Kan Lêvi 18 - Nau Brah Ndu Ngơi 2023

Nau vay buay lĕ nau bê̆ch nsum mâu di

¹ Brah Yêhôva lah ma Y-Môis:

² “Lah hom ma phung ƀon lan Israel pô aơ Gâp jêng Yêhôva Brah Ndu khân may.

³ Lơi khân may ƀư ôh lĕ nau khân păng ƀư tâm n'gor Êjipt, ntŭk khân may hŏ gŭ njưh jêh, mâu lĕ dơi tĭng ƀư nau khân păng ƀư tâm n'gor Kanaan, jêng n'gor Gâp mra njŭn khân may tât. Mâu dơi hăn tĭng ndô̆ ôh nau vay dăp khân păng.

⁴ Ăn khân may djôt prăp lĕ nau vay ƀư jêh ri mât mray nau vay Gâp. Gâp jêng Yêhôva Brah Ndu khân may.

⁵ Pôri ăn khân may djôt prăp nau vay jêh ri lĕ nau vay Gâp ƀư jêh; mbu nơm ƀư tĭng nau nây mra geh nau rêh tă bơh nĕ. Gâp jêng Brah Yêhôva.

⁶ Lơi ăn du huê tâm phung khân may bê̆ch nsum đah phung mpôl băl dăch ndŭl deh êp đah khân may. Gâp jêng Brah Yêhôva.

⁷ Lơi ta bê̆ch nsum đah mê̆, klach lah may ƀư bêk prêng mbơ̆ may. Yorlah păng jêng mê̆; mâu dơi bê̆ch nsum đah păng ôh.

⁸ Lơi bê̆ch nsum đah ăp ur mbơ̆ may; yor ƀư kơt nây jêng bêk prêng ma mbơ̆ may.

⁹ Lơi bê̆ch nsum đah oh nur may nơm, nđâp lah geh du mê̆ du mbơ̆, mâu lah du mbơ̆, êng mê̆ mâu lah du mê̆, êng mbơ̆, gĭt lah bu deh jêh tâm ngih mâu lah ta ntŭk êng.

¹⁰ Lơi bê̆ch nsum ôh đah mon bu ur tă bơh kon bu klâu may nơm mâu lah tă bơh kon bu ur may nơm; ƀư kơt nây jêng bêk prêng ma may nơm.

¹¹ Lơi bê̆ch nsum ôh đah oh bu ur du mbơ̆, êng mê̆; yorlah păng jêng oh bu ur may.

¹² Lơi bê̆ch nsum đah oh ruh mbơ̆ yorlah khân păng jêng noi deh du mham đah mbơ̆ may nơm.

¹³ Lơi bê̆ch nsum đah oh ruh mê̆, yorlah khân păng jêng noi deh du mham đah me may.

¹⁴ Lơi bê̆ch nsum ôh đah va bu ur mâu lah yơ bu ur; ƀư kơt nây jêng bêk prêng ma oh nâu mbơ̆ may nơm.

¹⁵ Lơi bê̆ch nsum đah ƀăn, yorlah păng jêng ur kon bu klâu may.

¹⁶ Lơi bê̆ch nsum đah ruh mi mâu lah oh mi; ƀư kơt nây jêng bêk prêng oh nâu may nơm.

¹⁷ Lơi bê̆ch nsum đah du huê bu ur me ndrel ma kon bu ur păng. Lơi bê̆ch nsum đah mon bu ur tă bơh kon bu klâu bu ur nây mâu lah mon bu ur tă bơh kon bu ur nơm nây, yorlah khân păng jêng noi deh ndrel du mham. Nau nây jêng du nau ƀai.

¹⁸ Lơi sŏk oh ruh ur may, dôl ur may hôm rêh; pônây mra ƀư jêng nau tâm rmot ndrel.

¹⁹ Lơi bê̆ch nsum đah bu ur me dôl ƀơ̆ ƀơch rnôk păng geh săk bu ur.

²⁰ Lơi bê̆ch ndrel đah ur phung chiau meng may ôh, gay ma may nơm mâu geh khan nau ƀơ̆ ƀơch.

²¹ Lơi djôt kon khân may nhhơr ma brah Môlek, yorlah ƀư kơt nây jêng ngơi sưr ma amoh Brah Ndu may nơm. Gâp jêng Brah Yêhôva.

²² Lơi bê̆ch ndrel đah du huê bu klâu tâm ban ma du huê bu ur; nau nây jêng du nau dŭt ƀơ̆ ƀơch ngăn.

²³ Lơi bê̆ch ndrel đah du mlâm mpa gay ma may nơm mâu geh khan nau ƀơ̆ ƀơch yor ma păng; bu ur mâu đŏng dơi bê̆ch nsum đah mpa bri; nau nây jêng du nau dŭt ƀơ̆ ƀơch ngăn.

²⁴ Lơi ƀư ƀơ̆ ƀơch khân may nơm tă bơh kan nây ôh, yorlah tă bơh lĕ kan nây phung ƀon lan jêng ƀơ̆ ƀơch jêh ri Gâp dăch nsot khân păng du bơh khân may.

²⁵ Neh nây ƀơ̆ ƀơch jêh. Gâp hŏ tâm rmal jêh păng yor nau djơh păng, jêh ri neh nây hok jrih phung ƀon lan păng.

²⁶ Bi ma khân may, gĭt lah phung ƀon lan tâm n'gor mâu lah bunuyh gŭ njưh ta nklang khân may, ăn djôt prăp da dê nau vay jêh ri nau Gâp dăp, lơi ƀư ôh tâm du ntil tâm lĕ nau kan ƀơ̆ ƀơch nĕ.

²⁷ Yorlah phung gŭ lor ma khân may tâm n'gor nây, hŏ ƀư lĕ nau kan ƀơ̆ ƀơch nĕ, yor ri neh nây hŏ jêng ƀơ̆ ƀơch jêh.

²⁸ Pôri, lơi ƀư ma neh nây jêng ƀơ̆ ƀơch; lah mâu, neh nây đŏng mra hok jrih khân may luh nâm păng hŏ hok jrih jêh phung ƀon lan gŭ ta nây lor ma khân may.

²⁹ Mbu nơm ƀư du ntil tâm nau kan dŭt ƀơ̆ ƀơch nây, bu mra mprơh lơi păng luh bơh phung ƀon.

³⁰ Pôri, ăn khân may djôt prăp nau Gâp ntĭnh jêh, mâu dơi ƀư lĕ nau vay ƀơ̆ ƀơch tâm phung ƀon lan gŭ rêh ta nây lor ma khân may, jêh ri lơi ăn nau vay mhĭk nây ƀư ƀơ̆ ma khân may. Gâp jêng Yêhôva Brah Ndu khân may.”