Kan Lêvi 3 - Nau Brah Ndu Ngơi 2023

Ndơ ƀư brah đăp mpăn

¹ “‘Mbu nơm ŭch nhhơr ndơ ƀư brah đăp mpăn ma ndrôk nkuăng mâu lah ndrôk me, nhhơr hom tanăp Brah Yêhôva du mlâm ndrôk mâu geh têl khap ôh.

² Bunuyh nây mra pah ti ta bôk mpa ƀư brah jêh nây nkhĭt păng ta bôk mpông Ngih Bok Nau Tâm Rƀŭn. Phung kon sau Y-Arôn, jêng phung kôranh ƀư brah, mra nsrih mham jŭm nơng ƀư brah.

³ Jêh nây sŏk du kô̆ tâm puăn bơh mpa ƀư brah ma ndơ ƀư brah đăp mpăn nây ƀư ndơ nhhơr ăn ŭnh sa nhhơr ma Brah Yêhôva. Nĕ jêng ndâr ngi krêp proch khŭng jêh ri ndâr ngi iang ta proch khŭng,

⁴ bar mlâm leh, ngi ta bar mlâm leh dăch bŭt jêh ri ndơ dŭt kah ta klơm, păng mra hoal ndơ nây ndrel ma bar mlâm leh.

⁵ Phung kon sau Y-Arôn mra gŭch lĕ ndơ nây ta nơng ƀư brah ndrel ma ndơ ƀư brah gŭch hŏ n'gân ta klơ long dôl hit ŭnh. Nĕ jêng du ntil ndơ ƀư brah ăn ŭnh sa, geh n'hôl ƀâu kah ƀư maak nuih n'hâm Brah Yêhôva.

⁶ Mbu nơm ŭch nhhơr mpa ƀư brah ma ndơ ƀư brah đăp mpăn đah biăp mâu lah be, ăn păng nhhơr hom ma Brah Yêhôva du mlâm biăp nkuăng mâu lah me mâu geh têl khap ôh.

⁷ Tơlah nơm nây nhhơr du mlâm biăp kon jêng ndơ nhhơr, ăn păng nhhơr tanăp Brah Yêhôva,

⁸ pah ti păng ta klơ bôk biăp jêh nây nkhĭt păng tanăp bôk mpông Ngih Bok Nau Tâm Rƀŭn. Phung kon sau Y-Arôn mra nsrih mham mpa nây jŭm nơng ƀư brah.

⁹ Jêh nây sŏk du kô̆ tâm puăn bơh ndơ ƀư brah đăp mpăn nây ƀư ndơ nhhơr ăn ŭnh sa nhhơr ma Brah Yêhôva. Nĕ jêng ngi, lĕ tơm chiăng koh dăch lôch nting kuyh, ndâr ngi krêp khŭng proch jêh ri ndâr ngi iang ta proch khŭng,

¹⁰ jêh ri bar mlâm leh, ngi ta bar mlâm leh dăch bŭt jêh ri ndơ dŭt kah tâm klơm, ăn păng hoal ndơ nây ndrel ma bar mlâm leh.

¹¹ Kôranh ƀư brah mra gŭch lĕ ndơ nây ta klơ nơng ƀư brah nâm bu jêng ndơ sông sa ăn ŭnh sa nhhơr ma Brah Yêhôva.

¹² Tơlah ndơ nhhơr bơh nơm nây jêng du mlâm be me, nhhơr păng hom tanăp Brah Yêhôva,

¹³ pah ti păng nơm ta klơ bôk mlâm be jêh nây nkhĭt păng tanăp Ngih Bok Nau Tâm Rƀŭn. Phung kon sau Y-Arôn mra nsrih mham mpa nây jŭm nơng ƀư brah.

¹⁴ Jêh nây sŏk du kô̆ bơh ndơ ƀư brah ma nau đăp mpăn ƀư ndơ nhhơr ăn ŭnh sa nhhơr ma Brah Yêhôva. Nĕ jêng ndâr ngi nkŭm proch khŭng jêh ri ndâr ngi iang ta proch khŭng,

¹⁵ bar mlâm leh, ngi ta bar mlâm leh dăch bŭt jêh ri ndơ dŭt kah tâm klơm, ăn păng hoal ndơ nây ndrel ma bar mlâm leh.

¹⁶ Kôranh ƀư brah mra su lĕ ndơ nây ta klơ nơng ƀư brah nâm bu ndơ sông sa nhhơr ăn ŭnh sa geh n'hôl ƀâu kah. Lĕ rngôch ngi jêng ndơ Brah Yêhôva.

¹⁷ Aơ jêng nau vay dăp n'ho ro ma noi deh khân may ta ăp ntŭk khân may gŭ: khân may mâu dơi sa ngi mâu lah mham ôh.’”