Kan Lêvi 11 - Nau Brah Ndu Ngơi 2023

Ndơ sông sa kloh jêh ri mâu kloh

¹ Brah Yêhôva lah ma Y-Môis jêh ri Y-Arôn:

² “Lah hom ma phung ƀon lan Israel: ‘Tâm lĕ mpô mpa rêh ta klơ neh ntu, aơ jêng lĕ ntil mpa khân may dơi vay sa:

³ Khân may dơi sa lĕ mpô mpa geh nchop tâm nkhah bar jêh ri sa njuah tay.

⁴ Ƀiălah, tâm lĕ rngôch mpô mpa blau njuah tay mâu lah geh nchop tâm nkhah, khân may mâu dơi sa ôh lĕ mpô mpa aơ: seh samô, yorlah păng blau njuah tay ƀiălah mâu geh nchop tâm nkhah ôh, păng jêng mpa mâu kloh ma khân may;

⁵ mpik bri yôk, yorlah păng blau njuah tay ƀiălah mâu geh nchop tâm nkhah ôh, păng jêng mpa mâu kloh ma khân may;

⁶ rpai bri, yorlah păng blau njuah tay ƀiălah mâu geh nchop tâm nkhah ôh, păng jêng mpa mâu kloh ma khân may;

⁷ sŭr, yorlah jâng păng geh nchop tâm nkhah ƀiălah mâu blau njuah tay ôh, pôri păng jêng mpô mpa mâu kloh ma khân may.

⁸ Khân may mâu dơi sa puăch lĕ mpa nây, săk jăn khĭt khân păng khân may mâu dơi pah ôh, khân păng jêng mpa mâu kloh ma khân may.

⁹ Tâm lĕ mpa gŭ tâm dak, aơ jêng lĕ mpa khân may dơi vay sa: Lĕ mpa gŭ tâm dak, nđâp lah tâm dak rlai mâu lah tâm dak krong, tơlah geh rsâng jêh ri nsiap, khân may dơi sa.

¹⁰ Ƀiălah lĕ rngôch mpa rêh gŭ tâm dak rlai mâu lah dak krong mâu geh rsâng, mâu geh nsiap, gŭ rêh âk ndrel tâm dak mâu lah mpa rêh gŭ ndrel ma lĕ rngôch mpa êng êng tâm dak, lĕ rngôch jêng mpa ƀơ̆ ƀơch ma khân may.

¹¹ Lĕ ntil mpa nây geh dŭt ƀơ̆ ma khân may; mâu dơi sa puăch khân păng ôh, bi ma săk jăn khĭt khân păng jêng ndơ ƀơ̆ ƀơch ma khân may.

¹² Lĕ rngôch mpa rêh gŭ tâm dak mâu geh rsâng, mâu geh nsiap, uănh hom jêng geh nau ƀơ̆ ƀơch ma khân may.

¹³ Tâm lĕ rngôch sĭm, aơ jêng lĕ ntil ăn khân may uănh jêng ndơ ƀơ̆ ƀơch, mâu dơi sa ôh yorlah khân păng jêng mpa dŭt ƀơ̆ ƀơch: klang ƀŭng, klang grĭt, klang grât;

¹⁴ klang ntơp, klang nglang, lĕ mpa tĭng nâm ntil;

¹⁵ lĕ mpôl nđak,

¹⁶ sĭm ôtrus, klang kô, sĭm tê văch, lĕ rngôch klang pah,

¹⁷ klang kô jê̆, kômôran, klang kok ŭnh,

¹⁸ sĭm njơch dak, sĭm njônh, klang sa puăch ôm,

¹⁹ sĭm klang kok, kik dak jêh ri lĕ mpa tĭng nâm mpôl păng; sĭm rkleh jêh ri rêt.

²⁰ Lĕ rngôch ntil mpa vơr geh năr jêh ri jâng jêng mpa ƀơ̆ ƀơch da dê ma khân may.

²¹ Ƀiălah, tâm lĕ mpa vơr geh năr jêh ri jâng, khân may dơi sa lĕ mpa geh jâng blau nsăt ta klơ neh,

²² nâm lĕ rngôch krah ndrach, lĕ rngôch krah nsăt geh bôk rvang, lĕ rngôch lêr, jêh ri lĕ rngôch krah nsăt êng êng.

²³ Lĕ mpa vơr geh năr jêh ri jâng êng, uănh hom jêng ndơ ƀơ̆ ƀơch ma khân may.

²⁴ Khân may geh nau ƀơ̆ ƀơch yorlah lĕ nau aơ: mbu nơm pah ta săk jăn khĭt lĕ rngôch mpa ta aơ, khân păng mra ƀơ̆ ƀơch tât kêng măng:

²⁵ Mbu nơm djôt săk jăn khĭt khân păng mra pih kho ao păng jêh ri jêng ƀơ̆ ƀơch tât kêng măng.

²⁶ Ăp mpô mpa geh nchop tâm nkhah ƀiălah mpang jâng mâu nchop tâm nkhah ôh jêh ri mâu blau njuah tay gơ̆ jêng mpa ƀơ̆ ƀơch ma khân may; mbu nơm pah ta khân păng mra jêng ƀơ̆ ƀơch.

²⁷ Tâm lĕ rngôch mpa hăn đah puăn jâng, tơlah mpô mpa hăn ma mpang jâng, uănh hom jêng mâu kloh ma khân may; mbu nơm pah ta săk jăn khĭt khân păng mra jêng ƀơ̆ ƀơch tât kêng măng,

²⁸ jêh ri mbu nơm djôt săk jăn khĭt khân păng mra pih kho ao păng jêh ri mra jêng ƀơ̆ ƀơch tât kêng măng; lĕ rngôch mpa nây jêng mpa mâu kloh ma khân may.

²⁹ Tâm lĕ mpô mpa vơr bêng ler ta klơ neh, aơ jêng lĕ ntil mpa mâu kloh ma khân may: sŭk, đe, jêh ri ăp ntil nglonh toyh;

³⁰ tŭk ke, rya, bŭl ka, rtum jêh ri nkuay păr.

³¹ Tâm lĕ rngôch mpa vơr, nây jêng lĕ mpa mâu kloh ma khân may; mbu nơm pah ta săk jăn khĭt khân păng mra jêng ƀơ̆ ƀơch tât kêng măng.

³² Dôl du mpa tâm phung mpa nây khĭt, săk jăn khĭt păng tŭp ta ăp ntil moh ndơ, ndơ nây mra jêng ƀơ̆ ƀơch, nđâp lah nĕ jêng ndơ dŏng ƀư ma si, ma bok, ma ntâu, dŭng, mâu lah geh ta ăp ndơ ƀaƀă; ăn bu trăm lĕ ndơ nây tâm dak, jêh ri lĕ ndơ nây mra jêng ƀơ̆ ƀơch tât kêng măng rĭ mơ khân păng jêng kloh.

³³ Tơlah săk jăn nây tŭp tâm yăng, lĕ ndơ gŭ tâm nây mra jêng ƀơ̆ ƀơch, ăn khân may mbang nchah lơi yăng nây.

³⁴ Lah dak tă bơh yăng nây geh nkhŭt ta klơ ndơ sông sa, ndơ sông sa mra ƀơ̆ ƀơch, dak nhêt ăn tâm yăng nây jêng ƀơ̆ ƀơch da dê.

³⁵ Ăp ntil moh ndơ, nđâp lah geh du kô̆ săk jăn mpa nây khĭt tŭp ta păng ăt mra jêng ƀơ̆ ƀơch da dê, nđâp lah jêng năk mâu lah lŭ năk, ăn bu mbang chah lơi; lĕ ndơ nây jêng hŏ ƀơ̆ ƀơch jêh ri ăn khân may kơp khân păng jêng ƀơ̆ ƀơch.

³⁶ Ƀiălah, du tu dak mâu lah du ntu prăp dak, bu ăt kơp dak nây jêng kloh tơlah geh săk jăn lĕ rngôch mpa nây; ƀiălah mbu nơm pah săk jăn khĭt khân păng mra jêng ƀơ̆ ƀơch.

³⁷ Tơlah du săk jăn khĭt tŭp ta klơ găr ntil dăch hăn srih, găr ntil nây ăt hôm geh nau kloh.

³⁸ Ƀiălah tơlah bu hŏ tŏ jêh găr ntil ma dak jêh ri săk jăn khĭt tŭp ta găr ntil nây, ăn khân may uănh găr ntil nây jêng ƀơ̆ ƀơch.

³⁹ Tơlah du mlâm mpa khân may dơi vay sa puăch, ƀiălah păng khĭt, jêh ri mbu nơm pah săk jăn khĭt păng mra jêng ƀơ̆ ƀơch tât kêng măng.

⁴⁰ Mbu nơm mra sa puăch săk jăn khĭt nây, ăn păng pih kho ao păng nơm jêh ri jêng ƀơ̆ ƀơch tât kêng măng; mbu nơm hôm tung săk khĭt nây ăt păng pih đŏng kho ao păng jêh ri jêng ƀơ̆ ƀơch tât kêng măng.

⁴¹ Lĕ rngôch ndrŭng vơr ta neh jêng geh nau ƀơ̆ ƀơch da dê, bu mâu dơi sa mpa nây ôh.

⁴² Lĕ ntil mpô mpa vơr ma ndŭl, hăn ma puăn jâng mâu lah geh âk jâng, lah nsum ma lĕ rngôch mpa vơr bêng ler ta klơ neh, khân may mâu dơi sa ôh, yorlah lĕ mpa nây jêng mpa geh nau ƀơ̆ ƀơch.

⁴³ Lơi ta khân may ƀư ƀơ̆ ƀơch ma khân may nơm yorlah bơh lĕ mpô mpa nây, lơi dĭng yorlah lĕ mpa nây khân may jêng ƀơ̆ ƀơch.

⁴⁴ Yorlah Gâp jêng Yêhôva Brah Ndu khân may; pôri prăp hom khân may nơm ăn kloh ueh jêh ri kloh ueh hom, yorlah Gâp nơm jêng kloh ueh. Lơi yor ăp ntil ndrŭng vơr ta klơ neh ƀư ma khân may nơm geh nau ƀơ̆ ƀơch.

⁴⁵ Yorlah Gâp jêng Yêhôva, Nơm hŏ djôt jêh khân may luh bơh n'gor Êjipt, gay jêng Brah Ndu khân may; pôri khân may ăn kloh ueh hom, yorlah Gâp nơm jêng kloh ueh.

⁴⁶ Nây jêng nau vay di ăn ma mpô mpa rong, ma sĭm klơ trôk, ma lĕ rngôch mpa rêh mpât n'gơ nsong tâm dak jêh ri lĕ rngôch ndrŭng vơr ta klơ neh,

⁴⁷ gay tâm nkhah mpa mâu kloh đah mpa geh nau kloh, lĕ rngôch mpa bu dơi sa đah lĕ rngôch mpa bu mâu dơi sa ôh.’”