Kan Lêvi 23 - Nau Brah Ndu Ngơi 2023

Lĕ nau rƀŭn toyh tâm năm

¹ Brah Yêhôva lah ma Y-Môis:

² “Ăn may ntăm hom ma phung ƀon lan Israel pô aơ: ‘Aơ jêng lĕ nar rƀŭn Brah Yêhôva hŏ tâm nal jêh, ăn khân may mbơh nau aơ nâm bu mbơh nau lĕ yan tâm rƀŭn kloh ueh.

³ Lĕ rngôch nau kan dơi ƀư tâm prao nar, ƀiălah tal pơh jêng nar saƀat, du nar rlu, jêng nar tâm rƀŭn kloh ueh, khân may mâu dơi ƀư du ntil kan ôh; nây jêng nar saƀat ma Brah Yêhôva tâm lĕ rngôch ntŭk khân may gŭ.

⁴ Aơ jêng lĕ nar rƀŭn ma Brah Yêhôva, lĕ yan tâm rƀŭn kloh ueh, ăn khân may mbơh nau aơ tĭng nar tâm nal jêh.

⁵ Rƀŭn Nau Găn ma Brah Yêhôva ntơm kêng mhaơ nar jât ma puăn khay nguay.

⁶ Chuat tât nar jât mprăm tâm khay nây jêng nar rƀŭn Piăng Let Mâu Geh Ndrui nhhơr ma Brah Yêhôva; khân may sa piăng let mâu geh ndrui tâm pơh nar.

⁷ Ta nar tal nguay khân may mra geh nau tâm rƀŭn kloh ueh, khân may mâu dơi ƀư du ntil kan vay ƀư tâm ăp nar.

⁸ Tâm pơh nar ăn khân may nhhơr lĕ ndơ nhhơr ăn ŭnh sa ma Brah Yêhôva. Tât ta nar tal pơh geh đŏng du yan tâm rƀŭn kloh ueh, khân may mâu dơi ƀư du ntil kan vay ƀư tâm ăp nar.’”

⁹ Brah Yêhôva lah tay ma Y-Môis:

¹⁰ “Ăn may ntăm hom ma phung ƀon lan Israel pô aơ: ‘Lah khân may hŏ lăp jêh tâm n'gor Gâp ăn ma khân may jêh ri khân may hŏ kăch roih lĕ yan play, ăn khân may djôt leo du nchăp ba bôk yan tât ta kôranh ƀư brah.

¹¹ Tâm du nar pakơi nar saƀat, kôranh ƀư brah mra nhhơr nchăp ba nây ma nau vay ƀư ndơ̆ đah aơ ndơ̆ đah ri tanăp Brah Yêhôva gay ma khân may dơi dơn.

¹² Ăt tâm nar nây khân may nhhơr nchăp ba ma nau vay ƀư ndơ̆ đah aơ ndơ̆ đah ri, ăn khân may nhhơr du mlâm kon biăp nkuăng geh du năm mâu geh têl khap gay ƀư ndơ ƀư brah gŭch ma Brah Yêhôva,

¹³ jêh ri du ndơ ƀư brah rnih môi ma bar kilô rnih môi pot đah dak ngi, jêng ndơ ƀư brah ăn ŭnh sa, geh n'hôl ƀâu kah nhhơr ma Brah Yêhôva, ndrel ma du lit ndrănh gay ƀư ndơ nhhơr nhêt.

¹⁴ Khân may mâu dơi sa piăng let mâu lah găr ba vâr mâu lah nkong ba nse kŏ tât ta nar nĕ, nây jêng nar khân may nhhơr ndơ ƀư brah ma Brah Ndu khân may. Nây jêng nau vay dăp n'ho ro ma lĕ rngôch rnôk, tâm lam ntŭk khân may gŭ rêh.

¹⁵ Khân may kơp ăn nŭm pơh nar ver, ntơm bơh nar pakơi ma nar saƀat, jêng nar khân may nhhơr nchăp ba, nkra tĭng nau vay ƀư ndơ̆ đah aơ ndơ̆ đah ri;

¹⁶ tâm nar tal prăm jât, jêng nar pakơi ma nar saƀat tal pơh, ăn khân may nhhơr du ndơ ƀư brah rnih môi mhe ma Brah Yêhôva.

¹⁷ Ăp rnăk vâl ăn khân may njŭn bar mlâm piăng let gay ƀư mpa nhhơr, tĭng nau vay ƀư ndơ̆ đah aơ ndơ̆ đah ri; ăp mpơng ƀănh dơi ƀư tâm di ma bar kilô rnih môi geh pot ndrui jêh ri gŭch, nây jêng ndơ dak bôk nhhơr ma Brah Yêhôva.

¹⁸ Ndrel ma piăng let, ăn lĕ rngôch phung tâm rƀŭn khân may nhhơr đŏng pơh mlâm biăp kon du năm mâu geh têl khap ôh, du mlâm ndrôk jêh ri bar mlâm biăp nkuăng ƀư ndơ ƀư brah gŭch nhhơr ma Brah Yêhôva ndrel ma ndơ ƀư brah rnih môi jêh ri ndơ nhhơr nhêt; ndơ ƀư brah gŭch jêng ndơ ƀư brah ăn ŭnh sa, geh n'hôl ƀâu kah ma Brah Yêhôva.

¹⁹ Ăn phung tâm rƀŭn khân may nhhơr đŏng du mlâm be nkuăng jêng ndơ ƀư brah chuai nau tih jêh ri bar mlâm biăp kon du năm jêng ndơ ƀư brah đăp mpăn.

²⁰ Kôranh ƀư brah mra nhhơr lĕ mpa nây tanăp Brah Yêhôva, ndrel ma bar mpơng piăng let ƀư đah ba bôk yan jêh ri bar mlâm biăp kon, tĭng nau vay ƀư ndơ̆ đah aơ ndơ̆ đah ri. Lĕ rngôch mpa nây mra jêng kloh ueh ma Brah Yêhôva jêh ri ăn mpa nây ma kôranh ƀư brah.

²¹ Tâm nar nây, ăn khân may kuăl rgum lĕ rngôch phung ƀon lan jêh ri geh nau tâm rƀŭn kloh ueh; mâu dơi ƀư du ntil kan vay ƀư tâm ăp nar. Nây jêng nau vay dăp n'ho ro ma lĕ rngôch rnôk khân may, tâm lam ntŭk khân may gŭ rêh.

²² Tơlah khân may kăch roih ba tâm n'gor khân may nơm, lơi kăch roih tât ta pĭt mir ôh, mâu đŏng dônh lĕ ndrŏng ba hôm klen. Ăn khân may chalơi ndơ nây ma phung o ach jêh ri ma bunuyh gŭ njưh. Gâp jêng Yêhôva Brah Ndu khân may.’”

²³ Brah Yêhôva lah tay ma Y-Môis:

²⁴ “Ăn may ntăm hom ma phung ƀon lan Israel pô aơ: ‘Lơ nguay khay pơh jêng nar ăn ma khân may rlu, jêng du nar ndray đah tăng uh bâr nŭng, jêh ri geh du nau tâm rƀŭn kloh ueh.

²⁵ Khân may mâu dơi ƀư du ntil kan vay ƀư tâm ăp nar, ƀiălah ăn khân may nhhơr lĕ ndơ nhhơr ăn ŭnh sa ma Brah Yêhôva.’”

²⁶ Brah Yêhôva lah tay ma Y-Môis:

²⁷ “Lơ jât khay pơh jêng nar rƀŭn chuai nau tih, mra geh gưl tâm rƀŭn kloh ueh ăn ma khân may; ăn khân may ât sông sa jêh ri nhhơr lĕ ndơ nhhơr ăn ŭnh sa ma Brah Yêhôva.

²⁸ Tâm nar nây mâu geh du huê dơi pah kan, yorlah nĕ jêng nar chuai nau tih, jêng nar nkra nau rƀŭn chuai nau tih ma khân may tanăp Yêhôva Brah Ndu.

²⁹ Tâm nar nĕ, mbu nơm mâu ât sông sa mra geh nau nsot lơi tă bơh phung ƀon lan;

³⁰ jêh ri mbu nơm ƀư du ntil kan tâm nar nây, Gâp mra ƀư rai khân păng bơh phung ƀon lan.

³¹ Lơi khân may ƀư du ntil kan ôh. Nây jêng nau vay dăp n'ho ro ma lĕ rngôch rnôk khân may, tâm lam ntŭk khân may gŭ rêh.

³² Aơ jêng nar saƀat ma khân may, du nar geh nau rlu ngăn, jêh ri ăn khân may ât sông sa. Ăn khân may djôt prăp nar saƀat, ntơm bơh nar nhâp tâm lơ sĭn tât nar nhâp tâm nar ôi taơ.”

³³ Brah Yêhôva lah tay ma Y-Môis:

³⁴ “Ăn may lah hom ma phung ƀon lan Israel pô aơ: ‘Ta nar jât ma prăm khay pơh aơ jêng nau rƀŭn Ngih Ndưp jêh ri mra thoi jong tât pơh nar gay yơk mbah ma Brah Yêhôva.

³⁵ Nar tal nguay jêng nar geh nau tâm rƀŭn kloh ueh, khân may mâu dơi ƀư du ntil kan vay ƀư tâm ăp nar.

³⁶ Ăp nar tâm pơh nar, ăn khân may nhhơr lĕ ndơ nhhơr ăn ŭnh sa ma Brah Yêhôva. Tât ta nar tal pham, khân may geh đŏng nau tâm rƀŭn kloh ueh jêh ri ăt nhhơr lĕ ndơ nhhơr ăn ŭnh sa ma Brah Yêhôva. Nây jêng nau tâm rƀŭn geh nau khư yơk, khân may mâu dơi ƀư du ntil kan vay ƀư tâm ăp nar.

³⁷ Nây jêng lĕ nar rƀŭn khư yơk ma Brah Yêhôva, ăn khân may mbơh nau nây nâm bu lĕ gưl tâm rƀŭn kloh ueh gay nhhơr ma Brah Yêhôva lĕ ndơ nhhơr ăn ŭnh sa, ndơ ƀư brah gŭch, ndơ ƀư brah rnih môi, ndơ ƀư brah ma nau đăp mpăn, jêh ri ndơ nhhơr nhêt, ăp nau rƀŭn di nar păng.

³⁸ Rlau ma nây, khân may djôt prăp đŏng lĕ nar saƀat Brah Yêhôva, lĕ ndơ nhhơr, lĕ ndơ ƀư brah ƀư nau ton jêh ri khân may nơm ŭch nhhơr ma Brah Yêhôva.

³⁹ Kơt nây, ta nar jât ma prăm khay pơh, lôch jêh khân may pĕ play bơh neh, ăn khân may djôt prăp du nau rƀŭn ăn ma Brah Yêhôva tâm pơh nar. Nar tal nguay mra jêng nar rlu jêh ri nar tal pham, lôch jêh nau rƀŭn ăt jêng nar rlu đŏng.

⁴⁰ Nar tal nguay, ăn khân may mra săch lĕ ntil play kam, play kroch, lĕ n'gĭng tơm đung, lĕ n'gĭng tơm si geh âk n'ha, jêh ri lĕ n'gĭng tơm si yôr rŏ kơh dak n'hor, jêh ri khân may nkra nau răm maak tanăp Brah Yêhôva Brah Ndu khân may tâm pơh nar.

⁴¹ Tâm ăp năm, lăp ta khay pơh ăn khân may djôt prăp nau rƀŭn nây ma Brah Yêhôva tâm pơh nar. Nây jêng nau vay dăp n'ho ro tâm lĕ rngôch rnôk khân may.

⁴² Khân may mra gŭ tâm ngih bok tâm pơh nar. Lĕ rngôch phung ƀon lan bu deh jêh jêng phung ƀon lan Israel, mra gŭ hom tâm ngih bok da dê,

⁴³ gay ma lĕ rngôch rnôk khân may dơi gĭt Gâp djôt leo jêh phung ƀon lan Israel luh bơh Êjipt, Gâp hŏ ăn jêh khân păng gŭ tâm lĕ ngih bok. Gâp jêng Yêhôva Brah Ndu khân may.’”

⁴⁴ Pôri Y-Môis ntĭm nti ma phung ƀon lan Israel gĭt djôt prăp lĕ nar rƀŭn ma Brah Yêhôva hŏ tâm nal jêh.