Kan Lêvi 17 - Nau Brah Ndu Ngơi 2023

Nau vay ntŭk nkhĭt mpa ƀư brah

¹ Brah Yêhôva lah ma Y-Môis:

² “Lah hom ma Y-Arôn jêh ri ma phung kon bu klâu păng ndrel ma lĕ rngôch phung ƀon lan Israel: ‘Aơ jêng nau Brah Yêhôva ntăm:

³ Ăp nơm bu klâu bơh ngih Israel nkhĭt du mlâm ndrôk, du mlâm biăp kon mâu lah du mlâm be tâm ngih bok mâu lah padih ngih bok,

⁴ ƀiălah mâu djôt ôh mpa nây ta mpông Ngih Bok Nau Tâm Rƀŭn gay nhhơr ma Brah Yêhôva tanăp Ngih Bok Brah Yêhôva, bu mra kơp nơm nây jêng khan tih ƀư nkhŭt mham; bu mra mprơh nơm ƀư nkhŭt mham luh bơh phung ƀon lan păng.

⁵ Nau vay nây gay lơi hôm ăn phung ƀon lan Israel nkhĭt mpa ƀư brah tâm mir. Ăn khân păng djôt mpa ƀư brah nây tât ma kôranh ƀư brah gay nhhơr ma Brah Yêhôva jêng ndơ ƀư brah đăp mpăn ta mpông Ngih Bok Nau Tâm Rƀŭn.

⁶ Kôranh ƀư brah mra nsrih mham mpa ƀư brah nây ta klơ nơng ƀư brah Brah Yêhôva ta mpông Ngih Bok Nau Tâm Rƀŭn jêh ri su ngi nây gay n'hôl ƀâu kah nhhơr ma Brah Yêhôva.

⁷ Khân păng mâu dơi nhhơr ndơ ƀư brah ma phung brah mhĭk, jêng phung brah khân păng ƀư nau văng tĭr. Nây jêng nau vay dăp n'ho ro ma khân păng tâm lĕ rngôch rnôk.’

⁸ Pôri ăn may lah ma Phung ƀon lan Israel: ‘Mbu nơm bơh ngih Israel mâu lah bunuyh gŭ njưh ta nklang khân păng, nhhơr ndơ ƀư brah gŭch mâu lah mpa ƀư brah

⁹ ƀiălah mâu djôt ôh mpa nây tât ta mpông Ngih Bok Nau Tâm Rƀŭn gay nhhơr ma Brah Yêhôva, bu mra mprơh lơi nơm nây bơh phung ƀon lan păng.’

Buay sa mham

¹⁰ ‘Mbu nơm bơh ngih Israel mâu lah bơh bunuyh gŭ njưh ta nklang khân păng sa mham, Gâp mra tâm rdâng đah nơm sa mham nây, jêh ri mra mprơh păng luh tă bơh phung ƀon lan păng nơm.

¹¹ Yorlah nau rêh nglay săk gŭ tâm mham, jêh ri Gâp hŏ ăn jêh mham ma khân may mbrih ta klơ nơng ƀư brah gay ƀư nau rƀŭn chuai nau tih ma huêng khân may. Yorlah mham jêng nau rêh rĭ mơ dơi chuai nau tih.

¹² Yor nây, Gâp lah ma phung ƀon lan Israel pô aơ mâu geh du huê tâm khân may dơi sa mham ôh, jêh ri lĕ bunuyh gŭ njưh ta nklang khân may ăt mâu dơi ôh sa mham.

¹³ Tơlah geh du huê tâm phung ƀon lan Israel mâu lah phung gŭ njưh ta nklang khân păng hăn nchron geh du mlâm mpa mâu lah du mlâm sĭm dơi sa puăch, ăn nkhŭt mham mpa nây luh tât lĕ jêh ri sŏk ndruyh neh brôi lơi mham nây,

¹⁴ yorlah nau rêh lĕ rngôch nglay săk gŭ tâm mham păng nơm. Yor ri, Gâp lah ma phung ƀon lan Israel: “Khân may mâu dơi sa mham ăp du ntil mpa rêh ôh, yorlah nau rêh lĕ rngôch mpa rêh jêng mham păng nơm; mbu nơm sa mham bu mra nsot lơi păng.”

¹⁵ Mbu nơm, nđâp lah jêng phung ƀon tơm mâu lah bunuyh gŭ njưh, sa puăch du mlâm mpa khĭt êng mâu lah khĭt yor mpa bri janh sa hêk, ăn pih lơi kho ao, ŭm tâm dak jêh ri jêng ƀơ̆ ƀơch tât kêng măng jêh nây mra dơi geh nau kloh tay.

¹⁶ Bi ma mbu nơm mâu pih ôh kho ao mâu lah mâu ŭm ôh, păng mra tuy nau tih păng.’ ”