Kan Lêvi 14 - Nau Brah Ndu Ngơi 2023

Rƀŭn ƀư kloh bunuyh geh ji phŭng

¹ Brah Yêhôva lah ma Y-Môis pô aơ:

² “Aơ jêng nau vay prăp ma bunuyh khan ji phŭng tâm nar ƀư kloh păng. Ăn bu njŭn păng mâp kôranh ƀư brah;

³ kôranh ƀư brah mra luh padih ngih bok gay sek uănh. Tơlah bunuyh khan ji phŭng hŏ bah jêh

⁴ kôranh ƀư brah mra ntăm ma nơm dăch ƀư nau kloh, sŏk bar mlâm sĭm rêh kloh, du n'gâng tơm si sêdar, du rse brai sut chăng rhưch jêh ri n'gĭng hisôp.

⁵ Kôranh ƀư brah ntăm nkhĭt nguay tâm bar mlâm sĭm nây, dơ mham sĭm tâm glah uk, geh prăp dak hoch.

⁶ Jêh nây, sŏk sĭm hôm rêh ndrel ma n'gâng tơm si sêdar, rse brai sut chăng, jêh ri n'gĭng hisôp, mbŭk lĕ tâm mham sĭm hŏ nkhĭt jêh ta glah uk geh prăp dak hoch.

⁷ Kôranh ƀư brah mra nsrih mham nây pơh tơ̆ ta klơ nơm dơi ƀư kloh jêh ri mbơh nơm geh ji phŭng jêng kloh, jêh ri mƀơk sĭm hôm rêh luh tâm mir.

⁸ Nơm ŭch geh nau kloh mra pih kho ao, poih ăn kloh lĕ sŏk, soar păng, ŭm tâm dak jêh ri păng mra jêng kloh. Jêh nây, ăn nơm nĕ gŭ padih ngih bok tâm pơh nar, jêh nây păng dơi lăp ta ngih bok.

⁹ Tât ta nar tal pơh, păng mra poih lĕ soar, sŏk, têp jêh ri rsau sâng măt, pih kho ao jêh ri ŭm tâm dak gay ma păng dơi geh nau kloh.

¹⁰ Ta nar tal pham, păng mra nhŭp bar mlâm biăp nkuăng mâu têl khap ôh, du mlâm biăp me du năm mâu têl khap, pe kilô rnih môi tâm pot dak ngi ƀư ndơ ƀư brah rnih môi jêh ri du kô̆ tâm pe lit dak ngi.

¹¹ Kôranh ƀư brah nơm ƀư nau rƀŭn ƀư kloh mra djôt bunuyh dơi geh nau ƀư kloh jêh ri lĕ ndơ nhhơr aơ tanăp Brah Yêhôva ta mpông Ngih Bok Nau Tâm Rƀŭn.

¹² Kôranh ƀư brah mra nhŭp nguay tâm bar biăp nkuăng nhhơr jêng ndơ ƀư brah chuai nau ƀư tih ndrel ma du kô̆ tâm pe lit dak ngi jêh ri ƀư nau vay ƀư ndơ̆ đah aơ ndơ̆ đah ri tanăp Brah Yêhôva.

¹³ Jêh nây kôranh ƀư brah nkhĭt biăp nây tâm ntŭk bu vay nkhĭt mpa ƀư brah chuai nau tih jêh ri ndơ ƀư brah gŭch, tâm ntŭk kloh ueh; yorlah ndơ ƀư brah chuai nau ƀư tih ăt prăp ma kôranh ƀư brah nâm ndơ ƀư brah chuai nau tih, nĕ jêng ndơ dŭt kloh ueh.

¹⁴ Kôranh ƀư brah mra sŏk mham mpa nhhơr chuai nau ƀư tih mhĭng ta chiau tôr ma, nơm dơi ƀư kloh, ta nglau me ti ma jêh ri ta nglau me jâng ma păng;

¹⁵ jêh ri sŏk djê̆ dak ngi nkhŭt tâm mpang ti chiau păng,

¹⁶ mbŭk nglau ti ma păng tâm dak ngi ăn tâm ti chiau păng jêh ri nsrih pơh tơ̆ tanăp Brah Yêhôva.

¹⁷ Kôranh ƀư brah mra sŏk dak ngi hôm e tâm mpang ti păng mhĭng ta chiau tôr ma nơm dơi ƀư kloh, ta nglau me ti ma jêh ri nglau me jâng ma, jêng ta klơ mham ndơ ƀư brah chuai nau ƀư tih.

¹⁸ Bi dak ngi hôm e tâm mpang ti, kôranh ƀư brah mra mhĭng ta bôk nơm dơi ƀư kloh. Kôranh ƀư brah mra ƀư nau rƀŭn chuai nau tih ăn ma nơm nĕ tanăp Brah Yêhôva.

¹⁹ Kôranh ƀư brah mra nhhơr ndơ ƀư brah chuai nau tih gay chuai nau tih ma nơm nây dơi ƀư kloh bơh lĕ rngôch ƀơ̆ ƀơch. Jêh nây, kôranh ƀư brah mra nkhĭt mpa ƀư ndơ ƀư brah gŭch.

²⁰ Kôranh ƀư brah mra nhhơr ndơ ƀư brah gŭch nđâp ma ndơ ƀư brah rnih môi ta klơ nơng ƀư brah. Tâm ban pônây, kôranh ƀư brah mra nhhơr nau rƀŭn chuai nau tih ma păng, jêh ri păng mra dơi kloh.

²¹ Ƀiălah tơlah păng o ach, mâu tŏng nau dơi nhhơr lĕ ndơ nhhơr nây ôh, ăn păng nhŭp du mlâm biăp nkuăng dŏng ƀư ndơ ƀư brah chuai nau ƀư tih tĭng nau vay ƀư ndơ̆ đah aơ ndơ̆ đah ri gay chuai nau tih ma păng nơm ndrel ma du kilô rnih môi pot dak ngi jêng ndơ ƀư brah rnih môi jêh ri du kô̆ tâm pe lit dak ngi,

²² bar mlâm sĭm ntơp mâu lah du kôp sĭm plŭk, tĭng nâm nau dơi, du mlâm dŏng ƀư ndơ ƀư brah chuai nau tih, du mlâm êng dŏng ƀư ndơ ƀư brah gŭch.

²³ Tât ta nar tal pham, gay ma dơi geh nau ƀư kloh, ăn nơm nây djôt lĕ ndơ nhhơr ma kôranh ƀư brah ta mpông Ngih Bok Nau Tâm Rƀŭn, tanăp Brah Yêhôva.

²⁴ Kôranh ƀư brah mra nhŭp biăp kon gay ƀư ndơ ƀư brah chuai nau ƀư tih jêh ri du kô̆ tâm pe dak ngi nhhơr tĭng nâm nau vay ƀư ndơ̆ đah aơ ndơ̆ đah ri tanăp Brah Yêhôva.

²⁵ Kôranh ƀư brah mra nkhĭt biăp kon gay ƀư mpa ƀư brah chuai nau ƀư tih, sŏk mham nây mhĭng ta n'ha tôr ma, ta nglau me ti ma jêh ri ta nglau me jâng ma nơm dơi ƀư kloh.

²⁶ Kôranh ƀư brah nkhŭt đŏng djê̆ dak ngi tâm mpang ti chiau păng,

²⁷ mbŭk nglau ti ma tâm dak ngi hŏ nkhŭt jêh tâm mpang ti chiau jêh ri nsrih pơh tơ̆ tanăp Brah Yêhôva

²⁸ jêh ri mhĭng ta n'ha tôr ma, ta nglau me ti ma jêh ri ta nglau me jâng ma nơm dơi ƀư kloh, tâm ban ma klơ mham ndơ ƀư brah chuai nau ƀư tih.

²⁹ Kô̆ dak ngi hôm e tâm mpang ti, kôranh ƀư brah mra mhĭng ta bôk nơm dơi ƀư kloh gay ƀư nau rƀŭn chuai nau tih nơm nĕ tanăp Brah Yêhôva.

³⁰ Jêh nây kôranh ƀư brah mra nhhơr bar mlâm sĭm ntơp mâu lah bar mlâm sĭm plŭk, tĭng nâm nau dơi nơm nây,

³¹ du mlâm dŏng ƀư ndơ ƀư brah chuai nau tih, du mlâm dŏng ƀư ndơ ƀư brah gŭch, ndrel ma ndơ ƀư brah rnih môi. Kơt nây, kôranh ƀư brah nhhơr nau rƀŭn chuai nau tih ma nơm dơi ƀư kloh tanăp Brah Yêhôva.”

³² Nây jêng nau vay ma nơm geh nau ji phŭng ƀiălah mâu dơi tŏng nau nhhơr lĕ ndơ nhhơr dŏng ma nau rƀŭn ƀư kloh păng nơm.

Têl mbrĭng tâm ngih

³³ Brah Yêhôva ăt lah đŏng ma Y-Môis jêh ri ma Y-Arôn pô aơ:

³⁴ “Tơlah khân may lăp tâm n'gor Kanaan jêng n'gor Gâp mra ăn khân may ƀư drăp ndơn, tơlah Gâp n'gân du ntil nau têl mbrĭng ta du rplay ngih tâm n'gor khân may mra pit sŏk,

³⁵ nơm ngih nây mra hăn mbơh ma kôranh ƀư brah pô aơ: ‘Gâp saơ geh du ntil nau têl nâm bu nau têl mbrĭng tâm ngih gâp.’

³⁶ Êlor hăn lăp sek uănh têl mbrĭng nây, ăn kôranh ƀư brah ntăm ma khân păng chông leo padih lĕ rngôch ndơ tâm ngih gay mâu geh tưp ƀơ̆; jêh nây, kôranh ƀư brah mra lăp sek uănh ngih nây.

³⁷ Kôranh ƀư brah mra sek uănh nau têl nây, tơlah têl nây gŭ tâm mpir ngih nây geh âk ntŭk ƀlak ndrêh mâu lah chăng, jêh ri nduh jru lơn đah mpir,

³⁸ kôranh ƀư brah mra luh padih mpông ngih jêh ri nchăng ngih nây tâm pơh nar.

³⁹ Ta nar tal pơh, kôranh ƀư brah mra plơ̆ tay, tơlah saơ lĕ ƀlak nây jêng bĭk tâm mpir ngih

⁴⁰ kôranh ƀư brah mra ntăm ma bu sŏk lơi lĕ lŭ geh ƀlak nây jêh ri klŭp lơi lŭ nây tâm du ntŭk ƀơ̆ ƀơch ta padih ƀon toyh;

⁴¹ jêh nây đă bu poih kloh tâm trôm ngih, nkhŭt lơi klo bu mhe poih nây tâm du ntŭk ƀơ̆ ƀơch ta padih ƀon toyh,

⁴² jêh ri sŏk lŭ êng rgâl ta ntŭk lŭ ơm ri, jêh nây mra sŏk klo êng lĭr ngih nây.

⁴³ Ƀiălah tơlah hŏ tăk lơi lŭ jêh, poih ngih jêh ri lĭr tay, ƀiălah ƀlak mbrĭng nây ăt hôm mpơl tâm ngih

⁴⁴ ăn kôranh ƀư brah hăn tât sek uănh tay. Tơlah nau ƀlak nây ăt hôm jêng bĭk tâm ngih, nây jêng nau têl mbrĭng jêng bĭk tâm ngih, jêh ri ngih nây hŏ jêng ƀơ̆ ƀơch.

⁴⁵ Ăn bu rơih lơi ngih nây; lĕ rngôch lŭ, tơm si jêh ri lĕ klo ngih nây, nkhŭt tâm du ntŭk ƀơ̆ ƀơch ta padih ƀon toyh.

⁴⁶ Dôl ngih nây hôm nchăng, mbu nơm lăp ngih ta nây mra jêng ƀơ̆ ƀơch kŏ tât kêng măng.

⁴⁷ Mbu nơm bê̆ch mâu lah sông sa tâm ngih nây ăn pih lơi kho ao păng nơm.

⁴⁸ Tơlah lôch jêh nau lĭr tay ngih nây, kôranh ƀư brah hăn sek uănh jêh ri saơ lĕ têl nây mâu jêng bĭk ôh tâm ngih, kôranh ƀư brah mra mbơh ngih nây jêng kloh, yorlah lĕ têl mbrĭng nây hŏ bah jêh.

⁴⁹ Gay ma ƀư kloh ngih nây, ăn kôranh ƀư brah sŏk bar mlâm sĭm, ndrel ma tơm si sêdar, brai sut chăng jêh ri n'gĭng hisôp;

⁵⁰ jêh nây nkhĭt nguay tâm bar mlâm sĭm nây tâm klơ bâr glah uk geh prăp dak hoch,

⁵¹ sŏk tơm si sêdar, n'gĭng hisôp, jêh ri brai sut chăng jêh ri sĭm hôm rêh mbŭk lĕ tâm mham sĭm bu hŏ nkhĭt, tâm pot jêh ma dak hoch jêh ri mbrih ta ngih nây pơh tơ̆.

⁵² Pônây kôranh ƀư brah hŏ dŏng mham sĭm, ma dak hoch, sĭm rêh, tơm si sêdar, n'gĭng hisôp, jêh ri brai sut chăng gay ƀư kloh ma ngih nây.

⁵³ Kôranh ƀư brah ăt mƀơk sĭm rêh ăn mpăr luh ta mir padih ƀon toyh. Pônây, jêh kôranh ƀư brah ƀư nau rƀŭn chuai nau tih ma ngih nây, jêh ri păng mra dơi kloh.”

⁵⁴ Ta klơ aơ jêng nau vay ăn ma lĕ nau ji glăm ta klơ ntâu: nau ok,

⁵⁵ lĕ têl mbrĭng ta klơ kho ao jêh ri tâm ngih gŭ,

⁵⁶ lĕ ntŭk môr, mâu lah ntŭk luh, jêh ri lĕ ƀlak,

⁵⁷ gay gĭt năl tơlah păng jêng ƀơ̆ ƀơch jêh ri tơlah păng jêng kloh. Nây jêng nau vay ma nau ji glăm ta klơ ntâu.