Kan Lêvi 24 - Nau Brah Ndu Ngơi 2023

Nau vay ma ŭnh kađen tâm ngih brah

¹ Brah Yêhôva lah ma Y-Môis:

² “Ăn may ntĭnh hom ma phung ƀon lan Israel djôt dak ngi ôlive hŏ mpet lêk mâu geh rlŭk tât ta aơ, gay mpoh ŭnh kađen, gay mât mray ŭnh kađen hit ƀaƀơ.

³ Y-Arôn mra n'gân kađen nây tâm Ngih Bok Nau Tâm Rƀŭn, padih bok nching nkŭm Hip Nau Tâm Rnglăp, gay mât mray ŭnh kađen hit ƀaƀơ, ntơm bơh mhaơ tât ôi tanăp Brah Yêhôva. Nây jêng nau vay dăp n'ho ro tâm lĕ rngôch rnôk khân may.

⁴ Y-Arôn mra n'gân lĕ rngôch kađen ta klơ jâng kađen ma mah kloh gay ŭnh kađen hit ƀaƀơ tanăp Brah Yêhôva.”

Nau vay ma piăng let nhhơr

⁵ “Sŏk hom rnih môi, gŭch jât ma bar mpơng piăng let, ăp mpơng nhueh jâk bar kilô,

⁶ jêh ri ăn may dăp păng bar mbor, prao mlâm tâm du mbor, ta klơ sưng ndop ma mah kloh tra năp Brah Yêhôva.

⁷ Ta ăp mbor, ăn may srih ndơ ƀâu kah mâu geh rlŭk, gay tâm ntĭt ndơ ma nau kan nhhơr piăng let, nâm ndơ ƀư brah ăn ŭnh sa nhhơr ma Brah Yêhôva.

⁸ Ăp nar saƀat, Y-Arôn vay dăp ƀaƀơ lĕ mpơng piăng let nây tanăp Brah Yêhôva ntang an ma phung ƀon lan Israel nâm bu du nau tâm rnglăp n'ho ro.

⁹ Piăng let nĕ prăp ma Y-Arôn jêh ri ma phung kon bu klâu păng, khân păng mra sa păng tâm du ntŭk kloh ueh, yorlah păng jêng kô̆ dŭt kloh ueh prăp ma khân păng bơh lĕ ndơ ƀư brah ăn ŭnh sa nhhơr ma Brah Yêhôva. Nây jêng nau dăp n'ho ro tâm lĕ rngôch rnôk khân may.”

Nau tâm rmal ma nau tih ngơi sưr rlau

¹⁰ Geh du huê kon bu klâu, me păng jêng phung Israel, mbơ̆ păng jêng bunuyh Êjipt, nsong ta nklang phung ƀon lan Israel jêh ri tâm lơh đah du huê phung Israel tâm ngih bok.

¹¹ Kon bu klâu bu ur Israel nây yơh ngơi sưr jêh ri rak rtăp ma amoh Brah Yêhôva. Bu njŭn păng tât ma Y-Môis. Amoh me păng H'Sêlômit, kon bu ur Y-Dibri, bơh noi deh Dan.

¹² Bu krŭng păng tâm ndrung kŏ tât nôk nau mĭn Brah Yêhôva ŭch dơi mpơl rah vah.

¹³ Brah Yêhôva lah ma Y-Môis:

¹⁴ “Djôt leo hom nơm rak rtăp nĕ luh padih ngih bok. Đơ lĕ rngôch phung hŏ tăng jêh nau păng ngơi, ăn pah hom ti khân may ta bôk păng jêh ri ăn lĕ rngôch phung ƀon lan Israel klŭp păng ma lŭ.

¹⁵ Jêh nây ăn may lah ma phung ƀon lan Israel pô aơ: ‘Mbu nơm rak rtăp Brah Ndu mra tuy nau tih păng nơm.

¹⁶ Mbu nơm ngơi sưr ma amoh Brah Yêhôva bu mra nkhĭt lơi păng; lĕ rngôch phung tâm rƀŭn mra klŭp lŭ ta păng. Nđâp lah bunuyh gŭ njưh mâu lah bunuyh ƀon tơm, mbu ngơi sưr ma amoh Brah Yêhôva, bu mra nkhĭt păng.’

Nau vay nkra lĕ nau mhĭk

¹⁷ ‘Mbu nơm lơh nkhĭt du huê bunuyh, bu mra nkhĭt păng.

¹⁸ Mbu nơm lơh nkhĭt du mlâm mpô mpa, ăn păng ntrok yơh, mpa rêh ntrok mpa rêh.

¹⁹ Mbu nơm ƀư sôt phung chiau meng păng, ăn bu phat păng tâm ban ma păng hŏ ƀư jêh ma bu;

²⁰ nting ntrok nting, măt ntrok măt, sêk ntrok sêk; bu mra ƀư sôt rmanh ma bunuyh êng mâm nau păng hŏ ƀư, ăn păng tuy sôt rmanh kơt nĕ.

²¹ Mbu nơm ƀư khĭt du mlâm mpô mpa rong, ăn ntrok yơh; mbu nơm lơh nkhĭt du huê bunuyh, ăn bu nkhĭt păng.

²² Phung kon knŏng geh du nau vay dơi dŏng ăn ma bunuyh gŭ njưh jêh ri ma bunuyh ƀon tơm; yorlah Gâp jêng Yêhôva Brah Ndu khân may.’”

²³ Y-Môis ntăm tay ma phung ƀon lan Israel lĕ nau aơ. Khân păng njŭn nơm ngơi sưr luh bơh ngih bok jêh ri klŭp lŭ ta păng. Phung ƀon lan Israel ƀư di tĭng nâm nau Brah Yêhôva hŏ ntăm jêh ma Y-Môis.