nau ƀư tih yorlah păng hŏ geh nau tih jêh tanăp Brah Yêhôva.”