Kan Lêvi 27 - Nau Brah Ndu Ngơi 2023

Ndơ nhhơr

¹ Brah Yêhôva lah ma Y-Môis:

² “May ntăm hom ma phung ƀon lan Israel pô aơ: ‘Tơlah mbu nơm geh nau dăn ton êng tât ma nau nhhơr bunuyh ma Brah Yêhôva, ăn may kơp tĭng nâm rnoh tâm ban gay ma nhhơr.

³ Tơlah păng jêng bu klâu bơh bar jât năm tât ta prao jât năm, ăn khân may kơp rnoh bơi tât prao rhiăng gram prăk, tĭng nâm sêkel prăk di tâm Ntŭk Kloh Ueh.

⁴ Tơlah nơm nây jêng bu ur, ăn khân may veh rnoh klăp lah pe rhiăng prăm jât gram prăk.

⁵ Tơlah păng jêng ndăm rah mâu lah druh rah ntơm bơh prăm năm tât ta bar jât năm, ăn khân may veh rnoh klăp lah bar rhiăng pe jât gram prăk ma du huê bu klâu jêh ri du rhiăng jât mprăm gram prăk ma du huê bu ur.

⁶ Kon se ntơm bơh du khay tât ta prăm năm, ăn khân may veh rnoh bơi prao jât gram ma du huê kon se bu klâu jêh ri bơi pe jât prăm gram prăk ma du huê kon se bu ur.

⁷ Phung bu ranh ntơm bơh prao jât năm leo klơ, ăn khân may veh rnoh klăp lah du rhiăng pơh jât gram prăk ma du huê bu klâu jêh ri du rhiăng jât mprăm gram ma du huê bu ur.

⁸ Tơlah nơm dăn ton jêng ndĭt trơi ir, mâu dơi plơ̆ rnoh prăk hŏ veh jêh, bu mra njŭn păng tât tanăp kôranh ƀư brah. Kôranh ƀư brah mra veh rnoh ma păng tĭng nâm păng dơi geh.

⁹ Tơlah du huê nơm ton sŏk mpô mpa ƀư ndơ ƀư brah nhhơr ma Brah Yêhôva, lĕ mpa bu nhhơr nây mra jêng ndơ kloh ueh.

¹⁰ Păng mâu dơi ntrok mâu lah rgâl mpa ueh jêng mpa mhĭk, mâu lah mpa mhĭk ntrok ma mpa ueh. Tơlah ntrok mpa aơ đah mpa ri, pôri lĕ bar mlâm mpa nây mra jêng ndơ kloh ueh.

¹¹ Tơlah mpa ton nhhơr jêng mpa ƀơ̆, bu mâu dơi dŏng ƀư ndơ ƀư brah nhhơr ma Brah Yêhôva, ăn bu têk mpa nây tât tanăp kôranh ƀư brah,

¹² jêh ri kôranh ƀư brah mra kơp rnoh păng ueh mâu lah mhĭk; dŭm âk kôranh ƀư brah veh rnoh, rnoh kơt nây yơh.

¹³ Bi tơlah ŭch chuai tay, mplơ̆ hom ntop du kô̆ tâm prăm ma rnoh hŏ veh jêh.

¹⁴ Tơlah geh nuyh ŭch nhhơr ngih păng ƀư ndơ kloh ueh ma Brah Yêhôva, kôranh ƀư brah mra veh rnoh ngih nây tĭng nâm ueh mâu lah mhĭk; dŭm âk kôranh ƀư brah veh rnoh, rnoh kơt nây yơh.

¹⁵ Tơlah nơm hŏ nhhơr jêh ngih nây ŭch chuai tay, ăn păng ntop du kô̆ tâm prăm ma rnoh hŏ veh jêh, jêh ri ngih nây mra jêng ndơ păng nơm.

¹⁶ Tơlah mbu nơm nhhơr du kô̆ neh tâm rnăk vâl păng ăn ma Brah Yêhôva, nau khân may veh rnoh tĭng nâm dŭm găr ntil srih tâm neh nĕ: klăp lah prao rhiăng gram prăk ăn ma bar rhiăng bar jât lit ntil ba ôrgơ.

¹⁷ Tơlah mir păng nhhơr bơh năm ueh maak, ăt dơi kơp tĭng nâm rnoh khân may hŏ veh jêh.

¹⁸ Ƀiălah tơlah păng nhhơr mir pakơi năm ueh maak, pôri kôranh ƀư brah mra kơp tĭng mrô năm hôm e kŏ tât năm ueh maak jêh ri khân may mra n'hŭch rnoh hŏ veh jêh.

¹⁹ Tơlah nơm hŏ nhhơr jêh mir, păng ŭch chuai tay, ăn păng plơ̆ ntop du kô̆ tâm prăm ma rnoh prăk hŏ veh jêh, jêh ri mir nây mra jêng ndơ păng.

²⁰ Bi tơlah păng mâu ŭch chuai tay ôh mâu lah hŏ tăch jêh mir ma nơm êng, păng mâu hôm dơi chuai tay đŏng ôh.

²¹ Tât năm ueh maak, mir luh tă bơh ti nơm rvăt mra jêng neh kloh ueh yorlah hŏ nhhơr jêh ma Brah Yêhôva; mir nây mra jêng ndơ kôranh ƀư brah.

²² Tơlah mbu nơm nhhơr ma Brah Yêhôva du mir păng hŏ rvăt jêh, mâu di neh rnăk vâl păng nơm ôh,

²³ pôri kôranh ƀư brah mra ăn rnoh mir kŏ tât năm ueh maak, jêh ri tâm nar nây ro, bunuyh nây plơ̆ hom kơp tĭng nâm rnoh hŏ veh jêh; nây jêng ndơ kloh ueh nhhơr ma Brah Yêhôva.

²⁴ Tât ta năm ueh maak, mir nây mra plơ̆ sĭt ma nơm tăch jêh păng, jêng plơ̆ sĭt ma păng nơm.

²⁵ Nau veh rnoh ăn kơt tĭng sêkel di tâm Ntŭk Kloh Ueh. Du sêkel mra jêng bar jât gêra.

²⁶ Ƀiălah, mâu geh nơm dơi nhhơr kon bôk rah ndrôk mâu lah biăp bơh mpô mpa khân may, yorlah lĕ kon bôk rah jêng ndơ Brah Yêhôva jêh.

²⁷ Bi tơlah mpa jêng mpa ƀơ̆, bu dơi rvăt tay păng tĭng nâm rnoh hŏ veh jêh, ntop đŏng du kô̆ tâm prăm ma păng; bi tơlah bu mâu chuai tay păng ôh, bu mra tăch păng tĭng nâm rnoh hŏ veh jêh.

²⁸ Padih nĕ, tâm lĕ rngôch ndơ nhhơr lah geh du huê bunuyh hŏ nhhơr jêh ma Brah Yêhôva, gĭt lah bunuyh mâu lah mpô mpa, mâu lah neh rnăk vâl păng, bu mâu dơi vay tăch mâu lah tâm chuai tay ôh. Lĕ rngôch mpa hŏ nhhơr jêng dŭt kloh da dê ma Brah Yêhôva.

²⁹ Du huê bunuyh hŏ jao jêh tâm nau rai lôch, bu mâu dơi vay chuai tay ôh; bunuyh nây mra nkhĭt.’

Nhhơr du kô̆ tâm jât

³⁰ ‘Lĕ rngôch ndơ du kô̆ tâm jât play bơh neh, ntơm bơh grăp ba tâm mir tât ma kao play bơh tơm si jêng ndơ Brah Yêhôva da dê; nĕ jêng ndơ kloh ueh nhhơr ma Brah Yêhôva.

³¹ Tơlah mbu nơm ŭch chuai tay moh ndơ tă bơh du kô̆ tâm jât nây ăn păng plơ̆ ntop đŏng du kô̆ tâm prăm ma du kô̆ tâm jât nây.

³² Bi ma ndơ du kô̆ tâm jât bơh ndrôk jêh ri biăp, jêng kon tal jât hăn găn tâm dâng mâng jra nơm chiăp, mra jêng ndơ kloh ueh ma Brah Yêhôva.

³³ Bu mâu dơi tâm nkhah mpa ueh mâu lah mpa mhĭk, jêh ri mâu lĕ păng dơi tâm rgâl. Tơlah păng tâm rgâl, pôri mpa tâm rgâl jêh ri nđâp ma mpa rgâl mra jêng ndơ kloh ueh da dê, bu mâu dơi chuai tay ôh.’”

³⁴ Nây jêng nau vay Brah Yêhôva ntăm đă Y-Môis ntăm tay ma phung ƀon lan Israel ta klơ yôk Sinai.