Kan Lêvi 13 - Nau Brah Ndu Ngơi 2023

Nau vay ma nau ji phŭng

¹ Brah Yêhôva lah tay ma Y-Môis jêh ri Y-Arôn:

² “Tơlah du huê bunuyh saơ ta ntâu păng môr, mâu lah geh nau ok eh mâu lah geh ƀlak nglang mra jêng ji phŭng, ăn bu njŭn nơm nây tâm mâp kôranh ƀư brah Y-Arôn mâu lah du huê tâm phung kôranh ƀư brah jêng phung kon sau Y-Arôn.

³ Kôranh ƀư brah mra sek uănh ntŭk sôt ta ntâu păng. Tơlah rsau ta ntŭk sôt nây hŏ jêng nglang jêh ri ntŭk sôt nĕ lơ hô nduh lơn ma ntâu, nây jêng ji phŭng. Lah jêh sek uănh, kôranh ƀư brah mra nter mbơh păng jêng nơm ƀơ̆ ƀơch.

⁴ Ƀiălah tơlah ƀlak nglang tâm ntâu păng, jêh ri mâu jêng nduh jru lơn ma ntâu, jêh ri tơlah rsau mâu jêng nglang ôh pôri kôranh ƀư brah krŭng nơm nây tâm pơh nar.

⁵ Tât ta nar tal pơh kôranh ƀư brah mra sek uănh tay păng. Tơlah saơ ntŭk sôt nây mâu bĭk ôh tâm ntâu, kôranh ƀư brah mra krŭng păng ntop tâm pơh nar đŏng.

⁶ Tât nar tal pơh, kôranh ƀư brah mra sek uănh tay păng. Tơlah ntŭk sôt nây jĭr đê̆, mâu bĭk ôh tâm ntâu, kôranh ƀư brah mra nter mbơh păng jêng kloh; nĕ knŏng jêng du ok eh nau vay. Ăn păng pih bok ao păng jêh ri dơi kloh.

⁷ Ƀiălah tơlah hŏ tâm mpơl măt tanăp kôranh ƀư brah gay ma mbơh păng jêng nơm kloh ƀiălah nau ok eh jêng bĭk tâm ntâu păng, ăn păng mâp tay kôranh ƀư brah du tơ̆ đŏng.

⁸ Kôranh ƀư brah mra sek uănh păng tay, tơlah nau ok eh nây jêng bĭk jêh tâm ntâu kôranh ƀư brah sâm mbơh ma păng jêng ƀơ̆ ƀơch, yor nây jêng nau ji phŭng.

⁹ Lah du huê bunuyh geh ji phŭng jêh, ăn bu njŭn păng mâp kôranh ƀư brah.

¹⁰ Kôranh ƀư brah mra sek uănh păng, tơlah tâm ntâu geh nau ok eh nglang ƀư ma rsau plăch jêng nglang, jêh ri tơlah tâm ok eh geh ndâr mlay luh chăng

¹¹ nây jêng ji phŭng gŭ jŏ tâm ntâu săk jăn păng. Kôranh ƀư brah mra mbơh păng jêng ƀơ̆ ƀơch jêh ri mâu ŭch krŭng păng gay sek uănh, yorlah păng hŏ jêng ƀơ̆ ƀơch jêh.

¹² Tơlah bu saơ geh nau glăm ta ntâu hŏ mpơl jêh ri bĭk lam săk jăn nơm nây tă bơh bôk tât jâng, ntŭk kôranh ƀư brah dơi saơ

¹³ ăn kôranh ƀư brah sek uănh nanê̆; tơlah ji nây hŏ bĭk jêh lĕ săk jăn păng jêh ri kôranh ƀư brah mra mbơh nơm ji jêng kloh, yorlah lam săk jăn păng plăch jêng nglang, yor ri păng jêng kloh.

¹⁴ Ƀiălah dôl saơ geh ntŭk mlay mpơl chăng, nơm nĕ jêng ƀơ̆ ƀơch;

¹⁵ kôranh ƀư brah mra sek uănh nanê̆ jêh ri mbơh ma păng jêng ƀơ̆ ƀơch, yorlah nây jêng nau ji phŭng.

¹⁶ Ƀiălah tơlah ntŭk mlay chăng plăch jêng nglang, păng mra hăn ta kôranh ƀư brah.

¹⁷ Kôranh ƀư brah mra sek uănh păng, tơlah ntŭk sôt hŏ plăch jêng nglang jêh, mbơh hom ma nơm geh nau ji nây jêng kloh, yorlah păng hŏ jêng kloh jêh.

¹⁸ Tơlah du huê bunuyh geh ok eh ta ntâu păng hŏ bah jêh,

¹⁹ ƀiălah tâm ntŭk toh ok eh nây luh geh nau môr nglang mâu lah ƀlak chăng, ăn păng hăn ma kôranh ƀư brah sek uănh.

²⁰ Tơlah saơ ntŭk ƀlak nây nduh jru lơn ma ntâu jêh ri rsau plăch jêng nglang, ăn kôranh ƀư brah mbơh ma păng jêng ƀơ̆ ƀơch; nây jêng têl yor nau ji phŭng hŏ luh jêh tă bơh ntŭk nau ok eh.

²¹ Ƀiălah tơlah kôranh ƀư brah sek uănh, jêh ri mâu saơ rsau jêng nglang, ntŭk ƀlak mâu jêng nduh jru lơn ma ntâu ôh jêh ri hŏ dơi lơn, ăn kôranh ƀư brah mra krŭng păng tâm pơh nar.

²² Tơlah saơ ƀlak nây jêng bĭk tâm ntâu, ăn kôranh ƀư brah mbơh ma păng jêng ƀơ̆ ƀơch, yorlah nây jêng ji phŭng.

²³ Ƀiălah tơlah ƀlak nây ăt hôm gŭ du ntŭk, mâu jêng bĭk ôh; nây jêng têl khap nau ok eh; kôranh ƀư brah mra mbơh ma păng jêng kloh.

²⁴ Lah du huê bunuyh geh têl khap ŭnh sa ta ntâu jêh ri têl khap ŭnh sa nây jêng du ƀlak chăng mâu lah nglang,

²⁵ yor ri kôranh ƀư brah mra sek uănh. Tơlah rsau tâm ntŭk ƀlak hŏ plăch jêng nglang jêh ri jêng nduh jru lơn ma ntâu, nây jêng nau ji phŭng luh tă bơh têl khap ŭnh sa. Kôranh ƀư brah mra mbơh ma păng jêng ƀơ̆ ƀơch, yorlah nây jêng nau ji phŭng.

²⁶ Ƀiălah tơlah kôranh ƀư brah sek uănh ta ntŭk têl khap ŭnh sa, ƀiălah mâu saơ rsau jêng nglang ôh, mâu nduh jru lơn ma ntâu ôh jêh ri hŏ dơi oi jêh, kôranh ƀư brah mra krŭng păng tâm pơh nar.

²⁷ Tât ta nar tal pơh, kôranh ƀư brah sek uănh tay păng, tơlah ƀlak nây jêng bĭk tâm ntâu, mbơh hom ma păng jêng ƀơ̆ ƀơch, yorlah nây jêng nau ji phŭng.

²⁸ Ƀiălah tơlah ƀlak nây ăt hôm gŭ du ntŭk, mâu jêng bĭk tâm ntâu ôh, ƀiălah bơi jêng nâm bu ntâu ơm, nây jêng khap tă ŭnh sa. Kôranh ƀư brah mra mbơh ma păng jêng kloh, yorlah nây jêng têl khap ŭnh sa.

²⁹ Lah du huê bu klâu mâu lah du huê bu ur geh ntŭk sôt ta bôk mâu lah ta têp kang,

³⁰ kôranh ƀư brah mra sek uănh ntŭk sôt nây. Tơlah păng jêng nduh jru lơn ma ntâu, rsau hon tâm ntŭk nây djê̆ ir jêh ri bơi jêng êr, pôri kôranh ƀư brah mra mbơh păng jêng ƀơ̆ ƀơch, nĕ jêng nau toh ok, jêng ji phŭng ta bôk mâu lah ta têp kang.

³¹ Ƀiălah tơlah kôranh ƀư brah sek uănh ntŭk geh toh ok, lah mâu saơ păng nduh lơn ma ntâu jêh ri mâu geh rsau krăk hon tâm ntŭk nây ôh, pôri kôranh ƀư brah mra krŭng nơm nây tâm pơh nar.

³² Tât ta nar tal pơh, kôranh ƀư brah mra sek uănh; tơlah ntŭk toh ok nây mâu bĭk ôh, mâu geh rsau êr jêh ri mâu nduh jru lơn ma ntâu ôh,

³³ pôri păng poih sŏk jêh ri têp păng, ƀiălah mâu poih ntŭk toh ok, jêh nây kôranh ƀư brah mra plơ̆ krŭng nơm nây ntop pơh nar đŏng.

³⁴ Tât nar tal pơh, kôranh ƀư brah sek uănh tay, tơlah ntŭk toh ok mâu jêng bĭk tâm ntâu ôh, mâu nduh jru lơn ma ntâu, pôri kôranh ƀư brah mra mbơh ma păng jêng kloh. Păng mra pih bok ao păng jêh ri mra dơi jêng kloh.

³⁵ Ƀiălah tơlah ntŭk toh ok nây jêng bĭk tâm ntâu, lah jêh nau dơi mbơh jêng kloh

³⁶ kôranh ƀư brah mra sek uănh tay păng. Tơlah ntŭk toh ok nây hŏ jêng bĭk jêh tâm ntâu, pôri kôranh ƀư brah mâu ŭch joi geh rsau bơi êr mâu lah mâu; păng hŏ jêng ƀơ̆ ƀơch jêh.

³⁷ Ƀiălah tơlah măt kôranh ƀư brah nơm yơh saơ ntŭk toh ok nây hôm nâm bu saơm jêh ri geh rsau krăk hŏ hon ta ntŭk nây, ntŭk toh ok nây hŏ bah jêh jêh ri păng hŏ dơi jêng kloh. Kôranh ƀư brah mra mbơh păng jêng kloh.

³⁸ Tơlah du huê bu klâu mâu lah du huê bu ur ntoh lĕ ƀlak nglang tâm ntâu săk jăn păng

³⁹ kôranh ƀư brah mra sek uănh. Tơlah lĕ ƀlak nglang tâm ntâu săk jăn du huê bunuyh jêng nhhuay, nây knŏng jêng kuh luh ntoh tâm ntâu; păng ăt jêng kloh.

⁴⁰ Tơlah geh du huê rŭng sŏk, plưn bôk, nơm nây ăt jêng kloh.

⁴¹ Bunuyh rŭng sŏk ta ndăr kleng jêng nơm plưn ta ndăr kleng, nơm nây ăt jêng kloh.

⁴² Ƀiălah tơlah ntŭk bôk plưn mâu lah plưn ta ndăr kleng geh têl nglang chăng, nây jêng ji phŭng luh tă bơh plưn bôk mâu lah ta plưn ndăr kleng.

⁴³ Ăn kôranh ƀư brah sek uănh păng, tơlah saơ môr ta bôk plưn mâu lah ta ndăr kleng plưn geh nglang chăng, nâm bu ji phŭng tâm ntâu săk jăn,

⁴⁴ pôri nơm nây geh nau ji glăm ta klơ ntâu; kôranh ƀư brah mra mbơh păng jêng ƀơ̆ ƀơch, yorlah ntŭk sôt ta bôk păng.

⁴⁵ Bunuyh geh nau ji phŭng mra nsoh kho ao sat, mâu dơi kĭt sŏk, rdêp têp păng jêh ri nter: ‘Ƀơ̆ ƀơch! ƀơ̆ ƀơch!’

⁴⁶ Moh nar păng hôm khan nau ji păng ăt hôm jêng ƀơ̆ jêh ri ăn păng gŭ êng tâm du ntŭk padih rmlak.

Nau vay ma ndô ndơ lĕ o

⁴⁷ Lah kho ao lĕ o nâm bu têl phŭng, nđâp lah ta klơ kho ao ma brai răm mâu lah kho ao ma bok mhay,

⁴⁸ ta klơ brai mhay, ndơ tanh ma bok mhay mâu lah ma brai răm, ta klơ ntâu mâu lah moh ndơ ƀư ma ntâu,

⁴⁹ tơlah saơ têl nây bơi ndrêh mâu lah bơi chăng luh tâm kho ao mâu lah ta klơ ntâu, ta klơ brai mhay, brai ek ndrŭng mâu lah moh ndơ ƀư ma ntâu, uănh hom nâm bu têl mbrĭng jêh ri djôt leo hom gay mbơh ma kôranh ƀư brah.

⁵⁰ Kôranh ƀư brah mra sek uănh nau nây jêh ri krŭng êng ndơ nây tâm pơh nar.

⁵¹ Tât ta nar tal pơh, kôranh ƀư brah mra sek uănh tay, tơlah nau têl jêng bĭk tâm kho ao, ta klơ brai mhay, brai ek ndrŭng mâu lah ta klơ ndô ndơ ƀư ma ntâu, nây jêng têl mbrĭng bĭk rơ̆; ndơ nây jêng ƀơ̆.

⁵² Kôranh ƀư brah mra su lơi kho ao nây, brai tanh, brai ek ndrŭng ma brai răm mâu lah ma brai lok, mâu lah ăp moh ndơ ƀư ma ntâu hŏ o ngăn, yorlah nây jêng têl mbrĭng gơnh tưp; ăn bu su ndơ nây tâm ŭnh.

⁵³ Ƀiălah, tơlah kôranh ƀư brah sek uănh jêh ri mâu saơ têl mbrĭng nây bĭk ôh ta klơ kho ao, ta klơ brai mhay, brai ek ndrŭng mâu lah ta lĕ ndơ dŏng ƀư ma ntâu,

⁵⁴ kôranh ƀư brah mra đă khân păng pih lơi moh ndơ geh têl mbrĭng, jêh nây păng mra plơ̆ krŭng êng ndơ nây tâm pơh nar đŏng.

⁵⁵ Lah bu pih jêh ndơ nây, kôranh ƀư brah mra sek uănh tay, tơlah têl nây mâu rgâl ôh, nđâp lah nau têl mbrĭng mâu jêng bĭk ôh, ndơ nây jêng ƀơ̆ yơh; ăn phung kon su păng tâm ŭnh, nđâp lah têl mbrĭng sa ta ndŭr kơi mâu lah panăp.

⁵⁶ Ƀiălah tơlah lôch pih jêh, ntŭk têl mbrĭng nây roh đê̆, ăn kôranh ƀư brah plôk lơi ntŭk têl o nây luh bơh kho ao, ta ntâu mâu lah brai mhay, mâu lah brai tanh.

⁵⁷ Tơlah têl mbrĭng nây luh geh ta kho ao, ta brai mhay, brai ek ndrŭng, mâu lah ndô ndơ ƀư ma ntâu, nây jêng du têl mbrĭng bĭk rơ̆, ăn khân may su ndơ nây.

⁵⁸ Ƀiălah kho ao, brai mhay, brai ek ndrŭng mâu lah moh ndơ ƀư ma ntâu, jêng ndơ khân may hŏ pih jêh ri têl mbrĭng roh jêh ăn bu djôt plơ̆ pih tal bar jêh ri ndơ nây mra jêng kloh.”

⁵⁹ Nây jêng nau vay ma têl mbrĭng ta kho ao ƀư ma brai răm mâu lah ma bok mhay, ta brai mhay, brai ek ndrŭng, mâu lah ta moh ndơ ƀư ma ntâu, tă bơh nĕ gay bu mbơh ndơ nây jêng kloh mâu lah ƀơ̆.