Kan Lêvi 1 - Nau Brah Ndu Ngơi 2023

Ndơ ƀư brah gŭch

¹ Brah Yêhôva tă bơh tâm Ngih Bok Nau Tâm Rƀŭn kuăl Y-Môis jêh ri ngơi:

² “May ngơi hom ma phung ƀon lan Israel pô aơ: ‘Dôl geh du huê tâm phung kon ŭch nhhơr mpa ƀư brah ma Brah Yêhôva, ăn khân may nhhơr ndrôk, biăp mâu lah be tă bơh mpô mpa rong khân may.

³ Tơlah ndơ nhhơr bơh bunuyh nây jêng ndơ ƀư brah gŭch ma ndrôk, ăn păng săch du mlâm ndrôk nkuăng mâu geh têl khap ôh. Ăn bunuyh nây nhhơr ndơ nây ta mpông Ngih Bok Nau Tâm Rƀŭn tanăp Brah Yêhôva, gay ma Păng maak dơn.

⁴ Bunuyh nhhơr ndơ nhhơr mra dơm ti păng ta klơ bôk mpa ƀư ndơ ƀư brah gŭch jêh ri mpa nây mra dơi dơn nâm bu du mpa ƀư brah gay chuai nau tih ntang an ma bunuyh nây.

⁵ Ndrôk nkuăng mra nkhĭt tanăp Brah Yêhôva, jêh nây phung kon sau Y-Arôn jêng phung kôranh ƀư brah sŏk mham păng nhhơr jêh ri djrah mham nây jŭm nơng ƀư brah ta mpông Ngih Bok Nau Tâm Rƀŭn.

⁶ Bunuyh nây mra n'huk ntâu mpa nĕ ƀư ndơ ƀư brah gŭch jêh ri koh puăch nây tĭng rngơl.

⁷ Phung kôranh ƀư brah jêng phung kon sau Y-Arôn mra dơm ŭnh ta klơ nơng ƀư brah jêh ri bun long ta klơ ŭnh.

⁸ Jêh nây phung kôranh ƀư brah dơm lĕ mlay puăch, bôk jêh ri ngi ta klơ long hit ŭnh ta klơ nơng ƀư brah.

⁹ Nơm nhhơr ndơ nây mra rao proch khŭng jêh ri jâng păng ma dak, jêh ri kôranh ƀư brah mra gŭch lĕ ndơ nây ta klơ nơng ƀư brah. Nĕ jêng ndơ ƀư brah gŭch, jêng du mpa ƀư brah ăn ŭnh sa gay nhhơr, geh n'hôl ƀâu kah ƀư maak nuih n'hâm ma Brah Yêhôva.

¹⁰ Tơlah ndơ bunuyh nây nhhơr jêng ndơ ƀư brah gŭch ma mpô mpa rong jê̆, mâu lah biăp mâu lah be, ăn păng nhhơr du mlâm mpô mpa nkuăng mâu geh têl khap ôh.

¹¹ Nơm nhhơr ndơ nây, nkhĭt hom mpa nây ta mpeh pa lơ nơng ƀư brah, tra năp Brah Yêhôva, jêh nây phung kon sau Y-Arôn jêng phung kôranh ƀư brah mra nsrih mham jŭm nơng ƀư brah.

¹² Ăn nơm nĕ koh puăch tĭng rngơl, nđâp ma bôk jêh ri ngi. Kôranh ƀư brah dơm lĕ rngôch ndơ nây ta klơ long ŭnh hit ta nơng ƀư brah.

¹³ Ăn nơm nây ăt sŏk dak rao proch khŭng jêh ri jâng, jêh nây kôranh ƀư brah djôt lĕ rngôch ndơ nây gŭch ta klơ nơng ƀư brah. Nĕ jêng ndơ ƀư brah gŭch, jêng mpa ƀư brah ăn ŭnh sa, jêng du mpa ƀư brah ăn ŭnh sa gay nhhơr, geh n'hôl ƀâu kah ƀư maak nuih n'hâm ma Brah Yêhôva.

¹⁴ Tơlah ndơ nơm nây nhhơr ma Brah Yêhôva jêng du ndơ ƀư brah gŭch ma sĭm, ăn păng nhhơr sĭm ntơp mâu lah sĭm plŭk kon.

¹⁵ Kôranh ƀư brah mra djôt păng ta nơng ƀư brah, juet tăch bôk păng jêh ri gŭch păng ta nơng ƀư brah; bi mham păng mra hoch ta pĭt nơng ƀư brah.

¹⁶ Păng mra sŏk lơi pưm nđâp rsau jêh ri klŭp păng ta pĭt nơng ƀư brah mpeh luh nar, jêng ta ntŭk bu nkhŭt ŭnh buh,

¹⁷ jêh nây bu mra nkhêk bar năr sĭm nây, ƀiălah mâu nkhêk tăch ôh. Kôranh ƀư brah mra gŭch păng ta klơ nơng ƀư brah ta ntŭk ŭnh dôl hit. Nĕ jêng ndơ ƀư brah gŭch, jêng du mpa ƀư brah ăn ŭnh sa gay nhhơr, geh n'hôl ƀâu kah ƀư maak nuih n'hâm ma Brah Yêhôva.’”