Kan Lêvi 12 - Nau Brah Ndu Ngơi 2023

Nau vay ƀư kloh ma phung bu ur lah jêh deh kon

¹ Brah Yêhôva lah ma Y-Môis pô aơ:

² “May lah hom ma phung ƀon lan Israel: ‘Tơlah du huê bu ur ntreo jêh ri deh du huê kon bu klâu, păng mra jêng ƀơ̆ ƀơch tâm pơh nar, nâm bu rnôk păng geh săk bu ur.

³ Tât nar tal pham ăn bu ƀư nau rƀŭn koh ntâu kon bu klâu nây.

⁴ Bu ur nây mra gŭ ta ngih ntop pe jât mpe nar đŏng gay ma lôch nau ƀư kloh. Păng mâu dơi pah ndơ kloh ueh ôh, mâu lĕ dơi hăn tâm ntŭk kloh ueh, kŏ tât ma nau ƀư kloh păng nơm.

⁵ Ƀiălah tơlah păng deh ma du huê kon bu ur, păng mra jêng ƀơ̆ ƀơch tâm bar pơh nâm bu rnôk păng geh săk bu ur. Jêh nây, ăn păng gŭ ta ngih ntop prao jât mprao nar đŏng gay lôch rnôk nau ƀư kloh.

⁶ Tơlah lôch jêh nar ƀư kloh păng nơm, nđâp lah deh kon bu klâu mâu lah kon bu ur, ăn bu ur nây djôt tât ma kôranh ƀư brah ta mpông Ngih Bok Nau Tâm Rƀŭn du mlâm biăp kon du năm gay ƀư ndơ ƀư brah gŭch jêh ri du mlâm sĭm plŭk mâu lah du mlâm sĭm ntơp jêng ndơ ƀư brah chuai nau tih.

⁷ Kôranh ƀư brah mra nhhơr mpa ƀư brah nây tanăp Brah Yêhôva gay ƀư nau rƀŭn ƀư kloh ma păng, jêh ri păng mra dơi geh kloh lôch ma nau suăt mham. Nây jêng nau vay ma bu ur deh kon bu klâu mâu lah kon bu ur,

⁸ Tơlah bu ur mâu tŏng nau dơi nhhơr du mlâm biăp kon, ăn păng nhhơr du kôp sĭm ntơp mâu lah du kôp plŭk kon, du mlâm prăp ma ndơ ƀư brah gŭch, du mlâm êng prăp ma ndơ ƀư brah chuai nau tih. Kôranh ƀư brah mra ƀư nau rƀŭn ƀư kloh ma păng jêh ri păng mra dơi kloh.’”