Kan Lêvi 21 - Nau Brah Ndu Ngơi 2023

Nau kloh ueh phung kôranh ƀư brah

¹ Brah Yêhôva lah tay ma Y-Môis: “Ăn kon ngơi hom ma phung kôranh ƀư brah jêng phung kon bu klâu Y-Arôn: ‘Du huê kôranh ƀư brah mâu dơi ƀư ƀơ̆ păng nơm yor du huê bunuyh khĭt tâm ndŭl mpôl dăch păng nơm,

² knŏng ndŭl mpôl păng dăch lơn, nâm bu ntĭt, mê̆, mbơ̆, kon bu klâu, kon bu ur, oh nâu,

³ mâu lah oh ruh păng nơm hôm druh, nsing ta kôranh ƀư brah yorlah mâu geh sai ôh; kôranh ƀư brah nây klăp lah yor ma oh ruh nây păng geh nau ƀơ̆.

⁴ Yorlah păng jêng kôranh chiă uănh phung ƀon lan yor ri kôranh ƀư brah mâu dơi ăn ma păng nơm roh nau kloh jêh ri roh nau khư.

⁵ Lĕ kôranh ƀư brah mâu dơi poih sŏk ta bôk, kreh chiông têp kang mâu lah nkăp nglay săk khân păng.

⁶ Khân păng prăp êng ăn kloh ueh ma Brah Ndu jêh ri mâu dơi ngơi sưr ôh amoh Brah Ndu, yorlah khân păng jêng lĕ phung nhhơr ndơ ƀư brah ăn ŭnh sa ma Brah Yêhôva, jêng ndơ sông sa ma Brah Ndu khân păng; yor nây ăn khân păng jêng kloh ueh.

⁷ Kôranh ƀư brah mâu dơi gŭ ôh bu ur văng tĭr mâu lah du huê bu ur ka n'hong, mâu lah bu ur chalơi sai, yorlah kôranh ƀư brah jêng kloh ueh ma Brah Ndu păng.

⁸ Yor ri ăn khân may uănh kôranh ƀư brah nâm bu kloh ueh yorlah păng nhhơr ndơ sông sa ma Brah Ndu khân may. Khân păng jêng kloh ueh đah khân may, yorlah Gâp, Brah Yêhôva jêng kloh ueh, jêng Nơm ƀư kloh ueh khân may.

⁹ Tơlah du huê kon bu ur kôranh ƀư brah ƀư bêk prêng păng nơm yor ƀư bu ur văng tĭr, ngơi sưr ma mbơ̆ păng, ăn bu su lơi bu ur nây ma ŭnh.

¹⁰ Kôranh ƀư brah jêng nơm toyh lơn tâm phung oh nâu păng, nơm bu hŏ mbrih dak ngi kloh ta klơ bôk păng, nơm bu prăp êng jêh jêng kloh ueh gay ma nsoh bok ao, mâu dơi rơih lơi sŏk, mâu lah nkhêk ao,

¹¹ mâu dơi hăn dăch ôh ta săk jăn khĭt, mâu dơi ƀư ƀơ̆ păng nơm gĭt lah mbơ̆ mâu lah mê̆ păng nơm.

¹² Păng mâu dơi du luh bơh ngih brah kloh ueh, mâu lah ngơi sưr ma ngih brah kloh ueh Brah Ndu yorlah Dak ngi kloh Brah Ndu hŏ tŏ jêh ta klơ păng. Gâp jêng Brah Yêhôva.

¹³ Ăn păng gŭ ur đah du huê bu ur hôm druh.

¹⁴ Mâu dơi gŭ ôh đah bu ur ndrô, bu ur sai chalơi jêh, bu ur ka n'hong mâu lah bu ur văng tĭr, ƀiălah ăn nđăp đah du huê bu ur hôm druh tâm ndŭl mpôl păng nơm;

¹⁵ kơt nây, păng mâu mra ƀư nau đit prêng noi deh ndŭl mpôl dăch păng, yorlah Gâp jêng Brah Yêhôva, Nơm ƀư kloh ueh păng.’”

Lĕ nau mâu dơi ƀư tâm kan kôranh ƀư brah

¹⁶ Brah Yêhôva hôm lah ma Y-Môis:

¹⁷ “Lah hom ma Y-Arôn: ‘Tâm lĕ rngôch rnôk, mâu ôh ăn du huê tâm phung kon sau may geh ntŭk kuet ji dơi hăn dăch gay ma nhhơr ndơ sông sa ma Brah Ndu păng nơm.

¹⁸ Lơi ăn du huê bunuyh geh ntŭk kuet ji dơi hăn dăch, jêng phung bunuyh kơt aơ: bunuyh chieh măt, rvĕn, mhĭk muh măt mâu lah jâng gleh jong;

¹⁹ bunuyh pă jâng mâu lah pă ti,

²⁰ đŭn kŭr guih, dêh ir, ji măt, toh ok, kuh, mâu lah găr bêk prêng chah jêh.

²¹ Ăp bunuyh tâm noi deh Y-Arôn kôranh ƀư brah, nơm geh ntŭk ji kuet mâu dơi hăn dăch gay nhhơr ndơ ƀư brah ăn ŭnh sa ma Brah Yêhôva. Yorlah păng geh ntŭk kuet ji, păng mâu dơi ôh hăn dăch nhhơr ndơ sông sa ma Brah Ndu păng nơm.

²² Nơm nây dơi sa ndơ sông sa ma Brah Ndu, nđâp ma lĕ ndơ dŭt kloh ueh jêh ri lĕ ndơ prăp êng ma nau kloh ueh,

²³ ƀiălah păng mâu dơi hăn dăch bok nching mâu lah hăn dăch nơng ƀư brah ôh, yorlah păng geh ntŭk kuet ji. Kơt nây păng mâu ngơi sưr ôh ta lĕ ntŭk kloh ueh Gâp, yorlah Gâp jêng Brah Yêhôva, Nơm ƀư kloh ueh lĕ ntŭk nây.’”

²⁴ Y-Môis hŏ lah kơt nây ma Y-Arôn jêh ri ma phung kon bu klâu păng ndrel phung ƀon lan Israel.