Kan Lêvi 25 - Nau Brah Ndu Ngơi 2023

Năm saƀat

¹ Brah Yêhôva ntăm ma Y-Môis ta klơ yôk Sinai:

² “Ntăm hom ma phung ƀon lan Israel pô aơ: ‘Lah khân may lăp tâm n'gor Gâp bơi ăn pôri khân may mra ăn neh rlu tâm du năm saƀat ma Brah Yêhôva

³ Tâm prao năm khân may mra tuch tăm tâm mir, koh nkra đang krăk ƀâu jêh ri rgum play kao păng.

⁴ Ƀiălah năm tal pơh mra jêng năm saƀat gay ăn neh rlu, jêng năm saƀat ma Brah Yêhôva, khân may mâu dơi tuch tăm ôh tâm mir mâu lah koh nkra đang krăk ƀâu khân may;

⁵ mâu dơi kăch roih ôh lĕ ndơ hon êng pakơi yan kăch jêh ri mâu đŏng pĕ ôh play krăk ƀâu bơh đang krăk ƀâu mâu mâp koh nkra. Nĕ jêng du năm ăn neh rlu.

⁶ Play kao geh tâm năm saƀat mra dŏng ƀư ndơ sông sa ăn ma khân may, ăn ma phung oh mon bu klâu, bu ur khân may, ăn ma phung kan nkhôm, phung gŭ njưh tâm nklang ma khân may,

⁷ jêh ri ăn ma mpô mpa rong jêh ri ma mpô mpa gŭ tâm n'gor khân may. Lĕ rngôch play bơh neh dŏng ƀư ndơ sông sa da dê.’

Năm ueh maak

⁸ ‘Ăn khân may kơp pơh pơh năm, nâm bu ntĭt pơh tơ̆ pơh năm yơh; mông nar tâm pơh năm nây mra jêng puăn jât ma sĭn năm.

⁹ Tâm nar jât khay pơh jêng nar chuai nau tih, ăn khân may uh nŭng ăn huy ngăn lam n'gor.

¹⁰ Ăn khân may ƀư tâm năm tal prăm jât jêng kloh ueh jêh ri mbơh nau kon me ma lĕ rngôch phung ƀon lan gŭ tâm lam n'gor. Nây jêng năm ueh maak ma khân may; ăp nơm dơn tay drăp ndơn khân păng, jêh ri ăp nơm plơ̆ sĭt ma ndŭl mpôl păng nơm.

¹¹ Năm prăm jât nây jêng năm ueh maak ma khân may; dôl nây khân may mâu dơi tuch tăm mâu lah kăch roih ôh moh ndơ hon êng tă bơh neh, mâu lĕ pĕ play bơh đang krăk ƀâu mâu mâp koh nkra,

¹² yorlah aơ jêng năm ueh maak jêh ri kloh ueh ma khân may; khân may knŏng sa play kao bơh mir khân may.’

Nau tăch rvăt jêh ri nau chuai drăp ndơn

¹³ ‘Tâm năm ueh maak, ăp nơm tâm phung khân may mra dơn tay drăp ndơn khân păng nơm.

¹⁴ Tơlah khân may tăch mâu lah rvăt moh ndơ tă bơh phung chiau meng khân may, lơi ta ndơm ndrăng nơm ôh.

¹⁵ Ăn phung khân may kơt tĭng mrô năm ntơm pakơi năm ueh maak, khân may mra rvăt ndơ nơm chiau meng khân may, bi khân păng mra tăch ma khân may kơt tĭng ta năm geh play kao.

¹⁶ Tơlah hôm âk năm ăn khân may ntop rnoh, tơlah hôm djê̆ năm ăn khân may n'hŭch rnoh, yorlah păng tăch ma khân may tĭng nâm mrô năm geh play kao.

¹⁷ Lơi tâm ndơm ndrăng khân may nơm ôh, ƀiălah ăn khân may klach yơk ma Brah Ndu khân may, yorlah Gâp jêng Yêhôva Brah Ndu khân may.

¹⁸ Yor nây ăn khân may ƀư tĭng lĕ nau vay dăp bơh Gâp, mât mray jêh ri ƀư tĭng lĕ nau vay ƀư bơh Gâp, gay ma khân may dơi gŭ rêh đăp mpăn tâm n'gor.

¹⁹ Neh mra deh play kao ăn ma khân may, khân may mra sa kŏ hơm jêh ri gŭ rêh ma nau đăp mpăn tâm n'gor.

²⁰ “Klăp lah khân may mra vĭ vĕ: Moh ndơ hên mra sa ta năm tal pơh tơlah hên mâu tuch tăm mâu kăch roih?”

²¹ Gâp mra ăn nau ueh uĭn ma khân may năm tal prao kŏ tât play kao mra dơi tŏng tâm pe năm.

²² Năm tal pham khân may mra tuch tăm jêh ri sa play kao yan kăch roih ơm jêh ri sa tay kŏ tât yan kăch roih mhe năm tal sĭn.

²³ Mâu dơi tăch neh n'ho ro ôh yorlah neh jêng ndơ Gâp, bi khân may gŭ ndrel ma Gâp nâm bu phung bu năch jêh ri phung gŭ njưh.

²⁴ Tâm lam n'gor khân may mra dơn drăp ndơn, ăn khân may nkra ma bu nau vay tâm chuai neh.

²⁵ Tơlah oh nâu may tŭp tâm nau ndĭt trơi jêh ri tăch du kô̆ drăp ndơn, ruh me noi deh dăch păng mra văch jêh ri tâm chuai neh oh nâu păng hŏ tăch jêh.

²⁶ Tơlah du huê bunuyh mâu geh ôh ruh me sâm chuai an ma păng ƀiălah păng nơm dơi ndrăp gay tâm chuai êng,

²⁷ ăn păng kơp mrô năm ntơm bơh păng tăch jêh ri plơ̆ ăn nŭm lơn rnoh ma bunuyh rvăt, jêh ri păng dơn tay drăp ndơn păng.

²⁸ Tơlah nơm tơm neh mâu dơi tŏng ôh nau gay plơ̆ prăk ma nơm ri pôri neh păng tăch mra jêng ndơ nơm rvăt kŏ tât năm ueh maak; ta năm ueh maak, neh nây mra luh bơh ti nơm rvăt jêh ri sĭt ma nơm tơm neh.

²⁹ Tơlah du huê bunuyh tăch du rplay ngih gŭ tâm ƀon toyh geh pêr jŭm, păng dơi chuai ngih nây tâm du năm lah jêh păng tăch; yorlah nau dơi tâm chuai nđom jong tât du năm.

³⁰ Bi nơm tăch ngih, tơlah lôch tâm du năm mâu chuai ôh ngih gŭ tâm ƀon toyh geh pêr jŭm, ngih nĕ mra jêng ndơ nơm rvăt n'ho ro jêh ri ma kon sau păng. Bu mâu mra plơ̆ ôh ngih nây tâm năm ueh maak.

³¹ Ƀiălah, ngih tâm ƀon jê̆ mâu geh mpêr ƀon jŭm bu mra kơp nâm bu mir, nơm tăch dơi chuai tay. Ngih nây mra dơi plơ̆ ma nơm tơm ngih tâm năm ueh maak.

³² Ƀiălah bi ma lĕ ƀon toyh jêh ri ngih tâm lĕ ƀon toyh jêng ndơ phung Lêvi, khăn păng dơi chuai ndah jŏ păng ŭch.

³³ Tơlah phung Lêvi mâu chuai ôh ngih tâm ƀon toyh jêng ndơ khân păng, ƀiălah khân păng hŏ tăch jêh, lah tât năm ueh maak bu mra plơ̆ tay ngih nây ma khân păng, yorlah ngih tâm ƀon toyh jêng drăp ndơn phung Lêvi ta nklang phung ƀon lan Israel.

³⁴ Bi ma lĕ mir tâm ƀon toyh jêng ndơ phung Lêvi bu mâu dơi vay tăch ôh; yorlah mir nây jêng drăp ndơn khân păng ƀaƀơ.’

Bi ma phung o ach

³⁵ ‘Tơlah oh nâu khân may tŭp tâm nau o ach, mâu dơi siăm rong păng nơm ôh, ăn khân may kơl păng, nđâp lah du huê bu năch mâu lah du huê bunuyh gŭ njưh, gay ma păng dơi rêh ndrel ma khân may.

³⁶ Lơi sa kao mâu lah sŏk drăp nkhôm bơh păng ôh, ƀiălah klach yơk hom ma Brah Ndu gay ma oh nâu khân may dơi gŭ rêh dăch khân may.

³⁷ Lơi may ăn păng chan prăk may yor may ŭch sa kao, mâu đŏng dơi tăch ndơ sông sa ma păng yor may ŭch sa drăp.

³⁸ Gâp jêng Yêhôva Brah Ndu khân may, Nơm ngluh khân may luh bơh bri Êjipt, gay ăn ma khân may neh Kanaan jêh ri ƀư Brah Ndu khân may.’

Nau geh ma phung dĭk

³⁹ ‘Tơlah oh nâu gŭ dăch khân may tŭp tâm nau ndĭt trơi, jêh ri tăch păng nơm ma khân may, khân may mâu dơi đă păng pah kan tâm ban ma dĭk ôh.

⁴⁰ Păng mra gŭ ndrel khân may tâm ban ma du huê oh mon kan nkhôm, tâm ban ma du huê gŭ njưh, jêh ri păng mra gŭ pah kan ma ngih khân may tât ta năm ueh maak.

⁴¹ Dôl nây, păng dơi jêng kon me, păng ndrel ma kon păng plơ̆ sĭt ma rnăk vâl păng nơm jêh ri dơn tay drăp ndơn bơh phung chô yau păng.

⁴² Yorlah khân păng jêng phung oh mon Gâp, phung Gâp hŏ ngluh jêh bơh bri Êjipt, bu mâu dơi tăch khân păng tâm ban ma tăch dĭk ôh.

⁴³ Lơi ăn khân may jêng phung chiă uănh khân păng ma nau janh ôh, ƀiălah klach yơk hom ma Brah Ndu.

⁴⁴ Lah khân may ŭch geh oh mon bu klâu jêh ri oh mon bu ur, khân may dơi rvăt khân păng bơh phung ƀon lan jŭm khân may.

⁴⁵ Khân may dơi rvăt đŏng dĭk bơh phung gŭ njưh tâm nklang khân may, jêh ri tă bơh lĕ rnăk vâl geh kon deh jêh tâm n'gor khân may; khân păng mra jêng drăp ndơn khân may.

⁴⁶ Khân may dơi mât khân păng jêng drăp ndơn ma phung kon sau khân may, jêh ri gay ma khân păng jêng dĭk n'ho ro. Ƀiălah ma phung oh nâu khân may jêng phung ƀon lan Israel, mâu geh du huê dơi chiă uănh janh ma khân păng.

⁴⁷ Tơlah du huê bu năch mâu lah du huê gŭ njưh ndrel ma khân may văch ma ndrŏng ngăn, bi oh nâu khân may dăch khân păng tŭp tâm nau ndĭt trơi jêh ri tăch păng nơm ma bu năch mâu lah ma nơm gŭ njưh nây, mâu lah ma du huê bunuyh tâm ngih nơm bu năch nây,

⁴⁸ jêh păng tăch păng nơm, du huê tâm phung oh nâu păng, klăp lah dơi chuai êng păng nơm,

⁴⁹ mâu lah kônh va mâu lah kon kônh va mâu lah du huê tâm phung ndŭl mpôl dơh dăch, ăt dơi đŏng chuai păng, mâu lah tơlah păng văch ma ndrŏng jêh ri dơi chuai êng păng nơm.

⁵⁰ Păng mra kơp ndrel ma nơm rvăt păng ntơm bơh năm păng tăch păng nơm kŏ tât năm ueh maak jêh ri rnoh prăk tâm chuai păng mra jêng tĭng mrô năm nây, jêh ri bu mra kơp rnoh tâm ban ma oh mon kan nkhôm.

⁵¹ Tơlah hôm âk năm, kơt tĭng nâm mrô năm păng mra n'hŭch rnoh bu hŏ rvăt păng jêng rnoh tâm chuai păng;

⁵² Tơlah hôm djê̆ năm êlor tât năm ueh maak kơt tĭng mrô năm hôm păng mra mplơ̆ prăk tâm chuai.

⁵³ Yorlah uănh păng tâm ban ma du huê bunuyh pah kan nkhôm ntơm năm aơ chuat tât năm êng yor nây kôranh mâu dơi gŭ ngao nau janh ma nơm nây.

⁵⁴ Tơlah păng mâu dơi geh nau chuai tâm ban pônây, tâm năm ueh maak, bu mra plơ̆ păng jêh ri ndrel ma oh kon păng.

⁵⁵ Yorlah phung ƀon lan Israel jêng phung oh mon Gâp, phung Gâp ngluh jêh bơh bri Êjipt. Gâp jêng Yêhôva Brah Ndu khân may.’ ”