Kan Lêvi 22 - Nau Brah Ndu Ngơi 2023

Nau dŏng lĕ ndơ nhhơr kloh ueh

¹ Brah Yêhôva lah tay ma Y-Môis:

² “Lah hom ma Y-Arôn jêh ri ma phung kon bu klâu păng, njrăng hom đah lĕ ndơ nhhơr kloh ueh phung ƀon lan Israel nhhơr ma Gâp, gay ma khân păng mâu ôh ngơi sưr ma amoh kloh ueh Gâp. Gâp jêng Brah Yêhôva.

³ Lah hom ma khân păng: ‘Tâm lĕ rngôch rnôk, mbu nơm tâm phung kon sau Y-Arôn dôl gŭ tâm nau ƀơ̆ ƀiălah hăn dăch ta lĕ ndơ nhhơr kloh ueh, yor tă phung ƀon lan Israel nhhơr ma Brah Yêhôva, bu mra nsot lơi păng luh bơh tanăp Gâp. Gâp jêng Brah Yêhôva.

⁴ Mâu geh tâm noi deh Y-Arôn geh ji phŭng mâu lah nau ji kren dơi vay sa lĕ ndơ nhhơr kloh ueh, kŏ tât nơm nây dơi kloh. Mbu nơm pah tât moh ntil ndơ hŏ geh nau ƀơ̆ yor săk jăn khĭt, bunuyh geh ji kren dak ntăk,

⁵ nơm geh nau ƀơ̆ yorlah pah ta du ntil ndrŭng vơr, mâu lah nơm geh nau ƀơ̆ ƀơch yor pah ta bunuyh ƀơ̆, mâu lah moh ntil ndơ ƀơ̆,

⁶ nơm nây mra jêng ƀơ̆ tât kêng măng jêh ri mâu dơi sa ôh ndơ nhhơr kloh ueh, lah păng ê hŏ ŭm tâm dak.

⁷ Lah nar nhâp, păng dơi jêng kloh, jêh ri păng dơi sa lĕ ndơ nhhơr kloh ueh, jêng ndơ sông sa ma păng nơm.

⁸ Păng mâu dơi ôh sa puăch mpô mpa khĭt mâu lah mpa bri janh hêk sa, gay bah ƀư ƀơ̆ păng nơm. Gâp jêng Brah Yêhôva.

⁹ Yor nây, ăn khân păng djôt prăp nau Gâp ntăm, lah mâu khân păng mra tuy nau tih jêh ri khĭt yorlah khân păng hŏ mưch rmot jêh lĕ ndơ nhhơr kloh ueh. Gâp jêng Brah Yêhôva, Nơm ƀư kloh ueh khân păng.

¹⁰ Nơm gŭ padih rnăk vâl kôranh ƀư brah, nơm nây mâu dơi sa lĕ ndơ nhhơr kloh ueh. Bunuyh bu năch mâu lah bunuyh kan nkhôm tâm jây kôranh ƀư brah mâu dơi sa ndơ nhhơr kloh ueh.

¹¹ Ƀiălah phung dĭk lĕ kôranh ƀư brah rvăt ma prăk jêh mâu lah nơm bu deh jêh tâm ngih kôranh ƀư brah mra dơi vay sa ndơ sông sa kôranh ƀư brah.

¹² Tơlah kon bu ur kôranh ƀư brah sŏk sai ƀiălah sai păng mâu di jêng kôranh ƀư brah, bu ur nây mâu mra dơi sa ndơ tă bơh ndơ nhhơr kloh ueh.

¹³ Ƀiălah tơlah kon bu ur kôranh ƀư brah jêng bu ur ndrô khĭt sai mâu lah bu ur sai chalơi jêh, ƀiălah mâu geh kon ôh, jêh ri plơ̆ sĭt ta ngih mbơ̆ păng, tâm ban ma păng hôm kon se jê̆, păng mra dơi sa ndơ sông sa mbơ̆ păng. Nơm rêh gŭ padih rnăk vâl kôranh ƀư brah, nơm nây mâu dơi vay sa lĕ ndơ nhhơr kloh ueh.

¹⁴ Tơlah du huê lăn sa ndơ nhhơr kloh ueh, mplơ̆ tay hom ndơ nhhơr kloh ueh păng hŏ sa jêh ma kôranh ƀư brah, jêh ri ntop đŏng du kô̆ tâm prăm rnoh khlay ndơ nây.

¹⁵ Kôranh ƀư brah mâu dơi ƀư ƀơ̆ ôh ndơ nhhơr kloh ueh phung ƀon lan Israel nhhơr ma Brah Yêhôva

¹⁶ tơlah ăn phung bu năch sa ndơ nhhơr kloh ueh, ƀư ăn khân păng tŭp nau tih jêh ri ntrok ndơ nhhơr. Gâp jêng Brah Yêhôva, Nơm ƀư kloh ueh ma lĕ ndơ nây.’”

Nau săch mpa ƀư brah

¹⁷ Brah Yêhôva lah ma Y-Môis:

¹⁸ “Lah hom ma Y-Arôn, ma phung kon bu klâu păng jêh ri ma lĕ rngôch phung ƀon lan Israel: ‘Tơlah du huê tâm phung Israel mâu lah phung gŭ njưh tâm nklang phung Israel hŏ ton nhhơr mâu lah păng nơm ŭch nhhơr ndơ ƀư brah gŭch ma Brah Yêhôva

¹⁹ ăn khân păng nhhơr du mlâm mpa nkuăng mâu geh têl khap ôh nhŭp tă bơh phung ndrôk, mâu lah biăp kon mâu lah be me.

²⁰ Khân may mâu dơi nhhơr ôh du mlâm mpô mpa geh têl khap yorlah mpa nây gâp mâu mra dơn ôh.

²¹ Tơlah du huê bunuyh hŏ ton nhhơr mâu lah păng nơm ŭch nhhơr du mlâm mpa ƀư brah đăp mpăn ma Brah Yêhôva ma ndrôk mâu lah biăp, be, gay geh nau Gâp dơn, ăn khân may nhhơr mpa mâu geh têl khap ôh.

²² Khân may mâu dơi nhhơr ma Brah Yêhôva du mlâm mpa chieh măt, deh jâng, geh âk sôt, toh ok mâu lah kuh. Mâu dơi djôt lĕ mpô mpa kơt nĕ n'gân ta nơng ƀư brah ƀư ndơ ƀư brah gŭch nhhơr ma Brah Yêhôva.

²³ Khân may dơi nhhơr du mlâm ndrôk mâu lah biăp kon geh jâng jong ir mâu lah gleh ir ƀư ndơ nhhơr khân may nơm ŭch, ƀiălah tơlah nhhơr mpa nây ƀư ndơ nhhơr ma nau dăn ton, mpa nây mâu mra dơi dơn ôh.

²⁴ Tâm lam n'gor, khân may mâu dơi nhhơr ôh ma Brah Yêhôva du mlâm mpa geh găr bêk brêng jêh, khêk jêh, mâu lah koh jêh.

²⁵ Lĕ khân may mâu dơi dơn ôh du mpô mpa tâm ban pônây tă bơh du huê bu năch gay ƀư ndơ sông sa ma Brah Ndu. Lĕ mpa nây mâu mra dơi dơn ôh yor khân păng geh sôt jêh ri geh têl khap.’”

²⁶ Brah Yêhôva lah tay ma Y-Môis:

²⁷ “Du mlâm ndrôk kon, biăp kon mâu lah be kon mhe deh, ăn păng gŭ ndrel ma me păng tâm pơh nar. Bơh nar tal pham rlet panăp klăp lah păng mra dơi dơn jêng ndơ ƀư brah ăn ŭnh sa nhhơr ma Yêhôva.

²⁸ Mâu dơi nkhĭt ôh me ndrôk nđâp ma ndrôk kon, mâu lah me biăp nđâp ma biăp kon tâm du nar.

²⁹ Tơlah khân may nhhơr ndơ ƀư brah nsĭt nau lah ueh ma Brah Yêhôva, mâm nau khân may nhhơr gay ma dơi dơn.

³⁰ Ăn sa ndơ ƀư brah tâm nar nây ro, mâu dơi om du ntil ndơ kŏ tât ang ôi taơ. Gâp jêng Brah Yêhôva.

³¹ Pôri ăn khân may djôt prăp jêh ri ƀư tĭng kơt lĕ nau vay ntăm bơh Gâp. Gâp jêng Brah Yêhôva.

³² Lơi ngơi sưr ta amoh kloh ueh Gâp ôh, gay ma Gâp geh nau kloh ueh ta nklang phung ƀon lan Israel. Gâp jêng Brah Yêhôva, Nơm ƀư kloh ueh ăn ma khân may,

³³ jêng Nơm hŏ njŭn jêh khân may luh bơh Êjipt gay ƀư Brah Ndu khân may. Gâp jêng Brah Yêhôva.”