Kan Lêvi 20 - Nau Brah Ndu Ngơi 2023

Nau tâm rmal yor nhhơr kon ăn ma Môlek

¹ Brah Yêhôva lah ma Y-Môis:

² “Ăn may lah hom ma phung ƀon lan Israel pô aơ: ‘Ăp phung Israel mâu lah bunuyh gŭ njưh tâm n'gor Israel, lah păng djôt nhhơr phung kon sau păng ma Môlek, ăn bu nkhĭt lơi păng; phung ƀon lan tâm n'gor mra klŭp păng ma lŭ.

³ Bi Gâp, Gâp mâu mra uănh măt nơm nây đŏng ôh jêh ri nsot lơi păng tă bơh phung ƀon lan păng, yorlah păng hŏ nhhơr jêh du huê tâm phung kon sau păng ma Môlek, ƀư ƀơ̆ jêh ngih brah kloh ueh jêh ri ngơi sưr amoh kloh ueh Gâp.

⁴ Lah nơm nây nhhơr du huê tâm phung kon sau păng ma Môlek ƀiălah phung ƀon lan tâm n'gor nhêp măt ƀư dah mâu gĭt jêh ri mâu nkhĭt păng ôh,

⁵ Gâp nơm mra mâu hôm uănh muh măt nơm nây jêh ri mpôl băl păng, ƀiălah mra nsot lơi păng jêh ri phung tĭng kơt păng, du tă bơh phung ƀon lan yor nau tih ƀư nau văng tĭr đah Môlek.’

Nau tâm rmal yor nau tih tĭng phung kuăl brah phan jêh ri phung n'hŭm

⁶ ‘Tơlah mbu nơm n'gĭl uănh ta phung ngơi ndrel đah brah mhĭk jêh ri phung n'hŭm, ƀư nau văng tĭr đah phung nây, Gâp mra tâm rdâng đah bunuyh nây jêh ri mra nsot lơi păng luh bơh phung ƀon lan păng.

⁷ Khân may prăp hom khân may nơm tâm nau kloh jêh ri dơi jêng nau kloh ueh, yorlah Gâp jêng Yêhôva Brah Ndu khân may.

⁸ Ăn khân may djôt prăp jêh ri ƀư tĭng kơt lĕ nau vay Gâp dăp; Gâp jêng Brah Yêhôva, Nơm ƀư kloh ueh khân may.’

Nau tâm rmal yor tih rak rtăp mê̆ mbơ̆

⁹ ‘Mbu nơm rak rtăp ma mê̆ mbơ̆ păng bu mra nkhĭt lơi păng. Păng hŏ rak rtăp jêh ma mê̆ mbơ̆ păng, mham păng mra nkhŭt tay ta klơ păng nơm.’

Lĕ nau rmal êng êng

¹⁰ ‘Tơlah du huê bu klâu ƀư tih văng tĭr đah du huê bu ur lĕ geh sai, mâu lah đah ur nơm chiau meng păng, lĕ bu ur jêh ri bu klâu nây mra nkhĭt da dê.

¹¹ Tơlah mbu nơm bê̆ch ndrel đah ur mbơ̆ păng nơm, jêng hŏ ƀư bêk mbơ̆ păng, lĕ khân păng bar hê bu mra nkhĭt lơi, mham khân păng mra nkhŭt tay ta khân păng nơm.

¹² Tơlah mbu nơm bê̆ch nsum đah ƀăn păng, bu mra nkhĭt lơi lĕ bar hê khân păng, yorlah khân păng hŏ ƀư jêh nau dŭt ƀơ̆ ƀơch, mham khân păng mra nkhŭt tay ta khân păng nơm.

¹³ Tơlah du huê bu klâu bê̆ch ndrel đah du huê bu klâu êng nâm bu bê̆ch ndrel đah bu ur, bu mra nkhĭt lơi lĕ bar hê khân păng, khân păng hŏ ƀư nau dŭt ƀơ̆ ƀơch; mham khân păng mra nkhŭt tay ta khân păng nơm.

¹⁴ Tơlah du huê bu klâu sŏk nđâp me ndrel ma kon ƀư jêng ur păng, nây jêng du nau djơh; bu mra su lĕ pe nuyh khân păng ma ŭnh, gay ma nau djơh nây mâu hôm geh tâm nklang khân may ôh.

¹⁵ Tơlah du huê bu klâu bê̆ch ndrel đah du mlâm mpô mpa, bu mra nkhĭt lơi păng; ăn khân may nkhĭt lơi mpa nây.

¹⁶ Tơlah du huê bu ur hăn dăch ta du mlâm mpô mpa jêh ri bê̆ch ndrel đah păng; ăn khân may nkhĭt lơi bu ur nây jêh ri mpa nây; nkhĭt lơi khân păng, mham khân păng mra nkhŭt tay ta khân păng nơm.

¹⁷ Tơlah du huê bu klâu sŏk ruh mâu lah oh păng nơm, mâu lah du mbơ̆, mê̆ êng êng, mâu lah du mê̆, mbơ̆ êng êng, nây jêng du nau dŭt bêk prêng, bu mra ngluh lơi khân păng luh bơh phung ƀon lan. Nơm hŏ ƀư bêk jêh oh ruh păng, nơm nây mra tuy nau djơh păng.

¹⁸ Tơlah du huê bu klâu bê̆ch nsum đah du huê bu ur dôl bu ur rnôk păng geh săk bu ur jêh ri bu klâu nây ăn bu gĭt nau bu ur nĕ geh săk bu ur jêh ri bu ur nĕ ƀư ăn bu gĭt mham păng luh, bu mra nsot lơi lĕ bar hê khân păng bơh phung ƀon lan păng.

¹⁹ Mâu dơi bê̆ch nsum đah oh ruh me may mâu lah oh ruh mbơ̆ may, yor nau ƀư kơt nây jêng nau bêk prêng ndŭl mpôl dăch may; bar hê khân păng mra tuy nau tâm rmal yor nau djơh khân păng.

²⁰ Tơlah du huê bu klâu bê̆ch nsum đah ur kônh mâu lah ur va păng, jêng ƀư nau bêk prêng ma kônh va păng nơm; bar hê khân păng mra tuy nau rmal yor nau tih khân păng. Khân păng mra khĭt mâu geh kon ôh.

²¹ Tơlah du huê bu klâu sŏk ur nâu păng mâu lah ur oh păng, nau nây jêng nau ƀơ̆; păng nây hŏ ƀư bêk prêng oh nâu păng. Khân păng mâu mra geh kon ôh.

²² Ăn khân may djôt prăp jêh ri ƀư tĭng lĕ nau vay dăp jêh ri nau vay Gâp ƀư gay ma n'gor Gâp djôt khân may lăp gŭ mâu mra jrih khân may ôh.

²³ Khân may mâu dơi ƀư tĭng ndô̆ nau vay lĕ phung ƀon lan Gâp mra nsot lơi tă bơh năp khân may, yorlah khân păng hŏ ƀư jêh lĕ nau nây jêh ri Gâp tâm rmot ngăn ma khân păng.

²⁴ Gâp hŏ ntăm jêh ma khân may: “Khân may mra dơn n'gor khân păng, Gâp mra ăn khân may n'gor nây jêng drăp ndơn khân may; nây jêng du n'gor bêng ma dak toh jêh ri dak sŭt.” Gâp jêng Yêhôva Brah Ndu khân may, hŏ tâm nkhah jêh khân may luh bơh phung ƀon lan êng.

²⁵ Pônây ăn khân may tâm nkhah mpa kloh đah mpa ƀơ̆, sĭm och kloh đah sĭm och ƀơ̆; lơi ƀư ma khân may nơm jêng ndơ ƀơ̆ ƀơch yor ma mpô mpa, yor sĭm och mâu lah lĕ rngôch ndrŭng vơr ta neh, jêng lĕ rngôch ntil Gâp hŏ tâm nkhah êng jêh gay ăn khân may gĭt lĕ ntil mpa nây jêng ƀơ̆ ƀơch.

²⁶ Ăn khân may jêng kloh ueh đah Gâp; yorlah Gâp jêng Brah Yêhôva, jêng kloh ueh; Gâp hŏ tâm nkhah jêh khân may bơh lĕ phung ƀon lan êng gay ma khân may jêng phung Gâp nơm.

²⁷ Tơlah du huê bu klâu mâu lah du huê bu ur jêng nơm ngơi ndrel đah brah mhĭk mâu lah ƀư n'hŭm pol, bu mra nkhĭt lơi păng; klŭp khân păng ma lŭ jêh ri mham khân păng mra nkhŭt tay ta khân păng nơm.’ ”