Kan Lêvi 19 - Nau Brah Ndu Ngơi 2023

Nau vay ma nau kloh ueh jêh ri nau rêh

¹ Brah Yêhôva lah ma Y-Môis:

² “Ntăm hom ma lĕ rngôch phung ƀon lan Israel tâm rƀŭn: ‘Ăn khân may jêng kloh ueh, yorlah Gâp jêng Yêhôva Brah Ndu khân may, jêng kloh ueh.

³ Ăp nơm bunuyh ăn yơk ma mbơ̆ mê̆ jêh ri kah gĭt prăp nar saƀat Gâp. Gâp jêng Yêhôva Brah Ndu khân may.

⁴ Lơi n'gĭl ma rup ndah jêh ri mâu dơi đŏng tŏ rup brah ma kông ăn ma khân may. Gâp jêng Yêhôva Brah Ndu khân may.

⁵ Lah khân may nhhơr ndơ ƀư brah đăp mpăn ăn ma Brah Yêhôva, mâm nau khân may nhhơr gay ma Gâp dơi dơn.

⁶ Ăn khân may sa ndơ nây ta nar khân may nhhơr, mâu lah ta nar ôi taơ; jêh ri moh mpa hôm e tât nar tal pe ăn bu su lơi tâm ŭnh.

⁷ Tơlah chuat tât nar tal pe jêh, ƀiălah ăt geh bunuyh hôm sa ndơ nây, nĕ jêng nau ƀơ̆ ƀơch, Păng mâu mra dơn ôh.

⁸ Bunuyh nây mra anh nau tih păng nơm, yorlah păng hŏ ƀư mhĭk tât ta ndơ kloh ueh Brah Yêhôva jêh ri mprơh lơi păng luh bơh phung ƀon lan.

⁹ Lah khân may kăch roih ba tâm n'gor khân may, lơi kăch roih kŏ tât nglĕ dŭt ta pĭt mir, mâu lĕ mban ndrŏng ba hôm klen.

¹⁰ Lơi pĕ lĕ đang krăk ƀâu mâu lah dônh lĕ play krăk ƀâu tŭp tâm neh; om play nây ma phung o ach jêh ri ma phung bu năch. Gâp jêng Yêhôva Brah Ndu khân may.

¹¹ Khân may mâu dơi ntŭng ôh, mâu lĕ dơi ngơi nchơt jêh ri mƀruh ndrăng he.

¹² Khân may mâu dơi sŏk amoh Gâp ôh gay ton mƀruh, yorlah kơt nây jêng ngơi sưr tât ta amoh Brah Ndu khân may. Gâp jêng Brah Yêhôva.

¹³ Mâu dơi tŭn jot nơm chiau meng khân may nơm, mâu đŏng ntŭng ndơ khân păng. Lơi dĭng mâu ăn prăk ma bunuyh kan nkhôm tâm ngih khân may kŏ tât ôi taơ.

¹⁴ Lơi ta mưch rmot ma bunuyh tê̆k mâu lah ndơm ndơ chêh jâng ma bunuyh chieh măt, ƀiălah ăn khân may klach yơk ma Brah Ndu. Gâp jêng Brah Yêhôva.

¹⁵ Khân may mâu dơi ƀư nau mâu sŏng tâm nau phat dôih; mâu gŭ nding mpeh ma nơm o ach mâu lah yơk phung geh nau kan toyh, ƀiălah phat dôih hom phung chiau meng khân may ma nau sŏng.

¹⁶ Mâu dơi tâm phong ta nklang phung mpôl băl, mâu đŏng ngơi nchơt mƀruh gay ƀư mhĭk nau rêh ma phung chiau meng. Gâp jêng Brah Yêhôva.

¹⁷ Lơi geh nuih n'hâm tâm rkeh ma oh nâu khân may; nduyh hom nơm chiau meng gay mâu khan nau tih ndrel ma păng.

¹⁸ Lơi ta plơng har, mâu lah anh nau ji nuih ma phung ƀon lan khân may ôh, ƀiălah rŏng hom phung chiau meng tâm ban ma khân may nơm. Gâp jêng Brah Yêhôva.

¹⁹ Ăn khân may djôt prăp lĕ nau vay Gâp dăp. Lơi ăn ôh ntil mpa nây tâm gar ma ntil mpa êng; lơi srih bar ntil găr tâm mir khân may jêh ri mâu lĕ dơi nsoh kho ao bu tanh ma bar ntil brai êng êng.

²⁰ Tơlah du huê bu klâu bê̆ch ndrel đah du huê bu ur dĭk, hŏ tâm mbloh jêh đah du huê bu klâu êng, ƀiălah bu ê hŏ chuai mâu lah bu ê hŏ mplơ̆ nau kon me, ăn bu mra rmal ma bar hê nơm nây, ƀiălah mâu mra nkhĭt khân păng ôh, yorlah bu ur nây ê hŏ mplơ̆ nau kon me.

²¹ Ƀiălah, ăn bu klâu nây mra djôt du mlâm biăp nkuăng tât ta mpông Ngih Bok Nau Tâm Rƀŭn, nhhơr mpa nây ma Brah Yêhôva ƀư ndơ ƀư brah chuai nau ƀư tih.

²² Kôranh ƀư brah mra nhhơr biăp nkuăng nây jêng ndơ ƀư brah chuai nau ƀư tih ma nơm hŏ ƀư tih tanăp Brah Yêhôva jêh ri nau tih păng ƀư mra dơi yô̆ an.

²³ Tơlah khân may lăp tâm n'gor hŏ ton jêh ri tăm ăp ntil tơm play sa, kơp hom play nây nâm bu play mâu dơi sa. Ăn khân may uănh play nây nâm bu play mâu dơi sa jêh ri mâu dơi sa tâm pe năm.

²⁴ Ƀiălah tât ta năm tal puăn lĕ rngôch play tơm si nây mra jêng kloh ueh, jêng ndơ nhhơr tâm rnê ma Brah Yêhôva.

²⁵ Tât ta năm tal prăm khân may ăt hôm dơi sa play tơm si nây. Tơlah khân may djôt prăp nau Gâp nti, play kao nây mra bĭk rơ̆ ma khân may. Gâp jêng Yêhôva Brah Ndu khân may.

²⁶ Khân may mâu dơi sa puăch hôm mham. Mâu dơi ƀư nau n'hŭm pol mâu lah ƀư nau blau rƀên ôh.

²⁷ Lơi poih sŏk jŭm bôk khân may jêh ri lơi kreh têp kang.

²⁸ Lơi yor ma bunuyh khĭt nkăp tor nglay săk khân may mâu lah kach ăp ntil rup ta săk jăn khân may. Gâp jêng Brah Yêhôva.

²⁹ Lơi ƀư bêk kon bu ur khân may jêh ri đă păng jêng du huê bu ur văng tĭr tâm lĕ jây rhŏ brah, ƀư ăn lĕ n'gor nây tŭp tâm nau văng tĭr jêh ri bêng ma nau ƀai.

³⁰ Ăn khân may djôt prăp lĕ nar saƀat Gâp jêh ri yơk mbah ma ngih brah kloh ueh Gâp. Gâp jêng Brah Yêhôva.

³¹ Khân may mâu dơi hăn tât ma phung kuăl brah phan mâu lah ma phung n'hŭm; lơi ta ôp ôh khân păng, tơlah ƀư kơt nây khân may mra jêng ƀơ̆ ƀơch. Gâp jêng Yêhôva Brah Ndu khân may.

³² Ăn khân may dâk tanăp măt phung sŏk ndra, yơk ma phung bu ranh, jêh ri ăn khân may klach yơk ma Brah Ndu khân may. Gâp jêng Brah Yêhôva.

³³ Tơlah geh bunuyh gŭ njưh tâm n'gor khân may, lơi tŭn jot ma khân păng ôh.

³⁴ Phung bu năch gŭ njưh ndrel ma khân may ăn khân may uănh nâm bu bunuyh ƀon tơm; ăn khân may rŏng ma khân păng nâm bu khân may nơm lĕ, yorlah khân may hŏ tă jêng phung bu năch gŭ tâm n'gor Êjipt. Gâp jêng Yêhôva Brah Ndu khân may.

³⁵ Khân may mâu dơi ƀư kue ôh tâm nôk khân may phat dôih tâm ban đŏng tâm nôk veh njing ndah jong, ndah jâk, mâu lah ndah kơp.

³⁶ Ăn khân may dŏng njing di, rplay njing jâk ăn di, ê-pha jêh ri hin ăn di. Gâp jêng Yêhôva Brah Ndu khân may, Nơm hŏ njŭn leo khân may luh jêh bơh n'gor Êjipt.

³⁷ Pôri khân may djôt prăp hom jêh ri ƀư tĭng lĕ rngôch lĕ nau vay dăp jêh ri lĕ nau vay Gâp ƀư. Gâp jêng Brah Yêhôva.’”