Kan Lêvi 4 - Nau Brah Ndu Ngơi 2023

Ndơ ƀư brah chuai nau tih

¹ Brah Yêhôva lah tay ma Y-Môis:

² “May ngơi hom ma phung ƀon lan Israel pô aơ: Tơlah geh du huê bunuyh mâu mĭn ƀư tih tâm du ntil lĕ nau vay Brah Yêhôva ntăm jêh ri ƀư nau mâu dơi vay ƀư ôh:

³ Tơlah păng jêng kôranh ƀư brah toyh lơn dơn jêh nau bu tŏ dak ngi, ƀiălah păng ƀư tih njŭn ma phung ƀon lan khan tâm nau tih, yor nau tih păng hŏ ƀư nây, kôranh ƀư brah nây nhhơr hom ma Brah Yêhôva du mlâm ndrôk mâu geh ntŭk têl khap ôh, gay ƀư mpa ƀư brah chuai nau tih.

⁴ Nơm nây mra têk ndrôk nây tât ta bôk mpông Ngih Bok Nau Tâm Rƀŭn tanăp Brah Yêhôva, pah ti ta bôk ndrôk jêh nây nkhĭt păng tanăp Brah Yêhôva.

⁵ Kôranh ƀư brah toyh lơn bu hŏ tŏ jêh dak ngi mra sŏk du kô̆ mham ndrôk nây njŭn ta trôm Ngih Bok Nau Tâm Rƀŭn,

⁶ mbŭk nglau ti păng tâm mham jêh ri nsrih pơh tơ̆ tanăp Brah Yêhôva, tanăp blah bok Ngih Brah Kloh Ueh.

⁷ Kôranh ƀư brah mra mhĭng mham ndrôk ta lĕ nke Nơng ƀư brah gŭch ndơ ƀâu kah dơm tâm Ngih Bok Nau Tâm Rƀŭn, tanăp Brah Yêhôva, jêh nây nkhŭt lĕ rngôch mham hôm e tâm dâng jâng nơng ƀư brah nhhơr ndơ ƀư brah gŭch n'gân tanăp bôk mpông Ngih Bok Nau Tâm Rƀŭn.

⁸ Păng mra hoal lơi lĕ rngôch ngi ndrôk dŏng ƀư mpa ƀư brah chuai nau tih, nâm bu ndâr ngi nkŭm jŭm proch khŭng jêh ri ngi iang ta khŭng proch,

⁹ bar mlâm leh, ngi ta bar mlâm leh dăch bŭt jêh ri kô̆ dŭt kah ta klơm, ăn păng hoal ndrel ma bar mlâm leh,

¹⁰ tâm ban ma bu hoal lĕ ndơ nây bơh ndrôk nhhơr tâm ndơ ƀư brah đăp mpăn. Kôranh ƀư brah mra su lĕ ndơ nây ta klơ nơng ƀư brah nhhơr ndơ ƀư brah gŭch.

¹¹ Bi ma ntâu ndrôk, lĕ rngôch puăch, bôk, jâng, proch khŭng jêh ri ek păng,

¹² jêng lĕ rngôch ndơ hôm e tă bơh ndrôk, ăn kôranh ƀư brah njŭn luh padih ngih bok, tât ta du ntŭk kloh jêng ntŭk bu nkhŭt ŭnh buh, jêh nây bun ta klơ long gay ma su, jêng su ta ntŭk bu nkhŭt ŭnh buh.

¹³ Tơlah lĕ rngôch phung Israel tâm rƀŭn lăn ƀư tih jêh du ntil nau tâm lĕ nau vay Brah Yêhôva ntăm, ƀư nau mâu dơi vay ƀư, yor ri lĕ tih jêh, nđâp lah khân păng mâu saơ nau nây.

¹⁴ Ƀiălah dôl khân păng gĭt jêh nau tih khân păng nơm hŏ ƀư tih jêh, phung tâm rƀŭn nhhơr hom du mlâm ndrôk ƀư ndơ ƀư brah chuai nau tih jêh ri têk njŭn ndrôk tanăp Ngih Bok Nau Tâm Rƀŭn.

¹⁵ Phung bu ranh tâm phung Israel mra pah ti ta bôk ndrôk jêh nây nkhĭt păng tanăp Brah Yêhôva.

¹⁶ Kôranh ƀư brah toyh lơn hŏ dơn jêh nau bu tŏ dak ngi mra djôt du kô̆ mham ndrôk lăp tâm ngih Bok Nau Tâm Rƀŭn,

¹⁷ mbŭk nglau ti tâm mham jêh ri nsrih pơh tơ̆ tanăp Brah Yêhôva, tanăp blah bok.

¹⁸ Kôranh ƀư brah toyh lơn mra mhĭng mham ta klơ lĕ nke nơng ƀư brah tâm Ngih Bok Nau Tâm Rƀŭn tanăp Brah Yêhôva, jêh ri nkhŭt mham hôm e tâm dâng jâng nơng ƀư brah nhhơr ndơ ƀư brah gŭch n'gân tanăp mpông Ngih Bok Nau Tâm Rƀŭn.

¹⁹ Kôranh ƀư brah mra hoal lĕ rngôch ngi djôt gŭch ta klơ nơng ƀư brah.

²⁰ Ăn kôranh ƀư brah toyh lơn nhhơr ndrôk nây tâm ban ma nau bu nhhơr ndrôk tâm nau rƀŭn chuai nau tih. Tâm ban pônây, kôranh ƀư brah mra chuai nau tih ăn ma phung tâm rƀŭn jêh ri nau tih khân păng mra dơi yô̆ an.

²¹ Jêh nây, ăn păng njŭn ndrôk luh padih rmlak tahan jêh ri su păng tâm ban ma păng hŏ su jêh ndrôk tal lor. Nĕ jêng ndơ ƀư brah chuai nau tih ăn ma phung tâm rƀŭn.

²² Dôl geh du huê kôranh chiă uănh lăn ƀư tih jêh tâm du ntil nau tâm lĕ nau vay Brah Yêhôva ntăm, jêng Brah Ndu păng nơm, ƀư nau mâu dơi vay ƀư ôh, yor ri lĕ tih jêh.

²³ Tơlah păng gĭt năl jêh nau tih păng hŏ ƀư, ăn păng njŭn du mlâm be nkuăng mâu geh têl khap ôh gay ƀư ndơ nhhơr.

²⁴ Păng mra pah ti ta klơ bôk be nkuăng nây, jêh nây nkhĭt păng tanăp Brah Yêhôva, ta ntŭk vay nkhĭt ăp mpa ƀư ndơ ƀư brah gŭch. Nĕ jêng ndơ ƀư brah chuai nau tih.

²⁵ Kôranh ƀư brah mra dŏng nglau ti păng sŏk djê̆ mham tă bơh mpa ƀư brah chuai nau tih jêh ri mhĭng ta lĕ nke nơng ƀư brah nhhơr ndơ ƀư brah gŭch, jêh nây nkhŭt mham hôm e tâm dâng jâng nơng ƀư brah.

²⁶ Păng ăt su lĕ rngôch ngi ta klơ nơng ƀư brah tâm ban ma nau gŭch ngi mpa ƀư brah tâm ndơ ƀư brah đăp mpăn. Tâm ban pônây, kôranh ƀư brah mra ƀư nau rƀŭn chuai nau tih ăn ma kôranh chiă uănh jêh ri nau tih păng mra dơi yô̆ an.

²⁷ Tơlah du huê tâm phung ƀon lan lăn ƀư tih jêh du ntil nau tâm lĕ nau vay Brah Yêhôva ntăm, ƀư nau mâu dơi vay ƀư ôh, yor ri lĕ tih jêh.

²⁸ Dôl păng gĭt năl jêh nau tih păng hŏ ƀư, ăn păng têk du mlâm be me mâu geh têl khap ôh gay ƀư ndơ ƀư brah chuai nau tih păng hŏ ƀư jêh.

²⁹ Păng mra pah ti ta klơ bôk mpa ƀư brah chuai nau tih jêh nây nkhĭt mpa nây tâm ntŭk bu vay nkhĭt lĕ mpa ƀư ndơ ƀư brah gŭch.

³⁰ Kôranh ƀư brah mra dŏng nglau ti sŏk djê̆ mham jêh ri mhĭng ta klơ lĕ nke nơng ƀư brah nhhơr ndơ ƀư brah gŭch jêh nây nkhŭt lĕ mham hôm e tâm dâng jâng nơng ƀư brah.

³¹ Păng ăt hoal lĕ rngôch ngi tâm ban ma nau bu ƀư tâm ndơ ƀư brah đăp mpăn, jêh nây djôt gŭch ta klơ nơng ƀư brah, ƀư ma ndơ ƀư brah geh n'hôl ƀâu kah ƀư maak nuih n'hâm ma Brah Yêhôva. Tâm ban pônây, kôranh ƀư brah mra ƀư nau rƀŭn chuai nau tih ăn ma păng, jêh ri nau tih păng mra dơi yô̆ an.

³² Tơlah păng nhhơr du mlâm kon biăp jêng mpa ƀư brah chuai nau tih, ăn păng têk du mlâm biăp me mâu geh têl khap ôh.

³³ Păng mra pah ti ta klơ bôk mpa ƀư brah chuai nau tih jêh ri nkhĭt ăp mpa nây ƀư ndơ ƀư brah gŭch.

³⁴ Kôranh ƀư brah mra dŏng nglau ti sŏk djê̆ mham jêh ri mhĭng ta klơ ăp nke nơng ƀư brah nhhơr ndơ ƀư brah gŭch, jêh nây nkhŭt lơi lĕ mham hôm e tâm dâng jâng nơng ƀư brah.

³⁵ Păng ăt hoal lĕ rngôch ngi tâm ban ma nau bu ƀư ma biăp kon nhhơr tâm ndơ ƀư brah đăp mpăn jêh nây djôt gŭch mpa nây ta klơ nơng ƀư brah, nđâp ma lĕ ndơ ƀư brah ăn ŭnh sa nhhơr ma Brah Yêhôva. Tâm ban pônây, kôranh ƀư brah mra ƀư nau rƀŭn chuai nau tih ăn ma păng, jêh ri nau tih păng mra dơi yô̆ an.”