Kan Lêvi 16 - Nau Brah Ndu Ngơi 2023

Rƀŭn toyh chuai nau tih

¹ Jêh nau khĭt bar hê kon bu klâu Y-Arôn dôl khân păng hăn dăch tanăp Brah Yêhôva, Păng ngơi ma Y-Môis:

² “Ăn may lah hom ma Y-Arôn, nâu may pô aơ, mâu geh lah dah ŭch lăp tâm Ntŭk Dŭt Kloh Ueh tâm trôm blah bok, tanăp ndrŭp nau yô̆ an ta klơ Hip Nau Tâm Rnglăp, tơlah mâu tông mra khĭt yơh, yorlah Gâp mra tâm mpơl tâm ndâr tŭk ta ndrŭp nau yô̆.

³ Y-Arôn mra lăp tâm Ntŭk Dŭt Kloh Ueh kơt aơ: Ăn păng têk du mlâm ndrôk nkuăng kon jêng ndơ ƀư brah chuai nau tih jêh ri du mlâm biăp nkuăng jêng ndơ ƀư brah gŭch.

⁴ Y-Arôn mra nsoh ao jong kloh ueh ma bok mhay, kho gleh ma bok mhay, rêt rse vân bŭt ma bok mhay jêh ri ndô môk ma bok mhay đŏng. Nây jêng kôp bok ao kloh ueh Y-Arôn mra nsoh lah păng lôch jêh ŭm tâm dak.

⁵ Y-Arôn dơn đŏng ndơ bơh phung Israel tâm rƀŭn, bar mlâm be nkuăng jêng ndơ ƀư brah chuai nau tih jêh ri du mlâm biăp nkuăng jêng ndơ ƀư brah gŭch.

⁶ Y-Arôn mra nhhơr ndrôk jêng ndơ ƀư brah chuai nau tih ma păng nơm jêh ri nkra nau rƀŭn chuai nau tih ma păng nơm jêh ri ma ngih păng nơm.

⁷ Jêh nây, păng mra sŏk bar mlâm be nkuăng tât tanăp Brah Yêhôva ta mpông Ngih Bok Nau Tâm Rƀŭn.

⁸ Y-Arôn mra nchroh n'hôr gay săch ta nklang bar mlâm be, nguay nchroh prăp ma Brah Yêhôva, jêh ri nguay nchroh êng prăp ma Asasel.

⁹ Y-Arôn đă bu djôt leo be nkuăng prăp ma Brah Yêhôva văch dăch jêh ri nhhơr păng jêng ndơ ƀư brah chuai nau tih.

¹⁰ Bi ma be prăp ma Asasel mra nhhơr rêh tanăp Brah Yêhôva gay ƀư nau rƀŭn chuai nau tih ta klơ păng jêh ri mƀơk păng hăn ta bri rdah ăn ma Asasel.

¹¹ Pôri, Y-Arôn mra djôt ndrôk jêng mpa ƀư brah chuai nau tih ma păng nơm jêh ri nkhĭt ndrôk nây gay ƀư nau rƀŭn chuai nau tih ma păng nơm jêh ri ma ngih păng nơm.

¹² Y-Arôn mra sŏk du khăl gŭch ƀâu kah bêng rnga hâng tă bơh nơng ƀư brah tanăp Brah Yêhôva jêh ri kuak bar mbăt rnih ƀâu kah jêh nây djôt lăp tâm trôm blah bok.

¹³ Ăn Y-Arôn dơm ndơ ƀâu kah tâm ŭnh tanăp Brah Yêhôva, gay ma ndâr tŭk nhhŭk ndơ ƀâu kah dơi nkŭm ndrŭp nau yô̆ an ta klơ Hip Nau Tâm Rnglăp, yor ri yơh Y-Arôn mâu geh nau khĭt.

¹⁴ Y-Arôn sŏk djê̆ mham ndrôk nây, jêh ri sŏk nglau ti mbrih pơh tơ̆ mpeh luh nar ma ndrŭp nau yô̆ an, ntĭt jêng panăp ndrŭp nau yô̆ an.

¹⁵ Jêh nây, Y-Arôn nkhĭt be nkuăng dŏng ƀư ndơ ƀư brah chuai nau tih ma phung ƀon lan, jêh nây djôt mham lăp tâm trôm blah bok, jêh ri sŏk đŏng mham păng mbrih ta mpeh luh nar ta ndrŭp nau yô̆ an, ntĭt jêng panăp ndrŭp nau yô̆ an, nâm bu lĕ dŏng jêh mham ndrôk.

¹⁶ Pôri, Y-Arôn ƀư nau rƀŭn chuai nau tih ma Ntŭk Dŭt Kloh Ueh yorlah nau mâu kloh ueh bơh phung ƀon lan Israel, nau ƀư tih jêh ri nau tih khân păng. Păng ăt ƀư kơt nĕ ma kô̆ hôm e Ngih Bok Nau Tâm Rƀŭn dôl gŭ ndrel ma khân păng, tâm nklang nau mâu kloh ueh khân păng.

¹⁷ Tâm nôk kôranh ƀư brah lăp tâm Ntŭk Dŭt Kloh Ueh gay ƀư nau rƀŭn chuai nau tih, lơi ăn geh du huê ôh gŭ tâm trôm Ngih Bok Nau Tâm Rƀŭn kŏ tât păng luh du. Tâm ban pônây, păng ƀư nau rƀŭn chuai nau tih ma păng nơm, ma ngih păng jêh ri ma lĕ rngôch phung Israel tâm rƀŭn.

¹⁸ Jêh ri păng hăn luh tât ta ntŭk nơng ƀư brah tanăp Brah Yêhôva gay ƀư nau rƀŭn chuai nau tih ma nơng ƀư brah; păng mra sŏk djê̆ mham ndrôk nkuăng kon jêh ri mham be nkuăng mhĭng ta lĕ nke nơng ƀư brah,

¹⁹ jêh ri sŏk nglau ti nsrih mham pơh tơ̆ ta klơ nơng ƀư brah gay ƀư kloh jêh ri ƀư kloh ueh nơng ƀư brah tă bơh lĕ nau mâu kloh phung ƀon lan Israel.”

Nsot lơi be nkuăng

²⁰ “Tơlah păng ƀư lôch jêh nau rƀŭn chuai nau tih ma Ntŭk Dŭt Kloh Ueh, ma Ngih Bok Nau Tâm Rƀŭn jêh ri ma nơng ƀư brah, ăn Y-Arôn djôt be nkuăng hôm rêh tât,

²¹ Y-Arôn lĕ bar ti păng pah ta klơ bôk be nkuăng hôm rêh nây, jêh ri mbơh lĕ rngôch nau djơh mhĭk phung ƀon lan Israel, jêh ri lĕ rngôch nau ƀư tih jêh ri nau tih khân păng, jêh ri dơm lĕ rngôch nau tih nây ta bôk be, jêh nây jao păng ma du huê bunuyh bu hŏ jao kan gay têk njŭn păng leo tâm bri rdah jêh ri mƀơk păng luh.

²² Be nây mra tuy tâm păng lĕ rngôch nau tih mhĭk phung Israel jêh ri bu mƀơk păng ta ntŭk rngot rklăk tâm bri rdah.

²³ Y-Arôn mra lăp tâm Ngih Bok Nau Tâm Rƀŭn, doh lơi bok ao ma bok mhay rhên păng hŏ nsoh jêh dôl lăp tâm Ntŭk Dŭt Kloh Ueh jêh ri chalơi bok ao ta nây.

²⁴ Păng mra ŭm săk jăn păng tâm du ntŭk kloh ueh, nsoh tay bok ao păng nơm jêh ri hăn luh nhhơr ndơ ƀư brah gŭch ma păng nơm jêh ri ndơ ƀư brah gŭch ma phung ƀon lan, gay ƀư nau rƀŭn chuai nau tih ma păng nơm jêh ri ma phung ƀon lan.

²⁵ Păng ăt gŭch đŏng ngi mpa ƀư brah chuai nau tih ta klơ nơng ƀư brah.

²⁶ Mbu nơm djôt be nkuăng prăp ma Asasel, ăn păng pih lơi kho ao, ŭm păng nơm tâm dak jêh nây mơ dơi lăp ta ngih bok.

²⁷ Ndrôk nkuăng rah jêh ri be nkuăng hŏ nhhơr jêng ndơ ƀư brah chuai nau tih, jêh ri mham mpa nây bu hŏ djôt jêh lăp tâm Ntŭk Dŭt Kloh Ueh gay ƀư nau rƀŭn chuai nau tih, ăn bu djôt lơi padih ngih bok; ntâu, puăch jêh ri ek tă bơh bar ntil mpa nây su lơi tâm ŭnh.

²⁸ Nơm gŭch lĕ ndơ nây mra pih kho ao, ŭm păng nơm tâm dak jêh nây mơ dơi lăp tâm ngih bok.

²⁹ Nây mra jêng du nau vay dăp n'ho ro ma khân may: Ta nar jât khay pơh, nđâp lah khân may jêng bunuyh tơm bri mâu lah bunuyh gŭ njưh ta nklang khân may, ât sông sa da dê, chalơi khân păng nơm, mâu ƀư kan,

³⁰ yorlah tâm nar nây, nau rƀŭn chuai nau tih mra dơi nkra ma khân may gay khân may mra dơi geh nau kloh; lĕ rngôch nau tih khân may mra dơi ƀư kloh tanăp Brah Yêhôva.

³¹ Nây mra jêng nar saƀat gay ma khân may rlu jêh ri ntrŭnh khân may nơm tâm nau đăp mpăn. Nây jêng nau vay dăp n'ho ro.

³² Kôranh ƀư brah bu tŏ jêh dak ngi jêh ri ăn nau n'hao kan jêng kôranh ƀư brah ntrok ma mbơ̆ păng, mra nsoh bok ao ma bok mhay, jêng bok ao kloh ueh, gay ƀư nkra nau rƀŭn chuai nau tih.

³³ Păng mra ƀư nau rƀŭn chuai nau tih ma Ntŭk Dŭt Kloh Ueh, ma Ngih Bok Nau Tâm Rƀŭn, ma nơng ƀư brah, ma phung kôranh ƀư brah jêh ri ma lĕ rngôch phung ƀon lan tâm rƀŭn.

³⁴ Aơ jêng nau vay dăp n'ho ro ma khân may: Du tơ̆ tâm ăp năm mra ƀư nau rƀŭn chuai nau tih ma phung ƀon lan Israel gay ƀư kloh lĕ rngôch nau tih khân păng.” Y-Arôn hŏ ƀư di nâm nau Brah Yêhôva ntăm jêh ma Y-Môis.