Kan Lêvi 15 - Nau Brah Ndu Ngơi 2023

Nau vay ma nau ƀơ̆ ƀơch săk jăn

¹ Brah Yêhôva lah ma Y-Môis jêh ri Y-Arôn:

² “Ăn khân may lah hom ma phung ƀon lan Israel gĭt: Tơlah du huê bu klâu geh nau ji kren tâm săk jăn, nau ji kren nây mra ƀư ƀơ̆ ƀơch ma nơm nĕ.

³ Nau ƀơ̆ ƀơch yor nau ji kren ƀư, nđâp lah săk jăn dôl luh ndâng mâu lah săk jăn păng rhân nau luh, nơm nây ăt jêng ƀơ̆ ƀơch.

⁴ Ăp sưng bê̆ch mra jêng ƀơ̆ ƀơch da dê, lah nơm geh nau luh bê̆ch; lah păng gŭ ta lĕ ndô ndơ nây jêng ƀơ̆ ƀơch da dê.

⁵ Mbu nơm geh pah ta sưng nơm nĕ bê̆ch, ăn păng pih kho ao, ŭm tâm dak, jêh ri jêng ƀơ̆ ƀơch tât kêng măng.

⁶ Mbu nơm gŭ ta ndơ nơm geh nau ji kren hŏ gŭ jêh, ăn păng pih kho ao, ŭm tâm dak jêh ri jêng ƀơ̆ ƀơch tât kêng măng.

⁷ Mbu nơm pah săk jăn nơm geh nau ji kren mra pih lơi kho ao, ŭm tâm dak jêh ri jêng ƀơ̆ ƀơch tât kêng măng.

⁸ Tơlah nơm geh nau ji kren geh soh dak diu ta du huê nơm kloh, ăn nơm nây pih lơi bok ao păng, ŭm tâm dak jêh ri jêng ƀơ̆ ƀơch tât kêng măng.

⁹ Ăp lĕ ưn seh, lah nơm geh nau ji kren gŭ mra jêng ƀơ̆ da dê.

¹⁰ Mbu nơm pah du ntil ndơ nơm geh nau ji kren bê̆ch mâu lah gŭ, nơm nây mra jêng ƀơ̆ ƀơch tât kêng măng. Bi ma mbu nơm djôt ndô ndơ nây mra pih lơi kho ao păng, ŭm tâm dak jêh ri mra jêng ƀơ̆ ƀơch tât kêng măng.

¹¹ Nơm geh nau ji kren mâu hŏ rao ôh ti ƀiălah mbu nơm geh pah, ăn nơm nây pih lơi kho ao, ŭm tâm dak jêh ri jêng ƀơ̆ ƀơch tât kêng măng.

¹² Ndơ dŏng ma glah uk, ƀiălah nơm geh nau ji kren pah, mbang nchah hom glah uk nây, ndơ ma tơm si bu mra rao tâm dak.

¹³ Dôl du huê bunuyh geh nau ji kren dơi bah, ăn kơp ntop tay pơh nar đŏng, rĭ mơ dơi ƀư kloh. Ăn bunuyh nĕ pih lơi kho ao, ŭm tâm tu dak, jêh ri mra dơi kloh.

¹⁴ Tât ta nar tal pham, nơm nây mra nhŭp bar mlâm sĭm ntơp mâu lah bar mlâm plŭk, hăn tanăp Brah Yêhôva ta mpông Ngih Bok Nau Tâm Rƀŭn jêh ri ăn ma kôranh ƀư brah.

¹⁵ Kôranh ƀư brah mra nhhơr du mlâm jêng ndơ ƀư brah chuai nau tih, du mlâm êng jêng ndơ ƀư brah gŭch. Pônây, kôranh ƀư brah mra ƀư nau rƀŭn chuai nau tih tanăp Brah Yêhôva ma nơm geh nau ji kren.

¹⁶ Tơlah du huê bu klâu geh nau luh dak ntăk nglang, ăn păng ŭm lĕ săk jăn păng tâm dak jêh ri jêng ƀơ̆ ƀơch tât kêng măng.

¹⁷ Lĕ ndơ dŏng ma brai mâu lah ntâu geh krêp dak ntăk bu mra pih rao tâm dak jêh ri jêng ƀơ̆ ƀơch tât kêng măng.

¹⁸ Tơlah du huê bu klâu bê̆ch ndrel ma du huê bu ur, lĕ bar hê khân păng mra ŭm tâm dak jêh ri jêng ƀơ̆ ƀơch tât kêng măng.

¹⁹ Tơlah huê bu ur dôl geh săk bu ur, păng mra dơn nau ƀơ̆ ƀơch tâm pơh nar. Mbu nơm pah ta păng mra jêng ƀơ̆ ƀơch tât kêng măng.

²⁰ Lĕ rngôch ndơ păng bê̆ch mâu lah gŭ mra jêng ƀơ̆ ƀơch, tâm nôk mâu kloh nây.

²¹ Mbu nơm pah sưng bê̆ch bu ur nây, ăn pih kho ao, ŭm tâm dak jêh ri jêng ƀơ̆ ƀơch tât kêng măng.

²² Mbu nơm pah ndơ bu ur nây hŏ gŭ jêh, ăn pih lơi kho ao, ŭm tâm dak jêh ri mra jêng ƀơ̆ ƀơch tât kêng măng.

²³ Mbu nơm geh pah ta sưng bê̆ch mâu lah ndơ bu ur nây gŭ, nơm nây mra jêng ƀơ̆ ƀơch tât kêng măng.

²⁴ Mbu nơm bu klâu bê̆ch ndrel đah bu ur nây, nau ƀơ̆ ƀơch mra tưp geh ta bu klâu, jêh ri păng mra jêng ƀơ̆ ƀơch tâm pơh nar; sưng bê̆ch nơm nây ăt mra jêng ƀơ̆ ƀơch đŏng.

²⁵ Tơlah du huê bu ur geh săk bu ur âk nar, mâu di tâm nôk geh săk bu ur, mâu lah geh săk bu ur âk nar rlau ir nau vay geh, păng mra jêng ƀơ̆ ƀơch tâm lĕ nôk geh săk bu ur tâm ban ma tâm nôk geh săk bu ur.

²⁶ Moh sưng bu ur nây bê̆ch tâm nôk geh săk bu ur mra jêng ƀơ̆ ƀơch tâm ban ma sưng păng bê̆ch tâm nôk păng geh săk bu ur; jêh ri lĕ ndơ păng săp gŭ mra jêng ƀơ̆ ƀơch, tâm ban ma tâm nôk păng geh săk bu ur.

²⁷ Mbu nơm pah ta ndơ nây mra jêng ƀơ̆ ƀơch, ăn pih lơi kho ao, ŭm tâm dak jêh ri jêng ƀơ̆ ƀơch tât kêng măng.

²⁸ Lah mham rhân nau luh, ăn păng kâp ntop tâm pơh nar đŏng, rĭ mơ dơi uănh păng jêng kloh.

²⁹ Tât ta nar tal pham păng mra sŏk bar sĭm ntơp mâu lah bar mlâm plŭk jêh ri djôt leo khân păng ma kôranh ƀư brah ta mpông Ngih Bok Nau Tâm Rƀŭn.

³⁰ Kôranh ƀư brah mra nhhơr du mlâm jêng ndơ ƀư brah chuai nau tih jêh ri du mlâm êng jêng ndơ ƀư brah gŭch. Pônây, kôranh ƀư brah mra ƀư nau rƀŭn chuai nau tih tanăp Brah Yêhôva ma nơm geh săk bu ur rlau ir.

³¹ Khân may mât phung ƀon lan Israel tâm nkhah khân păng nôk geh nau ƀơ̆ ƀơch; lah mâu, khân păng mra khĭt tâm nau ƀơ̆ ƀơch khân păng nơm, yorlah hŏ ƀư ƀơ̆ ƀơch jêh Ngih Bok Gâp hôm gŭ ta nklang khân păng.”

³² Nây jêng nau vay ma nau ƀơ̆ ƀơch nơm geh nau ji kren mâu lah ma nơm luh dak ntăk,

³³ bu ur tâm nôk păng geh săk bu ur, bu klâu geh nau ji kren mâu lah bu ur geh săk bu ur rlau ir nar, jêh ri ma bu klâu bê̆ch ndrel đah bu ur tâm nôk geh săk bu ur.