Kan Lêvi 10 - Nau Brah Ndu Ngơi 2023

Nau khĭt Y-Nadap jêh ri Y-Abihu

¹ Bar hê kon bu klâu Y-Arôn jêng Y-Nadap jêh ri Y-Abihu, ăp nơm khân păng djôt khăl gŭch ƀâu kah, dơm ŭnh rnga tâm păng jêh nây dơm ndơ ƀâu kah ta klơ jêh ri nhhơr du ntil ŭnh êng tanăp Brah Yêhôva, jêng nau Brah Yêhôva mâu mâp ntăm ôh ma khân păng.

² Du chiông ŭnh luh tă bơh tanăp Brah Yêhôva su bar hê nây; khân păng khĭt tanăp Brah Yêhôva.

³ Jêh nây Y-Môis lah ma Y-Arôn: “Aơ jêng nau Brah Yêhôva hŏ ntăm jêh: ‘Ta nklang phung văch dăch Gâp Gâp mra mpơl nau kloh ueh Gâp; Jêh ri tanăp lĕ rngôch bunuyh ƀon lan Gâp mra dơi tâm rnê.’” Y-Arôn gŭ rklăk.

⁴ Y-Môis kuăl Y-Misaêl jêh ri Y-Êlsaphan, bar hê kon bu klâu Y-Usiêl jêng kônh Y-Arôn, jêh ri lah ma khân păng: “Hăn tung hom săk jăn bar hê mon luh tă bơh ntŭk kloh ueh jêh ri leo padih ngih bok.”

⁵ Khân păng hăn dăch, dŏng ao jâr khân păng hôm e nsoh, mphâk săk jăn khân păng luh padih ngih bok, nâm bu nau Y-Môis hŏ lah jêh ma khân păng.

⁶ Jêh nây, Y-Môis lah ma Y-Arôn jêh ri ma bar hê kon bu klâu Y-Arôn jêng Y-Êlêasar jêh ri Y-Ithamar: “Lơi ƀư sŏk achưp, mâu lĕ dơi nkhêk ao khân may, gay ma nâu jêh ri phung mon mâu khĭt, jêh ri gay ma Brah Yêhôva mâu ji nuih đah lĕ rngôch phung tâm rƀŭn. Ƀiălah phung oh nâu jêh ri lĕ ngih Israel klăp lah dơi nhĭm nhhiăng ma phung hŏ khĭt yor Brah Yêhôva su ma ŭnh.

⁷ Lơi hăn luh bơh mpông Ngih Bok Nau Tâm Rƀŭn tâm nôk aơ, gay ma khân may mâu khĭt, yorlah Brah Yêhôva hŏ tŏ dak ngi jêh ma khân may.” Khân păng ƀư tĭng nâm nau Y-Môis ngơi.

Nau vay ăn ma phung kôranh ƀư brah

⁸ Brah Yêhôva ngơi ma Y-Arôn:

⁹ “May jêh ri ăp kon bu klâu may mâu dơi nhêt ndrănh krăk ƀâu mâu lah ndơ nhêt geh ndrui, nôk lăp tâm Ngih Bok Nau Tâm Rƀŭn, klach lah phung kon mra khĭt. Nĕ jêng du nau vay dăp n'ho ro ma lĕ rngôch rnôk ăp rô̆.

¹⁰ Ăn khân may gĭt tâm nkhah nau kloh ueh jêh ri ndơ neh ntu, nau ƀơ̆ ƀơch jêh ri nau kloh,

¹¹ jêh ri nti hom ma phung ƀon lan Israel lĕ rngôch nau vay Brah Yêhôva dăp hŏ ntĭm nti jêh bơh Y-Môis.”

¹² Y-Môis lah ma Y-Arôn jêh ri ma bar hê kon bu klâu păng hôm e jêng Y-Êlêasar jêh ri Y-Ithamar: “Sŏk hom kô̆ ndơ ƀư brah rnih môi hôm e lah jêh ăn ŭnh sa nhhơr ma Brah Yêhôva ƀư jêng ƀănh mâu geh ndrui jêh ri sa păng ta meng nơng ƀư brah, yorlah nĕ jêng ndơ dŭt kloh ueh.

¹³ Sa hom ndơ ƀư brah nây ta du ntŭk kloh ueh yorlah nĕ jêng kô̆ prăp ma may jêh ri phung kon bu klâu may, sŏk bơh lĕ ndơ nhhơr ăn ŭnh sa nhhơr ma Brah Yêhôva. Nĕ jêng nau Brah Yêhôva hŏ ntăm jêh ma gâp.

¹⁴ Bi ma nting rpaih nse hŏ nhhơr jêh ma Brah Yêhôva nâm du ndơ nhhơr êng jêh ri nglik hŏ nhhơr jêh ma Brah Ndu, may ndrel ma phung kon bu ur kon bu klâu may mra sa tâm du ntŭk kloh. Lĕ ndơ nây bu hŏ ăn jêh ma may jêh ri ma phung kon bu klâu may, sŏk jêh bơh ndơ ƀư brah đăp mpăn bơh phung ƀon lan Israel.

¹⁵ Khân păng mra djôt nglik hŏ nhhơr jêh ri nting rpaih nse lĕ ƀư jêh nau vay ƀư ndơ̆ đah aơ ndơ̆ đah ri, ndrel ma lĕ kô̆ ngi bơh ndơ ƀư brah gŭch ăn ŭnh sa, nhhơr tĭng nâm nau vay ƀư ndơ̆ đah aơ ndơ̆ đah ri tanăp Brah Yêhôva. Nĕ jêng ndơ prăp ma nâu jêh ri phung kon nâu, tĭng nâm nau veh jêh jêng nau Brah Yêhôva hŏ ntăm jêh.”

¹⁶ Dôl Y-Môis ôp ma Y-Êlêasar jêh ri Y-Ithamar, hŏ be nkuăng dŏng ƀư ndơ ƀư brah chuai nau tih, jêh ri saơ bu hŏ gŭch jêh păng. Pôri Y-Môis ji nuih ma Y-Êlêasar jêh ri Y-Ithamar jêng bar hê kon bu klâu Y-Arôn hôm e, jêh ri lah:

¹⁷ “Mâm ƀư khân may mâu sa puăch mpa ƀư brah chuai nau tih tâm du ntŭk kloh ueh? Nĕ jêng du kô̆ dŭt kloh ueh, ndơ Brah Yêhôva hŏ ăn jêh ma khân may gay ma khân may dơi tuy nau tih tâm lĕ phung tâm rƀŭn jêh ri ƀư ndơ ƀư brah chuai nau tih ma khân păng tanăp Brah Yêhôva.

¹⁸ Yorlah mham mpa ƀư brah nây mâu dơi njŭn tâm ntŭk kloh ueh ôh, yor ri ăn khân may sa mpa ƀư brah tâm du ntŭk kloh ueh tĭng nâm nau gâp ntăm jêh.”

¹⁹ Y-Arôn lah ma Y-Môis: “Nar aơ bar hê mon may hŏ nhhơr jêh ndơ ƀư brah chuai nau tih jêh ri ndơ ƀư brah gŭch tanăp Brah Yêhôva. Ƀiălah lĕ nau mâu ueh kơt nĕ hŏ tât jêh ma gâp, jêh ri nar aơ gâp hôm sa mpa ƀư brah chuai nau tih, yŏng ma Brah Yêhôva maak nuih n'hâm?”

²⁰ Tăng lĕ nau ngơi nây, Y-Môis dơn.