Kan Lêvi 2 - Nau Brah Ndu Ngơi 2023

Ndơ ƀư brah rnih môi

¹ “‘Tơlah geh du huê ŭch nhhơr du ntil ndơ ƀư brah rnih môi ma Brah Yêhôva, ndơ păng nhhơr nây ăn ƀư ma rnih môi. Ăn păng kêt dak ngi jêh ri dơm dak si ƀâu kah ta klơ,

² jêh nây njŭn ma phung kon sau Y-Arôn, jêng phung kôranh ƀư brah. Kôranh ƀư brah mra sŏk du mbăt rnih môi, dak ngi jêh ri lĕ rngôch dak si ƀâu kah jêh nây su ta klơ nơng nâm bu ntĭt lĕ rngôch ndơ ƀư brah rnih môi. Nĕ jêng ndơ ƀư brah ăn ŭnh sa, geh n'hôl ƀâu kah ƀư maak nuih n'hâm Brah Yêhôva.

³ Bi ndơ hôm e bơh ndơ ƀư brah rnih môi jêng ndơ ma Y-Arôn de jêh ri phung kon bu klâu păng. Nĕ jêng ndơ dŭt kloh ueh sŏk bơh ndơ ƀư brah ăn ŭnh sa nhhơr ma Brah Yêhôva.

⁴ Tơlah phung kon nhhơr ndơ ƀư brah rnih môi ma ƀănh gŭch tâm năk pôri ƀănh nĕ mra ƀư ma rnih mâu geh ndrui pot đah dak ngi, mâu lah ƀư jêng ƀănh n'hơ mâu geh ndrui tâm pot đah dak ngi.

⁵ Tơlah khân may sŏk ƀănh gŭch ta klơ mpĭt ƀư ndơ ƀư brah rnih môi pôri ƀănh nây ƀư ma rnih môi mâu geh ndrui pot đah dak ngi,

⁶ nkê̆ch hom âk mlay jêh ri kêt dak ngi ta klơ. Nây jêng ndơ ƀư brah rnih môi.

⁷ Tơlah ndơ ƀư brah rnih môi jêng piăng let vâr tâm glah toyh, piăng let nĕ ăn ƀư ma rnih môi lĕ pot đah dak ngi.

⁸ Khân may mra njŭn ndơ ƀư brah rnih môi hŏ ndrăp jêh kơt nây gay nhhơr ma Brah Yêhôva; lah bu hŏ jao jêh ma kôranh ƀư brah, păng mra djôt ndơ nây ta nơng ƀư brah.

⁹ Kôranh ƀư brah mra sŏk du kô̆ tâm puăn tă bơh ndơ ƀư brah rnih môi nây gay tâm ntĭt ma lĕ rngôch ndơ ƀư brah jêh ri gŭch păng ta nơng ƀư brah. Nây jêng ndơ ƀư brah nhhơr ăn ŭnh sa, geh n'hôl ƀâu kah ƀư maak nuih n'hâm Brah Yêhôva.

¹⁰ Bi ndơ hôm e bơh ndơ ƀư brah rnih môi jêng ndơ ma Y-Arôn de jêh ri phung kon bu klâu păng. Nĕ jêng ndơ dŭt kloh ueh sŏk bơh ndơ ƀư brah ăn ŭnh sa nhhơr ma Brah Yêhôva.

¹¹ Ndơ ƀư brah rnih môi khân may nhhơr ma Brah Yêhôva mâu dơi pot ndrui ôh yorlah khân may mâu dơi gŭch ôh ndrui mâu lah dak sŭt tâm ndơ ƀư brah ăn ŭnh sa nhhơr ma Brah Yêhôva.

¹² Khân may dơi nhhơr lĕ ntil ndơ nây ma Brah Yêhôva tâm ban ndơ nhhơr bôk yan, ƀiălah mâu dơi su ôh păng ta klơ nơng ƀư brah nâm bu ndơ ƀư brah geh ndơ ƀâu kah.

¹³ Ăn khân may ƀư kah boh tâm lĕ ndơ ƀư brah rnih môi. Mâu dơi nhhơr ôh ndơ ƀư brah rnih môi pưt boh yorlah boh jêng nau tâm rnglăp đah Brah Ndu khân may. Ăn khân may nhhơr boh ndrel ma lĕ rngôch ndơ nhhơr.

¹⁴ Tơlah khân may sŏk kao play dak bôk ƀư ndơ ƀư brah rnih môi nhhơr ma Brah Yêhôva, ăn khân may sŏk ba mhe, vâr tâm ŭnh jêh ri kĭn jêng rnih,

¹⁵ nkhŭt dak ngi jêh ri dơm dak si ƀâu kah ta klơ păng. Nĕ jêng ndơ ƀư brah rnih môi.

¹⁶ Kôranh ƀư brah mra sŏk du kô̆ găr ba kĭn hăch jêh, pot đah dak ngi ndrel ma lĕ rngôch dak si ƀâu kah jêh ri gŭch gay tâm ntĭt lĕ rngôch ndơ ƀư brah. Nĕ jêng ndơ ƀư brah ăn ŭnh sa nhhơr ma Brah Yêhôva.’”