I Yôhan 5 - Nau Brah Ndu Ngơi 2023

Dơi đah neh ntu

¹ Mbu nơm chroh ma Brah Yêsu jêng Brah Krist geh nau deh jêh tă bơh Brah Ndu; mbu nơm rŏng ma Nơm deh jêh ma păng, ăt rŏng ma bunuyh deh jêh bơh Nơm nây tâm ban lĕ.

² Tă bơh nau nây, he gĭt năl ma he nơm rŏng ma phung kon Brah Ndu: Nây jêng he rŏng ma Brah Ndu jêh ri ƀư tĭng lĕ nau vay Păng ntăm.

³ He rŏng ma Brah Ndu nâm bu ntĭt he tông prăp lĕ nau vay Păng ntăm; nau vay Păng ntăm mâu jâk jêr ôh.

⁴ Yorlah mbu nơm deh tă bơh Brah Ndu dơi đah neh ntu; nau ƀư ma he dơi đah neh ntu jêng nau he chroh.

⁵ Mbu nơm dơi jêh đah neh ntu, mâu di hĕ jêng nơm chroh ma Brah Yêsu jêng Kon Brah Ndu?

⁶ Brah Yêsu Krist jêng Nơm văch jêh ma dak jêh ri ma mham, mâu di knŏng ma dak ôh, ƀiălah dak nđâp ma mham.

⁷ Brah Huêng Ueh yơh mbơh nkoch, yorlah Brah Huêng Ueh jêng nau ngăn.

⁸ Geh pe ntil nau mbơh: Brah Huêng Ueh, dak jêh ri mham; lĕ pe ntil tâm rnglăp ndrel.

⁹ Tơlah he dơn nau mbơh bơh kon bunuyh, nau Brah Ndu mbơh jêng toyh lơn; yorlah aơ jêng nau ngơi Brah Ndu mbơh nkoch ma Kon Păng.

¹⁰ Mbu nơm chroh ma Kon Brah Ndu geh nau mbơh nĕ tâm păng nơm. Mbu nơm mâu chroh ma Brah Ndu, păng mĭn Brah Ndu ngơi mƀruh, yorlah păng mâu chroh ma nau ngơi Brah Ndu mbơh nkoch jêh ma Kon Păng.

¹¹ Aơ jêng nau mbơh: Brah Ndu ăn jêh nau rêh n'ho ro ma he, jêh ri nau rêh aơ gŭ tâm Kon Păng.

¹² Mbu nơm geh Brah Kon geh nau rêh; mbu nơm mâu geh Kon Brah Ndu mâu geh nau rêh ôh.

¹³ Gâp nchih jêh nau aơ ma khân may, jêng phung chroh jêh ma amoh Kon Brah Ndu, gay ma khân may gĭt khân may nơm geh jêh nau rêh n'ho ro.

Nau mbơh sơm geh nau dơn

¹⁴ Aơ jêng nau nuih n'hâm nâp phung he geh tanăp Brah Ndu: Nây jêng tơlah he mbơh sơm dăn moh ndơ tĭng nâm Păng ŭch, Păng iăt nau he.

¹⁵ Jêh ri tơlah he gĭt Păng iăt moh ndơ he dăn mbơh sơm, he gĭt he nơm hŏ dơn jêh ndơ he dăn.

Mbơh sơm kơl an nơm ƀư tih

¹⁶ Tơlah mbu nơm saơ oh nâu păng nơm ƀư tih, ƀiălah nau tih nây mâu kŏ tât khĭt ôh, vơh vơl hom, jêh ri Brah Ndu mra ăn nau rêh ma bunuyh nây, jêng ma phung ƀư nau tih mâu kŏ tât khĭt. Geh đŏng nau tih njŭn leo tât nau khĭt; gâp mâu đă ma ăn khân may mbơh sơm dăn ma nau tih aơ.

¹⁷ Lĕ rngôch mâu sŏng srăng jêng nau tih da dê, ƀiălah geh đŏng nau tih mâu tât nau khĭt.

Rdŭt tay samƀŭt

¹⁸ He gĭt mbu nơm deh jêh tă bơh Brah Ndu mâu ƀư tih ôh, yorlah Nơm deh jêh bơh Brah Ndu mât mray bunuyh nây, jêh ri brah mhĭk mâu pah bi bunuyh nây ôh.

¹⁹ He gĭt he nơm jêng phung Brah Ndu, bi lĕ neh ntu gŭ tâm dâng nau dơi brah mhĭk da dê.

²⁰ He gĭt lĕ ma Kon Brah Ndu văch jêh, jêh ri ăn nau gĭt rbăng ma he gay ma he gĭt năl Păng jêng Nơm nanê̆ ngăn; he gŭ tâm Nơm nanê̆ ngăn, jêng gŭ tâm Kon Păng jêng Brah Yêsu Krist. Păng yơh jêng Brah Ndu nanê̆ ngăn jêh ri jêng nau rêh n'ho ro.

²¹ Hơi phung kon jê̆, njrăng hom bơh rup brah!